Kəla rāā Ngámbang kəla gə̄ 24

Jipə gə̄ sekə́n̄ Pol

1Ndɔ̄ mí gō tə́ anī, Ananias ngol *ngé tun̄ yá̰a̰ gə̄ reē kə *kum kɔɔ̄ kə́rēý gə̄ ō, nge kɔr̄ najə̄ kum gotən kógə̄ḿ kə́ rīn na i Tertulus ō. Nin̄-sekə́n̄ Pol rɔ̄ nge ko̰o̰ ɓē tə́. 2Ɓārə́n̄ Pol adə̄ reē, anī Tertulus sekə́n əda na:

Peliksə nge ko̰o̰ ɓē kə́ majə, kem sɔl̄ lɔm kə́ ngá̰ý ń j-aw̄ń toō i kə ta kūlīí, tá ī-tūr̄ gíŕ yá̰a̰ gə̄ ngá̰ý tām̄ yā majə yā gíŕ nápar de gə̄ ń toō tə́ kə ta kūl̄ ko̰o̰ ɓē yāí kə́ kə kum kedə̄ kə́ ngá̰ý ɓáý to̰. 3Yá̰a̰ malang ń j-ənge asə naā beé kə kum mbang gə̄ malang ō, kə̄ loo gə̄ tə́ malang ō, kə ta kūlīí ní, jə-ndadī tāmən tə́. 4Ba m̄-sāā njə́bāī kadə̄ dan ngāl̄ ngá̰ý alé, adə̄ m̄-rāāī ɓɔ́ kadə̄ ī-rāā kem majə sejí ba ī-nēl̄ mbīí ōōń najə̄ yājí sḛ́ý. 5J-a̰ā̰ kadə̄ deē ń toō i de kə́ majaĺ ngá̰ý tītə̄ mo̰y ngāl̄bɔ̄gīí beē: Ni sól̄yō *Jipə gə̄ malang kə́ dɔ nang tə́ laā, tá i nəkɔ́ n i so̰ no madə̄n gə̄ kə́ gír ɓūtə̄ yā *Najaret gə̄ tə́ ní. 6Ni-sāā rāā kadə̄ majaĺ tákə̄ *kújə yā Kɔ́ɔ̄ɓē, banī jḭḭ j-əhɔn ta tə́ kɔ̄ɔ́. Jḭḭ jə-gḛy gān̄g sarya dɔn tə́ kə gō *ndū najə̄ yājí, 7banī Lijiyas ngol áskar gə̄ kə́ bo teē noō reē taān kə rɔ̄ɔ́ jījí tə́ kɔ̄ɔ́. 8Gō tə́ anī ni-əda ngé sekə́n gə̄ kadə̄ reēn̄ rɔ̄í tə́. Ré īkɔ́ ī-dəjen najə̄ anī, nəkɔ́ a ɔjə kadə̄ yá̰a̰ malang ń jə-sekə́n najə̄n tə́ ní i rɔ̄kum#24.8 Najə̄ ń ḭḭ dɔ ... Jḭḭ jə-gḛy gān̄g sarya dɔn tə́ ... bátə́ ... jə-sekə́n najə̄n tə́ ní i rɔ̄kum ní, gətóo kem makətūbə̄ Kəla rāā kə́rēý gə̄ kə́ kété tə́ kə ta Gərek..

9*Jipə gə̄ ndigən̄ najə̄ gō Tertulus tə́, ədan̄ na i tītə̄ ń noō rɔ̄kum.

Pol ɔr̄ najə̄ dɔ rɔ̄n tə́

10Dan ń nge ko̰o̰ ɓē əla jīn kə dɔ Pol tə́ kadə̄ ɔr̄ najə̄ anī, Pol, əda na:

Mā m̄-ger̄ kadə̄ ḭ̄ i nge gān̄g sarya yā nápar de gə̄ ń toō rāā ɓāl̄ ngá̰ý ngɔlaā. Adə̄ m-ə̄nā wurəḿ mámák yā kɔrə̄ń najə̄, kadə̄ m̄-nējəń najə̄ dɔḿ tə́ kɔ̄ɔ́. 11M-āw̄ rɔȳ Nə́ɓāá *Jerusalem, ba dan ń m-ūgə̄ ní, m̄-rāā ndɔ̄ kə́ mān̄ kutə gidə i jōó alé. Nge ń noō ī-dəje i náā gə̄gē anī a ədaī. 12Deē əngem̄ loo nējə̄ naā najə̄ tə́ kə de kə́rēý kem *kújə yā Kɔ́ɔ̄ɓē tə́ aĺ ō, deē əngem̄ loo sə̄lā kósə de gə̄ tə́ kem kújə́ kán̄ naā gə̄ tə́, aláa kem ɓēé aĺ ō. 13Tá yá̰a̰ gə̄ ń de gə̄ ń toō sekə́mə̄n̄ ngɔlaā najə̄n tə́ ní, nin̄-asən̄ kɔjiī kadə̄ i rɔ̄kum alé. 14Ba yá̰á̰ ń m̄-ger̄ kadə̄ i rɔ̄kum ní n toó: Mā m-ún i gō róbə́ kə́ kijə ń ədan̄ na i róbə́ kə́ gōtə́ aĺ ní n m̄-rāań kəla m-ādə̄ Nə́ɓā yā kaají gə̄ ní. Banī m̄-taā kem yá̰a̰ malang ń ndangən̄ kem makətūbə̄ *ndū najə̄ tə́ ō, kem makətūbə̄ yā *ngé koō ta gə̄ tə́ ō ní. 15Mā m-ə̄ndā kemḿ dɔ Nə́ɓā tə́ tītə̄ ń nin̄ kɔ́ gə̄ əndān̄neé kemdə́ dɔn tə́ ō ní, kadə̄ de kə́ sew gə̄ ō, de kə́ sew aĺ gə̄ ō ń oyn̄ ní, Nə́ɓā a ndól̄də́. 16I tām̄ najə̄ ń noō tə́ n m-ā m-ə́hɔń rɔ̄ḿ tɔgə ngándáńg kadə̄ najə̄ gətóoń dɔḿ tə́ ta kum Nə́ɓā tə́ ō, ta kum de gə̄ tə́ ō ní.

17m̄-gətóo kem ɓē kə́ *Jerusalem tə́ asə ɓāl̄ ngá̰ý, ba m̄-tél m-āw̄ gogə́ kemeé i kadə̄ gír deē yāḿ gə̄ yá̰a̰ gə̄ kə́ yā rāań kə ngé ndoō gēé tə́ ō, i kadə̄ Nə́ɓā *yá̰a̰ ndējə̄ gə̄ tə́ ō. 18I loo ń noō tə́ n teēn̄ dɔḿ tə́ kem *kújə yā Kɔ́ɔ̄ɓē tə́, ndɔ̄ ń m-ā m̄-tɔ̄ləń ta tə́go rɔ̄ḿ tə́ kadə̄ m-ūnjəń njáý njáý tə́ ní. De gə̄ ɔsən̄ dɔdə́ naā tə́ ran̄ aĺ ō, ká̰a̰ najə̄ ɓār̄ sow aĺ ō. 19Banī *Jipə kə́rēý gə̄ kə́ gō nang kə́ Aji tə́ ran̄ noó, ba majə kadə̄ i nin̄ n ré aw̄n̄ kə najə̄ kə́rēý seḿ anī, reē ran̄ noí tə́ ba sekə́mə̄n̄ ní. 20Aĺ ɓáa yá̰á̰ kə́ majaĺ ń m̄-rāā á najə̄n əhɔm̄ ndɔ̄ ń m̄-ndań no ngé sarya kə́ bo gə̄ yā *Jipə gə̄ tə́ ní, ādə̄ de gə̄ ń ran̄ toó ədan̄. 21Ngá̰ý a i najə̄ kə́ kum kógə̄ḿ beē ń m-ún ndūḿ kə̄ dɔɔ́ ngá̰ý m-ə́dań dandə́ tə́ ní tá, m-ə́da na: I tām̄ taā kə́ m̄-taā kem kadə̄ de kə́ koy gə̄ a ndólə̄n̄ tə́ n a rāān̄neé sarya seḿ ta kumsí tə́ ɓōólaā toó!

22Peliksə ger̄ najə̄ kə́ dɔ gō róbə ngeé ń toō tə́ majə adə̄ ni-əndādə́ dɔɔ́, ba ədadə́ na:

Ré Lijiyas ngol áskar gə̄ kə́ bo reē ugə̄ laā anī, m-ā m̄-gān̄g sarya yāsí. 23Ni-adə̄ ndūn ngol áskar gə̄ na kə ngɔ̄m̄ Pol dəngáyá, ba kə lōō kəndā dɔn tə́ ō, kə lōō kɔgə̄ deē yān gə̄ rāā seneé ō.

Pol ra no Peliksə nin̄ kə Dərusil tə́

24Gō tə́ ndɔ̄ kóndóńg wań anī, Peliksə reēn̄ nin̄ kə nə̄yá̰n Dərusil ń i *Jipə ní. Ni-əla gō Pol tə́ ba oō najə̄ kə́ dɔ taā kem Jeju *Kərist tə́ ń Pol ɔjə ní. 25Ba dan ń Pol a ɔr̄ najə̄ kə́ dɔ háĺ kə́ gōtə́ tə́ ō, dɔ kəhɔ rɔ̄ dɔ yá̰á̰ tə́ ō, dɔ sarya kə́ a reē ɓáý tə́ ō anī, ɓōĺ rāā Peliksə adə̄ əda na:

Kə́ ngɔr ń toō tə́ ɓáa ī-tél āw̄ kə̄ naā tə́. Ré m-ə́nge kum mbang anī m-ā m̄-ɓāríī ɓáý.

26Ni ɔjəń na majanī Pol na a əndā nar jīn tə́. I yá̰á̰ ń noō n ni a əlań gōn tə́ kə̄ nja naā tə́ kadə̄ reē wál̄ najə̄ seneé ní.

27Rāā ɓāl̄ jōó anī Porsiyus Pestus reē kun gotə Peliksə tə́. Banī Peliksə gḛy kadə̄ nel̄ *Jipə gə̄ seneé, adə̄ əya̰ Pol dəngáyá.

Currently Selected:

Kəla rāā Ngámbang kəla gə̄ 24: BS

Highlight

Copy