Roman 16
16
Gesuwa na
1Mma bila de Ni yi ku beta a kiya yayiwa mu Pibi de ema bunwa nsubiya Yesu a Kankiriya. 2Ku keleba yi a siki Obagizi yiride e kamata ntani Mirikisi su yi, ku beyi guru mbode yaa bila anya ku, sobon e shi ma e ma oboki e sua ntani nyowa nto nzun e ni du.
3Ku geshe Biriskila nja Akila, oboki ANKI na a siki Kiristi Yesu; 4su sa leyi su a siki aseri sobon e ni. Mma gbede su, E ni na kin mma gbede su ba, sede nzun guru worede su ma Yawudawa ba nsubiya Yesu su ma gbede su du. 5Ku geshe nsubiya Yesu de su ma gom a gizi su.
Ku geshe oboki na de ma so Apanitu, de e shiya para keleba Kiristi Yesu a kesa Asiya. 6Ku geshe Meremu, de yi pama ANKI soseyi sobon nku. 7Ku geshe Andaronikus nja Yuniya, worede su ma yayuwa na Yawudawa de su domuna mu a jaru gabada; de su shina su soseyi a siki yayamanki, su kwa rigye ni keleba Yesu.
8Ku geshe Ampiliyatu, oboki ANKI na a siki Obagizi. 9Ku geshe ni Obanusu oboki ANKI mu a siki Kiristi, nja oboki na Sitaki. 10Ku geshe Apali de aminshiyi a siki Kiristi ma yeda la. Ku geshe ni ntani gizi ni Aristobulus. 11Ku geshe ni yayiwa na Hirudiyan. Ku geshe ni ntani gizi ni Nakisu de su ma ntani Obagizi.
12Ku geshe ni Tirapina nja Tirapisa, mata worosu mu na su yi ANKI soseyi a siki Obagizi. Ku geshe ni Pasi oboki na, de yi ANKI soseyi sobon Obagizi. 13Ku geshe ni Rupus de su shina yi soseyi a siki ANKI Obagizi, nja amaa e yi, de la ni kankye ni ma yaa yi. 14Ku geshe ni Asinkiritu, nja Piligona, nja Hemasu, nja Paturobas, nja Hamasu nja guru yayuwa de su ma nja su. 15Ku geshe ni Pilologus, nja Yuliya, nja Niriyus nja yayiwa e yi ni mase, nja Olimpas nja guru nsubiya Yesu de su ma nja su. 16Ku geshe nkiya ku ni runguma ni selema nsuseki. guru ntani nsubiya Kiristi sua geshe ku.
Gila ni Karishe
17Yayuwa na, Ni meyi ologba ku, ku yi ankili nja ntani de su ma zo bombom a sisika ku worede su ma ku turiki titimi de meyi geba nja beigaskye de ku keleba. Ku yi nyisa ni yiri ntani ni. 18Sobon yiri ntani mu su ma bowuta Obagizi mu Kiristi naba, sede sobon siki su la. Te anya zanki beta baki su nja yobo yaruwa su ma shirigye worede su ma zi su de tunani su mani yaya dende. 19Konse zi yiride kuma beyi girima te nja manki kyakyawu, e shiya sa ni meyi peri siki sobon ku; sede Mma bila de kuma nsu simi a kiya ni mbode e ma kyakyawu, kuma ntani mere lepi anya guru mbode e ma mumungu.
20Mirikisi de ma beyi selema, yaa dede ba yaa sa de ku shakiya Obiri.
Aniyeri Obagizi mu Yesu Kiristi e ma nja ku.
21Timoti, oboki ANKI na, e ma geshe ku, yomuna kuma Lushiyu, nja Yason nja Sosipata, su ma yayuwa na la.
22Eni, Tarusu, de rubuta takada mu, mma geshe ku a siki Obagizi.
23Gayusu, de keleba ni nja guru ntani nsubiya Yesu a gizi yi, e ma geshe ku.
Erastu, de ma nsu keyi gyolo geri, nja yayiwa mu Kawartasu su ma geshe ku.
24Bila de aniyeri ni Obagizi mu Yesu Kiristi e ma nja ku guru. Emayomu.
Lepa Yobo Ni Karishe
25Bila de girima e te nja Mirikisi! De mani sori de yaa sa ku ku sakisi nsori a siki beigaskye ku te anya nabari kyakyawu de Mma beyi manki yi a kiya Yesu Kiristi, te anya bure ndani mbode e ma a boyi tun kwanki de bise, 26sede kuzukam Mirikisi pelesa yi gaskye te anya ni nsu anebi, nja te anya beta Mirikisi de ema gbogbo nja guru ntani durinya sua beigaskye nja su kwa zi kuni yi. 27Bila de girima e ma nja Mirikisi nsu simi te anya Yesu Kiristi ari gbogbo! Ema yomu.
The Word for the World International and The Word for the World Nigeria