Roman 9
9
Mirikisi Nja Ntani de E zabi
1Mma pala gaskye; Ni mani Kiristi la, mma yi yaruwa na ba, a siki dishiya na ni shina Aworo Nsuseki e beyi tebeshi a kiya na nkye mma yi yaruwa naba 2Mmani beki siki soseyi, nja Ni ma damu a siki dishiya naa. 3Sobon ni ntani na, Ni pi so de Mirikisi e sa Ni de ni ma lalasheshe nse e kuma laba ni nja Kiristi sobon ntani naa. 4Ntani Izireyila su ma ntani Mirikisi la; e sa su su ma ntani yi e kwa pelesa su totolo dereja yi; e yi seda nja su, e kuma ba su doka yi; e kwa nana su yiride sua bowuta yi ngaskye nja e kwa ba su anikowori yi. 5Su ma dege juriya ni nsu adaatolo Heleniyawa de su shina su soseyi la; Kiristi kuma su yapu yi ma kankye nsebeki, bila de Mirikisi de yaa yi solota a kiya ni guru mbo, su yobo yi gbogbo! Ema yomu.
6Ba Mma pala nkye anikowori de Mirikisi yi ntani Izireyila e ki sika yi naba. Ba guru ntani Izireyila na su ma ntani Izireyila ni gaskye ba. 7Yomuna ba guru worede su ma a siki juriya ni Abireyi na su ma yaya Mirikisi ba. A kiya yomuna Mirikisi pala gye Abireyi nkye, <<Te anya Ishaku na sua sukwa juriyake.>> 8Mbode ni meyi nupi anya mu e shiya ma, ba yaya Abireyi guru na su ma yaya Mirikisi ba, sede yaya de su yapu su te anya anikowori Mirikisi osu na sua sukwa su yaya ni Abireyi ni gaskye. 9Mbode Mirikisi pala naka kwanki de e yi Abireyi anikowori: <<A kyakya kwanki mu shekera nsu zo na kuma zo mbayi, Saratu yaa yapu yaa.>>
10Ba yomuna kin ba, sede Rebeka mata ni Abireyi yapu yaya bi togweyi adaa su ma daa la, e shiya ma Ishaku adatolomu. 11Sede Mirikisi yi beta nja Rebeka kapi de e yapu yaya togweyi mu ko su yi mbodaa kyakyawu ko mumungu, Mirikisi yi yomuna de e nana a pili nkye yaa de e zabi mu e ma nupi Mirikisi la: 12ba sobon ankiyi naba sede te anya nsude sukwa yi nkye, <<Tonse yaa ke yaa bowuta dende yi.>> 13Yiride e ma a rubutu a siki Takada Mirikisi nkye, <<Yakubu na Ni ma so, sede Ni ki Yisuwa.>>
14Mina mua pala, Mu nkye Mirikisi yi kyakya ba naka? Yi e ma yomu naba! 15Sobon Mirikisi pala gye Musa nkye,
<<Na zi toseyi Ni guru nsude mma zi toseyi
yomuna kuma Na zi toseyi Ni guru nsude mma bila de nzi toseyi.>>
16Nkayom, da mu e ma yi ni nsebeki ko kokori yi na ba, sede aniyeri Mirikisi la. 17Sobon yomuna takada Mirikisi pala gye Piriyona nkye: <<Ni sa ke de ki ma seleki, de Ni nana sori na akyiyake la nja de ntani durinya guru su shina seni na.>> 18Nkaayom Mirikisi e ma nana aniyeri te nja guru nsude e ma bila de e nana yi aniyeri, nja Mirikisi yaa sa rishi yeda ni beta e yi a dishiya guru nsude e ma bila de e sa rishi yeda a dishiya e yi.
Anwashi Mirikisi nja Toseyi
19Sede nseda ku gyeni nkye: <<Nde yomuna mina sa de Mirikisi ma geni lepi mu? Waa yaa ki nupi Mirikisi?>> 20Sede waa ma e ke, nsebeki, de ka yi musu nja Mirikisi? <<Tuni kesa yaa minya nsude yii nkye, <Mina sa de ki yi ni yomu?>>> 21Nsude meyi tuni e mani yiko yi ampani ni kesa yiride e ma bila de e yi. E ma yi yaa yi ampani ni kesa ndandaa e yi tuni nyowa worosu su sobon ANKI nsu dereja worosu su kuma sobon ANKI de man dereja ba.
22Yomuna gaskye mbode Mirikisi yi. Yaa bila de e nana anwashiyi nja e sakye nana sori yi a pili, sede ni totolo kadishiya na Mirikisi yi takuwa nja worede su deta de su keleba anwashi yi, worede Mirikisi shiriya de su bebeta. 23Yomuna Mirikisi bila de e sa ntani de su shina yowa girima yi anya worede e ma nana aniyeriyi, worede Mirikisi shiriya su tun dege pari sobon dereja yi. 24Sobon omu ma du de Mirikisi sukwa mu, ba Yawudawa na kin ba sede nzun worede su ma Yawudawa ba. 25Yiride e pala a siki takada ni anebi Hosiya nkye:
<<Ntani de su ma nna ba
Na sukwa <ntani na.>
ntani worede Mma so ba;
Na sukwa su <Worede Ni ma so.>
26Se anya de su gye su nkye, <Kuma ntani na ba,>
ayan sua sukwa su yaya ni Mirikisi nsu la yi.>> 27Yomuna anebi Ishaya yi beta a kiya ntani Izireyila nkye:
<<Kode nkye Ntani Izireyila su yi yowa kankye nyashi baki riki,
sede worede rigye piri a siki su na kin Mirikisi yaa sila su. 28Sobon Obagizi yaa gama sisika ankiyi nja a durinya.>> 29Yiride anebi Ishaya pala a beyi nkye, <<Mba sobon Obagizi nso girima ba woron su juriya naba, mua ma kankye ntani Sodom, mua kwa ma kankye ntani Gomora.>>
Ntani Izireyila nja Nabari Kyakyawu
30Omu worede muma Yawudawa ba, de mu bila zunwa gangasi anya Mirikisi ba, su samu zunwa mere lepi te anya beigaskye su; 31Sede ntani Mirikisi, de su ma bila turiki zunwa gangasi anya Mirikisi, te anya doka Musa su samu ba. 32Mina sa su samu ba? Sobon su bila e yi te turiki beigaskye naba sede su ma geni kankye te turiki ankisu la. Se su titimi <<A kiya dunsi titimi.>> 33Yiride e ma a rubutu a siki Takada Mirikisi nkye:
<<Geni, Ni sa dunsi titimi a Siyona
de yaa sa ntani su titimi
dunsi de yaa sa ntani puari,
sede guru nsude beigaskye nja shi Mirikisi yaa taba sa yi zi kumnya ba.>>
Currently Selected:
Roman 9: Gaa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria