JEJU KƏ́ NGŌN̄ SIRAK 51
51
Najə̄ kə́ kənī dɔ madə̄ tə́ kə́ yā tɔ̄ləń ta
Ndɔ̄ȳ yā Jeju kə́ ngōn̄ Sirak
1Kɔ́ɔ̄ɓē, ḭ̄ ń i mban̄g ní, m̄-ndigə rāāī kə́ra.
Nə́ɓā nge kajəḿ, m̄-ndigə ɓōkíī tɔ̄ȳ.
I ngarā̰ kumií ḭ̄kɔ́ n m̄-rāāī kə́rá ní.
2Tɔdɔ̄ ī-ngɔ̄mə̄m̄ ō, ī-dḭḭ̄m̄ ō,
ɔ̄rə̄m̄ ta yo tə́ ō.
Ḭ̄ ɔ̄rə̄m̄ kum gūmbə̄ yā ngé kɔr̄ najə̄ kə́ gōtə́ aĺ gə̄ tə́ ō,
ájəm̄ ta ngé sor̄ gə̄ tə́ ō.
Ḭ̄ ī-reē ī-dḭḭ̄m̄ ō, ájəm̄
3ta kum madə̄ ba̰ā̰ḿ gə̄ tə́ ō,
kə gō kem majə yāí kə́ to ɓōĺ ngá̰ý ō, tām̄ yā rīí tə́ ō.
Tɔdɔ̄ de gə̄ ń nuū ń ndin̄ dɔ rɔ̄də́ tə́ kɔ̄ɔ́ yā kəsam̄ ní,
ḭ̄ ī-taām̄ jīdə́ tə́ kɔ̄ɔ́. Ngé gə̄ ń ndigən̄ tɔ̄lə̄m̄ ní, ḭ̄ ī-taām̄ jīdə́ tə́ ə́ya̰m̄ dɔɔ́.
Yá̰á̰ kə́ majə aĺ gə̄ ngá̰ý teēn̄ dɔḿ tə́, banī ájəm̄.
4Hor ń gīr̄ gidəḿ əla ta naā tə́ ní, ḭ̄ ájəm̄ kum tə́.
Ḭ̄ ájəm̄ kum hor kə́ i mā n m̄-rāā aĺ tə́.
5Ḭ̄ ī-teē seḿ kɔ̄ɔ́ ɓádá lo kə́ ɗúú ngá̰ý tə́ ō,
ī-teē seḿ kɔ̄ɔ́ ta najə̄ kə́ yḛr gə̄ tə́ ō, ta najə̄ kə́ sor̄ gə̄ tə́ ō.
6Kum gərā gə̄ ń téēn̄ ta de kə́ majə aĺ tə́ ní, ḭ̄ ī-teē seḿ kɔ̄ɔ́ ta tə́.
Kété ní mā i ngɔr kə̄ ta yo tə́ ō,
m̄-risə m-āw̄ ɓádá ō.
7Madə̄ ba̰ā̰ḿ gə̄ teēn̄ kə̄ ta gə̄ tə́ gīrə̄n̄ gidəḿ, ba de kə́ reē dḭḭ̄m̄ gətóo.
M̄-sāā deē kə́ kadə̄ rāā seḿ, banī m-ə́nge alé!
8Lo ń nuū tə́ Kɔ́ɔ̄ɓē, əga kemḿ dɔ kem majə yāí tə́ ō,
dɔ rāā majə kə deé yāí ń ə́lá gír rāā i jóó ngá̰ý ní tə́ ō.
M̄-ger̄ kadə̄ ngé gə̄ ń tə́gān̄ tadə́ ba ngóōīn̄ ní, ḭ̄ ī-gān̄g dɔdə́ ō,
ī-taādə́ jī ngé kem ndul gə̄ tə́ ə́yá̰də́ dɔɔ́ ō.
9Adə̄ m̄-ra dɔ nang tə́ laā m̄-rāāiń ɓɔ́ ō,
m̄-ra seí kadə̄ ɔ̄rə̄m̄ kɔ̄ɔ́ ta yo tə́ ō.
10M̄-rāā Kɔ́ɔ̄ɓē ń i bɔbə̄ kɔ́ɔ̄ḿ ní ɓɔ́ kadə̄ rāā seḿ,
kadə̄ əya̰m̄ kɔ̄ɔ́ kem ndɔ̄ gə̄ ń yá̰a̰ a tɔȳń dɔḿ tə́ ní aĺ ō,
dan yā ngé kɔjə rɔ̄ gə̄ ń nge dḭḭ̄m̄ gətóó tə́ ní ɓáa kadə̄ rāā seḿ ō.
11M-ā m̄-tɔ̄ȳ rīí kanjə̄ kəya̰ ta ō,
m-ā m̄-ndadī kə pāá ō.
Anī Kɔ́ɔ̄ɓē oō ndɔ̄ȳ yāḿ ba rāā seḿ.
12Nə́ngētə́ gēé taḿ tḭ̄ḭ̄, banī ájəm̄ ō,
ī-gān̄g dɔḿ ndɔ̄ ń yá̰á̰ kə́ majə aĺ teēń dɔḿ tə́ ní ō.
I tām̄ najə̄ ń nuū tə́ n m̄-ndigə rāāī kə́ra ō, ɓōkíī tɔ̄ȳ ō ní.
M̄-ndigə kəda gotə yá̰á̰ kə́ majə ń ī-rāā seḿ ní ō.
Deē aw̄ sāā kum kedə̄ tə́
13Dan balsááḿ tə́, kété pá tá kadə̄ m-āw̄ dáȳ dɔɔ́ tə́ ní,
m̄-sāā kum kedə̄ i kə̄ dɔ ndágá wáńg lo ndɔ̄ȳ tə́.
14M̄-ndɔ̄ȳ tāmən tə́ ta kújə yā Kɔ́ɔ̄ɓē tə́ ō,
m-ā m̄-sāan bátə́ kadə̄ m-óyń ō.
15Dan ń kum kedə̄ tɔgə, tītə̄ kan̄ nduú kə́ kərē kɔ̄ɔ́ anī,
adə̄m̄ rɔ̄nel̄ ngarā̰ kemḿ tə́.
M̄-njə̄rā dɔ róbə́ kə́ súūmú tə́ ō,
m-ə́lá gír kun gō tóo kum kedə̄ ō, i dan balsááḿ tə́ nú.
16M̄-nēl̄ mbīḿ sḛ́ý beé ngóy anī, m-ə́ngen ō,
m-ə́ngé yá̰á̰ ndóō kə́ ngá̰ý tām̄ yāḿ tə́ ō.
17M̄-teē deē i kə ta kūl̄ kum kedə̄.
I tām̄ najə̄ ń toō tə́ n m-ɔ́sə go̰n deē ń adə̄m̄ kum kedə̄ ní.
18Tɔdɔ̄ m̄-gḛy rāā yá̰á̰ ń kum kedə̄ əda ní.
M̄-rāā yá̰á̰ kə́ majə i kə rɔ̄ tḭ̄ḭ́ ō, m̄-tél m̄-ndə̄ngā rɔ̄ḿ najə̄n tə́ aĺ bátə́ ō.
19M-ə́hɔ gō kum kedə̄ adə̄ ngan̄g ō,
yá̰á̰ ń ndū najə̄ əda ní, m-ə̄ndā rɔ̄ḿ ta tə́ m̄-rāā kə ta njaá ō.
M-ɔ́y jīḿ kə̄ dɔɔ́ m̄-ndɔ̄yń Nə́ɓā ō,
m̄-ndə̄ngā rɔ̄ḿ najə̄ rāā kə́ m̄-rāā kum kedə̄ nja bə̄yā̰ kə́ gogə́ tə́ ō.
20M-āw̄ kə̄ rɔ̄ kum kedə̄ tə́ ō,
dan ń m-ə́ngen ní, ni unjə̄ njáý njáý ō.
I ni n rāā adə̄ kur̄ dɔḿ ger̄ yá̰a̰ ta kəla gíŕ tə́ ní.
I tām̄ najə̄ ń toō tə́ n kum kedə̄ a əya̰m̄ kɔ̄ɔ́ aĺ bátə́ ní.
21Kemḿ əgam̄ biting biting lo sāā kum kedə̄ tə́.
I tām̄ najə̄ ń toō tə́ n m-ə́ngé yá̰á̰ kə́ majə kə́ gātən i ngá̰ý ń toō ní.
22Kɔ́ɔ̄ɓē adə̄m̄ ger̄ kɔr̄ najə̄ əndāń njaḿ,
adə̄ m̄-ndigə kɔsə go̰nən.
23Sḭḭ̄ de gə̄ ń ndóōn̄sí yá̰a̰ aĺ ní, ī-reēī kə̄ rɔ̄ḿ tə́,
údiī kem kújə́ ndóō yá̰a̰ yāḿ tə́.
24Kadə̄ ī-ndiī kanjə̄ kum kedə̄ dan i ngá̰ý ɓáý i tām̄ rí tə́?
Tá kəndā rāāsí ngá̰ý.
25M̄-teē taḿ m-ə́dań najə̄ ń toó kə mbērēé, m-ə́da na:
ā ə́ngeī kum kedə̄ kanjə̄ nar.
26Ə́laī dɔsí gíŕ njúkə yān tə́,
yā taāń yá̰á̰ ndóō yān.
Ni i kadəsí tə́ ngɔr, adə̄ deē ń əndā rɔ̄n ta sāan tə́ anī a əngen.
27Sḭḭ̄ kɔ́ gə̄ á̰a̰ī kə kumsí kadə̄ m-á̰á̰ tápə̄ i ngá̰ý aĺ bátə́
n m-ə́ngeń kɔr̄ koō kə́ ngá̰ý ní.
28Ī-mangiī yá̰á̰ ndóō kə gātə̄ kə́ ngá̰ý,
anī ā ə́ngeī lɔ́ŕ ngá̰ý kə ta kūl̄neé.
29Ī-rāāī rɔ̄nel̄ najə̄ kem majə yā Kɔ́ɔ̄ɓē tə́ ō,
ī-lōōī kadə̄ rɔ̄sí sɔl̄sí lo ɓōkə́n tɔ̄ȳ tə́ ō.
30Ī-rāāī kəla yāsí kété no kum mbang ń ɔjən̄ tə́ ní,
anī a adə̄sí yá̰a̰ kəndā nja yāsí kə kum mbang yāneé.
Pā kə́ nge ndangən kə́ nge kṵ jōó kə́ kem ɓē kə́ Ker tə́ əla tū dɔ nin̄ kə́ kutə mí gidə i kógə̄ḿ tə́ ba kəlān i kutə gidə i jōó tə́
a Ī-tɔ̄yī Kɔ́ɔ̄ɓē tām̄ ni i de kə́ majə,
tɔdɔ̄ tár yān i táŕ kə́ to ngándáńg.
b Ī-tɔ̄yī Nə́ɓā ń tɔ̄ȳnən̄ ní,
tɔdɔ̄ tár yān i táŕ kə́ to ngándáńg.
ɓ Ī-tɔ̄yī nge ngɔ̄m̄ Israel,
tɔdɔ̄ tár yān i táŕ kə́ to ngándáńg.
d Ī-tɔ̄yī nge rāā dɔ rā̰ ō dɔ nang ō,
tɔdɔ̄ tár yān i táŕ kə́ to ngándáńg.
ɗ Ī-tɔ̄yī nge gān̄g dɔ Israel,
tɔdɔ̄ tár yān i táŕ kə́ to ngándáńg.
e Israel gə̄ ń tə̄ndā tḭ̄ḭ̄n̄də́ kə̄ lo gə̄ tə́ ní,
ī-tɔ̄yī nge kɔsə njadə́ kə̄ naā tə́,
tɔdɔ̄ tár yān i táŕ kə́ to ngándáńg.
ə Ī-tɔ̄yī nge rāā ɓē yān ō, lo kə́ táĺ yān ō,
tɔdɔ̄ tár yān i táŕ kə́ to ngándáńg.
g Ī-tɔ̄yī nge rāā kadə̄ gajə dā̰ kógə̄ḿ əɓa kem kújə yā Dabid tə́,
tɔdɔ̄ tár yān i táŕ kə́ to ngándáńg.
h Ī-tɔ̄yī nge gə̄rā ngán Sadok gə̄ kadə̄ nin̄ i ngé tun̄ yá̰a̰ gə̄,
tɔdɔ̄ tár yān i táŕ kə́ to ngándáńg.
i Ī-tɔ̄yī nge ń ni i der yā Abəraham ní,
tɔdɔ̄ tár yān i táŕ kə́ to ngándáńg.
j Ī-tɔ̄yī mbal̄ yā Ijaak,
tɔdɔ̄ tár yān i táŕ kə́ to ngándáńg.
k Ī-tɔ̄yī nge kə́ tɔ́gən i ngá̰ý yā Jakob, t
ɔdɔ̄ tár yān i táŕ kə́ to ngándáńg.
l Ī-tɔ̄yī nge gə̄rā Siyo̰,
tɔdɔ̄ tár yān i táŕ kə́ to ngándáńg.
m Ī-tɔ̄yī mban̄g yā mban̄g gə̄,
tɔdɔ̄ tár yān i táŕ kə́ to ngándáńg.
n Anī deē yān gə̄ ń tɔ́gə́də́ gətóó ní,
ni a tél yā kadə̄də́ tɔ́gə gogə́ rang.
Lo ń nuū tə́ ngé kəhɔ gōn gə̄ malang a ɓōkə́nən̄ tɔ̄ȳ,
adə̄ i ngáń kə́ dəyá̰ gə̄ yā Israel,
gír de gə̄ ń nin̄ i ngɔr rɔ̄n tə́ ní.
Aleluya.
Najə̄ kə́ kɔr̄ kə gōsōó dɔ sāā kum kedə̄ kə rɔ̄tḭ̄ḭ́ tə́
13a Dan balsááḿ tə́, kété pá tá kadə̄ m-āw̄ dáȳ dɔɔ́ tə́ ní,
m̄-sāā kum kedə̄ i kə̄ dɔ ndágá wáńg lo ndɔ̄ȳ tə́.
14a Ni reē rɔ̄ḿ tə́ kə majə yāneé ō,
m-ā m̄-ngɔ̄də̄ gōn bátə́ ta tɔ̄l̄ ta tə́ ō.
15a Tītə̄ ń hútə̄ kāgə̄ nduú kuú kɔ̄ɔ́ dan ń kan̄
nduú kərē yā kadə̄ń deē rɔ̄nel̄ dan wurən tə́ ní,
m̄-njə̄rā kum kubə tə́ i tītə̄ ń nuū,
tɔdɔ̄ m-ə́lá gír ger̄ kum kedə̄ i dan balsááḿ tə́.
16a M̄-nēl̄ mbīḿ sḛ́ý beē yā kəngeń yá̰á̰ ndóō kə́ nel̄ taḿ gə̄ ngá̰ý.
17a Kum kedə̄ tél i kókətōḿ kə́ dəyá̰ ō,
deē ń ndóōm̄ yá̰á̰ ní,
m̄-ndigə ɓōkə́n tɔ̄ȳ kə gō ń kum kedə̄ asə kənge ní ō.
M-ɔ́jə kḭḭ dɔɔ́ kógə̄ naā sḛ́ý.
18a Yá̰á̰ kə́ tām̄ yā rɔ̄nel̄ tə́ ní, m̄-rāā kə rɔ̄tḭ̄ḭ́ ō,
m-ɔ̄r̄ koō loon tə́ aĺ ō.
19a M̄-rāā adə̄ ngur kəngen rāām̄ ngá̰ý,
kanjə̄ kun kumḿ kɔ̄ɔ́ ta tə́.
20a M̄-rāā adə̄ ngurən rāām̄ ngá̰ý ō,
dan ń mā i dɔ lo yān kə́ ḭḭ kə̄ dɔɔ́ gə̄ tə́ ní,
m̄-sɔl̄ njéŕ njéŕ aĺ ō.
M̄-sə́re jīḿ.
M-ún kum mbang ngá̰ý m-á̰a̰ń rɔ̄n kə́ karī kə ta njaá,
m̄-tə́go jīḿ adə̄ unjə̄.
Currently Selected:
JEJU KƏ́ NGŌN̄ SIRAK 51: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
JEJU KƏ́ NGŌN̄ SIRAK 51
51
Najə̄ kə́ kənī dɔ madə̄ tə́ kə́ yā tɔ̄ləń ta
Ndɔ̄ȳ yā Jeju kə́ ngōn̄ Sirak
1Kɔ́ɔ̄ɓē, ḭ̄ ń i mban̄g ní, m̄-ndigə rāāī kə́ra.
Nə́ɓā nge kajəḿ, m̄-ndigə ɓōkíī tɔ̄ȳ.
I ngarā̰ kumií ḭ̄kɔ́ n m̄-rāāī kə́rá ní.
2Tɔdɔ̄ ī-ngɔ̄mə̄m̄ ō, ī-dḭḭ̄m̄ ō,
ɔ̄rə̄m̄ ta yo tə́ ō.
Ḭ̄ ɔ̄rə̄m̄ kum gūmbə̄ yā ngé kɔr̄ najə̄ kə́ gōtə́ aĺ gə̄ tə́ ō,
ájəm̄ ta ngé sor̄ gə̄ tə́ ō.
Ḭ̄ ī-reē ī-dḭḭ̄m̄ ō, ájəm̄
3ta kum madə̄ ba̰ā̰ḿ gə̄ tə́ ō,
kə gō kem majə yāí kə́ to ɓōĺ ngá̰ý ō, tām̄ yā rīí tə́ ō.
Tɔdɔ̄ de gə̄ ń nuū ń ndin̄ dɔ rɔ̄də́ tə́ kɔ̄ɔ́ yā kəsam̄ ní,
ḭ̄ ī-taām̄ jīdə́ tə́ kɔ̄ɔ́. Ngé gə̄ ń ndigən̄ tɔ̄lə̄m̄ ní, ḭ̄ ī-taām̄ jīdə́ tə́ ə́ya̰m̄ dɔɔ́.
Yá̰á̰ kə́ majə aĺ gə̄ ngá̰ý teēn̄ dɔḿ tə́, banī ájəm̄.
4Hor ń gīr̄ gidəḿ əla ta naā tə́ ní, ḭ̄ ájəm̄ kum tə́.
Ḭ̄ ájəm̄ kum hor kə́ i mā n m̄-rāā aĺ tə́.
5Ḭ̄ ī-teē seḿ kɔ̄ɔ́ ɓádá lo kə́ ɗúú ngá̰ý tə́ ō,
ī-teē seḿ kɔ̄ɔ́ ta najə̄ kə́ yḛr gə̄ tə́ ō, ta najə̄ kə́ sor̄ gə̄ tə́ ō.
6Kum gərā gə̄ ń téēn̄ ta de kə́ majə aĺ tə́ ní, ḭ̄ ī-teē seḿ kɔ̄ɔ́ ta tə́.
Kété ní mā i ngɔr kə̄ ta yo tə́ ō,
m̄-risə m-āw̄ ɓádá ō.
7Madə̄ ba̰ā̰ḿ gə̄ teēn̄ kə̄ ta gə̄ tə́ gīrə̄n̄ gidəḿ, ba de kə́ reē dḭḭ̄m̄ gətóo.
M̄-sāā deē kə́ kadə̄ rāā seḿ, banī m-ə́nge alé!
8Lo ń nuū tə́ Kɔ́ɔ̄ɓē, əga kemḿ dɔ kem majə yāí tə́ ō,
dɔ rāā majə kə deé yāí ń ə́lá gír rāā i jóó ngá̰ý ní tə́ ō.
M̄-ger̄ kadə̄ ngé gə̄ ń tə́gān̄ tadə́ ba ngóōīn̄ ní, ḭ̄ ī-gān̄g dɔdə́ ō,
ī-taādə́ jī ngé kem ndul gə̄ tə́ ə́yá̰də́ dɔɔ́ ō.
9Adə̄ m̄-ra dɔ nang tə́ laā m̄-rāāiń ɓɔ́ ō,
m̄-ra seí kadə̄ ɔ̄rə̄m̄ kɔ̄ɔ́ ta yo tə́ ō.
10M̄-rāā Kɔ́ɔ̄ɓē ń i bɔbə̄ kɔ́ɔ̄ḿ ní ɓɔ́ kadə̄ rāā seḿ,
kadə̄ əya̰m̄ kɔ̄ɔ́ kem ndɔ̄ gə̄ ń yá̰a̰ a tɔȳń dɔḿ tə́ ní aĺ ō,
dan yā ngé kɔjə rɔ̄ gə̄ ń nge dḭḭ̄m̄ gətóó tə́ ní ɓáa kadə̄ rāā seḿ ō.
11M-ā m̄-tɔ̄ȳ rīí kanjə̄ kəya̰ ta ō,
m-ā m̄-ndadī kə pāá ō.
Anī Kɔ́ɔ̄ɓē oō ndɔ̄ȳ yāḿ ba rāā seḿ.
12Nə́ngētə́ gēé taḿ tḭ̄ḭ̄, banī ájəm̄ ō,
ī-gān̄g dɔḿ ndɔ̄ ń yá̰á̰ kə́ majə aĺ teēń dɔḿ tə́ ní ō.
I tām̄ najə̄ ń nuū tə́ n m̄-ndigə rāāī kə́ra ō, ɓōkíī tɔ̄ȳ ō ní.
M̄-ndigə kəda gotə yá̰á̰ kə́ majə ń ī-rāā seḿ ní ō.
Deē aw̄ sāā kum kedə̄ tə́
13Dan balsááḿ tə́, kété pá tá kadə̄ m-āw̄ dáȳ dɔɔ́ tə́ ní,
m̄-sāā kum kedə̄ i kə̄ dɔ ndágá wáńg lo ndɔ̄ȳ tə́.
14M̄-ndɔ̄ȳ tāmən tə́ ta kújə yā Kɔ́ɔ̄ɓē tə́ ō,
m-ā m̄-sāan bátə́ kadə̄ m-óyń ō.
15Dan ń kum kedə̄ tɔgə, tītə̄ kan̄ nduú kə́ kərē kɔ̄ɔ́ anī,
adə̄m̄ rɔ̄nel̄ ngarā̰ kemḿ tə́.
M̄-njə̄rā dɔ róbə́ kə́ súūmú tə́ ō,
m-ə́lá gír kun gō tóo kum kedə̄ ō, i dan balsááḿ tə́ nú.
16M̄-nēl̄ mbīḿ sḛ́ý beé ngóy anī, m-ə́ngen ō,
m-ə́ngé yá̰á̰ ndóō kə́ ngá̰ý tām̄ yāḿ tə́ ō.
17M̄-teē deē i kə ta kūl̄ kum kedə̄.
I tām̄ najə̄ ń toō tə́ n m-ɔ́sə go̰n deē ń adə̄m̄ kum kedə̄ ní.
18Tɔdɔ̄ m̄-gḛy rāā yá̰á̰ ń kum kedə̄ əda ní.
M̄-rāā yá̰á̰ kə́ majə i kə rɔ̄ tḭ̄ḭ́ ō, m̄-tél m̄-ndə̄ngā rɔ̄ḿ najə̄n tə́ aĺ bátə́ ō.
19M-ə́hɔ gō kum kedə̄ adə̄ ngan̄g ō,
yá̰á̰ ń ndū najə̄ əda ní, m-ə̄ndā rɔ̄ḿ ta tə́ m̄-rāā kə ta njaá ō.
M-ɔ́y jīḿ kə̄ dɔɔ́ m̄-ndɔ̄yń Nə́ɓā ō,
m̄-ndə̄ngā rɔ̄ḿ najə̄ rāā kə́ m̄-rāā kum kedə̄ nja bə̄yā̰ kə́ gogə́ tə́ ō.
20M-āw̄ kə̄ rɔ̄ kum kedə̄ tə́ ō,
dan ń m-ə́ngen ní, ni unjə̄ njáý njáý ō.
I ni n rāā adə̄ kur̄ dɔḿ ger̄ yá̰a̰ ta kəla gíŕ tə́ ní.
I tām̄ najə̄ ń toō tə́ n kum kedə̄ a əya̰m̄ kɔ̄ɔ́ aĺ bátə́ ní.
21Kemḿ əgam̄ biting biting lo sāā kum kedə̄ tə́.
I tām̄ najə̄ ń toō tə́ n m-ə́ngé yá̰á̰ kə́ majə kə́ gātən i ngá̰ý ń toō ní.
22Kɔ́ɔ̄ɓē adə̄m̄ ger̄ kɔr̄ najə̄ əndāń njaḿ,
adə̄ m̄-ndigə kɔsə go̰nən.
23Sḭḭ̄ de gə̄ ń ndóōn̄sí yá̰a̰ aĺ ní, ī-reēī kə̄ rɔ̄ḿ tə́,
údiī kem kújə́ ndóō yá̰a̰ yāḿ tə́.
24Kadə̄ ī-ndiī kanjə̄ kum kedə̄ dan i ngá̰ý ɓáý i tām̄ rí tə́?
Tá kəndā rāāsí ngá̰ý.
25M̄-teē taḿ m-ə́dań najə̄ ń toó kə mbērēé, m-ə́da na:
ā ə́ngeī kum kedə̄ kanjə̄ nar.
26Ə́laī dɔsí gíŕ njúkə yān tə́,
yā taāń yá̰á̰ ndóō yān.
Ni i kadəsí tə́ ngɔr, adə̄ deē ń əndā rɔ̄n ta sāan tə́ anī a əngen.
27Sḭḭ̄ kɔ́ gə̄ á̰a̰ī kə kumsí kadə̄ m-á̰á̰ tápə̄ i ngá̰ý aĺ bátə́
n m-ə́ngeń kɔr̄ koō kə́ ngá̰ý ní.
28Ī-mangiī yá̰á̰ ndóō kə gātə̄ kə́ ngá̰ý,
anī ā ə́ngeī lɔ́ŕ ngá̰ý kə ta kūl̄neé.
29Ī-rāāī rɔ̄nel̄ najə̄ kem majə yā Kɔ́ɔ̄ɓē tə́ ō,
ī-lōōī kadə̄ rɔ̄sí sɔl̄sí lo ɓōkə́n tɔ̄ȳ tə́ ō.
30Ī-rāāī kəla yāsí kété no kum mbang ń ɔjən̄ tə́ ní,
anī a adə̄sí yá̰a̰ kəndā nja yāsí kə kum mbang yāneé.
Pā kə́ nge ndangən kə́ nge kṵ jōó kə́ kem ɓē kə́ Ker tə́ əla tū dɔ nin̄ kə́ kutə mí gidə i kógə̄ḿ tə́ ba kəlān i kutə gidə i jōó tə́
a Ī-tɔ̄yī Kɔ́ɔ̄ɓē tām̄ ni i de kə́ majə,
tɔdɔ̄ tár yān i táŕ kə́ to ngándáńg.
b Ī-tɔ̄yī Nə́ɓā ń tɔ̄ȳnən̄ ní,
tɔdɔ̄ tár yān i táŕ kə́ to ngándáńg.
ɓ Ī-tɔ̄yī nge ngɔ̄m̄ Israel,
tɔdɔ̄ tár yān i táŕ kə́ to ngándáńg.
d Ī-tɔ̄yī nge rāā dɔ rā̰ ō dɔ nang ō,
tɔdɔ̄ tár yān i táŕ kə́ to ngándáńg.
ɗ Ī-tɔ̄yī nge gān̄g dɔ Israel,
tɔdɔ̄ tár yān i táŕ kə́ to ngándáńg.
e Israel gə̄ ń tə̄ndā tḭ̄ḭ̄n̄də́ kə̄ lo gə̄ tə́ ní,
ī-tɔ̄yī nge kɔsə njadə́ kə̄ naā tə́,
tɔdɔ̄ tár yān i táŕ kə́ to ngándáńg.
