Roman 5
5
Zunwa Mere Lepi Nja Mirikisi
1Nkaayom tunde mu samu zunwa mere lepi anya Mirikisi sobon beigaskye, mu man selema anya Mirikisi te anya Obagizi mu Yesu kiristi. 2Te anya yi la mu samu aniyeri ni Mirikisi, de muma a siki yi te anya beigaskye mu. Muma yi peri siki sobon sa dishiya a siki dereja Mirikisi! 3Mua dege dolo du a siki ngala mu, sobon mu shina nkye ngala yaa zo mu takuwa, 4takuwa yaa zo ni arinya ngagasi, arinya ngagasi yaa zo ni sa dishiya. 5Sa dishiya mu yaa taba zo mu ni kumnya ba, sobon Mirikisi sa so yi ma kankye miya de ma yowa a siki dishiya mu te anya Aworo Nsuseki, de Mirikisi ba mu. 6Sobon tun kwanki de muma ni nsu sua mu nto ba, Kiristi muntu sobon lepi mu a kwanki de Mirikisi zabi. 7Ba nsude yaa yi yaa muntu sobon nse gangasi. Kode nkye nseda yaa yi yaa yi sori dishiya de e muntu sobon nse gangasi. 8Sede Mirikisi nana yiride yaa so mu, Tunde mu ma nsu lepi na Kiristi muntu sobon mu! 9Sobon zini ni Yesu la mu samu zunwa mere lepi anya Mirikisi; nja kuzukam sua sila mu dege anwashi Mirikisi te anya Kiristi! 10A beyi muma oboki geba Mirikisi, sede kuzukam e samu muma oboki yi te anya muntu ni Yaa yi Yesu. Kuzukam muma oboki Mirikisi, yaa sila mu te anya leyi Kiristi! 11Sede e ma yomu na kin ba; mua yi peri siki sobon ni mbode Mirikisi yi te anya Obagizi mu Yesu kiristi, de sa muma oboki Mirikisi.
Ademu Nja Kiristi
12Yiride lepi yuru a siki durinya te anya nseda la, lepi ni nseda mu zo muntu. Yomuna muntu ma a kiya konwawa sobon konwawa yi lepi. 13Lepi ma a siki durinya Kapi de su beyi doka; sede anya de doka ma ba, sua la kikiriga ni lepi ba. 14Sede dege kwanki ni Ademu te a kwanki ni Musa, muntu yi solota a kiya guru ntani beki, ari a kiya worede lepi asu e ma yiri daa nja Adomu ba yiride de e ki biya doka Mirikisi. 15Sede kyawuta e ma yiri daa nja lepi naba, sobon kyawuta Mirikisi e ma kankye lepi ni Ademu na ba. E ma gaskye la de ntani nyowa su muntu sobon lepi ni nseda. Sede aniyeri e pi nyowa, yomuna kyawuta Mirikisi de e ba mu te anya Yesu Kiristi e shi ndandaa yi. 16Kyawuta Mirikisi e ma mbom nja lepi nseda kaka. A beyi lepi nseda, e sa muman nsu <<Lepi>>; sede a beyi yomu lepi nyowa, se kyawuta Mirikisi de mu samu <<E sa mu ma mere lepi!>> 17Te anya lepi ni nseda muntu yi solota sobon ni nseda ni. Sede yi solota mu e ma mbodaa na ba nde mu te gonta yi nja daa de nsedakaka yi, de ma Yesu Kiristi! Guru worede keleba aniyeri ni Mirikisi teke te anya zunwa gangasi nja shi sua yi zunwa solota ni gbogbo te anya Kiristi. 18Sobon yomu, yiride lepi ni Ademu e shi dandaa zo ni taala muntu a kiya konwawa, yomuna gangasi de nseda yi e sila ntani guru nja e ba su leyi. 19Yiride ntani guru su ma nsu lepi adelili ni lesa zi ni nseda, yomuna guru ntani sua ma gangasi a geba Mirikisi te anya zi kuni nseda.
20Doka zo sobon de lepi e butu a pili; sede anya de lepi ja nyowa, aniyeri Mirikisi yaa ja nyowa pi. 21Sobon yomu, yiride lepi yi solota te anya muntu, yomuna aniyeri Mirikisi yaa yi solota te anya gangasi, yaa sa de mu man leyi ni gbogbo te anya Yesu Kiristi Obagizi mu.
Currently Selected:
Roman 5: Gaa
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria