Makətūbə̄ yā Amos 6
6
Ndi kanjə̄ sōl̄ yá̰a̰ aĺ kə́ rɔ̄kum alé
1Yá̰á̰ kə́ to kum kaȳ aĺ kə́ ba̰ý beē,
tām̄ yāsí sḭḭ̄ ń ī-ndiī jəke
dɔ ngōn̄ mbal̄ kə́ *Jerusalem tə́ ní ō,
sḭḭ̄ ń ɔ́jiīń na yá̰á̰ kógə̄ḿ na a rāāsí
dɔ ngōn̄ mbal̄ kə́ Samari tə́ aĺ ní ō!
De gə̄ ədan̄ na sḭḭ̄ na
ī-majə ī-tɔyī nápar de kə́ rang gə̄
ń ī-ndiī dandə́ tə́ ní ō,
na ngán *Israel gə̄ ń
i ngákó̰ó̰sí gə̄ ní,
tūrə̄n̄ rɔ̄də́ i kə̄ rɔ̄sí tə́ ō!
2I beé ní, āwī Kalne á̰a̰ī!
Gō tə́ anī ḭ́ḭī noó āwī bátə́ ūgī Hamat
ń i ɓē kə́ bo ní tə́.
Ī-raī dɔ tə́ noō ī-risə āwī
Gat ɓē Pilistin gēé.
Ɓē ko̰o̰ gə̄ ń noō ní,
gātə̄sí tɔȳ yādə́ a?
Ɓē yāsí bo tɔȳ yādə́ a?
3Sḭḭ̄ ī-sāāī ndɔ́tə̄ kə ndɔ̄
yá̰á̰ kə́ to kum kaȳ aĺ kə̄ gogə́.
Banī sḭḭ̄ ī-rāāī ādə̄ ndɔ̄ yá̰a̰
rāā kə́ kə dɔ́nɔ́ reē.
4Sḭḭ̄ ī-toī i dɔ tə̄rá gə̄
kə́ rāān̄ ro̰də́ i kə ngān̄g dā̰á̰ tə́ ō,
ī-toī kə ngāl̄sí dɔ yá̰a̰ ndi yāsí
kə́ sɔl̄ lɔ́ḿ lɔ́ḿ gə̄ tə́ ō,
yā kəsań ngán batə̄ kə́ majə tɔȳ madə̄ gə̄
kə́ dan yá̰a̰ kul̄ yāsí gə̄ tə́ ō,
yā kəsań duĺ man̄g kə́ bo tɔȳ madə̄ gə̄
kə́ kem gɔngɔɔ́ ō.
5Sḭḭ̄ ə̄nī pā ba ī-dānī gō kə kəndeé.
sḭḭ̄ ī-teēī kə yá̰a̰ gōsə̄ kə́ kijə gə̄
tītə̄ yā Dabid beé.
6Sḭḭ̄ ā̰yī kasə *nduú
kem káĺ kə́ bo gə̄ tə́ ō,
ī-ndumiī yibə̄ kə́ gatə̄n i ngá̰ý
kə́ kotə majə gə̄ ō.
Banī kojə yā Jəjep ní,
a nujənə̄ń sák sák kɔ̄ɔ́ ō,
usəsí sḭḭ̄ yá̰á̰ kógə̄ḿ aĺ ō a!
7I tām̄ najə̄ ń toō tə́ n ngɔlaā ní
i sḭḭ̄ n a ɔyn̄sí yā kaw̄ sesí
dɔ ɓē kə́ rang tə́ kété
no madə̄sí gə̄ tə́ ní.
Adə̄ ā ī-gətóo kɔ̄ɔ́,
sḭḭ̄ ɓūtə̄ de kə́ yay gə̄!
Nujən̄ ɓē kə́ Samari sák sák kɔ̄ɔ́
8Kɔ́ɔ̄ɓē Nə́ɓā, Nə́ɓā
kə́ kɔ́ɔ̄ dɔ rā̰ ō dɔ nang ō
túbə əda na:
Tītə̄ ń mā i Nə́ɓā rɔ̄kum noó,
kɔjə rɔ̄ yā ɓē ko̰o̰
kə́ *Israel nelə̄m̄ aĺ ngá̰ý,
kújə yān kə́ majə gə̄ nelə̄m̄ aĺ ngá̰ý.
M-ā m-ə́la ɓē kə́ Samari
kə yá̰a̰ malang kə́ kemeé
kem jī madə̄ ba̰ā̰n gə̄ tə́.
9Ré de kə́ dəngam gə̄ kə́ kem kojə kógə̄ḿ tə́ na̰yn̄ i kutə kógə̄ḿ anī, nin̄ a oyn̄. 10Loo ń noō tə́ ngeedə́ kógə̄ḿ a teē kə nīńdə́ kɔ̄ɔ́ kem kújú yā róō horoó. Kem kújə́ kə́ ta tɔ̄l̄ ta tə́ ní, ré deē kógə̄ḿ na̰y kemeé kə kumneé ɓáý anī, ngeen a dəjen najə̄ a əda na: De gə̄ i seí ɓáý a? Anī ni a tél yā kədan na: A̰ á̰, deē gətóo. Ba gō tə́ anī a əda na: Ūtə̄ taí! I kum mbang kəda rī Kɔ́ɔ̄ɓē n toó alé!
11Tɔdɔ̄ i yā Kɔ́ɔ̄ɓē kadə̄ adə̄ ndūn,
anī nujən̄ kújə́ kə́ bo gə̄ kɔ̄ɔ́ ō,
ngé kə́ dūú gə̄ tétə̄n̄ rárák kɔ̄ɔ́ ō!
Tetə rɔ̄ɔ̄ kə́ jōó gə̄ i tetə rɔ̄ɔ̄ kə́ teē yá̰a̰ aĺ
12Sə́nda gə̄ a a̰ȳn̄ ngɔ̄də̄
dɔ mbal̄ gə̄ tə́ a?
Deē a ndɔr̄ dɔ mbal̄ gə̄ kə mangá a?
Sḭḭ̄ ī-rāāī adə̄ yá̰á̰ kə́ súmūú
tél yá̰á̰ kə́ yḛl deē ō,
yá̰á̰ kə́ gōtə́ téĺ yá̰á̰ kə́ atə̄ kárárá ō.
I tām̄ rí tə́?
13Sḭḭ̄ ī-rāāī rɔ̄nel̄ tetə rɔ̄ɔ̄ yāsí kə́ Loo Dabar ń i ɓē ń ni i yá̰á̰ kógə̄ḿ aĺ ní. Sḭḭ̄ ə́daī na:
Jə-taā ɓē kə́ Karnaim i kə ta kūl̄ tɔ́gə́jí rɔ̄kum, ɓē ń tɔ́gə i tū tə́ ní. 14Banī Kɔ́ɔ̄ɓē, Nə́ɓā kə́ kɔ́ɔ̄ dɔ rā̰ ō dɔ nang ō əda na: Ɓē ko̰o̰ kə́ *Israel, m-ā m̄-rāā kadə̄ ɓē kógə̄ḿ a ḭḭ yā rɔ̄ɔ̄sí. Ni a rējə̄sí, ba a əla gír i Lebo Hamat dām̄ mbɔ́r ɓē kə́ ko̰ó̰ tə́, bátə́ kadə̄ ugə̄ń man̄ dɔ mbal̄ kə́ Araba tə́, dām̄ mbɔ́r ɓē kə́ geleé tə́.
Currently Selected:
Makətūbə̄ yā Amos 6: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad
