Makətūbə̄ ń Pol ndang adə̄ Kolosə gə̄ ní 4
4
1Sḭḭ̄ kɔ́ɔ̄ ɓəlo gə̄, ī-rāāī yá̰á̰ kə́ súmūú ō, yá̰á̰ kə́ gō tə́ ō, kə ɓəlo yāsí gēé. Tɔdɔ̄ ī-gerī kadə̄ Kɔ́ɔ̄sí ndi dɔ rā̰ tə́ noō ō.
Najə̄ kə́ dɔ yá̰a̰ gə̄ kə́ yā rāā tə́
2Ī-na̰yḭḭ̄ kə̄ loo ndɔ̄ȳ tə́, ī-ndiīń já̰já̰ loo ndadə̄ Nə́ɓā tə́. 3Ī-ndɔ̄yī tām̄ yājí tə́ ō, ādə̄ Nə́ɓā teē ta róbə adə̄jí, kadə̄ j-ɔjə najə̄ yān ō, kadə̄ m-ə́dá yá̰á̰ kə́ to loo mundə̄ tə́ kə́ dɔ *Kərist tə́ ń mā i dəngáyá tāmən tə́ ní ō, 4kadə̄ m-ɔ́jə́ yá̰á̰ ń sɔɔ̄ kadə̄ m-ɔ́jə ní kə̄ ndágá.
5Kadə̄ hál njə̄rāsí kə́ dan de kə́ ndágá gə̄ tə́ i kə kum kedēé. Dan ń ə́ngeī loo rāā yá̰á̰ kógə̄ḿ anī, ī-rāāī. 6Ādī najə̄ kɔr̄sí i najə̄ kə́ majə ngándáńg ō, i najə̄ kə́ nel̄ ō, yā kadə̄ ī-gerīneé loo tūr̄ de gə̄ najə̄ kadə̄ sɔɔ̄ dɔdə́ kógə̄ḿ kógə̄ḿ.
Pol rāā lápə́ya kə́ ta tɔ̄l̄ ta tə́
7Tisik ń#4.7 Tisik: Á̰a̰ī Kəla 20.4; Ep 6.21 i ngōkó̰ó̰jí kə́ kó tár yāḿ ní, ni ń i de kə́ bo kə́ nge ra dɔ ndūn tə́ ō, madə̄ kəlaḿ kə́ loo kəla yā Kɔ́ɔ̄ɓē tə́ ō ní, 8m-ə́la seneé kə̄ rɔ̄sí tə́, kadə̄ ɔjəsí yá̰a̰ malang kə́ dɔḿ tə́ ō, sɔl̄ kemsí ō. 9M-ə́ládə́ i nin̄ kə Onejim ń i de kə́ loosí á i ngōkó̰ó̰jí kə́ kó tár yāḿ kə́ nge ra dɔ ndūn tə́ ní. Nin̄ a ɔjən̄sí yá̰a̰ malang ń rāā yá̰a̰ laā ní.
10Aristark ń i dəngáy madə́ḿ ní, rāāsí lápə́ya. Mark kə́ ngōkó̰o̰ Barnabas rāāsí lápə́ya ō. Ni ní tāān̄sí najə̄ kə́ dɔn tə́ adə̄ ōōī ɓá. Ré ni-ugə̄ loosí anī, ə́hɔin̄ kə̄ rɔ̄sí tə́ majə. 11Jeju ń a ɓāŕnən̄ na i Justus ní, rāāsí lápə́ya ō. Dan *Jipə gə̄ tə́ ní, i de gə̄ ń toō ngóy n rāān̄ kəla seḿ tām̄ yā *Ɓē ko̰o̰ yā Nə́ɓā tə́ ní, adə̄ nin̄-sɔlə̄n̄ kemḿ.
12Epapəras ń i de kə́ loosí ní rāāsí lápə́ya. Nge kəla yā *Kərist Jeju ń toō rɔ̄ɔ̄ tām̄ yāsí tə́ kə ndɔ̄yɔ̄ɔ́ yā kadə̄ ī-raī gágájə́ kə́ de kə́ majə ɔtə̄ kə taá gə̄ tə́, kə́ rāān̄ yá̰a̰ gə̄ ń kem Nə́ɓā ndigə ní. 13M-ə́da najə̄ kə́ kum tə́ yān m-ə́da na ni-a̰a̰ tápə̄ ngá̰ý tām̄ yāsí tə́ ō, tām̄ yā de kə́ Laodise tə́ gə̄ ō, Hiyerapolis tə́ gə̄ ō. 14Luk, doktór kə́ kó tár yājí ō, Demas ō, rāān̄sí lápə́ya.
15Ī-rāāī ngákó̰ó̰jí gə̄ kə́ Laodise ō, Nimpas naā tə́ kə ngé kán̄ naā kə́ kem kújə yān tə́ gə̄ ō lápə́ya. 16Loo ń tə́dan̄ makətūbə̄ ń toō dɔ dáńsí tə́ oy anī, ādī tə́dan̄ kem Egəlijə kə́ Laodise tə́ ō, ādə̄ tə́dan̄ makətūbə̄ yā Laodise gə̄ dansí tə́ ō. 17Tá ə́daī Arkipə kadə̄ əndā kumən gír kəla ń Kɔ́ɔ̄ɓē adə̄n tə́ ní, kadə̄ rāā adə̄ majə ɔtə̄ kə taá.
18Lápə́ya ń toō, i mā Pol n m̄-ndang kə jīḿ ní. Ādə̄ əga kemsí dɔ súĺ ń do̰ō̰mə̄n̄neé ní tə́. Ādə̄ Nə́ɓā rāā kem majə sesí.
Currently Selected:
Makətūbə̄ ń Pol ndang adə̄ Kolosə gə̄ ní 4: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad