Makətūbə̄ yā Kohelet 2
2
1M-ə́da kə̄ kemḿ mə̄kɔ́ tə́ na: M-ā m̄-nāā rāā rɔ̄nel̄ ō, ndi majə ō yā ka̰ā̰, anī nge ń noō i yá̰á̰ kə́ kanjə̄ kumən ō.
2M-ə́da na: Kəgō i mbóo! Yā rɔ̄nel̄ ɓáa m-ə́da na ké rɔ̄nel̄ a rāā i rí wa.
3m̄-gḛy nāā rāā rɔ̄nel̄ ń kasə *nduú a adə̄ deē ní ō, m̄-gḛy ndájə̄ yá̰a̰ rāā de kə́ mbóo gə̄ ō, kanjə̄ kəya̰ rɔ̄ḿ kadə̄ yá̰á̰ kə́rēý o̰o̰ ɓē dɔ tə́. m̄-sāā ger̄ kum yá̰á̰ kə́ to só tə́ ń kadə̄ deē ndul gə̄ rāān̄ dan ń ndin̄neé kə kumdə́ dɔ nang tə́ ní. 4M-ə́lá gír rāā kəla kə́ bo gə̄. m̄-rāā kújə yāḿ gə̄ ō, m-ə́hɔ *kāgə̄ nduú gə̄ ō. 5m̄-rāā ngán ndɔr̄ tá̰a̰ gə̄ ō kāgə̄ gə̄ ō, tām̄ yāḿ tə́. M-ə́hɔ kāgə̄ kə́ tayā tayā gə̄ kə́ a anə̄n̄ ō tū tə́. 6m̄-ndēr̄ bəlo kə́ kadə̄ man̄ ra kemeé gə̄ tām̄ yāḿ tə́ yā rāań man̄ gíŕ ngán kāgə̄ kə́ ngá̰ý gə̄ tə́. 7m̄-mang ɓəlo kə́ dəngam gə̄ ō kə́ dəyá̰ gə̄ ō. M-āw̄ kə de kə́ ngé rāā kəla gə̄ kem ndogə̄ yāḿ tə́ ō. Yá̰a̰ kul̄ yāḿ kə́ bo gə̄ ō kə́ dūú gə̄ ō ní, i ngá̰ý tɔȳ yā de gə̄ malang ń ndin̄ Jerusalem kété noḿ tə́ ní. 8m̄-kán̄ gində̄ arjā̰a̰ ō lɔ́r ō ń i yá̰a̰ kənge yā mban̄g gə̄ ō, yā ɓē gə̄ ō ń əlan̄ dɔdə́ gír tɔ́gə yāḿ tə́ ní kə̄ dɔ naā tə́ tām̄ yāḿ tə́. Yá̰á̰ ń nel̄ ta ngán Adam gə̄ ngá̰ý á i dəyá̰ gə̄ ní m-ɔ́ýdə́ ngá̰ý tām̄ yāḿ tə́ ō. 9m̄-tél de kə́ bo, m-ə́nge yá̰a̰ tɔȳ de gə̄ malang ń ndin̄ Jerusalem kété noḿ tə́ ní. Ba kum kedə̄ yāḿ rāā seḿ. 10Yá̰a̰ malang ń kumḿ gḛy ka̰ā̰ ní m-ɔ̄gən ka̰ā̰ alé. M-ɔ̄gə̄ rɔ̄ḿ yá̰á̰ kə́ nelə̄n alé, tɔdɔ̄ kəla malang ń m̄-rāā ní kemḿ nelə̄m̄ loon tə́: Nge ń noō i rɔ̄nel̄ ń kəla rāāḿ teēń ní n m-ə́ngé núsən yāḿ noō. 11Banī m̄-tél m̄-tūr̄ rɔ̄ḿ kə̄ rɔ̄ kəla gə̄ malang ń m̄-rāādə́ kə jīḿ ní tə́ ō, kə̄ rɔ̄ kəla ń rāān tōr̄ rɔ̄ḿ ngá̰ý ní tə́ ō. M-á̰a̰ kadə̄ yá̰a̰ gə̄ ń noō malang i yá̰á̰ kə́ kanjə̄ kumən tītə̄ loo ngɔ̄də́ gō nél yā kəhɔn beé. Deē a ənge yá̰á̰ kógə̄ḿ gírí dɔ nang tə́ laā alé.
12m̄-sāā ger̄ kum yá̰á̰ ń i kum kedə̄, aké i ka̰ȳ kɔ̄r̄, aké i mbóó ní. Adə̄ m̄-dəje rɔ̄ḿ najə̄ ń toō: Deē ń a ndi mban̄g gotəḿ tə́ ní, a rāā yá̰a̰ tītə̄ yā madə̄n kə́ kété non tə́ gə̄ a? 13Yá̰á̰ ń m-á̰a̰ā̰ ní n toó: Kum kedə̄ rāā majə kə deē tɔȳ mbóo, tītə̄ ń loo kə́ unjə̄ kow rāań majə kə deé tɔȳ til ni . 14Tɔdɔ̄ kum de kə́ nge kum kedə̄ a̰a̰ loo ń ni a aw̄ kə̄ tū tə́ ní, ba de kə́ mbóo a njə̄rā i kum til tə́. Banī mā m̄-ger̄ kadə̄ i yá̰á̰ kə́ kógə̄ḿ beē n a rāādə́ jōó mbak ní.
15Tā anī m-ə́da kə̄ kemḿ tə́ na: Yá̰á̰ ń rāā de kə́ mbóó ní a rāām̄ mā ō, ní m̄-sāā kadə̄ kumḿ mā kə edə̄ ngá̰ý i najə̄ rí tə́? I yá̰á̰ kə́ kanjə̄ kumən ō. 16Yá̰a̰ malang ń rāā yá̰á̰ ní dɔ deē ndígə̄nal kɔ̄ɔ́ kem ndɔ̄ gə̄ ń utə̄n̄ gō tə́ ní. De kə́ nge kum kedə̄ oy tītə̄ ń de kə́ mbóo oyń ní ō, i nin̄ mbak n əga kem de gə̄ dɔdə́ tə́ to̰ aĺ ní ō. Yá̰a̰ to tītə̄ ń noō i najə̄ rí tə́ ō? 17I beé ní ndi kə kumuú i yá̰á̰ kə́ nelə̄m̄ aĺ ngá̰ý, tɔdɔ̄ kəla ń de gə̄ rāān̄ dɔ nang tə́ ní i yá̰á̰ kə́ majaĺ ta kumḿ tə́: Yá̰a̰ malang i yá̰á̰ kə́ kanjə̄ kumən ō, i ngɔ̄də̄ gō nél yā kəhɔn ō.
18Kəla malang ń m̄-rāā kum mbang tə́ ō, m-ā m-ə́ya̰ kɔ̄ɔ́ yā kadə̄ deē ń a un gotəḿ ō ní, nelə̄m̄ aĺ ngá̰ý. 19Deē ní kumən a edə̄ a deē ger̄ aĺ ō, i de kə́ a mbóo a deē ger̄ aĺ ō. Ni a téĺ kɔ́ɔ̄ kəla malang ń m̄-rāā kə kum kedə̄ yāḿ kum mbang tə́ ní: Nge ń noō i yá̰á̰ kə́ kanjə̄ kumən ō. 20m̄-tél m̄-sarya kɔ̄ɔ́ gō kəla gə̄ malang ń m̄-rāādə́ kum mbang tə́ ní tə́. 21Tɔdɔ̄ á̰a̰ā̰, kadə̄ deē rāā kəla yān kə kum kedēé ō, kə ger̄ yá̰á̰ ō, kəla ní teē majə ō, ɓáa i de kə́ rang kə́ rāā kəla ní aĺ n nge rāā kəla ní a adə̄n kan̄ kəla yān ní ní, nge ń noō i yá̰á̰ kə́ kumən gətóo ō, i majaĺ kə́ bo ngá̰ý ō. 22Beé ní kəla malang ń kem deē i dɔ tə́ ngá̰ý á a̰a̰ tápə̄ loo rāān tə́ kum mbang tə́ ní a ənge rí i gírí? 23Tɔdɔ̄ ndɔ̄n gə̄ malang i rɔ̄ tōr̄ ō, kəla rāān i wur kɔl ō. Ndɔ̄ɔ́ gə̄gē ngarā̰ kemən ɔr̄ koō alé. Nge ń noō i yá̰á̰ kə́ kanjə̄ kumən ō.
24Yá̰á̰ kə́ majə tām̄ yā deē tə́ gətóo, ngá̰ý anī i kəsa yá̰a̰ ō ka̰ȳ ō, i kadə̄ kem deē nelə̄n loo rāā kəla yān tə́ ō ngóy. Mā m-á̰a̰ kadə̄ nge ń noō i Nə́ɓā n i nge kadə̄ deē kə jīneé ō. 25Tɔdɔ̄ ni-əda na: I náā n asə kəsa yá̰a̰ ō sōl̄ ō kanjə̄ kadə̄ mā m̄-ger̄ gō ní? 26A̰á̰ā̰, deē ń nelə̄n seneé ní ni-adə̄n kum kedə̄ ō yá̰a̰ ger̄ ō, rɔ̄nel̄ ō. Banī ni-adə̄ nge rāā majaĺ kəla k ɔsə nja yá̰a̰ kə̄ naā tə́ ō, kán̄ yá̰a̰ kə̄ dɔ naā tə́ ō, yā kadə̄ deē ń nel̄ Nə́ɓā seneé ní. Nge ń noō i yá̰á̰ kə́ kanjə̄ kumən ō, i ngɔ̄də̄ gō nél yā kəhɔn ō.
Currently Selected:
Makətūbə̄ yā Kohelet 2: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad