Makətūbə̄ kə́ nge ko̰ jōó ń Pol ndang adə̄ Korḛntə gə̄ ní 13
13
Tāā kə́ ta tɔ̄l̄ ta tə́ ō, lápə́ya ō
1I nja kə́ nge ko̰ mətá n m-ā m-āw̄ kə̄ loosí toō. Tītə̄ ń makətūbə̄ yā Nə́ɓā ədań ní,
a gāngə̄n̄ sarya malang i kə gō najə̄ kɔr̄ de kə́ kum tə́ gə̄ jōó, aláa mətá#13.1 K. 1: Á̰a̰ī Ndū 19.15.
2I najə̄ kə́ m-ə́dá kété kɔ̄ɔ́, dan ń m-āwń loosí nja kə́ nge ko̰ jōó ní tə́. Ba ɓōólaā ń m̄-gətóo dansí tə́ ní, m̄-téĺ m-ə́dá ngé gə̄ ń rāān̄ yá̰á̰ kə́ majaĺ ní ō, m-ə́da gotə de gə̄ malang ō, kadə̄ gerə̄n̄ pá tá, na ré m̄-tél m-āw̄ gogə́ loosí anī, m-ā m-ə́ya̰ deē kógə̄ḿ karī alé. 3Ī-gḛyiī i kadə̄ kə m-ɔ́jə́sí yá̰á̰ kə́ ɔjə kə̄ ndágá kadə̄ *Kərist a ɔr̄ najə̄ kə ta kūlə̄ḿ ní, m-ā m-ɔ́jəńsí ngeé ō. Tām̄ yāsí tə́ ɓáa tɔ́gə Kərist gətóo alé, banī ni-ɔjə tɔ́gən kə̄ ndágá dɔ dáńsí tə́. 4Ngan̄g aĺ yān rāā adə̄ əndanən̄ kə máyá̰ tū kāgə̄ kə́ dēsə́ tə́, banī ni-ndi kə kumneé i kə ta kūl̄ tɔ́gə yā Nə́ɓāá. Kə gō ɓoo ń jə-ɓoo naā seneé ní ɓáa, rāā adə̄ tɔ́gə́jí jḭḭ gətóo ō. Banī yá̰á̰ ń jə-rāā sesí ní, ɔjə kadə̄ jə-ndi i kə kumjí seneé kə ta kūl̄ tɔ́gə yā Nə́ɓāá.
5Sḭḭ̄ kɔ́ gə̄ ə̄ndāī ma̰ȳ rɔ̄sí ba á̰a̰ī ké sḭḭ̄ i dɔ róbə taā kem tə́ wa. Ī-nāāī rɔ̄sí. Aké ī-gerī kadə̄ Jeju *Kərist i kemsí tə́ aĺ a? Ké nāā ń ī-nāāī rɔ̄sí ní ənīsí i kɔ̄ɔ́ a? 6Ba m̄-taā kem kadə̄ ā ī-gerī kadə̄ Kərist i kemjí jḭḭ tə́, tām̄ jḭḭ j-ɔjə kə̄ ndágá kadə̄ ni i kemjí tə́. 7Jə-ndɔ̄ȳ Nə́ɓā kadə̄ ī-rāāī yá̰á̰ kógə̄ḿ kə́ majaĺ alé. I yā kadə̄ de gə̄ ndigən̄neéjí alé, banī i yā kadə̄ sḭḭ̄ ī-rāāīneé yá̰á̰ kə́ majə, ba kadə̄ jḭḭ ɓáa jə-to tītə̄ de gə̄ kə́ nāān̄jí, banī j-asə aĺ beē. 8Tām̄ tɔ́gə́jí kə́ yā kadə̄ jə-rɔ̄ɔń najə̄ kə́ rɔ̄kum yā Nə́ɓā gətóo. Tɔ́gə́ ń j-aw̄ń ní i tām̄ yā najə̄ kə́ rɔ̄kum tə́ ngóy. 9Dan ń jə-ngan̄g aĺ ɓáa jə-rāā rɔ̄nel̄, banī sḭḭ̄ i de kə́ ngan̄g gə̄. I tām̄ najə̄ ń noō tə́ n jə-dəje kem ndɔ̄ȳ yājí tə́, kadə̄ ī-téliī de kə́ majə ɔtə̄ kə taá gə̄ ní. 10I tām̄ najə̄ ń noō tə́ n m̄-ndangəń najə̄ gə̄ ń toō malang m-ādə̄sí dan ń mā i sa̰y rɔ̄sí tə́ ní. I yā kadə̄ loo ń mā i dansí tə́ anī, m-ə̄ndā tɔ́gə́ ń Kɔ́ɔ̄ɓē adə̄m̄ ní kə ngangāá dɔsí tə́ alé. Tɔdɔ̄ tɔ́gə́ ń Kɔ́ɔ̄ɓē adə̄m̄ ní, i yā kadə̄ m̄-mbūsəń deē, banī i yā kadə̄ m̄-nujəń deē alé.
11Kə́ tām̄ yā gotə yá̰á̰ kə́ rang gə̄ tə́ ɓáa, ngákó̰ó̰ḿ gə̄, ī-ndiī kə rɔ̄nelēé ō, ī-rāāī tá kadə̄ ī-téliī de gə̄ kə́ majə ɔtə̄n̄ kə taá gə̄ ō, ə́laī go̰ kem naā tə́ ō, ādī míndə́sí asə naā ō, ī-ndiī lɔm kə naá ō. Loo ń noō tə́ Nə́ɓā kə́ nge tár ō, kə́ nge rāā kadə̄ lɔm to ō, a ndi sesí.
12Ī-ɓirī naā kə̄ rɔ̄sí tə́ ī-rāāīneé naā lápə́ya kə́ loo ngákó̰o̰ naā gə̄ tə́.
Ngé kə́ *táĺ gə̄ malang rāān̄sí lápə́ya.
13Sḭḭ̄ malang ní, ādə̄ Kɔ́ɔ̄ɓē Jeju *Kərist rāā kem majə sesí ō, Nə́ɓā táŕsí ō, ī-rāāī kem kógə̄ḿ kə *Ndíĺ kə́ Táĺ ō.
Currently Selected:
Makətūbə̄ kə́ nge ko̰ jōó ń Pol ndang adə̄ Korḛntə gə̄ ní 13: BS
Highlight
Copy
Compare
Share
Want to have your highlights saved across all your devices? Sign up or sign in
© 2006, 2010 Alliance Biblique du Tchad
