Makətūbə̄ ń Pol ndang adə̄ Epejə gə̄ ní 5
5
Ī-ndiī kum loo kə́ unjə̄ kow tə́
1I beé ní ī-ndájī Nə́ɓā kə́ ngáń kó tár yān gə̄ tə́. 2Ī-táriī naā tītə̄ ń *Kərist tárəńjí ba adə̄ń Nə́ɓā rɔ̄n tām̄ yājí tə́ tītə̄ *yá̰a̰ ndējə̄ ō, *yá̰a̰ tun̄ ō, kə́ sēēn nel̄ Nə́ɓā beé ní.
3Sḭḭ̄ i dan de gə̄ yā Nə́ɓā tə́, adə̄ majə kadə̄ sāā naā loo kaya tə́, aláa gíŕ yá̰á̰ kə́ yḛr kə́ tayā tayā gə̄, aláa kum sə̄ngā yá̰á̰ ní, i kə́ yā kəda rī dɔ dansí tə́ alé. 4Ɔ̄rī najə̄ kə́ to rɔ̄sɔl̄ gə̄ aĺ ō, kə́ to ngonjə̄ gə̄ aĺ ō, ī-tāmī mbóo aĺ ō. Najə̄ gə̄ ń noō i najə̄ kə́ majə gə̄ alé. Majə kadə̄ ī-ndadī i Nə́ɓā tá. 5Ōōī majə. De gə̄ kə́ sāān̄ naā loo kaya tə́ ō, kə́ rāān̄ yá̰á̰ kə́ to yḛr kum gə̄ ō, ngé suu gə̄, tɔdɔ̄ suu i rāā ɓesə̄ ō ní, asən̄ kənge loo kem Ɓē ko̰o̰ yā *Kərist tə́ ō yā Nə́ɓā tə́ ō alé.
6Ādī deē kógə̄ḿ gól̄sí kə mbóo najá alé. Ī-tām̄ yá̰á̰ kə́ tītə̄ ń noō gə̄ tə́ n wōn̄g yā Nə́ɓā a reēń dɔ ngé gə̄ ń mbātə́n̄ koō najə̄ tan tə́ ní. 7Ī-rāāī yá̰a̰ naā tə́ sedə́ alé. 8Jóó ní sḭḭ̄ i kum til tə́, ba ngɔlaā sḭḭ̄ i kum loo kə́ unjə̄ kow tə́, sɔɔ̄ń ɓoo kə́ ī-ɓooī naā kə Kɔ́ɔ̄ɓēé. I beé ní, ī-rāāī yá̰a̰ tītə̄ ngáń kə́ kum loo kə́ unjə̄ kow tə́ gə̄. 9Tām̄ loo kə́ unjə̄ kow a ojə i gíŕ yá̰a̰ gə̄ malang kə́ rāā kə kem majaá ō, yá̰á̰ kə́ gōtə́ ō, yá̰á̰ kə́ rɔ̄kum ō. 10Yá̰á̰ ń nel̄ Kɔ́ɔ̄ɓē ní, majə kadə̄ á̰a̰ ī-gerī. 11Kəla kə́ rāā tilií gə̄ ń i kəla kə́ teē yá̰a̰ aĺ gə̄ ní, i-lōōī rāā sedə́, banī ī-teēī kə gíŕdə́ ndágá. 12Yá̰a̰ gə̄ ń nin̄-rāān̄ loo mundə̄ tə́ ní, rɔ̄ deē sɔlə̄n loo kəda tə́. 13Yá̰a̰ malang ń deē teē kə gírneé ndágá ní, i kə́ teēn̄ kum loo kə́ unjə̄ kow tə́, 14tɔdɔ̄ yá̰a̰ malang ń deē teē kə gírneé ndágá ní a tél i loo kə́ unjə̄ kow. I tām̄ ń toō tə́ n ədan̄ na:
Ḭ̄ ń ī-ɓīī ní, ī-ndól̄,
ḭ́ḭ dɔɔ́ dan de kə́ koy gə̄ tə́, anī *Kərist a unjə̄ kow dɔí tə́.
15I beé ní, ə̄ndāī ma̰ȳ háĺsí majə. Ī-lōōī rāā yá̰a̰ tītə̄ de kə́ ger̄ yá̰a̰ aĺ gə̄, banī ī-rāāī yá̰a̰ tītə̄ de kə́ ngáā gə̄. 16Dan ń ə́ngeī kum mbang anī, úniī ī-rāāiń yá̰á̰ kə́ majə, tɔdɔ̄ ndɔ̄ gə̄ ń jə-ndiī kemeé ngɔlaā ní majən̄ alé. 17I beé ní, ī-lōōī rāā yá̰a̰ tītə̄ yā de kə́ kur̄ dɔdə́ gətóo gə̄, banī majə kadə̄ ī-gerī kum yá̰á̰ ń Kɔ́ɔ̄ɓē gḛy ní.
18Ī-lōōī kadə̄ kasə rāāsí, tām̄ nge ń noō i ta róbə rāā yá̰á̰ kə́ gō tə́ aĺ gə̄. Ba ādī *Ndíĺ kə́ Táĺ rosə kemsí. 19Ɔ̄rī najə̄ kə naá kə pā gə̄ kə́ yā ndɔ̄yń Nə́ɓā ō, kə́ yā tɔ̄ȳnəń ō, kə pā gə̄ ń Ndíĺ adə̄sí ní ō. Ə̄nīī pā gə̄ ɔ́siīneé gɔn Kɔ́ɔ̄ɓē kə ngarān̄g kemsí malang. 20Ī-ndadī Bɔbə̄jí Nə́ɓā ngándáńg tām̄ yā yá̰a̰ gə̄ tə́ malang kə rī Kɔ́ɔ̄ɓē yājí Jeju *Kərist.
Najə̄ kə́ dɔ dəyá̰ gə̄ tə́ ō dɔ dəngam gə̄ tə́ ō
21Ōōī ta naā sɔɔ̄ń ɓōĺ ń ī-ɓōlíī Ndíĺ *Kərist ní.
22Ādə̄ dəyá̰ gə̄ rāān̄ tītə̄ ń noō kə ngaadə́ gēé ō, tītə̄ ń a rāān̄neé kə Kɔ́ɔ̄ɓēé ní. 23Tɔdɔ̄ dəngam i dɔ dəyá̰, tītə̄ ń Kərist i dɔ Egəlijə ní. Ni i nge kajə ngé kán̄ naā gə̄ ń rāān̄ rɔ̄də́ i dā̰ rɔ̄n tə́ ní. 24Ba dan ń ngé taā kem *Kərist gə̄ oōn̄ ta Kərist ní, majə kadə̄ dəyá̰ gə̄ rāān̄ tītə̄ ń noō tū yá̰a̰ gə̄ tə́ malang ō kə ngaadə́ gēé.
25Sḭḭ̄ dəngam gə̄, ī-táriī nə̄yá̰sí gə̄ tītə̄ ń *Kərist tárəń ngé taā kemən gə̄ adə̄ ni-adə̄ rɔ̄n tām̄ yādə́ tə́ ní. 26I tītə̄ ń noō n ni-ɔrə̄ń kam̄ ngé kán̄ naā gə̄ kə ta kūl̄ tə́gódə́ kə maná kadə̄ unjə̄n̄ ní, adə̄ i kə ta kūl̄ najá. 27Ni-gḛy kadə̄ ta kumən tə́ ɓáa ngé kán̄ naā gə̄ ngeé ń toō ton̄ tītə̄ dəyá̰ kə́ ndə́lē pipir ō, kə́ yə̄ró ɔdən aĺ ō, kə́ rɔ̄n sá̰ā̰ kīdə́ aĺ ō, kə́ dām̄ rɔ̄n sḛ́ý kə́ nujə gətóo ō. Ni-gḛy kadə̄ ngé kán̄ naā yān gə̄ ní i de kə́ *táĺ gə̄, kə́ najə̄ kə́ yā kəda dɔdə́ tə́ gətóo. 28Ī tītə̄ ń toō n majə kadə̄ dəngam gə̄ tárən̄ nə̄yá̰də́ gə̄ ní. De kə́ tár nə̄yá̰n tár i dā̰ rɔ̄n nəkɔ́. 29De kə́ im̄ rɔ̄n gətóo, banī deē a a̰a̰ i gō rɔ̄n kə yá̰a̰ kəsaá ō, a ngɔ̄m̄ i rɔ̄n ō. I yá̰á̰ ń toō n *Kərist rāā kə ngé kán̄ naā gēé ní, 30tɔdɔ̄ jḭḭ̄ i ngán rɔ̄n gə̄.
31I tām̄ ń toō tə́ n dəngam a əya̰ bɔbə̄n ō kó̰o̰n ō
ba a əhɔ gō nə̄yá̰n, yā kadə̄ nin̄ jōó télən̄ i de kə́ kógə̄ḿ beé ní#5.31 K. 31: Á̰a̰ī Tkg 2.24.
32Nge ń noō i yá̰á̰ kə́ bo kə́ to loo mundə̄ tə́ kə́ j-asiī ger̄ kum kə deē dɔjí alé. M-ə́dásí na yá̰á̰ ń toō i yá̰á̰ kə́ sɔɔ̄ dɔ *Kərist kə ngé kán̄ naā gēé. 33Ba yā kɔr̄ń najə̄ kə̄ kété ngá̰ý aĺ ní, sḭḭ̄ tā a yāsí i kadə̄ sḭḭ̄ kógə̄ḿ kógə̄ḿ ī-táriī nə̄yá̰sí gə̄ tītə̄ rɔ̄sí sḭḭ̄ kɔ́ gə̄ ō, kadə̄ dəyá̰ ɓōĺ ndíl ngaan ō.
Currently Selected:
Makətūbə̄ ń Pol ndang adə̄ Epejə gə̄ ní 5: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad