Makətūbə̄ kə́ nge ko̰ jōó ń Pol ndang adə̄ Tesalonik gə̄ ní 3
3
Ī-ndɔ̄yī tām̄ yājí tə́
1Ní, sḭḭ̄ ngákó̰ó̰jí gə̄, ī-ndɔ̄yī tām̄ yājí tə́, yā kadə̄ najə̄ yā Kɔ́ɔ̄ɓē aw̄ń kə̄ loo gə̄ tə́ ō, kadə̄ de gə̄ ɔsən̄ gɔnən tītə̄ kə́ loosí ō. 2Ī-ndɔ̄yī tá kadə̄ Nə́ɓā ɔr̄jí jī ngé kem ndul gə̄ tə́ ō, jī de kə́ tōr̄ gə̄ tə́ ō, tɔdɔ̄ i de gə̄ malang n taān̄ kem ní alé.
3Banī Kɔ́ɔ̄ɓē i nge ra dɔ ndūn tə́. Ni a mbūsə̄sí ō, a ngɔ̄m̄sí najə̄ yā Nge kem Ndul tə́ ō. 4Tá Kɔ́ɔ̄ɓē rāā adə̄ j-ənī kemjí mámák najə̄ yāsí tə́. Tɔdɔ̄ yá̰á̰ ń j-əda kadə̄ ī-rāāī ní ī-rāāī ō, ā ī-rāāī kə̄ nosí tə́ ō.
5Ādə̄ Kɔ́ɔ̄ɓē rāā adə̄ kemsí ndigə tár ń Nə́ɓā táŕsí ní ō, tə́gā ta ń *Kərist i nge kadə̄ ní ō.
Majə kadə̄ deē rāā kəla
6Ngákó̰ó̰jí gə̄, jə-dəjesí kə rī Kɔ́ɔ̄ɓē yājí Jeju Kərist kadə̄ ɔ̄rī rɔ̄sí kɔ̄ɔ́ rɔ̄ ngákó̰ó̰sí kə́ ngé yay gə̄ tə́ malang, nin̄ ń i ngé mbātə́ rāā yá̰a̰ gə̄ ń j-ɔjəsí ní. 7Tɔdɔ̄ sḭḭ̄ ī-gerī loo ndájə̄jí majə, tām̄ dan ń jə-ndi dansí tə́ ní, jə-yay alé. 8Yá̰á̰ ń j-əsa ní, i deē kógə̄ḿ n jə-dəjen kadə̄ adə̄jí ní alé. Banī jə-rāā kəla kə́ j-ɔr, j-a̰a̰ tápə̄ ndɔ̄ɔ́ ō, kadaá ō, yā kadə̄ j-ɔȳń deē kógə̄ḿ dansí tə́ alé. 9Ba mandang ɓáa, ré jə-dəjesí yá̰a̰ anī, najə̄ i yājí. Banī jə-dəjesí alé, tām̄ jə-ndigə kadə̄ ī-ndájījí. 10Tɔdɔ̄ dan ń jə-ndi dansí tə́ ní, j-ədasí na deē ń gḛy rāā kəla aĺ ɓáa ādə̄ kɔ́ɔ̄ əsa yá̰a̰ aĺ ō.
11Tɔdɔ̄ j-oō kadə̄ de kə́rēý gə̄ dɔ dáńsí tə́ i de kə́ yay gə̄. Nin̄-rāān̄ kəla alé, ba a əndān̄ i kūngə́də́ tū tə́ ngóy. 12Ba de gə̄ ń noō ní, j-ədadə́ ō, j-ɔjə̄də́ ō, kə rī Kɔ́ɔ̄ɓē Jeju *Kərist, kadə̄ rāān̄ kəla ba əsan̄ yá̰á̰ kə́ teē kə ta kūl̄ tətōdə́ nin̄ kɔ́ gə̄.
13Ba sḭḭ̄ ngákó̰ó̰jí gə̄, ī-lōōī kadə̄ tɔ́gə́sí ur̄ wak loo rāā yá̰á̰ kə́ majə tə́. 14Ré deē kógə̄ḿ mbātə́ najə̄ ń j-əda kem makətūbə̄ ń toō tə́ ní anī, ī-rāāī ādə̄ de gə̄ ger̄nən̄, ba ī-lōōī ɓoo naā seneé, ādə̄ rɔ̄n sɔlə̄n. 15Á̰a̰in̄ tītə̄ madə̄ ba̰ā̰sí alé, banī ī-gɔŕyɔ̄niī kə́ ngōkó̰ó̰sí tə́.
Tɔ́r̄ ta ō, lápə́ya ō
16Ādə̄ Kɔ́ɔ̄ɓē kə́ nge kem sɔl̄ lɔm sɔl̄ kemsí ngándáńg ō, kə ta róbə́ kə́ tayā tayā gə̄ ō. Ādə̄ Kɔ́ɔ̄ɓē i naā tə́ sesí malang.
17I mə̄kɔ́ Pol n m̄-ndang najə̄ lápə́ya ń toō kə jīḿ ní. Makətūbə̄ yāḿ gə̄ malang ní, m-ā m-ə̄ndā jīḿ gírí i tītə̄ ń noō.
18Ādə̄ Kɔ́ɔ̄ɓē yājí Jeju *Kərist rāā kem majə sesí malang.
Currently Selected:
Makətūbə̄ kə́ nge ko̰ jōó ń Pol ndang adə̄ Tesalonik gə̄ ní 3: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad
