Roman 13
13
Beyi Girima Te Nja Toree
1Dole na konwawa e beyi girima te nja nsu yiko, sobon ba woni yiko de ma ba shina ni Mirikisi ba. Nja guru yiko Mirikisi na sa su. 2Sobon yomu, guru nsude ki beyi girima te nja mbode toree pala e ki beyi girima te nja Mirikisi la, worede sua yi yomu sua keleba totolo poro. 3Nsu solota gomunati su ma mbo womba aba anya worede su meyi mbo kyakyawu, sede e ma mbo womba la anya worede su meyi mbo mumungu. Ka bila de kede ki yi womba ni nsu solota? Se ki yi mbo kyakyawu osu kuma sua yobo ke. 4Sobon nsu solota su ma bunwa Mirikisi la de su yi ANKI kyakyawu sobon ku. Sede nde ki meyi mbo mumungu, se ki yi womba su, sobon solota de su meyi a kiya ku e ma wopi aba. E ma bunwa Mirikisi de e poro guru worede su meyi mbo mumungu la. 5Nkaayom, e ma dole na de ku beyi girima te nja toree, ba sobon poro Mirikisi na kin ba, sede sobon tunani dishiya ku e ma ba lepi.
6Mbode sa kuma beyi gendu naka, sobon toree gomunati su ma bunwa Mirikisi la, de su beyi kwanki su de su yi solota mu. 7Ku ba konwawa mbode ma na yi: Ku beyi gendu te nja worede su ma keleba gendu, ku beyi gendu ni keikei ku te nja worede su ma keleba gendu ni keikei; ku zi womba worede e kamata de ku zi womba asu, ku beyi girima te nja worede e kamata de ku ba su girima.
Ku So Nkyaku
8Kede ku keyi basi nseda a kiya ku, sede ku so nkyaku, sobon guru nsude so yayiwa e yi e ma beyi girima te nja doka Mirikisi naka. 9Doka ni e shiya ma, <<Kede ki kwana nja mata nseda ko ki kwana nja minzi nseda,>> <<Kede ki kisa nse,>> <<Kede ki yi bolowa,>> <<Kede ki yi memeri keikei nseda,>> guru ririgye doka de su ma, guru su ma a siki beta mu de nkye: <<Ki so konwawa kankye kiya ke.>> 10Nde ki ma so nseda ka yi mbo mumungu ba. Nkayomu so e shiya ma sika doka Mirikisi.
11E ma dole na ku yi yomu, sobon ku shina yiri kwanki de mu ma a siki yi. Kwanki yi de kwa dege a kwana, sobon kwanki de Mirikisi yaa sila mu yi kusa pi kwanki de mu beigaskye. 12Dederi yi kusa yiwo; kwanki rigye piri de geri shekeri. Sobon yomu mu bila yi guru mbode ma siki dopuwa de mu la keyi yanki mu ni asikye. 13Mu yi zunwa kyakyawu de yi kyawu nja ntani de su zunwa asikye, kede mu yi buki ni sha riki yiri yiri ba, kede mu bugu, kede mu kwana nja mata nseda ko ki kwana nja nseminji nseda nja zunwa zi dadi ni rishi kumnya, nja rikishi nja nkyamu nja sihinwuta nkyamu. 14Sede kula yiri arinya Obagizi mu Yesu Kiristi, ku bila sa ankeli a siki memeri ni arinya nki nja beyi mbode yaa so.
The Word for the World International and The Word for the World Nigeria