Ceepaw 10

Pitar la Cornelius

1Caesarea luh a Cornelius mingnaw tih khyang pahuat myi. Yn ce Italian na jaapuː phawhuat uptih Roma khyanglian pahuat y si. 2Yn la yn immlawng tomti ce Nuatpaw kyh theila jumnyak kyng ciat tih khy ym si. Acya khyang ha eyng tyakei jyngcee tyakei bawva bei theila Nuatpaw cenga hngihminnei nyak cai shoi tih ym si. 3Hnguːp huat hnguːp acuːn pathum hnguva Nuatpaw huankhu ceepaw pahuat ce yn cenga lu theila, “Cornelius” tijyang y hyau khyang y lunghnguːn nyng y hnguh.

4Cornelius na y kyh. “Mawhpaw vo, ni i ma?” y tinyak.

Yn hnguva huankhu ceepaw na, “Nyang hngihminnei khyang la ny bei khyang kutpuan ha Nuatpaw hngoaimawva shyhei pyn. 5Tuh a Joppa luh a khyang thuh tila Pitar tijyng ym hyau khyang Simon lawvei. 6Yn ce hlawhpa khutbi tih Simon imm ma y myi. Yn imm ce panglai ka a myi,” y tinyak. 7Yn bawva yn ngyng hyautih huankhu ceepaw zetbua pynnyng, Cornelius na y ma pahngih la y pumhngaw cenga setzaw vyng khutbi theila Nuatpaw kyhkhiat tih jaapaw pahuat y pan. 8Yn na yn ha eyng a thawn tih tomti saih theila Joppa luh a yn ha y tuh.

9Hnguːp cya hnguːp pyng yn ha ce lyam zet awla luh eyng lawijei lu theila khusun na Pitar ce hngihminnei haija immtih huanna y koi. 10Yn hnguva Pitar ce coijei lu theila juːhuat huat ei jy y luː, khyang ha na ei jy khyang ym cijang hnguva Pitar na lunghnguːn y hnguh. 11Y hnguh khyang ce huankhu hngongei theila a giv pahli jyng somdek kyng kaw lu hiahpoai lian tih hlawnlu khyang y hnguh. 12Yn duk kyng somdek kyng zetjok tih kutkhu pahli mawh hiyangsei kuːm tomti, zet jok tih hiyangsei la huankhu hngaw ming kuːm a shyp. 13Yn hnguva, “Pitar vo thoo, tu tila ei,” tijyng huankhu ceepaw cengkuːh thai y jyak.

14Ynbawlakhy Pitar na, “Thawn nyn jo Mawhpaw vo, kei na thahseetih sikawvyngcee cimtih kaw ihngukhy ei sai jo nga,” y tinyak.

15Pitar eyng hngih nyak hyau thai cee, “Nuatpaw na cim shyak khyang ha ce ikhy a thahsee ti kawh,” y tinyak. 16Yn bawva mawk thum hyau pynnyng, yn ce saisikung huankhu lyamma y zehei bya.

17Pitar na y lunghnguːn nyng y hnguh hnguːt khyang y khindyang hnguva, ibaw ma tila y muːnnyak. Cornelius na y tuh khyang, khyang ha ce Simon imm sui awla imm kyt ta ym tungei. 18Yn ha na, “Pitar tijyng ym hyau khyang Simon ce myn imm ma myi jei?” tila ym hngii.

19Pitar ce y lunghnguːn khyang y khindang hnguva, Muikhaw na, “Ngeih! Nyang khyang pathum#10.19 pathum; aciya kutjok cawvyng myi Aciya; kutjokcawvyng pahuat tijyng myi Pahngih. na ym sui jok. 20Yn khiannyng thoo theila dyanga kommeih. Kei na yn ha ky tuːhlu, shunshyang kawva yn ha dy lykkei byih,” y tinyak. 21Yn hnguva Pitar ce yn khyang ha cenga kommei theila, “Kei ce nyangmi shuijok khyang ky si. Ibawthawnnyng nym lu ma,” y hngi.

22Yn khyang ha na, “Khyang lianzaw Cornelius cengkuːh kym lu. Yn ce puːnpok theila Nuatpaw kyh tih si theila Judah pe kuːh khyang tomti na khy ym kyhkhiat khyang y si. Yn imm ma nyang pannei theila nyang na saksi jyng ny saih jy khyang khyaukhaw ha jaw haija Nuatpaw huankhu ceepaw na yn ngyng y shin hnguːt.” 23Yn pynnyng Pitar na yn khyang ha y khiin nyak ky tawk imm dukka y pannei.

Aciya hnguːp pyng Pitar ce yn ha dy y zet hnguva, Joppa luh a kuːh aciya jummeitih ha a khy ynih dy ym lykkei. 24Atha hnguːp pyng Caesarea luh a y phawlu. Cornelius cee ynih juːjawng ha eyng lawijei tih uːtshu ha huattyng pannei theila Pitar tih zong awla ym myijei. 25Pitar imm duk voang hnguva, Cornelius ce yn dy kommei theila ynih hngoaimaw va khukdya theila y munnei. 26Ynbawlakhy Pitar na ynih thooh. “Tung, kei pumhngaw khy ce khyang jyang ky si,” y tinyak. 27Yn dy khyau theila Pitar ce imm dukka y voang, yn hnguva khyang panu dynnei khyang y hnguh. 28Pitar na yn ha eyng, “Judah khyang pahuat ce ycya khyang juː ha cenga lynglu khyang ce, mymi thumcian nyng cyppei kaw khyang nyangmi na nym hnguat. Ynbawlakhy Nuatpaw na kei jyng y duannei pyn, yn ce kei na ukhy thahseetih sikawvyngcee cimtih kaw tijyng hyau dat jonga. 29Yn khiannyng nyangmi na kei nym pannei hnguva, kei na ikhy zah kawva ky lu. Yn khiannyng ibawthawnnyng nyangmi na kei nym pannei ma tijyng ky hngi hluː,” y tinyak.

30Cornelius na, “A pyih hnguːt tih hnguːp thum myng khusun acuːn pathum myng ky imm ma kei hngihminnei theila ky myi hnguːt.#10.30 hngihminnei; acya kutjokcaw vyng myi Jahei la hngihminnei. Yn hnguva angtih suishyak vuei tih khyang pahuat ce kei hngoaimaw va tung 31theila, ‘Cornelius, nyang hngihminnei khyang Nuatpaw na jyak pyn. Nyang na sanglai tih ha eyng ny bei khyang kutpuan ha khy y khindang pyn. 32Yn khiannyng Joppa luh a khyang tuːh tila Pitar tijyng hyau khyang Simon lawei. Yn ce hlawhpa caitih Simon imm ma khiin pahuat y si, ynih imm ce panglai khyam ma y myi,’ y tinyak. 33Yn khiannyng nyng kei na nyang cenga saisikung khyang ky tuːhlu. Tuh a nyang ngyng Mawhpaw hnguishin hnguːt khyang tomti keimi jyng saih haija Nuatpaw hngoaimawva tomti kym myi pyn,” y tinyak.

Pitar Susaihnyak

34Yn pynnyng Pitar na hyau vy khyang y phun, “Nuatpaw ce khyang hngoaihlei tih si kaw khyang kei na hngoan na ky jyakcawk. 35Ynbawlakhy khyang juː tomti ynih kyh theila a hngoan na caih tih u khy si seh, Nuatpaw cenga luhngoai ym lawhei. 36Nuatpaw ce a kuːmkuːt Mawhpaw thawntih Jesuh Khrist khiannyng jadyam nyak Isreal khyang ha eyng bei khyang sityang poai nyangmi na nym hnguat. 37Jawhan na Baptisma bawng saih pynnyng, Galilee pe ja kuːhthuh Judah pe tomti ja athawn hnguːt tih ha nyangmi na nym hnguat. 38Nuatpaw na Nazareth luh zaw Jesuh eyng Muikhaw Cim la phungan ibawva hngyahei y bei hnguːt khyang nyangmi na nym hnguat. Nuatpaw ce Jesuh dy puijei khiannyng y khyngtih cai theila tusee ha bynnei khyam lawhtih ha kangsashyak bya theila aduːn tomti jaa y zet jok. 39Mymi ce Judah pe la Jerusalem luh a y cai hnguːt khyang tomti tawk saksi ja my thawn giah. Yn ha na Jesuh tangtyng huanna tang awla ym tuk hnguːt. 40Ynbawlakhy Nuatpaw na Jesuh byt nyak kuːh khuhnguːp hnguːp thum hnguva thoo shyak bya theila y podyang shyak. 41Ynbawlaakhy Khyang tomti jyng y duannei hnguːt si jo. Nuatpaw pumhngaw na saksi ha thawn haija y hngyahei hnguːt khyang mymi cengnga y duannei. Jesuh byt nyak kuːh thoo bya pynnyng mymi khy ce yn Mawhpaw dy my ei ou hah. 42Jesuh na y pumhngaw syak hiyang khyang la byttih ha eyng tala cijangtih a Nuatpaw na lup shyak khyang pahuat y si tinyak khyang, khyang ha eyng saksi susaih jy mymi jyang y hnguishin hnguːt. 43Jesuh jummeitih tomti ce yn ming ngyng pet duk kuːh hluːh khyammei lawh ey tijyng hngawpaw tomti na saksi ym khyam hnguːt,” y tinyak.

Khyangjuː Cya Na Muikhaw Cim Dynnei nyak

44Yn khyaukhaw ha Pitar na susaih hnguva, Muikhaw Cim ce yn tala jawtih tomti huanna y komlu. 45Yn bawva Muikhaw Cim kutpuan ce aciya khyang juː ha na khyam lawh awla yn ym khyam lawh khyang Pitar dy Joppa luh lutih Judah khyang juː vuːnmonghleih jummeitih ha na ym muːnnyak. 46Ibawthawnnyngma tijyngcee khyang juː cya ha na aciya be jyng Nuatpaw tyivei khyang khyau ym jyak hnguva ym lung jy. Yn hnguva Pitar na, 47“Keimi bawva Muikhaw Cim dynneitih myn khyang ha tuii jyng baptisma bei jy khyang u na kawkat nyn ny ma,” tila y hyau. 48Yn khiannyng Jesuh Khrit ming ngyng baptisma khyammei jy y hyau. Yn pynnyng Pitar eyng yn ha dy khuhnguːp meihzaw myi jy ym kawhei.

Currently Selected:

Ceepaw 10: NTHTB25

Highlight

Copy

Compare