Marka 15

Pilat Hngoaimaw va Jesuh

(Matthai 27.1–2,11–14; Luka 23.1–5; Jawhen 18.28–38)

1Kuuthoaih lyaam ngutyh hnguva, jahenpaw lian, y lianzang, tala cawkhyautih haa, Sanhedrin haa tomti cee ym puhcai buathuh ey khyang pyeivei. Jesuh khuun theieawlaa, Pilat Syamphalyang ngyng saisikung ym yappei. 2Ynhnguva Pilat na Jesuh eyng, Judah haa Syamphalyang ny si jei? tilaa y hngi.

Jesuh naa, “Yih, nyang hyau baw asi,” y tinyak.

3Ynpynyng jahenpaw lian haa naa apet panukung ym tyang. 4Yn hnguva Pilat na athaa y hngih buatuːh, “Nyang naa ikhy khyau syakkei bua jo tijei? Do yn haa na panukung nyang ngyng pet ym tyang maa,” y tinyak.

5Ynbawlakhy Jesuh naa ikhy y hyau bua kaw khyang Pilat na y muːnnyak.

Pilate na Jesuh Tukky Cijang Nyak

(Matthai 27.15–26; Luka 23.13–25; Jawhen 18.39—19.16)

6Pahtyak hnguːp tyng ngyng Khyang haa naa ym luːvei khyang thawng dukka kuːh pahuat Pilate na y hluːh piat thumzian amyi. 7Ynhnguva khyang syak tuu awla pheh khyam lawh tih haa panuu ym myi. Yn haa dukka Barabas mingnawtih khyang pahuat khy myi. 8Khyang puː haa luu theiawla, Pilate tyng ny puhcai shoi bawva apetmawh pahuat hluːh piat tila ym khawhei. 9Pilat na yn haa eyng y hngi, “Judah Syamphalyang hluːh piatty nym luː nyak kei?” y tinyak. 10Ibawthawnyng nibawa y hngi ma tijyng cee, jahenpaw lian haa na Jesuh myangsing naw awlaa ym muan khyang y hnguat.

11Ynbawlakhy jahenpaw lian haa na khyang puː haa ym hnguh hnguva Pilate tyng Barabas ym hluːh syak. 12Athaa khy Pilat na, “Judah Syamphalyang tijyng nym hyau khyang ibaw ky puh lawhey ma?” tijyng y hngi.

13Yn haa naa, “Tangtyng huanna tuu vyt,” tila tomti ym paang.

14Pilat na yn haa eyng, “Ithawnnyngmaa? I y pet nyak ma?” y tinyak.

Ynbawlakhy “yn tangtyng huannaa tuuvyt,” tila ym paang kakai.

15Khyang puː haa ym lungjyy syakky y luː khianyng, Pilat naa Barabas yn haa tawk y hluːhpiat. Jesuh cee shuat theila tangtyng huan na tang haija y yap.

Jesuh Ym Hlokpyak

(Matthai 27.27–31; Luka 19.2–3)

16Jaapuː haa na Jesuh cee syamphalyang imm maw ym zeh, yn cee Jaapuː puːhuat dynnei luu haiawa ym paan. 17Jesuh eyng oale phaang vuh theiawla, ahling ngyng gyaei tih lukhu y lukee huan na ym byua. 18“Judah syamphalyang” syak syau seh! tila hawedawh nuuva khun ym bei. 19Atha mawk huat y luugee zungkiak kyng pawt theila ynih cyatuii ym suh nyak. Y hngoaimawa khukdyaa theiawla khuːhbia tih bawva ym puh. 20Ynbawva ym hawedawh nyak pynnyng, oale phaang suishyak sut awlaa y suisyak hngaw ym vuh bua. Tangtyng huan na ym taang ngy ym zeh.

Jesuh Taangtyng Huan Na Ym Tuk

(Matthai 24.32–44; Luka 23.26–43; Jawhen 19.17–27)

21Cyrene pee kuːh, Simon mingnaw tih, Alexander laa Rufus pawe cee naama kuːh luu theila, lyaam y zet khyang ym hnguh hnguva, yn nyng bytseh kung taangtyng ym kyt syak. 22Jesuh cee Golgotha (luugee gop duːn tijyng ym hyau khyang) duːn na ym zeh. 23Murah ju dy thokkei tih, miksu ju ym bawk hnguva dynnei jo. 24Yn pynnyng tangtyng hngoan na ym taang. Y suisyak haa khoii theiawla, u na ibyang ym lawh ey maa tih ym phyaih ym zawtei. 25Tangtyng huan na ynih ym taang hnguva angu acuːn kuu cuːn asi. 26Hnguh tih takaa naa phuat hai awvaa: “Judah Syamphalyang,” tiila ym jawk. 27Ynih haa naa kheleem kheppa khyang see muuei tih hngutphai jei tih putawe pahngih tangtyng ngyng ym dyap. 28#15.28 Ycya kuːtjok caw haa ym bawng akhyn dik 28: Nibawva ynn tuikawmcaw na hyau khyang ahngoan luu, “sawisak mawh haa eyng y saih” (to Luk 22.37).

29Lyaam maa zet tih haa naa khy ym hawdawh nyak khyau khawe eyng, “Hei! biatimm Simpak tilaa, hnguːpthum myng syak nyn bua hai jyng! 30tuh a ny pumhngawe lilovei tila taangtyng huana kuːh kom lu hngawe camh!” tila ym hyau.

31Ynbaw tyng nga jahenpaw lian haa, tala thumcian cawkhyau tihaa naa khy ym hlawk pyak. “Khyang haa cee y hluːh piat nyn,” “ynbawlakhy y pumhngawe cee lilovei nyn jo si! 32Isreal syamphalyang, lilovei tih Messaih keeimi naa hnguh theilaa jum my tawk taangtyng huana kuːh kom luu.”

Jesuh Khrit dy tangngei tih khyang see pahngih hngyih naa khy hawedawh nuuva y hngih hlawkpyak.

Jesuh Bytnyak

(Matthai 27.45–56; Luka 23.44–49; Jawhen 19.28–30)

33A hnguːp duːduːm, myng kuːhthuh mawkthum cyp somdek tomti ahung na akuːn. 34Amuːlyaam khing thum hnguva Jesuh cee thaa eyng y paang, “Eloi, Eloi, lema sabachthani?” tila y paang. Yn cee, “ky Nuatpaw, ky Nuatpawe, ibawthawnyng ny dyyi maa?” ti hyau a si.

35Y cenga tung ti haa naa ym jyak, “Ngeih, Elijah y paan!” tila ym hyau. 36Ycya khyang pahuat zawn nei theilaa, miksu ju thuu am myng kuːh theila jooi jyng pawnsee hlomei tih eyng suk theila Jesuh naa uu haija y bawkkei. “Khyk hngyh seh, tawe hngyh pawe. Elijah na kom luu theilaa, y hluːh lu piattei tih my to vy” y tinyak.

37Jesuh cee thaa tomti jyng paang theila, y syak y jom.

38Ynhnguva biatimm dukkuːh hiahsung cee ahngoan cuu vyng kuːhthuh adyang cuu cyp pahngih aa atiakkut. 39Jeush hngoaimawva uptih bawi na y hnguh, ynih ibaw y byt #15.39 y byt; ycya kutjok caw haa myi baang theila y byt. khyang hnguh hnguva, “Tengteng kung myn Khyang cee Nuatpaw zawpaw y si!” tila y hyau.

40 # Luk 8.2,3 Acya hngutawe nu haa na a paan nawva kuːhthuh ym to. Yn haa dukka Magdala luh kuːh Marih, adik zawe tih James laa Josep nuu Marih, laa Salome khy ym pui. 41Galilee ja myi hnguva ynih hngulawng lyk theilaa lupan naw tih khy myi. Acya hngutaw Jerusalem maa kuːh haa khy ynijaa ym myi.

Jesuh Jawk Khuːh nyak

(Matthai 27.57–61; Luka 23.50; Jawhen 19.38–42)

42Yn hnguːp cee piangsaa jei hnguːp Jin hnguːp hluan a si. Khumuː lyaam phawlu hngua, 43Arimathea luh saw Josep cee Nuatpaw teengpee uːtnyak kyng zong tih y si bawva, Syamphalyang Pilat cenga kyh kawva Jesuh jawawk y hngih voih. 44Jesuh a byt pyn tiinyak khyang y jyak hnguva Pilat naa y muːnnyak. Uptih paan theila, “Jesuh cee y byt pyn nei ibaw ma?” tilaa y hngi. 45Uptih la y mawh hyau khyang y jyak hnguva, Pilate na Josep pyng Jesuh jawawk y bei. 46Yn hnguva Josep na y hleih khyang hiah bok kyng hlom theila, y jawawk y zeh, lunguu zuu dukka ym tawei, yn pynyng zu kyt tyng lungnu vyng y khah hnguːt. 47Magdala luh zaw Marih la Josep nuu Marrih na, Jesuh jawawk hngyn nyak duːn y hngih hnguh.

Currently Selected:

Marka 15: NTHTB25

Highlight

Copy

Compare