ə Ī-tɔ̄yī nge rāā ɓē yān ō, lo kə́ táĺ yān ō,
tɔdɔ̄ tár yān i táŕ kə́ to ngándáńg.
g Ī-tɔ̄yī nge rāā kadə̄ gajə dā̰ kógə̄ḿ əɓa kem kújə yā Dabid tə́,
tɔdɔ̄ tár yān i táŕ kə́ to ngándáńg.
h Ī-tɔ̄yī nge gə̄rā ngán Sadok gə̄ kadə̄ nin̄ i ngé tun̄ yá̰a̰ gə̄,
tɔdɔ̄ tár yān i táŕ kə́ to ngándáńg.
i Ī-tɔ̄yī nge ń ni i der yā Abəraham ní,
tɔdɔ̄ tár yān i táŕ kə́ to ngándáńg.
j Ī-tɔ̄yī mbal̄ yā Ijaak,
tɔdɔ̄ tár yān i táŕ kə́ to ngándáńg.
k Ī-tɔ̄yī nge kə́ tɔ́gən i ngá̰ý yā Jakob, t
ɔdɔ̄ tár yān i táŕ kə́ to ngándáńg.
l Ī-tɔ̄yī nge gə̄rā Siyo̰,
tɔdɔ̄ tár yān i táŕ kə́ to ngándáńg.
m Ī-tɔ̄yī mban̄g yā mban̄g gə̄,
tɔdɔ̄ tár yān i táŕ kə́ to ngándáńg.
n Anī deē yān gə̄ ń tɔ́gə́də́ gətóó ní,
ni a tél yā kadə̄də́ tɔ́gə gogə́ rang.
Lo ń nuū tə́ ngé kəhɔ gōn gə̄ malang a ɓōkə́nən̄ tɔ̄ȳ,
adə̄ i ngáń kə́ dəyá̰ gə̄ yā Israel,
gír de gə̄ ń nin̄ i ngɔr rɔ̄n tə́ ní.
Aleluya.
Najə̄ kə́ kɔr̄ kə gōsōó dɔ sāā kum kedə̄ kə rɔ̄tḭ̄ḭ́ tə́
13a Dan balsááḿ tə́, kété pá tá kadə̄ m-āw̄ dáȳ dɔɔ́ tə́ ní,
m̄-sāā kum kedə̄ i kə̄ dɔ ndágá wáńg lo ndɔ̄ȳ tə́.
14a Ni reē rɔ̄ḿ tə́ kə majə yāneé ō,
m-ā m̄-ngɔ̄də̄ gōn bátə́ ta tɔ̄l̄ ta tə́ ō.
15a Tītə̄ ń hútə̄ kāgə̄ nduú kuú kɔ̄ɔ́ dan ń kan̄
nduú kərē yā kadə̄ń deē rɔ̄nel̄ dan wurən tə́ ní,
m̄-njə̄rā kum kubə tə́ i tītə̄ ń nuū,
tɔdɔ̄ m-ə́lá gír ger̄ kum kedə̄ i dan balsááḿ tə́.
16a M̄-nēl̄ mbīḿ sḛ́ý beē yā kəngeń yá̰á̰ ndóō kə́ nel̄ taḿ gə̄ ngá̰ý.
17a Kum kedə̄ tél i kókətōḿ kə́ dəyá̰ ō,
deē ń ndóōm̄ yá̰á̰ ní,
m̄-ndigə ɓōkə́n tɔ̄ȳ kə gō ń kum kedə̄ asə kənge ní ō.
M-ɔ́jə kḭḭ dɔɔ́ kógə̄ naā sḛ́ý.
18a Yá̰á̰ kə́ tām̄ yā rɔ̄nel̄ tə́ ní, m̄-rāā kə rɔ̄tḭ̄ḭ́ ō,
m-ɔ̄r̄ koō loon tə́ aĺ ō.
19a M̄-rāā adə̄ ngur kəngen rāām̄ ngá̰ý,
kanjə̄ kun kumḿ kɔ̄ɔ́ ta tə́.
20a M̄-rāā adə̄ ngurən rāām̄ ngá̰ý ō,
dan ń mā i dɔ lo yān kə́ ḭḭ kə̄ dɔɔ́ gə̄ tə́ ní,
m̄-sɔl̄ njéŕ njéŕ aĺ ō.
M̄-sə́re jīḿ.
M-ún kum mbang ngá̰ý m-á̰a̰ń rɔ̄n kə́ karī kə ta njaá,
m̄-tə́go jīḿ adə̄ unjə̄.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.