Matayi 12
12
Yesu na saba
(Mlk 2.23-28; Luk 6.1-5)
1Mu kilumbu ki saba, Yesu wedi wuhyokila mu mfuba zibele. Milongoki myandi mibaka nsatu, na mitona mu kwe hedi mbutu zibele, na mu kwe dye zo. 2Bafalisi bu bayena bobo bata ti: «Tala milongoki myaku mina hidika misamu mi bakanikina mu kilumbu ki saba!» 3Yesu wubavutudila ti: «Lutanga ko misamu mihidika Davidi bu kaba na nsatu, yandi mpe na bantu baba nandi kintwadi e? 4Wukota mu nzo-Nzambi, mpe badya mampa ma minkayulu, mpeleko zinganga-Nzambi kwandi zii na luve lwe dya mo, kansi ka yandi na bantu baba nandi kintwadi ko. 5Hoti lutanga mu Misiku mi Mose ko ti, mu kilumbu ki saba, zinganga-Nzambi zikwe salanga mu nzo-Nzambi bakwe tingunanga musiku wu saba, kondo mu baka kibila e? 6Kansi, meno nina luteela ti, ehaha, ha na kima kivudidi bunene na nzo-Nzambi! 7Tala ti lutomini zaba mbangudulu eyi: Meno mutima wumbote ntiidi, ka munkayulu ko, nganunu luheeni kitumbu ku bantu balembolo sa kibila ko. 8Mu dyambu ti Mwana Muntu wudi Mfumu yi saba.»
Yesu wunyakisa bakala diba na kooko kusyoka
(Mlk 3.1-6; Luk 6.6-11)
9Yesu wukatuka hoho na wukota mu nzo yi lusambulu yi Bayudayo. 10Muba na bakala dimosi diba na kooko kusyoka. Bafuula ku Yesu ti: «Nganunu bufwanakani mu nyakisa mu kilumbu ki saba e?» Mwanki ba baka kibila kiba mufundila. 11Yesu wubavutudila ti: «Nkye muntu ha kati dyeno wuna dimeme dimosi, na dibwidi mu kati dibulu mu kilumbu ki saba, kakwe dye tombola ko e? 12Bwedi, muntu kavudidi dimeme mfunu ko e? Buna, bufwanakani mu hidika musamu wumbote mu kilumbu ki saba.»
13Buna, wuta ku muntu ti: «Lambula kooko kwaku.» Ni kalambula ko, mboki kooko kwandi ku hilama bonso bu ba kuhiika. 14Bafalisi baduuka, na bamusila mfundu mu zaba bwedi bamuhondila.
Yesu ni Kisadi ki soola Nzambi
15Yesu bu kayuwa musamu bewowo, wusisa kifulu bekyokyo na mpumbu yiyinene yi bantu yi mulanda. Wunyakisa mbevo zimvimba, 16kansi Yesu wubakanikina mu ngolo mu lembolo muzabikisa ku bantu. 17Mwanki misamu mi ta mumbikudi Yesaya myenda detila:
18«Ki ni kisadi kyani ki nasodidi,
ki ntomini tya na kyese kyani kimvimba kii mu yandi.
Nina tuula Mpeve ani mu yandi
na wuna samuna lunungu ku nsi zimvimba.
19Kaasosa mayuma ko na kaazangula ndinga ko,
baayuwa mbembo andi mu nzila ko.
20Kaabokola dyadya di fumbama ko
na kaazima mwinda wuna lembolo toma lema ko.
Bwabobo kaasadila natee bu kanungisi lunungu,
21na nsi zimvimba zaasa kivuvu kyawu mu nkumbu andi.»
Mvutu yi Yesu ku Bafalisi
(Mlk 3.22-30; Luk 11.14-23)
22Bamutwadila bakala dimosi diba mpofo na baba, mu dyambu ti mpeve yimbi yi ba nandi. Yesu wumunyakisa, ni katona mu zonza na mu yena. 23Mpumbu yi bantu yiyituku na yita ti: «Yanduwu ka mwana wu Davidi ko e?» 24Bafalisi bu bayuwa bobo bata ti: «Muntu bewuwu mu lulendo lu Belizebuli#12.24 Belizebuli: nkumbu yihiika yi Satana, mfumu yi mpeve zimbi, kana kumina mpeve zimbi!» 25Kansi Yesu wuzaba mayindu mawu na wubateela ti: «Tala ti bantu bakintinu kimosi bakabukidi yawu na yawu kimwangani. Yonso mbanza hoti nzo yidi ti bantu ba bakabuka yawu na yawu, yilendi tatamana mu zingila ko. 26Tala ti Satana wuna kuma satana, wu wukabuka yandi bende. Bwedi kimfumu kyandi kyaatatamana mu zingila e? 27Tala ti meno, mu lulendo lu Belizebuli nina kwe kumini mpeve zimbi, baala beno mu lulendo lu nani bakwe zi kuminanga e? Ni hahoho, baala beno baaba mimfundisi myeno. 28Kansi, tala ti mu Mpeve yi Nzambi nina kumina mpeve zimbi, kedika Kimfumu ki Nzambi bwabu ki tudidi ku yeno.
29Kunani muntu wulenda kota mu nzo yi muntu wuu na ngolo mu muzika mvwilu andi yimvimba, tala ti ka mubindikidi ntete misinga ko. Ni bwabobo kaamuzikila mvwilu andi yimvimba yi mu nzo andi. 30Wonso lembolo ba nani kintwadi, mbeni ani kadi, mpe yondowo kwe lembolo yonzikanga kintwadi nani, kwe mwangisanga. 31Ni hahoho nina luteela ti: Balendi lemvokila bantu bahidikidi masumu, na basafudi Nzambi: kansi wonso waasafula Mpeve Yilongo kalendi tambula ndemvokolo ko. 32Wonso waatyaka Mwana Muntu, baamulemvokila, kansi wonso waatyaka Mpeve Yilongo, baamulemvokila ko, ni yiba mu ntangu beyiyi hoti mu ntangu yina kwiza.
Kadi muti na mbutu zandi
(Luk 6.43-45)
33Mu baka mbutu zimbote, muti wufweti ba wumbote. Tala ti muti wumbi wuu naku, mbutu mpe zimbi waabaka. Mu dyambu ti, bakwe zabilanga muti mu mbutu zandi. 34Kanda di zimpidi! Bwedi lulendi teela misamu mimbote, yeno luu nkatika bantu bambi e? Mu dyambu ti mikwe duukisanga munwa, myamyomyo mifulukidi mu mutima. 35Muntu wumbote, kwe duukisanga misamu mimbote mu mutima andi wuu wufuluka mu misamu mimbote, kansi muntu wumbi kwe duukisanga misamu mimbi mu mutima andi wuu wufuluka mu misamu mimbi. 36Nkatika nina luteela ti: mu kilumbu kimfundusu, kadi muntu waavutula zimvutu mu misamu mimvimba milembolo fwanakana mi ka duukisa ha munwa andi. 37Kadi ni mu misamu mikwe duukisanga ha munwa aku ba ku nungisina, mpe ni mu misamu mikwe duukisanga ha munwa aku ba ku bedisila.»
Bafalisi balombidi kidimbu
(Mlk 8.11-12; Luk 11.29-32)
38Mwa ndambu yi milongisi mi Misiku na Bafalisi bateela Yesu ti: «Mulongisi, tutidi wu tulonka kidimbu kingitukulu, tuyena kyo.» 39Yesu wubateela ti: «Mbandu beyiyi yimbi na yi kinsuza yina sosa kidimbu, kansi ku kidimbu ki kaka kiba lulonka ko, tala ti ka ki mumbikudi Yona ko. 40Kadi bonso Yona wusa bilumbu bitatu na mpimpa zitatu mu kati di moyo wu mbizi yiyinene, Mwana Muntu mpe waasa bilumbu bitatu na mpimpa zitatu ku nsye butoto. 41Mu kilumbu kimfundusu, bantu bambanza yi Ninive baatelama ha kimosi na mbandu beyiyi, babedisa yo, mu dyambu ti bisi-Ninive bavilula madyela bu bayuwa ndongolo yi Yona. Kansi, ehaha, ha na muntu wuvudidi Yona! 42Mu kilumbu ki mfundusu, ntinu yi mukento yi nsi yi Sude yaatelama ha ntadisi yi mbandu beyiyi, waabedisa yo, mu dyambu ti wufuma ku nsi zi sukina butoto mu kwiza yuwa mambu ma ntinu Solomo ma fuluka mu ndwenga. Kansi, ehaha, ha na muntu wuvudidi ntinu Solomo!
Mvutukulu yi mpeve yimbi mu muntu
(Luk 11.24-26)
43Tala ti mpeve yimbi yi totokidi mu muntu, yakwe dyengila ku nsi yinkatu mu kwe sosa kibuka ki kaaba. Tala ti kabeki kyo ko, 44mbo yita ti: “Mbote bu navutukidi ku nzo ani yi nasisidi.” Bu yaavutuka, bweni yo yimpamba, yikombolo na yihidiku bumbote. 45Ni hahoho, bu yakwe landa mpeve nsambwadi zihiika zi muvudidi bubi, bu zaakwiza kintwadi nandi, zaakota mpe zaazakala momo. Ku manima kitezo ki muntu bewowo kyaalutila ku koba na bu kabedi ntete. Bwabobo mpe bwaaba ku mbandu beyiyi yimbi.»
Ngudi na mpangi zi Yesu
(Mlk 3.31-35; Luk 8.19-21)
46Yesu bu kedi zonza ntete ku mpumbu yi bantu, ngudi andi na mpangi zandi baba batelama ha mbazi na basosa mu zonza nandi. 47Muntu wumosi wuteela Yesu ti: «Ngudi aku na mpangi zaku ha mbazi baa batelama, mpe batiidi mu zonza naku.» 48Kansi Yesu wuvutula ti: «Nani wuu ngudi ani mpe banani baa zimpangi zani e?» 49Mboki wulambula kooko ku milongoki myandi na wuta ti: «Taleeno! Ngudi ani na zimpangi zani eba! 50Mu dyambu ti, wonso muntu kwe sadilanga luzolo lu Tata ani wu ku mazulu, yandi wuu mpangi ani, kibusi kyani mpe ngudi ani.»
Currently Selected:
Matayi 12: dde Ddo
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
Matayi 12
12
Yesu na saba
(Mlk 2.23-28; Luk 6.1-5)
1Mu kilumbu ki saba, Yesu wedi wuhyokila mu mfuba zibele. Milongoki myandi mibaka nsatu, na mitona mu kwe hedi mbutu zibele, na mu kwe dye zo. 2Bafalisi bu bayena bobo bata ti: «Tala milongoki myaku mina hidika misamu mi bakanikina mu kilumbu ki saba!» 3Yesu wubavutudila ti: «Lutanga ko misamu mihidika Davidi bu kaba na nsatu, yandi mpe na bantu baba nandi kintwadi e? 4Wukota mu nzo-Nzambi, mpe badya mampa ma minkayulu, mpeleko zinganga-Nzambi kwandi zii na luve lwe dya mo, kansi ka yandi na bantu baba nandi kintwadi ko. 5Hoti lutanga mu Misiku mi Mose ko ti, mu kilumbu ki saba, zinganga-Nzambi zikwe salanga mu nzo-Nzambi bakwe tingunanga musiku wu saba, kondo mu baka kibila e? 6Kansi, meno nina luteela ti, ehaha, ha na kima kivudidi bunene na nzo-Nzambi! 7Tala ti lutomini zaba mbangudulu eyi: Meno mutima wumbote ntiidi, ka munkayulu ko, nganunu luheeni kitumbu ku bantu balembolo sa kibila ko. 8Mu dyambu ti Mwana Muntu wudi Mfumu yi saba.»
Yesu wunyakisa bakala diba na kooko kusyoka
(Mlk 3.1-6; Luk 6.6-11)
9Yesu wukatuka hoho na wukota mu nzo yi lusambulu yi Bayudayo. 10Muba na bakala dimosi diba na kooko kusyoka. Bafuula ku Yesu ti: «Nganunu bufwanakani mu nyakisa mu kilumbu ki saba e?» Mwanki ba baka kibila kiba mufundila. 11Yesu wubavutudila ti: «Nkye muntu ha kati dyeno wuna dimeme dimosi, na dibwidi mu kati dibulu mu kilumbu ki saba, kakwe dye tombola ko e? 12Bwedi, muntu kavudidi dimeme mfunu ko e? Buna, bufwanakani mu hidika musamu wumbote mu kilumbu ki saba.»
13Buna, wuta ku muntu ti: «Lambula kooko kwaku.» Ni kalambula ko, mboki kooko kwandi ku hilama bonso bu ba kuhiika. 14Bafalisi baduuka, na bamusila mfundu mu zaba bwedi bamuhondila.
Yesu ni Kisadi ki soola Nzambi
15Yesu bu kayuwa musamu bewowo, wusisa kifulu bekyokyo na mpumbu yiyinene yi bantu yi mulanda. Wunyakisa mbevo zimvimba, 16kansi Yesu wubakanikina mu ngolo mu lembolo muzabikisa ku bantu. 17Mwanki misamu mi ta mumbikudi Yesaya myenda detila:
18«Ki ni kisadi kyani ki nasodidi,
ki ntomini tya na kyese kyani kimvimba kii mu yandi.
Nina tuula Mpeve ani mu yandi
na wuna samuna lunungu ku nsi zimvimba.
19Kaasosa mayuma ko na kaazangula ndinga ko,
baayuwa mbembo andi mu nzila ko.
20Kaabokola dyadya di fumbama ko
na kaazima mwinda wuna lembolo toma lema ko.
Bwabobo kaasadila natee bu kanungisi lunungu,
21na nsi zimvimba zaasa kivuvu kyawu mu nkumbu andi.»
Mvutu yi Yesu ku Bafalisi
(Mlk 3.22-30; Luk 11.14-23)
22Bamutwadila bakala dimosi diba mpofo na baba, mu dyambu ti mpeve yimbi yi ba nandi. Yesu wumunyakisa, ni katona mu zonza na mu yena. 23Mpumbu yi bantu yiyituku na yita ti: «Yanduwu ka mwana wu Davidi ko e?» 24Bafalisi bu bayuwa bobo bata ti: «Muntu bewuwu mu lulendo lu Belizebuli#12.24 Belizebuli: nkumbu yihiika yi Satana, mfumu yi mpeve zimbi, kana kumina mpeve zimbi!» 25Kansi Yesu wuzaba mayindu mawu na wubateela ti: «Tala ti bantu bakintinu kimosi bakabukidi yawu na yawu kimwangani. Yonso mbanza hoti nzo yidi ti bantu ba bakabuka yawu na yawu, yilendi tatamana mu zingila ko. 26Tala ti Satana wuna kuma satana, wu wukabuka yandi bende. Bwedi kimfumu kyandi kyaatatamana mu zingila e? 27Tala ti meno, mu lulendo lu Belizebuli nina kwe kumini mpeve zimbi, baala beno mu lulendo lu nani bakwe zi kuminanga e? Ni hahoho, baala beno baaba mimfundisi myeno. 28Kansi, tala ti mu Mpeve yi Nzambi nina kumina mpeve zimbi, kedika Kimfumu ki Nzambi bwabu ki tudidi ku yeno.
29Kunani muntu wulenda kota mu nzo yi muntu wuu na ngolo mu muzika mvwilu andi yimvimba, tala ti ka mubindikidi ntete misinga ko. Ni bwabobo kaamuzikila mvwilu andi yimvimba yi mu nzo andi. 30Wonso lembolo ba nani kintwadi, mbeni ani kadi, mpe yondowo kwe lembolo yonzikanga kintwadi nani, kwe mwangisanga. 31Ni hahoho nina luteela ti: Balendi lemvokila bantu bahidikidi masumu, na basafudi Nzambi: kansi wonso waasafula Mpeve Yilongo kalendi tambula ndemvokolo ko. 32Wonso waatyaka Mwana Muntu, baamulemvokila, kansi wonso waatyaka Mpeve Yilongo, baamulemvokila ko, ni yiba mu ntangu beyiyi hoti mu ntangu yina kwiza.
Kadi muti na mbutu zandi
(Luk 6.43-45)
33Mu baka mbutu zimbote, muti wufweti ba wumbote. Tala ti muti wumbi wuu naku, mbutu mpe zimbi waabaka. Mu dyambu ti, bakwe zabilanga muti mu mbutu zandi. 34Kanda di zimpidi! Bwedi lulendi teela misamu mimbote, yeno luu nkatika bantu bambi e? Mu dyambu ti mikwe duukisanga munwa, myamyomyo mifulukidi mu mutima. 35Muntu wumbote, kwe duukisanga misamu mimbote mu mutima andi wuu wufuluka mu misamu mimbote, kansi muntu wumbi kwe duukisanga misamu mimbi mu mutima andi wuu wufuluka mu misamu mimbi. 36Nkatika nina luteela ti: mu kilumbu kimfundusu, kadi muntu waavutula zimvutu mu misamu mimvimba milembolo fwanakana mi ka duukisa ha munwa andi. 37Kadi ni mu misamu mikwe duukisanga ha munwa aku ba ku nungisina, mpe ni mu misamu mikwe duukisanga ha munwa aku ba ku bedisila.»
Bafalisi balombidi kidimbu
(Mlk 8.11-12; Luk 11.29-32)
38Mwa ndambu yi milongisi mi Misiku na Bafalisi bateela Yesu ti: «Mulongisi, tutidi wu tulonka kidimbu kingitukulu, tuyena kyo.» 39Yesu wubateela ti: «Mbandu beyiyi yimbi na yi kinsuza yina sosa kidimbu, kansi ku kidimbu ki kaka kiba lulonka ko, tala ti ka ki mumbikudi Yona ko. 40Kadi bonso Yona wusa bilumbu bitatu na mpimpa zitatu mu kati di moyo wu mbizi yiyinene, Mwana Muntu mpe waasa bilumbu bitatu na mpimpa zitatu ku nsye butoto. 41Mu kilumbu kimfundusu, bantu bambanza yi Ninive baatelama ha kimosi na mbandu beyiyi, babedisa yo, mu dyambu ti bisi-Ninive bavilula madyela bu bayuwa ndongolo yi Yona. Kansi, ehaha, ha na muntu wuvudidi Yona! 42Mu kilumbu ki mfundusu, ntinu yi mukento yi nsi yi Sude yaatelama ha ntadisi yi mbandu beyiyi, waabedisa yo, mu dyambu ti wufuma ku nsi zi sukina butoto mu kwiza yuwa mambu ma ntinu Solomo ma fuluka mu ndwenga. Kansi, ehaha, ha na muntu wuvudidi ntinu Solomo!
Mvutukulu yi mpeve yimbi mu muntu
(Luk 11.24-26)
43Tala ti mpeve yimbi yi totokidi mu muntu, yakwe dyengila ku nsi yinkatu mu kwe sosa kibuka ki kaaba. Tala ti kabeki kyo ko, 44mbo yita ti: “Mbote bu navutukidi ku nzo ani yi nasisidi.” Bu yaavutuka, bweni yo yimpamba, yikombolo na yihidiku bumbote. 45Ni hahoho, bu yakwe landa mpeve nsambwadi zihiika zi muvudidi bubi, bu zaakwiza kintwadi nandi, zaakota mpe zaazakala momo. Ku manima kitezo ki muntu bewowo kyaalutila ku koba na bu kabedi ntete. Bwabobo mpe bwaaba ku mbandu beyiyi yimbi.»
Ngudi na mpangi zi Yesu
(Mlk 3.31-35; Luk 8.19-21)
46Yesu bu kedi zonza ntete ku mpumbu yi bantu, ngudi andi na mpangi zandi baba batelama ha mbazi na basosa mu zonza nandi. 47Muntu wumosi wuteela Yesu ti: «Ngudi aku na mpangi zaku ha mbazi baa batelama, mpe batiidi mu zonza naku.» 48Kansi Yesu wuvutula ti: «Nani wuu ngudi ani mpe banani baa zimpangi zani e?» 49Mboki wulambula kooko ku milongoki myandi na wuta ti: «Taleeno! Ngudi ani na zimpangi zani eba! 50Mu dyambu ti, wonso muntu kwe sadilanga luzolo lu Tata ani wu ku mazulu, yandi wuu mpangi ani, kibusi kyani mpe ngudi ani.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.