Makətūbə̄ yā Amos 9
9
Yá̰á̰ kə́ nge ko̰ mí ń Amos a̰ā̰ ní
1M-á̰á̰ Kɔ́ɔ̄ɓē ra kə njan kə́ dɔɔ́ dɔ *loo tun̄ yá̰á̰ tə́. Ni-əda na:
Ī-tə́ndā dɔ kāgə̄ nga dan kə́ ngāl̄ ɓururu gə̄ ādə̄ gír gisədə́ gə̄ yéȳn̄.
Ī-tétə̄də́ ādə̄ tə́sōn̄ dɔ de gə̄ tə́.
Ré ngé kə́rēý gə̄ ndin̄
kə kumdə́ ɓáý anī,
m-ā m̄-tɔ̄l̄də́ kə kaskaraá.
De kə́ yā teē ka̰ȳ a gətóo ō,
de kə́ yā ndi kə kumneé a gətóo ō.
2Ré nin̄ rāān̄ bátə́ ba udən̄
dan de kə́ koy kɔ̄ɔ́ gə̄ tə́ anī,
m-ā m-āw̄ gōdə́ tə́ yā kɔydə́.
Ré nin̄ alə̄n̄ bátə́
aw̄ ugə̄n̄ dɔ rā̰ tə́ anī,
m-ā m-āw̄ gōdə́ tə́ dɔɔ́ yā
rāādə́ kadə̄ risən̄.
3Ré nin̄ aw̄ ɓɔ̄ɔ̄n̄ rɔ̄də́
dɔ mbal̄ Karmel tə́ anī,
m-ā m-āw̄ yā sāādə́ ba kɔydə́.
Ré nin̄ ndigən̄ kadə̄ m-á̰á̰də́ alé,
adə̄ aw̄n̄ gír bā bo tə́ anī,
m-ā m-ə́da lī kə́ kum
bā bo tə́ kadə̄ do̰o̰də́.
4Ré nin̄ aw̄n̄ ɓəloó
ɓē madə̄ ba̰ā̰də́ gēé anī,
m-ā m-ə́da kadə̄ a tɔ̄lə̄n̄də́.
M-ā m-ə̄ndā kumḿ gōdə́ tə́
i tām̄ yā ndi majə yādə́ tə́ alé
banī i yā kadə̄ yá̰á̰
kə́ to kum kaȳ aĺ teē dɔdə́ tə́.
5Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý,
ɔdə dɔ nang kə jīneé
anī dɔ nang ndew.
De kə́ tū tə́ gə̄
malang əhɔn̄ ndoō.
Tītə̄ bā Nil kə́ Ejiptə
kə́ rosə kem kārə̄n
ba rə̄ɓā kə̄ ndágá ní,
nin̄ malang a ḭḭn̄,
ba gō tə́ anī, a əsōn̄.
6Nə́ɓā rāā kem
kújə yān gə̄ dɔ rā̰ tə́,
dɔ rā̰ ń sébə tan dɔ
dɔ nang tə́ tītə̄ kújə beé ní.
Ni ɓāŕ man̄ bā bo,
ba ɓōkə́n dɔ nang tə́.
Rīn na i Kɔ́ɔ̄ɓē.
Rāān̄ sarya kə de gə̄ ń najə̄ i dɔdə́ tə́ ní
7Kɔ́ɔ̄ɓē əda na:
*Israel gə̄, gātə̄sí i ngá̰ý
tām̄ yāḿ tə́ tɔȳ yā de kə́ *Etiopi gə̄ a?
m̄-teē sesí kɔ̄ɔ́ kem ɓē kə́ Ejiptə tə́,
ba m̄-teē kə Pilistin gēé kɔ̄ɔ́ Kapətor ō,
m̄-teē kə Aram gə̄ kɔ̄ɔ́ Kir ō.
Ní, ī-gerī nge ń noō aĺ á?
8Ɓē ko̰o̰ kə́ *Israel tə́ ń najə̄ i dɔ tə́ ní,
Kɔ́ɔ̄ɓē Nə́ɓā əndā
kumən gírí a̰ā̰ majə ngá̰ý.
Ni-əda na: M-ā m̄-rāān kadə̄
ni a gətóo kɔ̄ɔ́ dɔ nang tə́.
Ɓá tā ba m-ā m̄-rāā kadə̄
de kə́ kem kojə yā Jakob tə́ gə̄
gətóon̄ kɔ̄ɔ́ malang alé.
9A̰á̰ā̰, m-ā m-ə́dá yá̰a̰ gə̄
kə́ kadə̄ de gə̄ rāān̄,
dan nápar de gə̄ tə́ malang ní,
m-ā m̄-yéȳ gír de gə̄ ń
i ngán *Israel gə̄ ní,
tītə̄ ń deē a əgań kum yá̰a̰
kə yḛngəreé noō beē,
adə̄ kɔkərɔ kógə̄ḿ a əsō nang tə́ alé.
10De gə̄ malang kə́ dan
gír deē yāḿ gə̄ tə́ a oyn̄ ta rɔ̄ɔ̄ tə́.
Ɓá tā banī nin̄ ədan̄ na:
Yá̰á̰ kə́ to kum kaȳ aĺ a reē alé,
a ɔdə rɔ̄jí alé.
Gō loo kə́ nujə sák sák gidə kógə̄ḿ tə́
11Ɓē yā Dabid to i tītə̄
kújə ngɔm̄ kə́ ra dɔɔ́ aĺ beē.
Ndɔ̄ kógə̄ḿ tə́ anī, mā Kɔ́ɔ̄ɓē
m-ā m-ūtə̄ kumən kə́ mbútə̄ gə̄ kɔ̄ɔ́.
Mbal̄ kə́ tū tə́ gə̄ ń tə́sōn̄ nang tə́ ní,
m-ā m-ɔ́ýdə́ dɔɔ́ gogə́.
M-ā m̄-tél yā rāān
kadə̄ a to tītə̄ kə́ kété.
12Loo ń noō tə́ ngán *Israel gə̄
a télən̄ yā taā dɔ nang kə́ jóo gə̄
yā ɓē ko̰o̰ kə́ Edom ō,
yā nápar de gə̄ ń
ger̄mə̄n̄ kété ní ō.
I mā Kɔ́ɔ̄ɓē n
m-ə́da najə̄ ń noō ní ō,
m-ā m̄-rāā yá̰á̰ ní ō.
13Kɔ́ɔ̄ɓē əda ɓáý to̰ na:
Ndɔ̄ a reē noó kadə̄
kōō i ngá̰ý al̄ naā,
adə̄ kōō gə̄ ní a ton̄ bátə́
ugə̄ń dan yā ndɔr̄ gə̄ tə́.
Kəja kan̄ *kāgə̄ nduú a to
bátə́ ugə̄ń dan yā dubə̄ kōō
gémē gə̄ tə́ tītə̄ ń noō ō.
Loo ń noō tə́ kasə *nduú kə́ kijə
a nūgə́ dɔ ngán mbal̄ gə̄ tə́ ō,
a un dɔ ngán mbal̄ gə̄ ō.
14*Israel gə̄ ń
i gír deē yāḿ gə̄ ní ,
m-ā m̄-rāādə́ kadə̄
a tél a ndin̄ tītə̄ kə́ kété.
Ɓē bo kə́ nujə kɔ̄ɔ́ gə̄ ní,
nin̄ a télən̄ yā rāā gogə́ ō,
a télən̄ yā ndi kem
ɓē bo gə̄ ní tə́ gogə́ ō.
Nin̄ a əhɔn̄ *kāgə̄ nduú gə̄ ō,
a a̰ȳn̄ kasə nduú ō.
Nin̄ a ndɔrə̄n̄ ō,
a əsan̄ yá̰á̰ kə́ ndɔrɔ́ ō.
15M-ā m̄-tél yā kəndā gír deē yāḿ gə̄
dɔ nang yādə́ tə́ gogə́.
Dɔ nang ń m-ādə̄də́ ní,
deē a tə̄ɓādə́ tū tə́ kɔ̄ɔ́ to̰ alé.
Yá̰a̰ ń mā Kɔ́ɔ̄ɓē Nə́ɓā yāsí
m-ə́dá ní n noó.
Currently Selected:
Makətūbə̄ yā Amos 9: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad
