Walumi 15

Watazeni wamwenga

1Cheye chikangale muukutogola chikulondigwa kuwataza wala hawanakangala muukutogola ili wadahe kuzihuma mbuli zawe ndala. Chisekuibwedeza cheye wenyewe. 2Chila mnt'hu hagati yetu akulondigwa kuwataza wamwenga kutenda yala yadamane ili kuwazenga muukutogola Mndewa. 3Kwavila Kilisito hatendile mbuli za kuitaza mwenyewe, mbali kakala gesavila Maandiko ya Mulungu ivoyakulonga, “Madusi yose wakudukanile yanipata nie.” 4Ivo mbuli zose ziandikwe mmaandiko ya Mulungu ziandikigwa kwaajili ya kuchifunza cheye ili chifinyilize muukuhenyeka kwetu na chigelwe moyo, chidahe kuwa na lolelo. 5Mulungu nio akuchihoza moyo na akuchink'ha ufinyilizi. Elo humulomba Mulungu awatende mukale kwa moyo umwe, kwavila mkumuhiga Kilisito Yesu, 6ili mweye mose kwa hamwenga na kwa sauti imwe mdahe kumtunya Mulungu, Tata wa Mndewa wetu Yesu Kilisito.

Mbuli Idamane kwa want'hu wose

7Ivo, muihokele mweye kwa mweye, gesa Kilisito ivoawahokeleni mweye, ili want'hu wamtunye Mulungu. 8Huwalongelani kuwa Kilisito kawasank'hanila Wayahudi ili alagise ukweli wa Mulungu na kuditimiza lagano da Mulungu adiikile na wasaho wetu. 9Vilavila keza ili want'hu sio Wayahudi wamtunye Mulungu kwa ubazi wake. Gesa Maandiko ya Mulungu ivoyakulonga,

“Nanikwimbile nyila za kumtunya halongozi ha want'hu sio Wayahudi, Nani imbe nyila za kukutunya.”

10Vilavila Maandiko ya Mulungu yakulonga, “Denk'heleleni mweye want'hu sio Wayahudi hamwenga na want'hu wa Mulungu!”

11Maandiko ya Mulungu yakulonga kuwa, “Mtunyeni Mndewa mweye want'hu sio Wayahudi, Mweye want'hu wose mtunyeni Mndewa.”

12Vilavila Isaya mulotezi wa Mulungu kalonga, “Naeze mnt'hu imwe kulawa muuweleko wa Yese, nae naawalongoze want'hu sio Wayahudi, nao nawamulolele yeye kuwa naawahonye.”

13Ivo, Mulungu eli mwanduso wa kutogola, awenk'heni denk'ho na nt'hindiwalo mukutogola kwenu, ili lolelo dyenu diongezeke kwa nguvu ya Muhe wake.

Kila kilekile Paulo aandike baluwa ino

14Ndugu zangu, nie mwenyewe hutogola kuwa mweye mdamana, na mkumanya yose, na mkudaha kuifunza mweye kwa mweye. 15Mbali niwaandikila mbuli nyingi mui baluwa ino bila kuogoha, ili niwakumbuseni kwa mbuli ya wende ula anink'hile Mulungu, 16ya kuwa msank'hani wa Yesu Kilisito kwa want'hu weli sio Wayahudi. Husank'hana gesa mulavant'hambiko muna kuilonga Mbuli Idamane ya Mulungu, ili want'hu weli sio Wayahudi wawe nt'hambiko itogoligwe na Mulungu, nt'hambiko itakasigwe na Muhe wa Mulungu. 17Ivo nikawa niiyunga na Kilisito Yesu, hudaha kuigodela sank'hano yangu kwaajili ya Mulungu. 18Sikugeza kulonga mbuli yoyote ila haitendile Kilisito muisankhano yangu, hutenda vino ili want'hu sio Wayahudi wamuhulike Mulungu kwa kulonga na kutenda, 19kwa nguvu za vilagiso na uzonza, na kwa nguvu ya Muhe wa Mulungu. Kuandusila Yelusalemu hadi mmabululu yose yeli mnk'handa mnk'handa mwa Yelusalemu hadi kudibululu da Iluliko, niwalongela want'hu Mbuli Idamane ya Kilisito, sisigaze hant'hu hohote hala. 20Mzimbuli zose, hulonda niilonge Mbuli Idamane hant'hu hala Kilisito hawanammanya. Hutenda ivo ili nisekuandusa umpya sank'hano hant'hu hala mnt'hu imwenga kaiyandusa. 21Mbali gesa Maandiko ya Mulungu ivoyakulonga,

“Want'hu wala hawanalongeligwa mbuli zake, nawamuone,

na wala hawanahulika mbuli zake, nawamanye.”

Paulo akulolela kwita kudibululu dya Loma

22Mbuli iyo nio ikunitenda mala nyingi nipotwe kwiza kumwenu. 23Mbali kwavila haluse nikomeleza sank'hano yangu mui isi zino, elo, hulonda nk'hani kwiza kumwenu kwavila nikala na nk'hwina ya kutenda ivo siku nyingi, 24ivo hulolela kwiza kumwenu nikawa muinthambo yangu kwita isi ya Isipania. Mbali nanikale na mweye kwa siku ndodo na kudenk'helela hamwenga na mweye. Kamala mnitaze muint'hambo yangu kwita Isipania. 25Mbali vino haluse nimui nzila kwita Yelusalemu kwita kusank'hana sankhano ya Mulungu kwa want'hu wa Mulungu weli uko Yelusalemu. 26Kwavila want'hu wamtogole Kilisito wa Makedonia na Akaya iwadamanila kuwasangila want'hu wa Mulungu weli wachiwa uko Yelusalemu. 27Iwabwedeza kutenda ivo, kwavila want'hu si Wayahudi wahokela vint'hu va kimuhe kulawa kwa Wayahudi, vilavila nao wakulondigwa kuwasank'hanila Wayahudi kwa vint'hu vila wakuvilonda. 28Ivo, nikakomeleza sank'hano ino ya kuwenk'ha Wayahudi chila wasangilwe, naniwafoseleni niwaone nikawa muint'hambo yangu ya kwita Isipania. 29Humanya kuwa nikeza kumwenu Kilisito naawabaliki nk'hani. 30Ivo ndugu zangu, huwalomba nk'hani kwa zina da Mndewa wetu Yesu Kilisito na kwa ubwedo ula ukugaligwa na Muhe wa Mulungu, muiyunge na nie kwa kunilombele kwa Mulungu. 31Lombeni nilawe goya hagati ya want'hu wala hawakutogola weli Uyahudi, na Sank'hano yangu kula Yelusalemu idahe kutogolwa na want'hu wa Mulungu weli Yelusalemu. 32Ivo, Mulungu akabweda nanize kumwenu kwa moyo wa denkho, nikahumule hamwenga na mweye. 33Mulungu akugala nthindiwalo akale hamwenga na mweye mose. Tawile.

Currently Selected:

Walumi 15: DBV

Highlight

Copy