Roman 6
6
Lepi zo Muntu Kiristi Zo Leyi
1Mina mua yi kuzukam? mua sigeba ni lepi na ba de aniyeri Mirikisi e ja nyowa? 2Yi gbotuma! omu de mu rigye muntu a siki lepi, yaya na mua sigeba ni yi lepi? 3Ku shina nkye guru amu de mu yi tunkwasa a siki Kiristi Yesu, mu yi tunkwasa gabada a siki a muntu yi. 4Sobon yomuna mu muntu te anya tunkwasa de mu yi, sobon yiride Kiristi dege a kumsha a siki dereja nsori ni Mirikisi Adaa, yomuna omu du mua mani sabuwa leyi te anya muntu yi.
5Tunde muma daa nja shi a siki muntu yi, yomuna muma daa nja shi te dege nleyi yiride e shi e ma. 6Mu shina nkye arinya nki nsu lepi su gidiri yi gabada nja Yesu sobon de sori ni lepi yaa bebeta, de kede muma bunwa lepi gagaba, 7sobon guru nsude muntu e samu yenshi dege sori lepi. 8Tunde mu muntu nja Kiristi, mu yeda nkye mua zunwa gabada nja shi. 9Sobon mu shina nkye tunde Kiristi dege a kumsha, yaa sakye muntu gagaba, muntu yaa mani sori a kiya e yi gagaba. 10Muntu de Yesu yi, lepi man sori a kiya e yi gagaba; kuzukam e meyi zunwa ni zumunshi nja Mirikisi.
11Sobon yomu ku la nkyaku kankye worede su muntu dege sori lepi, sede ku yi zunwa zumunshi nja Mirikisi te anya Kiristi Yesu. 12Nkayomu kede ku bila lepi de yi solota a nkyaku ba, sobon de kede ku biya memeri ni nki ku. 13Kede ku munka ganga nki ku de ku yi lepi, de e ma kankye keikei ANKI ni yi mungu mbo, sede ku munka nkiku ba Mirikisi, kankye worede su mani leyi; se ku munka nkiku de kuma kankye keikei ANKI gangasi. 14Sobon yomu kede lepi e yi solota a kiya ku ba, sobon kuma yi zunwa a siki doka naba, sede kuma a siki aniyeri Mirikisi la.
Bunwa Ni Gangasi
15Mina mua yi? Mu sigeba nlepi sobon doka man sori akyamu bo, sede aniyeri Mirikisi? E ma yomuna ba! 16Ku shina bo nde ku munka nkyaku de kuma bunwa ni nseda, kuma bunwa ni nsude kuma beyi girima naka, ko kwa ma bunwa ni lepi, de yaa keyi ku te muntu, ko kwa beyi girima te nja Mirikisi, de kuma bunwa ni gangasi. 17Sede mu gbede Mirikisi! kode nkye a kwanki a beyi kuma bunwa ni lepi, ku biya gaskye ni kokoyi ndishiya daa de ku zi. 18Su sila nku bila lepi, ku zo ma bunwa de ku yi mbode Mirikisi yaa bila. 19Mmayi ku beta kankye yiride nsebeki meyi beta sobon ni arinya ni nsebeki de kuma nshi. A kwanki de bise ku munka kiya ku durum de ku bunwa mbo sha dola nja mumungu mbo sobon mungu nupi. Se ku munka kiya ku durum de kuma bunwa ni mbo gangasi sobon Mirikisi. 20Kwanki de kuma bunwa ni lepi, mbodaa gama ku ni ANKI gangasi ba. 21Mina ma nani wuta de ku samu a kiya mbode e kamata ku zi kumnya yi a kwanki mu? De nani wuta ni mbo woromu ma muntu! 22Sede kuzukam su butu ku dege lepi kuma bunwa ni Mirikisi. nani wuta aku de kwa samu dege siki yi e shiya ma zunwa seki, nja leyi ni gbogbo. 23Sobon nani wuta ni lepi e shiya ma muntu; sede kyawuta ni Mirikisi e shiya ma leyi ni gbogbo a siki Kiristi Yesu Obagizi mu.
Currently Selected:
Roman 6: Gaa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria