Melélíe 7

Dugálɔ duá Etiɛ́nɛ

1Ɔgúnɔ́gɔ́n wa bedúmbinusámb nuá Uhaluá uwoóhún Etiɛ́nɛ áneé: «Ubuɔ́ bɔ́yɔnɔ́ gáhɔ gá busió ubuɔ búnyɛ nɔ́ a? » 2Etiɛ́nɛ uwondinye áneé: «Beliméen na besíe bámɛ mbídɔ́lígɔ́nɔ́nɔ́n. Uhaluá ugúmenú, umebíénígenyinye ndíndíl yasɔ Áblahám agá hɔɔ́m ɔhɔɔ́ bɔ́dɔ́ŋɔnaá áneé Mesopotamí, umabá umanyɛ udienédúgúmín agaá bɔ́dɔ́ŋɔnaá áneé Halán. 3Uhaluá umɔyídɛ́n yɔ́ hɔ́ áneé: “Ólígié uguáhɔ guá gidɔŋ naá uguáhɔ guá niíd niá giansɛ, ɛɛ́d uguá gidɔŋ igiɛ́ ŋŋedíyenú.”» 4Áblahám uwoólígie gɔg uguá gidɔŋ giá Kaldé, gá guɛ́d guenedugúmín uguá tísɔna wa Halán. Egélém gá nigué niá síe, Uhaluá umal áneé woólígie Halán gá guɛ́d uguá gidɔŋ igiɛ́ núsɔ́dɔnaá guɔ́ dabdab. 5Uhaluá umesúguéŋin yɔ́ ta maná ibébéyi wa guísi, ta gibéyi giá gueg gá dɔ́bígɛn nugɔ́nd. Gɔgaá, umadánɛ́n yɔ́ áneé wanáhuá yɔ́ gidɔŋ igiánábánɔ giég, egélém gég gá nigué mbíényi siég síɔ́bɛ́n na giɛ́, ta haná Áblahám úmasádibiá muɔ́n uguá ginɛŋ giáguɔ́. 6Uhaluá uwond uwɔyidɛn Áblahám áneé: «Banana báhɔ bɔ́nɔ́sɔ́dɔn uguá bulug. Bánáyɛ biɔ́lɛ, bénégényigenye bɔ́ guɔ́ uguá duɔŋ étín átánɔ éníhi. 7Gɔgaá, yenégélenye bunɔŋ ubúénéyenú bɔ́ biɔ́lɛ. Egélém agányɛ, bónólígie uguá buɔ́lɛ bósiond aga gá ŋŋúmenye.» 8Egélém, Uhaluá uwal nigál na Áblahám, gilɛns giá niɛ́ gígínya nuansana. Nɔ́ Áblahám úmans muɔ́n wég Isáka uguá buɔ́sɛ buá gánímanyɛ buég buá nubíenyi. Isáka uwal bilɔŋ bímomi gá muɔ́n wég Yɔ́kɔba, Yɔ́kɔba súsɔ́n uwal bilɔŋ bímomi gá busió buá ndíndíl siásɔ isínya siád na íhandɛ.

9Ndíndil isigányɛ isíal ndiméen wɔb Yɔ́sɛba yaág, isíédué yɔ́ gá gueleé ubá giɔ́lɛ uguá gidɔŋ giá Egíbt. Gɔgaá, Uhaluá umabá neéneg, 10uwedúgún yɔ́ uguég guá meyú gidigid, uwond uweéŋin yɔ́ magɔg na nugedie agá eŋís ya Falaɔ́ŋ, ofuŋ huá Egíbt. Falaɔ́ŋ uwedéníginye Yɔ́sɛba ŋŋɔ́mɔna wa Egíbt gidigid naá weg wa nihiá gidigid. 11Henyé, giandá giá ɔndɔm igíágua uguá gidɔŋ giá Egíbt gidigid naá giá Kána. Bandɔ ɔbɔ́bígɔn giod, ndíndíl siásɔ símasánduguánan buand buá nyá. 12Yɔ́kɔba umɔɔ́mɔɔ́b áneé gunyá gúnyɛ uguá gidɔŋ giá Egíbt, uwadɔ́m ndíndíl siásɔ gá uŋand huá busió. 13Bómoógónd gá uŋand huá gáandɛ, Yɔ́sɛba uwebídíye agá beliméen, ofuŋ huá Egíbt uhúónd uhúálɛ́ns niíd niá giansɛ niá Yɔ́sɛba. 14Yɔ́sɛba uwadɔ́m gɔg bandɔ áneé bɔ́nɔgɔ́l síe weg Yɔ́kɔba na duɔnd duég gidigid. Bámabá bandɔ edín ádádɔ na bunyo. 15Yɔ́kɔba uwɛɛ́d gɔg uguá gidɔŋ giá Egíbt uweguín hɔ́, ndíndíl siásɔ isíéguín hɔ́ súsɔ́n. 16Ebélenye bilɔ́ŋ biɔ́b Sisɛ́m obónd abágan biɛ́ uguá bibɛ́l ibiɛ́ Áblahám úmɔɔ́nd na ŋŋúme yeg gá báan bá Emɔ́l uguá gidɔŋ giá Sisɛ́m. 17Ginɛŋ igiɛ́ Uhaluá úmɔyɛ́d gual buand ubuɔ́ úmadánɛ́n Áblahám gímasɛɛ́d mɔdɔg, buán buásɔ ubúésegidinye, ubúósiól giod uguá gidɔŋ giá Egíbt. 18Buɔ́sɛ búmodi gɔg, ofuŋ húdodi uhúɔ́gɔ́l gugimbe guá gidɔŋ giá Egíbt. Ofuŋ uhúganyɛ húmasálinsan Yɔ́sɛba. 19Ofuŋ uhugányɛ uhúɔ́nɔŋa buán buásɔ, uhúégényigenye ndíndíl siásɔ, uhúéhiligin bɔ́ áneé bébembelenye babugadiá bɔ́b, béguén. 20Ginɛŋ giáguɔ́ Mɔ́sɛsa úmebíbíén, umabá ginɔ́g giá bugadiá agá eŋís ya Uhaluá. Bómoye yɔ́ ihóli ídádɔ uguá giansɛ giá síe. 21Bémeémébembelidie Mɔ́sɛsa, ŋŋɔndɛ ya ofuŋ iyɔgɔ́l yɔ́ iyoye yɔ́ hana muɔ́n weg wa bíén. 22Mɔ́sɛsa uwahɔ́nhɔn nulinsa gidigid nuá Egíbt. Umabá ŋŋaŋa uguég guá dugálɔ naá uguég guá melélíe.

23Mɔ́sɛsa umaágányɛ na duɔŋ edín áhandɛ, nugedie unúólín yɔ́ áneé wanaán bisɔ́ndɛ biég, baán bá Íslayɛ́l. 24Mɔ́sɛsa uwaán haná bémesésényé gisɔ́nd giég, uwafa gá háŋídɛn mɔndɔ uyɔɔ́ bémegényigényé, uwɔɔ́n maná begíbtɛn. 25Uwegedenye áneé, bisɔ́ndɛ biég bígɔɔ́guɔ́b áneé uguég, Uhaluá woóguólonin bɔ́ na gisódie. Gɔgaá, bɔ́mɔsúguɔ́b. 26Mémbélényi, Mɔ́sɛsa uwaádán na baán bá Íslayɛ́l báandɛ bánuanan, uwambɛd gudúgún bɔ́, úmuanyɛ gɔ́b áneé: «Begúl bámɛ, nunyɛ bisɔ́ndɛ, gá giagɛ núnuananaá? » 27Gɔgaá, sɔ́gá umɔɔ́siɔ́nɔ́n ndiméen uwondinye yɔ́ áneé: «Ányá uweédéníginye ofuŋ na esúmbibisan wasɔ? 28Aáguamba guŋɔ́n haná ɔɔ́n maná begíbtɛn búyo a?» 29Mɔ́sɛsa umɔɔ́mɔɔ́b dugálɔ udugányɛ, uwɔbínɔh uwenedugúmín uguá bulug, uguá gidɔŋ giá Madián, uwebíén baán abanúmɔndɔ guɔ́ báandɛ. 30Egélém gá duɔŋ edín áhandɛ, gilúna igíébíéníginye yɔ́ agá uhambɛ, mɔdɔg na ɔŋuɛnyɛ huá Sinayí, uguadá guá gilɛ́mb giá yoógi uguá maná budɛ́. 31Mɔ́sɛsa uwayíka nuénígie unugányɛ. Umaágányɛ áneé ukɛl gá bíyɛg, uwɔɔ́b ugelu huá Ɔgúná húɔya áneé: 32«Nnyɛ Uhaluá wa ndíndíl siáhɔ, Uhaluá wa Áblahám, wa Isák, wa Yɔ́kɔba. Mɔ́sɛsa, na bilígímin umasándabia nimadɛ niá bíyigan.» 33Ɔgúná uwɔyidɛn yɔ́ gɔg áneé: «Bíólíe basílíbas báhɔ, gá giagiá anyɛ delimine agá gidányɛdányɛ giá hɔɔ́m.» 34Ɛɛ́ɛ, mmán bulɔ́b buá buán buámɛ uguá Egíbt mmónd mmɔ́b mbídadɛ yɔb, mmásɔs gá sódie buɔ́, dabdab idá, yɔɔ́guɔya gudɔ́m uguá Egíbt.

35Mɔ́sɛsa waáguɔ́ uyɔɔ́ bisɔ́ndɛ biég bímabísásɛ́ɛg na guɔya áneé: «Ányá uweédénígínyé ofuŋ na esúmbibisan?» Úmuanyɛ Uhaluá úmadɔ́m hana ofuŋ súsɔ́n edúgúne, uguá ŋŋɔyida ya gilúna igímebíénígínyé yɔ́ uguá maná budɛ́. 36Úmeéhémie bá Íslayelít uguá Egíbt, wala biandá biá biseyi na bilɛns uguá gidɔŋ giá Egíbt naá uguá máŋ ma mánɔ́ŋɔmánɔ́ŋá naá uguá uhambɛ uguá duɔŋ edín áhandɛ. 37Búnyɛ úmuanyɛ, Mɔ́sɛsa, úmɔɔ́yídɛ́n baán bá Íslayɛ́l áneé: «Uhaluá wenénúhémínye ebunebúné uguánɔ guá ɔlɔŋ hana yaŋuá.» 38Búnyɛ úmuanyɛ úmaábá delimine agá ɔdɛ́m na ɔdɛ́m huá gimbi giá ndíndíl siásɔ na gilúna igímagálgal neéneg agá ɔŋuɛnyɛ huá Sinayí. Úmuanyɛ úmaágíndígɛ́n dugálɔ duá nusɔ́da gá dídúmbenyinye. 39Gɔgaá, ndíndíl siásɔ símɔsúguɔya guɔ́bɛ́n yɔ́, isíɔ́biɔ́bɛn yɔ́ isíóndie dugedie duɔ́b uguá Egíbt. 40Isíɔ́yɔn gɔg Alɔ́n áneé: «Díáŋánɛ́n bá uhaluá ɔbɔ́gɔdígɔ́gɔnɔ́, gá giagía didiényi buand ubúmal Mɔ́sɛsa umeénédíhémie uguá Egíbt.» 41Uguá mɔɔ́sɛ amagányɛ abáŋan muɔ́n wa búlúke, ebéŋen giaŋana igigányɛ nusámb, abábalaga na buand ubuɔ́ bámuanyɛ mbánan bámaŋán na imbɔ́g siɔ́b. 42Gɔgaá, Uhaluá umedúm bɔ́ gélém, uwond uwanihɛn bɔ́ gá búlúgenye muódódi umúnya ugumɔn, hana búnya ubúɔ́ŋɔ́n uguá yubu hiá bebunebúné áneé:

«Buán buá Íslayɛ́l, yaŋuá númampuán manyam na dusámb dúdodi agá uhambɛ,

uguá duɔŋ edín áhandɛ a?»

43Ɛ́ɛɛ́, gɔgaá numabídúgɛ́n gilál giá uhaluá Mɔlɔ́k,

na yoódódi hiá uhaluá wanɔ Lefán,

biaŋana ibiɛ́ númalá gá búlúgenye.

Buand buáguɔ́ yénénúselienú hádɛ na agɔ́n unó wa Babilɔ́n.

44Agá uhambɛ, ndíndíl siásɔ símabídúgán gilál igímabianán yubu hiá nigál, gímabá igihágánɔ hana Uhaluá úmɔyɔ́n Mɔ́sɛsa, uwesilidin yɔ́ áneé wal giɛ́ hana igiɛ́ úmaán. 45Gilál igigányɛ gímadúmbɛ́n uguá imbɔ́g siá ndíndíl siásɔ naá siá nunam nuá gélém, isíádɔ́mb na giɛ́ uguá ginɛŋ igiɛ́ Yosué úmendényé bɔ́ gá guɛ́d guɔnɔgɔ́l bidɔŋ biá maán ibiɛ́ Uhaluá úmagúŋá uguɔ́b guá busió, abágíga na gilál igigányɛ gueneg uguá ginɛŋ giá Dáfide. 46Dáfide umabiá magɔg ma Uhaluá owond uwɔŋɛn yɔ́ bugaga buá hágɛn Uhaluá wa Yɔ́kɔba giansɛ. 47Ta nɔ́, búnyɛ Salomɔ́ŋ úmaáhágɛn Uhaluá giansɛ. 48Gɔgaá, Uhaluá unyaá hádɛ ugumɔn udiábídíman uguá biansɛ ibiɛ́ bandɔ báháganɔ́ na imbɔ́g, haná ebunebúné úmɔyɛ́d áneé:

49«Gumɔn gúnyɛ igɔ́y hiámɛ, guísi nidɔ́bígínɛn dugɔ́nd duámɛ.

Bugiansɛ búlúm nugampáginaá,

hanyɛ agaá ŋŋohogenú?

50Búdibá ɔmbɔ́g huámɛ húhúmaluŋa muand umugányɛ gidigid a?»

51«Banuá bandɔ bá iduá gulal, bá idɛ́m na idú gímbégímbé gá guɔ́b ɔdɔ́ŋína huá Uhaluá, banuá nubúgenineé Gileénde giá Budányɛ ŋŋil, nunyɛ hana ndíndíl síanɔ. 52Ebunebúné ulúm uyɔɔ́ ndíndíl síanɔ símesídigényígényé? Símɔɔ́na ebémebué gudógonye guól guá unyaá gindényé, úmuanyɛ waáguɔ́ núógió unuond, unuɔ́n. 53Numagíndígɛ́n gigodi giá Uhaluá uguá imbɔ́g siá bilúna, unuen guɔ́bɔnɛn giɛ́.»

Nigué niá Etiɛ́nɛ

54Uguá dugálɔ duá Etiɛ́nɛ udugányɛ, bandɔ gidigid bá idɔg ihigɔ́n ebéliŋ, abɛ́d gá bíbanda bigelédu na ɔhɛ́n huá Etiɛ́nɛ. 55Gɔgaá, úmuanyɛ, ohónón na Gileénde giá Budányɛ ubíyigan gumɔn uwaán nigúmi niá Uhaluá na Yésuse delimine ɔmbɔ́g uhunɛ́m huá Uhaluá. 56Uwɔyɛd gɔg áneé: «Bídɔ́lígɔ́nɔ́n, yaáguánan gumɔn ugubunénu, Muɔ́n wa mɔndɔ delimine ɔmbɔ́g uhunɛ́m huá Uhaluá.» 57Abɛ́d gɔg gá héhenye ugelu ugumɔn, bébígímbe idú. Egélém, ebéhulugin Etiɛ́nɛ hana mɔndɔ omoómi. 58Ebédúdúle yɔ́ gá hám neéneg uguá tísɔna, abɛ́d gá dúdan yɔ́ adányɛ gá guɔ́n yɔ́. Bamaáná bámaníhínɛ́n gidɛnd giá muúŋayɔ ɔhɛ́n áneé Sól bisɔn biɔ́b gá bídígɛn. 59Uguá ginɛŋ igiɛ́ bámabá bádúdan yɔ́ adányɛ, Etiɛ́ne umobísógólonye, wɔya áneé: «Ɔgúná Yésuse, gíndígɛ́n gileénde giámɛ.» 60Egélém, uwegunsigin dunúnú, uwehéhídinye na bugaga áneé: «Ɔgúná, ɔdidɔ́bígɛ́n bɔ́ gilɔga igigányɛ uguá ɔduá.» Umaámágálɛ́ɛd anagányɛ, uwegué.

Currently Selected:

Melélíe 7: EKM

Highlight

Copy