BARUK 1
1
Jipə kə́ Babilon gə̄ ɔrə̄n̄ najə̄ kə ngé kə́ Jerusalem gə̄
1Makətūbə̄ ń Baruk kə́ ngōn̄ Neriyas, kə́ ngōn̄ Maseyas, kə́ ngōn̄ Sedekiyas, kə́ ngōn̄ Hasadiyas, kə́ ngōn̄ Helkiyas, ndang kem ɓē kə́ Babilon tə́ ni, najə̄ kə́ kemeé n toó. 2Ni ndang makətūbə̄ ní i kem ɓāl̄ kə́ nge kṵ mí tə́, kə ndɔ̄ kə́ nge kṵ sīrí yā nāá, dan ń Babilon gə̄ taānəń ɓē kə́ Jerusalem ba əlan̄ hor dɔ tə́ ní.
3Baruk tə́da najə̄ kə́ kem makətūbə̄ ń toō tə́ i ta kum Jekoniyas kə́ ngōn̄ Joakim mban̄g kə́ Juda tə́ ō, ta kum kósə de gə̄ ń reēn̄ koō najə̄ kə́ kem makətūbə̄ ní tə́ ní ō. 4Tə́da i ta kum ngé kṵ ɓē gə̄ tə́ ō, ngán mban̄g gə̄ tə́ ō, kum kɔɔ̄ gə̄ tə́ ō, adə̄ i ta kum de gə̄ malang tə́. Ḭḭ dɔ de kə́ dūú ngá̰ý gə̄ tə́ bátə́ ugə̄ń dɔ de kə́ tɔgə gə̄ tə́. Tə́da i ta kum de gə̄ malang ń ndin̄ Babilon kadə bā Sudə tə́ ní. 5De gə̄ nūūn̄ ō, mbātə́n̄ kəsa yá̰a̰ ō, ndɔ̄ȳn̄ ta kum Kɔ́ɔ̄ɓē tə́ ō. 6Kutə̄ gō anī, nin̄ kógə̄ḿ kógə̄ḿ ɔsən̄ dɔ nar naā tə́. Adə̄n̄ i kə gō tɔ́gə́də́ gēé, 7ba əlanə̄ń Jerusalem adə̄n̄ nge tun̄ yá̰á̰ ń rīn na i Joakim ní. Joakim i ngōn̄ Helkiyas kə́ ngōn̄ Salom. Əlanə̄ń adə̄n̄ ngé tun̄ yá̰á̰ kə́ rang gə̄ ō, adə̄n̄ de gə̄ malang ń ndin̄ seneé Jerusalem ní ō. 8-9Kété ní Nabukodonosor, mban̄g kə́ Babilon, əhɔ Jekoniyas Jerusalem aw̄ seneé Babilon dɔ gúú tə́, naā tə́ kə ngār gə̄ ō, kɔdə̄ gə̄ ō, de kə́ bo gə̄ ō, de kə́ kem ɓēé gə̄ ō. Anī Sedekiyas kə́ ngōn̄ Jojiyas ń i mban̄g kə́ Juda ní, adə̄ rāān̄ ngáń gájə́ yá̰a̰ rāā kəla gə̄ kə gində̄ arjā̰a̰á̰ tām̄ yā kújə yā Kɔ́ɔ̄ɓē kə́ Jerusalem tə́. Ngáń gájə́ yá̰a̰ gə̄ ngeé ń toó ɔyn̄ kɔ̄ɔ́ kem kújə yā Kɔ́ɔ̄ɓē tə́ aw̄nəń Babilon. Ba kə ndɔ̄ kə́ nge kṵ kutə yā nāā siwān anī, Baruk tél táā kɔ̄ɔ́. Ni sāā i tél reēń gogə́ dɔ nang kə́ Juda tə́.
10Najə̄ ń de gə̄ ní ndangən̄ ní n toó: J-əla kə naraá j-adə̄sí i yā kadə̄ ī-mangiīń dā̰ kə́ yā tun̄ kə taá malang gə̄ ō, kə́ yā tun̄ tām̄ yā māȳ rɔ̄ tə́ dɔ majaĺ gə̄ tə́ ō, ndujə̄ nūū kāgə̄ kə́ otə majə ō. Ā ādī kadə̄ karī gə̄ ō, yá̰a̰ gə̄ kə́ yā tun̄ dɔ dabə tun̄ yá̰a̰ yā Kɔ́ɔ̄ɓē Nə́ɓā yājí tə́ ō. 11Ī-ndɔ̄yī tām̄ yā Nabukodonosor mban̄g kə́ Babilon tə́ ō, tām̄ yā ngōnən Baltajar tə́ ō. I dəjeī ādə̄ ndin̄ kə kumdə́ dan i ngá̰ý, tītə̄ ń dɔ rā̰ ndiń dan i ngá̰ý dɔ dɔ nang tə́ ní beē. 12Lo ń nuū tə́ Kɔ́ɔ̄ɓē a adə̄jí tɔ́gə ō, a tél kə rɔ̄nelé yā kadə̄jí gogə́ ō. J-a jə-ndiī ndíl Nabukodonosor mban̄g kə́ Babilon tə́ ō, ndíl ngōnən Baltajar tə́ ō, j-a jə-rāāī kəla yā kadə̄də́ dan i ngá̰ý ō, nin̄ a rāān̄ kem majə sejí ō. 13Ī-ndɔ̄yī Kɔ́ɔ̄ɓē Nə́ɓā yājí tām̄ yājí tə́ ō, tɔdɔ̄ jə-rāā majaĺ seneé. Adə̄ bátə́ ɓōólaā ní, ni un wūn̄g yān kə́ ngá̰ý kɔ̄ɔ́ dɔjí tə́ alé. 14Ta tɔ̄l̄ ta tə́ anī, ā ī-tə́daī makətūbə̄ ń j-əlań j-adə̄sí toō, yā kadə̄ de gə̄ ɔrə̄n̄ gír majaĺ yādə́ gə̄ kem kújə yā Kɔ́ɔ̄ɓē tə́, ndɔ̄ rāā nāā kújə́ kámbə gə̄ tə́ ō, ndɔ̄ kə́ majə tə́ ō.
Ndɔ̄ȳ yā ngé kaw̄ dɔ ɓē kə́ rang tə́ dɔ gúú tə́ gə̄
Kɔr̄ gír majaĺ
15Ā ə́daī na: Kɔ́ɔ̄ɓē Nə́ɓā yājí i nge rāā yá̰á̰ kə́ gōtə́, ba yājí jḭḭ̄ ɓáa i rɔ̄sɔl̄ tītə̄ ń jə-raīń ɓōólaā toó! Rɔ̄sɔl̄ i yā de gə̄ kə́ Juda ō kə́ Jerusalem ō, 16rɔ̄sɔl̄ i yā mban̄g yājí gə̄ ō, ngār yājí gə̄ ō, ngé tun̄ yá̰a̰ yājí gə̄ ō, ngé koō taa yājí gə̄ ō, kaají gə̄ ō. 17Tɔdɔ̄ jə-rāāī majaĺ kə Kɔ́ɔ̄ɓēé. 18Jə-raī dɔ ndūjí tə́ seneé alé. Dan ń Kɔ́ɔ̄ɓē Nə́ɓā yājí ədají na kə jə-rāāī yá̰a̰ gə̄ ń ni ədají ní, jḭḭ̄ j-oōī tan alé. 19Əla gír ndɔ̄ ń Kɔ́ɔ̄ɓē teēń kə kaají gēé kɔ̄ɔ́ kem ɓē kə́ Ejiptə tə́ bátə́ ɓōólaā ní, ndūjí ń j-ənī j-adī Kɔ́ɔ̄ɓē Nə́ɓā yājí ní, jə-raī dɔ tə́ aĺ ō, yá̰a̰ rāājí hɔɔ́lɔ̄ ngá̰ý tɔdɔ̄ j-oōī tan aĺ ō. 20I tām̄ najə̄ ń toō tə́ n yá̰á̰ kə́ to kum tō ndoō, naā tə́ kə ndɔ̄ĺ, əhɔn̄ gōjí tītə̄ ń j-a̰a̰īń ɓōólaā ní. Ndɔ̄ ń ni teēń kə kaají gēé kɔ̄ɔ́ kem ɓē kə́ Ejiptə tə́, yā kadə̄ńjí ɓē kə́ mba ō, yibə̄ tejə ō, i ngá̰ý kemeé tə́ ní, nge kəla yān Moyijə tāā najə̄ yā ndɔ̄ĺ ní kété. 21Ni əla kə ngé koō taa gēé adə̄jí, banī jḭḭ̄ j-oōī yá̰á̰ ń ni əndā tadə́ tə́ kadə̄ ədan̄jí ní alé. 22Banī jḭḭ̄ kógə̄ḿ kógə̄ḿ ní, j-uniī i gō gír̄ gə̄ yā kemjí kə́ majə aĺ, adə̄ j-aw̄ jə-rāāī kəla j-adī nə́ɓā kə́ rang gə̄, jə-rāāī yá̰á̰ kə́ majə aĺ ta kum Kɔ́ɔ̄ɓē Nə́ɓā yājí tə́.
Currently Selected:
BARUK 1: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.