Roomaa 3
3
Amanamummaa Allaah
1Egaa Yihuudii taʼuun faayidaa maalii qaba? Yookaan buʼaan dhagna qabaa maalii? 2Karaa hundaanuu buʼaa guddaa qaba! Jalqabatti dubbiin Allaaha Yihuudootatti imaanaa kenname.
3Isaan keessaa tokko tokko yoo hin amanin maal ree? Amantii dhabuun isaanii amanamummaa Allaaha ni balleessaa? 4Gonkumaa hin taʼu! Namoonni hundinuu sobdoota, Allaahan immoo dhugaa qabeessa haa taʼu. Kunis akkuma,
“Akka ati dubbii keetiin dhuga qabeessa taatuuf,
yommuu murtiitti dhiʼaattuttis akka moʼattuuf”#3:4 Zab 51:4
jedhamee barreeffamee dha.
5Yoo jalʼinni keenya qajeelina Allaaha ifa baase garuu maal jenna ree? Allaahan dheekkamsa isaa nutti fiduun isaa qajeelina dhabeetii? Kanas ani akka namaattin dubbadha. 6Gonkumaa hin taʼu! Utuu akkas taʼee silaa Allaahan akkamitti addunyaatti muruu dandaʼa ree? 7Namni tokko, “Yoo soba kootiin dhuga qabeessummaan Allaaha guddatee ulfinni isaas baayʼate maaliif hamma ammaatti akka cubbamaa tokkootti natti murama ree?” jedhee falma taʼa. 8Kunis isa namoonni tokko tokko, “Isaan, ‘Akka wanni gaariin dhufuuf hammina haa hojjennu?’ jedhu” jedhanii nurratti odeessisanii dha. Murtiin isaanitti muramus waanuma maluu dha!
Namni Kam iyyuu Qajeelaa miti
9Egaa maal jenna ree? Nu Yihuudoonni warra kaan caallaa? Gonkumaa akkas miti! Akka Yihuudoonnii fi Giriikonni hundinuu cubbuu jala jiran duraan dursinee mirkaneessineerraatii. 10Kunis kan akkana jedhamee barreeffamee dha:
“Qajeelaan tokko iyyuu hin jiru; namni tokko iyyuu;
11namni hubannaa qabu,
kan Allaah barbaadu tokko iyyuu hin jiru.
12Hundinuu dogoggoraniiru;
walumatti warra faayidaa hin qabne taʼaniiru;
namni waan gaarii hojjetu tokko iyyuu hin jiru;
tokkumti iyyuu hin jiru.”#3:12 Zab 14:1‑3; 53:1‑3; Lal 7:20
13“Laagaan isaanii qabrii banamaa dha;
arraba isaaniitiin ni gowwoomsu.”#3:13 Zab 5:9
“Hadhaan buutii hidhii isaanii jala jira.”#3:13 Zab 140:3
14“Afaan isaanii abaarsaa fi hadhaaʼummaan guutame.”#3:14 Zab 10:7
15“Miilli isaanii dhiiga dhangalaasuutti ariifata;
16badiisaa fi gadadootu karaa isaanii irra jira;
17karaa nagaas hin beekan.”#3:17 Isa 59:7,8
18“Allaah sodaachuun ija isaanii dura hin jiru.”#3:18 Zab 36:1
19Akka afaan hundi cufamuu fi akka addunyaan hundinuu murtii Allaaha jala galuuf, wanni seerri jedhu hundinuu akka warra seera jala jiraniif dubbatu ni beekna. 20Kanaafis eenyu iyyuu seera eeguudhaan fuula Allaaha duratti qajeelaa hin taʼu; seeratu cubbuu nu hubachiisaatii.
Qajeelummaa Amantiin Argamu
21Amma garuu qajeelummaan Allaahan kennamu kan seeraan adda taʼe, kan Seerrii fi Nabiiʼiyyoonni dhugaa baʼaniif mulʼateera. 22Qajeelummaan Allaaha kun amantiidhaan warra Iisaa Al-Masiihitti amanan hundaaf kennama; nama wal caalchisuun hin jiru; 23sababii hundi isaanii iyyuu cubbuu hojjetaniif isaan ulfina Allaaha irraa citaniiruutii; 24isaanis ayyaana Allaaha isa furama karaa Al-Masiihi Iisaatiin toluma kennameefiin qajeeltota taasifamaniiru. 25Dhiiga isaatti amantii qabaachuudhaanis akka inni aarsaa araaraa taʼuuf Allaahan isa dhiʼeesse. Waan kana gochuun isaas cubbuu kanaan dura hojjetame utuu hin adabin waan obsaan bira darbeef qajeelina isaa argisiisuuf jedhee ti; 26Allaahan yeroo ammaa qajeelummaa isaa argisiisuu fi akka nama Iisaatti amanus qajeelaa taʼuu isaa labsuuf waan kana godhe.
Seerri Kennamuu Isaa
27Yoos of tuuluun eessa jira ree? Inni hafeera. Seera kamiin? Seera eeguudhaan moo? Miti; seera amantiitiin malee. 28Nu akka namni seera eeguudhaan utuu hin taʼin amantiidhaan qajeelaa taasifamu ni amannaatii. 29Allaahan Allaah Yihuudootaa qofa moo? Inni Allaah Namoota Ormaas mitii? Eeyyee, inni Allaah Namoota Ormaatis; 30egaa kan dhagna qabates amantiin, kan dhagna hin qabatinis amantiidhuma sanaan qajeelaa kan taasisu Allaah tokkicha. 31Yoos nu amantii kanaan seera sana cabsinaa ree? Gonkumaa akkas miti! Seericha ni cimsina malee.
Biblica® Katabbiiwwan Qulqulluu, Turjumaana Ammayyaa Banamaa™
Mirgi seeraan eegama © 2024 Biblica, Inc.
Biblica® Open Oromo Contemporary Scriptures™
Copyright © 2024 by Biblica, Inc.