Mavanga 23

1Pawuli wusungimina kimvuka ki bakuluntu ba Bayudayo na wuta ti: «Mpangi zani, ndyatulu ani yimbote yidi ha ntadisi yi Nzambi natee kilumbu ki bubedidi.» 2Mfumu nganga-Nzambi Ananiase wutuma ku yobobo baba bela-bela nandi bamukata mu munwa. 3Ni hahoho Pawuli kamuteela ti: «Ngeye Nzambi kakaata, bonso kibaka ki bakusidi mpemba wudi! Ngeye zakadi ehaha mu mfundisa bonso buna tumina Misiku, hoti mu safula myo bu wuna lomba ti bankaata e?» 4Yobobo baba bela-bela na Pawuli, bamuteela ti: «Mfumu nganga-Nzambi wuna tuka!» 5Pawuli wuvutula ti: «Mpangi zani, nkwe zaba ko ti mfumu nganga-Nzambi kadi. Mu dyambu ti wusonama: “Kutukandi mfumu di kanda dyaku ko!”»

6Pawuli wuzaba ti mu kimvuka ki bakuluntu ba Bayudayo, ndambu baba Basaduki, ndambu yihiika Bafalisi. Wuzonza mu ngolo ha ntadisi awu ti: «Mpangi zani, meno Mufalisi nidi, mwana wu Mufalisi. Mu dyambu di kivuvu kyeto mu mfulukulu mu bafwa nina fundusulu.» 7Bu kamana zonza bobo, Bafalisi na Basaduki batona muyumana, na nkabani yikota ha bundu. 8Mu dyambu ti Basaduki bakwe tanga ti: kuu na mfulukulu yi bafwa ko, kuu na mbazi ko, na kuu na mpeve ko. Kansi Bafalisi yawu bakwe kwikilanga mu mimvimba bemyomyo. 9Lusuku luhyokila kitezo, milongisi mi Misiku mii mu kimvuka ki Bafalisi ni mitelama, mikota na kibakala kimvimba mu mayuma, ni mita ti: «Tuyeni dyambu dimbi ku bakala bedidi ko. Ngaa ti mpeve hoti mbazi yi mu zonzidi.» 10Nyuma bu yihyokila kitezo, mfumu yi zimbulu-mbulu wuyena bunkuta ti bazenga Pawuli mu bibuku ku bantu bebaba. Ni hahoho, kalombila ku zimbulu-mbulu bakulumuka mu kwe bonga Pawuli ha kati di bundu, na bamuvutula mu kivwandulu ki zimbulu-mbulu. 11Mpimpa yilanda, Mfumu wuyenika ku Pawuli na wumuteela ti: «Lwata kibakala, kimbangi ki ntedidi ha mbanza yi Yelusalemi, fweti kye ntela mpe ku mbanza yi Loma.»

Bayudayo bakotila Pawuli manenga

12Kilumbu kilanda na mene, Bayudayo bakota manenga: badya ndefi mu lembolo dya na kunwa tekila bahonda Pawuli. 13Yobobo bakota manenga bemomo baba lutangu kuhyoka makumaya ma bantu. 14Bayenda yenikina mfumu zi zinganga-Nzambi na zi bakuluntu mu bateela ti: «Tudidi ndefi ha ntadisi yi Nzambi mu lembolo dya tekila tuhonda Pawuli. 15Yeno na kimvuka ki bakuluntu ba Bayudayo, lombeeno ku mfumu yi zimbulu-mbulu yi Loma, ka munata ha ntadisi eno, mwanki lutoma fyongonina musamu andi. Yeto tukubamani mu muhonda tekila katula ehaha.»

16Kansi, mwana nkazi wu Pawuli, wu bakala, wuyuwa bu bedi zonzila mutambu wubalebika. Wuyenda kota mu kivwandulu ki zimbulu-mbulu mu lwengisa Pawuli. 17Pawuli wutumisa wumosi mu zimfumu zi zimbulu-mbulu nkama na wumuteela ti: «Nata toko bedidi ku mfumu yi bambulu-mbulu yi Loma, mu dyambu ti musamu wuu nandi ka muteela.» 18Mfumu yi zimbulu-mbulu nkama wuyenda ha kimosi nandi ku mfumu yi zimbulu-mbulu yi Loma. Wuta ku Mfumu yi Loma ti: «Nkole Pawuli wuntumisi na wundombidi na kutwadila toko bedidi. Musamu wuu nandi kakuteela.» 19Mfumu yi zimbulu-mbulu yi Loma wusimba toko mu kooko, wumunata ha luhengo na wumufuula ti: «Nkye musamu wuu naaku wuwanteela e?» 20Wuvutula ti: «Bayudayo bayuwasani mu kulomba wunata mbazi Pawuli ha ntadisi yi kimvuka ki bakuluntu ba Bayudayo. Ebu baakuteela ti batiidi mu fyongonina musamu andi. 21Ku bayuwilandi ko, mu dyambu ti bantu kuhyoka lutangu makumi maya ha kati dyawu bamulebikidi mutambu, mpe badidi ndefi ha ntadisi yi Nzambi mu lembolo dya na kunwa tekila bamuhonda. Bakubama bwabu badi na bana kingila kaka wuhaana luve.» 22Mfumu yi zimbulu-mbulu yi Loma wuvutula toko. Wumukanina ti: Kutandi ku kaani muntu ko ti musamu wawuntedidi.

Batambikidi Pawuli ku mbanza yi Sezale

23Ku manima, mfumu yi zimbulu-mbulu yi Loma wutumisa mfumu zole zi zimbulu-mbulu nkama, wubahaana lutumu elu: «Yonzikeeno nkama zole yi zimbulu-mbulu, makumi nsambwadi ma zimbulu-mbulu zikwe yendilanga mu mpunda na nkama zole yi zimbulu-mbulu zidi na madyonga. Kubameeno mu kwenda mu ngunga yi vwa yi nkokila ku mbanza yi Sezale. 24Kubikeeno mpe zimpunda mu nata Pawuli, ha ntadisi yi Munyadi Felikise, wulembolo bwilu dyambu» 25Ni kasonika mukanda ewu ti:

26«Meno, Kolode Lizyase nasonikini ku ngeye munyadi Felikise, mbote aku! 27Bayudayo bakanga bakala bedidi di nakutambikidi, mpe basosa mu muhonda. Ni nayenda na zimbulu-mbulu zani mu muvuukisa, bu nabakula ti mwisi-Loma wudi. 28Bu nasosidi mu zaba kibila ki bana mufundila, ni namuneti ha ntadisi yi kimvuka kyawu ki bakuluntu ba Bayudayo. 29Nabakudi ti, bana mufundila mu misamu mitadidi Misiku myawu. Kansi, mbeki kibila kye muhondila hoti kye mukotisila mu boloko ko. 30Mboki bu banteedidi ti Bayudayo bamukotidi manenga, ni ntumbu mutambika ku ngeye, mpe nalombidi ku mimfundi myandi biza bamufundila ha ntadisi aku.»

31Zimbulu-mbulu ni zilanda ntumunu zi batambula. Zibonga Pawuli, ni bamunata mu mpimpa ku mbanza yi Antipatilise. 32Kilumbu kilanda, zimbulu-mbulu ziyendila mu malu, zivutuka ku kivwandulu kyawu. Zimbulu-mbulu zikwe yendilanga mu mpunda, zitatamana nzyetolo na Pawuli. 33Bu zituula ha mbanza yi Sezale, zimbulu-mbulu zikwe yendilanga mu mpunda zihaana mukanda ku munyadi, mboki zisala sisa Pawuli mu moko mandi. 34Munyadi bu katanga mukanda, ni kafuula Pawuli mu zaba kizunga ki kafuma. Bu kayuwa ti ku kizunga ki Silisi, 35ni kamuteela ti: «Mbo nakuyuwa mu ntangu mimfundi myaku bu myaatuula.» Mboki, ni katuma bakeba Pawuli mu nzo yi kisalu yi munyadi Elode.

Currently Selected:

Mavanga 23: dde Ddo

Highlight

Copy