Marka 9
9
1Ynpynnyng yn haa eyng, “Ahngoan naa nyangmi jyng ky hyau vy, phungan nyng Nuatpaw teengpee kum tinyak khyang ni duːn nyng myi tih ycya haa naa hnguh hlawn naa byt lawh joaw,” y tiinyak.
Jesuh Phunggan Nyng Hlaijeinyak
(Matthai 17.1–13; Luka 9.28–36)
2 #
2 Pet 1.17,18 Khuhnguːp hnguːp shawk pynnyng, Jesuh naa Pitar, James laa Jawhan pannei theila, cung hluːng huannaa yn haa zehpuinyak, yn nijaa ym pythngaw ym myijei. Ynijaa ym hngaoimaw va phunggan nyng y duannei. 3Ynih suisyak cee, somdek huanna kuːh sawp nyn kaw khyang u suisyak haa dy huattei kawva khusiat hawh a pok. 4Pynnyng ynhaa hngaoimaw va Mosee laa Elijah khy dyangngei luu, Jesuh dy ym khyauvei. 5Pitar naa Jesuh eyng, “Rabbi vo, mynija mymi myih nyakky khyng. Mynija taai pathum ssawpaw, pahuat cee nyang tawk, pahuat cee Mosee tawk, athaa pahuat cee Elijah tawk,” y tinyak. 6Ynhnguva y hngulawnglyk haa naa kyh theiawlaa, Peter naa yn bawva y hyau.
7 #
Mat 3.17; Mar 1.11; Luk 3.22 Ynhnguva khusiat naa yn haa kuːn theila, khusait dukkuːh thaii pahuat ym jyak. “Yn khyau ngei byihjyt, myn cee keei khiat khyang ky zawe asi,” tilaa thaai pang luu. 8Ym kikaa saisih ym to hnguva, ym pumhngaw dy Jesuh thua ukhy hngu joaw.
9Cunghuan kuːh ym khawm luu hnguva, Jesuh naa, “Khyang zawpawe bytnyak kuːh thoo bua hlawncyp nym hnguh khyang tomti u vyngkhy saih kawh byih jyt,” y tinyak.
10Yn haa naa y khyaukhaw ngei thei awla, “byt nyak kuːh thoo bua” tinyak cee i tihyau hluː maa? tilaa pahuat laa pahuat ym hngijei thong. 11Ynpynnyng ynih eyng, “Ibawthawnyng Elijah jyang acuːkka luu vy tiawla tala cawkhyautih haa naa ym hyau maa?” ym hngi.
12Jesuh naa, “Tomti piangsaa haijaa Elijah y jyangnga komluu mawasi. Khyang Zawpaw khy sanglai cyhei khyamlawh theilaa, dyeutit khyang khy kyamlawh eyy tilaa ibawthawnnyng jok hnguːt maa? 13Ynbawlakhy Nyangmi jyng ky hyau vy, Elijah cee y komluu pyn, khyang haa naa khy tala eyng jok hnguːt tih bawva ynih eyng ym lunghnguːh bawva ym caipyn,” y tinyak.
Jesuh naa Tusee Byynnei khyang Putawzaw Y Kaansyak
(Matthai 17.14–21; Luka 9.37–43)
14Ycya hngulawnglyk haa ym luu bua hnguva, yn haa pingpyang nga khyangpuː panuu laa tala cawkhyau tih haa dy ym zaahei thong khyang ym hnguh. 15Khyang haa naa Jesuh ym hnguh laa hnguh, ym muːnnak, y cenga zawn awla ym sawt biattei voih. 16“Ynhaa dy ihaa nym zaahei tong maa?” tilaa y hngi.
17Khyang puː dukkuːh pahuat naa y syakkei, “Cawkhyautih vo nyang cenga ky zawpawe ky luu, yn ky zawepawe vyng muikhaw see naa pynnei khiannyng khyau nyn jo. 18Tusee naa y puhei hnguva, dek kyng y hngyng kyng. Y mong nyng cyatuivon haa lyt, y hawe haa khyat theila puum tomti zunggak luu. Yn tusee sytpiat haijaa ny hngulawnglyk haa eyng ky hyau, ynbawlakhy syt nyn joaw,” y tiinyak.
19Jesuh naa, “Jummei thaa niau tih khyang juː haa voo! Nyangmi dy iveih ky myi lawh hyaammy maa? Nyangmi jyng icyp duː ky khyam lawh hyammy maa? Dikzawe keei cenga luvyt,” tilaa y hyaubua. 20Ynhnguva dikzaw y cenga ym luu.
Tusee naa Jesuh y hnguh hnguva dikzawe zunggak syak hlyi. Dek kyng hngyng kyng theilaa y mong duk khuːh cyatuivon lyt theila, y pumhngaw hlyieu vei jok. 21Jesuh naa, “Nibawva y thawn khyang iveih diev hngyh maa?” tilaa dikzaw pawaw vyng y hngi?
“Dikzaw hngu kuːhthuh y thawn,” y tinyak. 22“Y pumhngaw byt haijaa meei laa tuii jyng khy cuupam shoi. Ynkhainnyng keeimi maannei theilaa ny caai nyn, nyangcee lilovei piat mawh,” tilaa y kawhei.
23Jesuh naa syakeibua, “Ny tuat nyn nyangcee? Jum nyak pahuat tawveitih tawkka cee itomti athawn nyn,” y tiinyak.
24Dikzaw pawaw cee saisikung y gap, “ky jummei. Keei jum nyn kaw khyang maanei piatmawh!” tilaa y khawhei.
25Jesuh naa khyangpuː lawijeiluu khyang hnguh hnguva, khyau vyng muikhaw see y cawkhyau. Hngawpyang theilaa awhtih muikhaw see vo, “Keei naa nyang ky syt, yn dikzawe duk kuːh lyt, athaa ihngukhy voang tih kawhbyih,” y tinyak.
26Tusee thaaeyng paang, dikzawe hievsyak theila lyt. Putawzawe cee jawk bawva myi khiannyng, “khyang tomti naa y bytpyn,” tilaa ym hyau. 27Ynbawlakhy Jesuh naa y kut tyng pyyn theilaa tung syak hnguva, yn cee tung bua nyn.
28Jesuh imm dukka voang pynnyng, ynih hngulawnglyk haa naa ajupzawva, “Ibawthannyng keeimi naa syt nyn jo maa?” tilaa ym hngii.
29Jesuh naa, “Nibyang cee hngihminnei khiannyng jyang syt nyn,” y tiinyak.
Jesuh naa Hngih Nyak Bytty khyang y Saihjai
(Matthai 17.22–23; Luka 9.43b–45)
30Jesuh laa hngulawnglyk haa yn duːn nyng kuːh Galilee pee lyamtyng ym zetbua. Jesuh naa hanijaa ym myih tinyak khyang u vyngkhy hnguatsyak hluː jo, 31ibawthonnyngmaa tijyngcee hngulawnglyk haa y cawksyang. Yn haa eyng y hyau, “Khyang Zawpawe cee khyang haa kut tyng up y khyam lawh ey. Ynih ym tukky, ynpynnyng hnguːp thum hnguːp pyng y thoo bua vy” tilaa y hyau.
32Ynbawlakhy i y hyau hluːmaa tiinyak khyang khyau jawecu joaw, hngii jy khy ym kyh.
Ubyang Y Lianduː Maa?
(Matthai 18.1–5; Luka 9.46–48)
33Kapanau luh lyam maa ym luu bua. Imm dukka y myih hnguva, Jesuh naa yn haa eyng y hngi, “lyaam myng luu hnguva ihaa nym coat maa?” tilaa y hngii.
34 #
Luk 22.24 Ynhnguva ikhy tikawva ym duːmei, ithawnyngmaa tijyngcee lyaam zehhyakyng ubyang lian duː maa tiinyak khyang ym coat. 35#Mat 20.26,27; 23.11; Mar 10.43,44; Luk 22.26 Ynhnguva Jesuh cee ngoa theila, hngulawnglyk kulaihngih pannei, “U khy si seh ajyangnga thawn hluː tihcee hnguduːtih aa thawnny asi, pynnyngcee tomti puhcaitih aa khy thawn lawh ey,” tilaa y hyau. 36Dikzaw pahuat lovei theila khyang haa duːduːm myng y tyak. Yn dikzaw y kut tyng pum theila, yn haa eyng y hyau, 37#Mat 10.40; Luk 10.16; Jaw 13.20 “Khyang pahuat naa keei ming shuuvei theila ni byang dikzawe pahuat dyynnei tihcee keei y dyynnei asi. Keei dyynnei tihkhy cee keei pyt y dynnei sijo, keei tuːhluu tih ky pawaw khy dynnei asi” tijyng y hyau.
Mymi Jyng Shuunnei Tihkawe cee Mymi Bawng asi
(Luka 9.49–50)
38Jawhan naa, “Cawkhyautih vo, khyang pahuat naa nyang ming summei theila tusee haa y syt khyang kym hnguh hnguːt, yn cee mymmi bawng asi kaw khiannyng ynih kym kat,” ym tiinyak.
39Jesuh naa, “Yn kat kawh yt, keei ming ngyng muːnnawseetih phungan duan theila keei seeja hyau tih ikhy myi jo. 40#Mat 12.30; Luk 11.23Mymi jyng suunnei tih kaw yn cee mymmi bawngpui asi. 41#Mat 10.42Ahngoan naa nyangmi jyng ky hyau vy, nyangmi cee Khrit khyang nym si khiannyng ukhy siseh keei ming ngyng tuii maahuat bok tih cee khunkyi lawh kawva myi lawh jo.
Apet hlumhliknyak
(Matthai 18.6–9; Luka 17.1–2)
42“Keei jummei tih dikzawe pahuat petnawe tih cee, ym hngyaa eyng aliantih kitsung khuh theila panglai dukka khyak khyang khyng. 43Ny kut naa pet caai jyngcee yn ny kut khuːn byih. Kut pahngih aa ngalai dukka ny khyak thyak kyngcee, ny kut pahuat myi tih aa syak hiyang khyang cee khyng, ynnijaa ihngukhy mei mitjo. 44#9.44 acya kutjokcaw haa ym baweng akyndik 44: pynnyng “yn haa ei tih zongcaa ihnguky byt jo, ynnijaa ihngukhy mei mitjo,” (to akyn dik 48). 45Ynpynnyng ny khuu naa apet cai jyngcee, yn khuːn byih. Khuu pahngih aa ngalai khyak thyak kyngcee khuu pahuat myi tih aa syak hiyang khyang cee khyng. 46#9.46 acya kutjokcaw haa ym baweng akyndik 46: Yn nyng “yn haa ei tih kyat ihnguky bytjo, pynnyng daw tih mei ihnguky mitjo,” (to akyndik 48). 47#Mat 5.29Ny mik naa apet cai jyngcee ny mik hngyihpya byih. Mik pahngih mawh aa ngalai jaa kyak thyak kyngcee mik lunghuat pyttyng Nuatpaw teengpee ny phaw khyang cee y khyng. 48‘Yn duːn naa yn haa ei tih kyat haa cee byt nyn joaw, pynnyngcee meei khy mit nyn jo.’
49“Henbawn nyak meh eyng mazii jyng cimsyak bawva khyang tomti meeii jyng cimnyak khyam lawh ey.
50 #
Mat 5.13; Luk 14.34,35 “Mazii cee a khyng, ynbawlakhy angaa tih akhuːk kyngcee, ibawva ny angaa syak bua theijy maa?
“Mazii bawva pahuat laa pahuat lungngoannei nyak tawvei byih jyt,” y tiinyak.
Currently Selected:
Marka 9: NTHTB25
Highlight
Copy
Compare
Share
Want to have your highlights saved across all your devices? Sign up or sign in
© 2025 by the Word for the World International
