Ceepaw 27

Pawluh Ce Roma lyamma Tuisyamphua Eyng Y Zunnyak

1Festus myang na keimi Italy ja kitawlawng ngyng thyak ky hnguːn pynnyng, yn ha na Pawluh la aciya thawngshaw ha la ciya Regiment jaapuː eyng sengei tih jaapuː uptih Julius mingnawtih cenga ym bek. 2Keimi ce Asia pe tuikhyam tomti jyng myitih tuikhyam luh a zun hngyh hai Adramyttium tuisyamphua huanna khoi awla kym cun. Macedonia pe shaw Thessalonica luh shaw Aristarchus khy ce keimi dy y lyklu. 3Atha hnguːp pyng Sidon lyangkhyam ma kym happei. Julius na Pawluh eyng khiat nyak kyng hyau theila y kyi ha cenga zet theila lupan nyak y cai shyak. 4Ynija kuːhthuh keimi panglai lyamma kym cun hnguva, ki ce a lipsi lyamma lu khiannyng, Cyprus khongphai ki hup nyak lyamma kym cun. 5Keimi ce Cilicia pee la Pamphylia pee kuːh panglai pek theila cun pynnyng, keimi ha Lycia pe ja myitih Myra luh a kym phaw. 6Yn luh a Italy lyamma cun hai Alexandria tuisamphua pahuat khyanglian na hngu theila keimi yn tuisyamphua huanna y koi shyak.

7Keimi ce khuhnguːp byangveih gigiang nga cun pynnyng, Cnidus luh ka a kaeitih a kym phawei. Ki ce lipsi lyamma lu khiannyng Salmone zehtaw theila Crete khongphai kuːh ki hup nyak lyamma kym cun. 8Yn bawva tuiikhyam tomti kaei tih a kym cun lu pynnyng, Lasea luh eyng lawijei tih Lyangkawm Poai nyak duːn na kym phaw.

9Acuːn byangveih diev theila, Pet Hluːh Hnguːp#27.9 Pet Hluːh Hnguːp: Yn ce Hkham kkhaw pyih la Khaamtyang kkhaw acuːk hnguva ym cai khyang, khuhngoai see cuːn nyng cun khyang seekhaw va thawn hnguːt. byih pynnyng, panglai lyam zet tuan kaw khyang khuhngoai khyng kaw khiannyng, Pawluh na, 10“Khyang ha aw, myn lyam myng lawkla la tuisyamphua khawmcyang mymi syak ha la cimpak hai lian thawn lu vy tijyng ky hnguh,” tila sathih y bei. 11Ynbawlakhy jaapuː uptih na Pawluh khyaukhaw thyaak ka tuisyamphua mawh la tuisyamphua moktih ha khyaukhaw jyang y ngei. 12Yn lawng hapnyak ce khusik khyaam nyak ky, khyng kaw khiannyng, thawn nyn nyngcee yn duːn ngyng kuːh ga theila Phoenix luh a phaw nyn nyngcee, Phoenix luh a lawng hap nyak khyng theila khusik khyam nyn ny tawk khyang panukung na ym hyau. Yn lawng hap nyak ce Crete khongphai lawng hapnyak thawn theila a khawkyak ping la khawkyak pyang#27.12 khawkyak ping la khawkyak pyang; sikawvyngcee hngilu ping la hngilu pyang. kikawvyng hngoai myangei.

Panglai Jyng Kilian Lunyak

13Pyang lyam kuːh ki ce hehe zawva a lu hnguva, yn ha na ym pumhngaw khindyang khyang awngtyang tijyng khin theila lunghum jyh tih buːk theila Crete khongphai lyaamma tyng kym cun. 14Ynbawlakhy diev kawva mawlyam pyang kuːh hariking tijyng ym hyau khyang ki lian ce khong lyaamma kuːh a lu. 15Tuisyamphua ce ki khawm theila ki lu thuːuː nyn kaw khiannyng, keimi khycee tawlak theila ki zeh nyak tyng kym cun lawh. 16Ynbawlakhy keimi ce Cauda ym tinyak khyang khongphai dik ki hup nawva by theila syakdolawng khy kaei tih a kym hyap nyn. 17Yn lawng dik tuisyamphua huanna tyang pynnyng, tuisyamphua pianpyak theila joii jyng kym khawnhyan. Ibawthawnnyngma tijyngcee Syrtis bahinpyy vyng tyang ngei jy khy cyh nyak khiannyng tuisyamphua dyap ha khym bua theila ki lu nyak tyng ym jawn. 18Keimi ce byibu ki lian khawm khiannyng atha hnguːp pyng yn ha na lawkla ha tuisyamphua huan kuːh ym dyyi giah. 19Hnguːp thum nyak kyng, yn ha ce tuisyamphua duk kuːh summei khyang ha loo theila ym dyyi bua tuh. 20Keimi ce khuhngi la arsi ha khy khuhnguːp diev va hngu lawh jo awnga. Ki ce tha eyng lu hyam. A pyih nyak kyng keimi ce khawmsiat duk kuːh lytnyak ky uːtnyak khyang myi ti jo.

21Yn ha ce acuːn diev va eiou kawva myi theila, Pawluh na yn ha duːduːm myng tung theila, “Khyang ha aw, nyangmi ce kei hyau khyang dynnei theila Crete khongphai lyamma my cun kaw vyngcee, myn cimpak nyak la ciliau nyak khawm lawh hai sijo paw. 22Ynbawlakhy nyangmi jyng ky kawhei, tuh a tha lovei byih jyt. Nyangmi u khy byt tya jo, tuisyamphua pyt jyng ciliau vy tya. 23Ibawthawnnyngma tijyngcee kei pyng theila kei khuːhbia khyang Nuatpaw huankhu ceepaw ce jyantuː muː juan na kei cenga lu theila, 24‘Pawluh aw, kyh kawh, nyang ce Caesar syamphalyang hngoaimawva ny voang lawh ey. Yn pynnyng Nuatpaw ce nyang dy huattyng cun hahtih tomti syak khawmsiat dukkuːh lytnyak y bei hnguːt,’ tila y hyau. 25Yn khiannyng, khyang ha aw, tha lovei byih jyt. Kei hyau hnguːt bawva tynga thawn ny tijyng Nuatpaw ky jummei. 26Ynbawlakhy mymi ce acya khongphai pahuat huanna my tyangei voih jy,” tila y hyau.

27Hnguːp khulaipahli juan phaw hnguva, ki na Adriatic panglai huanna jawnnei jok theila, khujuan duːduːm myng tuiisamphua moktih ha na khonga ngyng lawijei hngyh tila ym uːtnyak. 28Yn khiannyng tuiithook khyang ym cyam hnguva lyaam kua a thook. Yn pynnyng mawlyam meihzaw ym zet bya tuː theila atha ym cyam bua tuːh hnguva a lyam kulaipahngaw a thook tijyng ym hnguat lawh. 29Yn tuisyamphua lung ngyng ym thokkei jy ym kyh, yn khiannyng tuisyamphua moktih ha na tuisyamphua hngu khunnyak pahli khaw theila khuva lu vy jyang ym hngihminnei. 30Ynbawlakhy tuisyamphua shaw ha na tuisyamphua eyng kuːh ym lytnyak ky cai awla, tuisyamphua mok lyaamma zet theiawla tuisyamphua khunnyak khaw hai bawva thawn theila syakdolawng tuii jyng ym kyak. 31Yn hnguva Pawluh na jaapuː la jaapuː lianzaw ha eyng, “Myn khyang ha ce tuisyamphua huanna ym myi kaw vyngcee, nyangmi khy khawmsiat lyt nyn jo,” tila y hyau. 32Yn khiannyng jaapuː ha na lawng joii khuːn theila syakdolawng ym hawn tit.

33Khuthawi lu tian hnguva, Pawluh na yn ha tomti jyng juːhuat huat eiou vy y khawhei. “Nyangmi cee ikhy eiou kawva nym zong khyang hnguːp khulaipahli cup hngyh. 34Yn khiannyng eiou vy tawk nyangmi jyng ky khawhei. Nyangmi eiou hngu jyng tha luih theila nyangmi shyak hyang nyn ny. Nyangmi lukee kuːh lusam samhuat khy kuːk hai si jo,” tila y hyau. 35Yn bawva y hyau pynnyng, yn na phe loo theila khyang ha hngoaimawva Nuatpaw khunkhyi shyhpuah theila yn iak theila y ei. 36Yn ha tomti khy tha lawhei theila eiawk ym ei. 37Tuisyamphua huanna kuːh khyang tomti ce 276#27.37 276; aciya kutjokcawvyng 275; tijyng myi; aciya eyng 76 byang, tijyng myi. kym myi. 38Yn ha na eiawk ym luː hawh eiou pynnyng, tuncaang tomti ce panglai dukka dyyi awla tuisyamphua ce a hyaang bya.

Tuisyamphua Paknyak

39Khuthawi lu hnguva, ibyang a duːn tijyng tuisyamphua shaw na hnguat kaw lakhy, panglai tuikhyam myitih panglai kep pahuat tinyak khyang sathih ym tyakkei. Yn khiannyng thawn nyn hngucee tuisyamphua yn konga cenga happei nyn ny tijyng ym hnguːn. 40Yn pynnyng lawng khunnyak ha sat awla panglai dukka ym kyak, mokhuat pyt tyng tyakpaih joii ha shut pynnyng, tuisyamphua hlang theila kong lyamma ym bek. 41Ynbawlakhy panglai tuii khawmmei nyak pahinpyy huanna tuisyamphua hap theila tuisyamphua mok cee khong ngyng tyangei theila hluːnhlawk nyn tijo, apaih lyam khy tuiileng ha na ba theila akhuːn khuːn na a pak.

42Jaapuː ha ce thawngshaw ha khong lyaamma tuiijo theila ym zen ny khyang cyh nyak khiannyng, ym tukky ym cijang. 43Ynbawlakhy jaapuː mawh ce Pawluh syak hluːh piat hluː khiannyng, yn ha lungkhin khyang kawkat theila tuiijo nyn tih ha khy tuisyamphua huan kuːh alang mawva shoi theila kong lyamma ym joo. 44Myi hnguːt tih ha ce pianlap la tuisyamphua pak akuːn ha eyng ym joo vy y hyau. Yn bawva keimi ha tomti ce kong huanna khawmsee kawva kym phaw giah.

Currently Selected:

Ceepaw 27: NTHTB25

Highlight

Copy

Compare