Melélíe 9

Gubídun guá Sól

1Uguá ginɛŋ giáguɔ́ igigányɛ, Sól umasánihinan gudánanɛn bebinene bá Ɔgúná nigué. Uwɛɛ́d agá ɔgúnɔ́gɔ́n wa bedúmbinusámb nuá Uhaluá, 2gá gueleé wɔɔ́ŋɛ́n yɔ́ duhul gá busió buá bíŋín uguá bigúl ibínya Damás, nuhul unúéŋeneé yɔ́ bugaga buá gueleé úmégégie bandɔ ebébineneé ŋŋil ya Ɔgúná, ta bagándɔ ta banúmɔndɔ ugimben bɔ́, ugúda bɔ́ gá guɛ́d nɔɔ́nɔb Yelusalɛ́m. 3Umabá uganyɛ uguá ŋŋil ya guɛ́d Damás, mɔdɔg áneé weneg agá tísɔna, hɔ́nɔhɔ́, giandá giá gise igíónoólín ugumɔn, igíéhúgígen yɔ́. 4Uwagua, uwɔɔ́b ugelu húɔ́yɔn yɔ́ áneé: «Sól, Sól, gá giagɛ éŋényígenyeé? » 5Uwoóhún yɔ́ áneé: «Aŋuá ányá Ɔgúná? » Ugelu uhúóndinye yɔ́ áneé: «Nnyɛ Yésuse, yaŋuá égényígenyeé. 6Gɔgaá, adígɛ́n, bíŋín uguá tísɔna, hɔ́ bɔ́gɔ́guɔyidɛn ubuɔ́ ógódionu áneé al. » 7Biendinyi biá Sól biá uŋand ibíédélímin, ta guámbɔ́n niíd na bugádɔ, bíɔ́bɔn ugelu gɔgaá, bímasúguánan mɔndɔ. 8Sól uwadigɛn gɔgaá, ta haná úmabá eŋís eyebunénu, umasánduguánan buand. Ebégimbin yɔ́ uguá ɔmbɔ́g gá guɛ́d neéneg Damás. 9Uwagíga hɔ́ mɔɔ́sɛ mádádɔ kanduguánan, kanda buand buá nyá ta buá bíhuá.

10Ebinene omodi umabá Damás, ɔhɛ́n áneé Ananiás. Ɔgúná uwebíéníginye yɔ́, ɔwɔyidɛn yɔ́ áneé: «Ananiás!» Ananiás uwaádáab áneé: «Ɔgúná, Yaŋuá uyɔ. » 11Ɔgúná gég áneé: «Agaáguɛ́d uguá gibala igiɛ́ bɔ́dɔ́ŋɔnaá áneé gibala Gindényé ebíŋín uguá giansɛ giá Yúdas, oóhún mɔndɔ wa gidɔŋ giá Táls, ɔhɛ́n áneé Sól unyɛ hɔ́, woóbísógólonye dabdab. 12Uguá nuénígie, usaán mɔndɔ ɔhɛ́n áneé Ananiás usabá ubíŋen wond udɔ́bígɔn yɔ́ imbɔ́g gá gueleé wanduguɛ́d gá guánan.» 13Ananiás uwondinye áneé «Ɔgúná giod giá bandɔ gíɔ́ŋɔyɔn buonyi buá mɔndɔ ugányɛ, gíɔ́ŋɔyɔn bifal gidigid ibiɛ́ waál beédébi báhɔ abánya Yelusalɛ́m. 14Gúu woól agá na buŋaŋa ubuɔ́ bɔgúnɔ́gɔ́n bá bedúmbinusámb bá Uhaluá béŋín yɔ́, buá gueleé ugimben bandɔ gidigid obóbísógólonyeé uguáhɔ guá ɔhɛ́n ugúda bɔ́.» 15Gɔgaá, Ɔgúná uwɔyidɛn yɔ́ áneé: «Idá, gá giagiá yeéyíd mɔndɔ ugányɛ gá ŋalan buóli, ugɔya ɔhɛ́n huámɛ uguá maán mómodi, wɔyɔn ifuŋ siɔ́b naá uguá gidɔŋ giá Íslayɛ́l. 16Ɛɛ́ɛ, ŋŋedíye yɔ́ yaŋuá mbánan giɔ́bíga igiɛ́ úgódionú áneé wɔɔ́bígɔn gámɛ gá ɔhɛ́n. » 17Ananiás gɔg uwɛɛ́d. Uwebíŋín uguá giansɛ, uwɔdɔ́bígɛn Sól imbɔ́g, úmuanyɛ gég áneé: «Ndiméen wamɛ Sól, Ɔgúná Yésuse weébíénígínyé uguá ŋŋil iyɛɛ́ ólónín guɔ́, umándɔ́m áneé eŋís yahɔ yébíbun ond gá guánan, ohón na Gileénde giá Budányɛ. » 18Hɔ́nɔhɔ́, muand mpónyé na biísia umúólígonye uguég guá eŋís umúáguan, uwanduguɛ́d gá guánan, uwadigɛn obónd ebéyuminye yɔ́. 19Egélém agányɛ, uwanyá buand, uwabia bugaga.

Sól woódógonye Nugálɔ nuá Uhaluá Damás

Sól uwagígɛ́ɛd baán bá mɔɔ́sɛ na bebinene Damás, 20uwedúmbie guɛ́d gá dógonye Ginɔ́g giá Nsɔ́m uguá bigúl, wɔya áneé Yésuse unyɛ Muɔ́n wa Uhaluá. 21Bandɔ gidigdid ɔbɔ́mɔbídɔ́lígɔ́n yɔ́ abáyíka buɔ́, bóbióhon áneé: «Búdibá mɔndɔ uwaábá ugényigenye bandɔ obóbísógólónyé uguá ɔhɛ́n huá Yésuse Yelusalɛ́m a? Búdibá úmuanyɛ muɛ́d uwoól áneé wesigimbén bandɔ ugúda bɔ́ gá guɛ́d nɔɔ́nɔb agá bɔgúnɔ́gɔ́n bá bedúmbinusámb a? » 22Gɔgaá, Sól umabá udúmbenye na gálgal kanda bugádɔ mɔɔ́sɛ gidigid, bayúdɛn abámabá bɔ́sɔ́dɔn Damás bámasándalɛns buá guondinye yɔ́, gá giagiá umedíyényé bɔ́ áneé Yésuse unyɛ Bémeyíde.

23Giandá giá ginɛŋ gímaámádɔ́mb, bayúdɛn abágɔ́d idɔg áneé bɔ́n Sól. 24Sól gɔg uwɔɔ́b nugúda nuɔ́b nuá idɔg. Bámabá bágíga nibíŋínín niá tísɔna na budúg na buɔ́sɛ gá gueleé, úmáhám bɔ́n yɔ́. 25Gɔgaá, na budúg búmodi, bebinene bá Sól ɔbɔ́gɔ́l yɔ́, abág yɔ́ uguá idɛd gá hémie yɔ́ na agɔ́n unó wa igága.

Sól uméneg Yelusalɛ́m

26Sól umeéméneg Yelusalɛ́m, uwambɛd gubíŋíŋ uguá ɔlɔŋ huá bebinene, gɔgaá, bámuanyɛ gidigid bámabianán bugádɔ neéneg, gá giagiá bámasúguádáaban áneé uganyɛ mbanda ya ebinene. 27Balnábas uwɔgɔ́l yɔ́ gɔg, uwɛɛ́d neéneg agá gimbi giá medenyi. Uwɔyɔn bɔ́ haná Sól úmaán Ɔgúná uguá ŋŋil ya Damás na haná úmagálgál neéneg. Uwond uwɔyɔn bɔ́ haná Sól úmodógónyé Ginɔ́g giá Nsɔ́m uguá ɔhɛ́n huá Yésuse Damás kanda bugádɔ. 28Gubul uguá ginɛŋ igigányɛ, Sól uwagɔns guanda nɔɔ́nɔb, ubúlɛ́ɛg usɔs Yelusalɛ́m gá dógonye kanda bugádɔ Nugálɔ nuá Ɔgúná uguég guá ɔhɛ́n. 29Umabá ugálgal na bayúdɛn abámabá bágálgal nuglɛ́k, uségenye nɔɔ́nɔb, gɔgaá, bámuanyɛ bámabá bámba guɔ́n yɔ́. 30Beliméen bɔ́mɔɔ́mɔ́b anagányɛ, abádɔ́m Sól Sesalé, agányɛ ebédúmbie yɔ́ Táls.

31Uguá ginɛŋ giáguɔ́, Gimbi giá beédébi bá Klístus giá gibéyi giá guísi giá Yudé, giá Galilé naá giá Samalí gímɔsɔ́dɔ́n uguá bumbénu. Gímabá gígúnínan gíbísusenye agá eŋís ya Ɔgúná, Gileénde giá Budányɛ gígígenin giɛ́ ɔmbɔ́g, gíguman.

Gióndúgie giá Ené agá tísɔna wa Lída

32Henyé, Piéle umabá wanda uguá gidɔŋ gidigid, buɔ́sɛ búmodi, uwɛɛ́d agá Gimbi giá beédébi bá Klístus igímabá agá tísɔna wa Lída. 33Uwegégie mɔndɔ omodi hɔ́ ɔhɛ́n áneé Ené, bidimina egég gá nubambálɛ́n na buánana, umabá uganyɛ naá buɔ́ duɔŋ duánímanyɛ. 34Piéle uwɔyidɛn yɔ́ áneé: «Ené, Yésuse Klístus umóguóndúgíe, adígɛ́n aŋuá mbánan aŋan nubambálɛ́n nuáhɔ!» Hɔ́nɔhɔ́, Ené uwadigɛn. 35Bandɔ bá Lída gidigid naá bá gisáb giá Salɔ́n abán yɔ́, ebédúmbie guádáab Ɔgúná.

Piéle umóndie ugándɔ ɔhɛ́n áneé Tabíta uguá nusɔ́da

36Ebinene wa ugándɔ ɔhɛ́n áneé Tabíta, anagányɛ gúnya áneé: «Dɔlkás» na nuglɛ́k, gá guɔyɛd áneé «nsɔnd» umabá agá tísɔna wa Yopé, umabá mpuán nsesi, ugígenin basúgasuga ɔmbɔ́g. 37Uguá mɔɔ́sɛ máguɔ́, uwagua na manúma uwegué. Bémeémédumb gilɔ́ŋ giég, abánaág giɛ́ ugumɔn guá ndáŋia. 38Haná Yopé únya mɔdɔg na Lída, bebinene bá Klístus ɔbɔ́b áneé Piéle unyɛ hɔ́, abádúmɛ́ɛn yɔ́ bandɔ báandɛ na ɔdɔ́ŋína áneé: «Dimóbísógólidie, ógún gunsáns.» 39Piéle, uwedúmbie guɛ́d ɔlɔŋ nɔɔ́nɔb. Umeéméneg, ebébúlígie yɔ́ uguá ndáŋia, ebébíŋínye yɔ́ uguá nsúmba. Bisí gidigid ibímabá hɔ́ ibíégéŋélidie Piéle na masiana, bídíyenye yɔ́ bisɔn ibiɛ́ Dɔlkás umabá wala umanyɛ ɔgɔ́sɛ. 40Piéle uwehémie gɔg bandɔ gidigid, uwegunsig dunúnú uwɛɛ́d gá bísógólonye. Uwabígagalɛd gɔg gilɔ́ŋ, úmuanyɛ áneé: «Tabíta, adígɛ́n!» Tabíta uwebun eŋís, umaámán Piéle, uwadigɛn uwond uwedugumin. 41Piéle uwaganɔ́n ɔmbɔ́g uwediginye yɔ́, uwɔdɔ́ŋɛ́ɛn gɔg bisí biá bagándɔ na beédébi bá Klístus bómodi, uwedíye bɔ́ Tabíta ɔgɔ́sɛ. 42Bandɔ gidigid bá Yopé ɔbɔ́b buand gidigid ubúmabídúmban, giod igíádáab Ɔgúná. 43Piéle uwal giod giá mɔɔ́sɛ Yopé, agá nihiá niá Símune edenyi biɔmp.

Currently Selected:

Melélíe 9: EKM

Highlight

Copy