JEJU KƏ́ NGŌN̄ SIRAK 50
50
Simo̰ nge tun̄ yá̰á̰ kə́ bo
1Lo kə́ nujə gə̄ kə́ tū kújə yā Kɔ́ɔ̄ɓē tə́ ní,
i Simo̰ kə́ ngōn̄ Oniyas nge tun̄ yá̰á̰ kə́ bo n tél rāādə́ gogə́ rang ní ō,
ɓāl̄ yān tə́ ní, ni rāā kújə yā Kɔ́ɔ̄ɓē adə̄ ngan̄g tɔȳ kə́ kété ō.
2Ndogə̄ mbal̄ kə́ ngāl̄ ngá̰ý kum kə̄ dɔɔ́ ń kəndān i gidə naā tə́ jōó ní, i ni n əndā ngəran ní.
Adə̄ i nja kújə́ kə́ nang tə́ kə́ nder̄ ń rāā adə̄ lo kə́ kem kújə yā Kɔ́ɔ̄ɓē tə́ ḭḭ kə̄ dɔɔ́ ní.
3Ndērə̄n̄ bəlo kə́ yā ngɔ̄m̄ man̄ kemeé i ɓāl̄ yān tə́.
Kem bəlo ní bo asə naā kə kem bay kə́ bo kə́ ta kújə yā Kɔ́ɔ̄ɓē kə́ kété tə́.
4Ni gḛy kadə̄ nujən̄ gír deē yān gə̄ kɔ̄ɔ́ alé,
adə̄ rāā ɓē adə̄ ngan̄g najə̄ yā ngé reē kənī ɓē rɔ̄ɔ̄ tə́ gə̄.
5Dan ń teē kɔ̄ɔ́ kem lo kə́ táĺ tə́, ba a njə̄rā kə gō gidə kújə yā Kɔ́ɔ̄ɓēé ní,
kɔsə go̰n yān i kə́ bo ngá̰ý.
6Ni to i tītə̄ dɔgə́ lo tīī kə́ unjə̄ dan kil̄ man̄ gə̄ tə́ beé ō,
tītə̄ nāā kə́ ndaa ngóńg ngóńg kə́ gōr̄ gong beé ō.
7Ni to i tītə̄ mbang kə́ ndə́lē dɔ kújə yā Nge Ndi dɔ rā̰ tə́ tə́ beé ō,
tītə̄ kə́ dēsə́ bā kə́ ndə́lē dan kil̄ man̄ gə̄ kə́ to kɔsə go̰n tə́ beé ō.
8Ni to i tītə̄ hútə̄ kāgə̄ kə́ majə gə̄ kə́ ta ɓar tə́ beé ō,
tītə̄ hútə̄ ndə́já lís gə̄ kə́ ran̄ kadə man̄ tə́ beé ō,
tītə̄ kāgə̄ gə̄ kə́ Libā̰a̰ tə́ kə́ ngā nəngá beé ō.
9Ni to i tītə̄ ndujə̄ nūū kāgə̄ kə́ otə majə kə́ hor ṵṵ dɔ dabə róō ndujə̄ nūū kāgə̄ kə́ otə majə tə́ beē ō,
tītə̄ bay lɔ́ŕ kə́ súūn̄ gidə kə mbal̄ gə̄ kə́ gātə̄də́ i ngá̰ý gə̄ kə́ tayā tayā gə̄ beé ō,
10to i tītə̄ kāgə̄ olibə kə́ kanə̄n i ngá̰ý beē ō,
kāgə̄ sipəres kə́ tɔgə bátə́ ugə̄ ɓōdə̄ rā̰ tə́ beē ō.
11Dan ń ni əla kūbə̄ kṵṵ̄ nge tun̄ yá̰á̰ kə́ bo rɔ̄n tə́ ō,
tə́lá yá̰á̰ súū rɔ̄ yān kə́ majə ngá̰ý gə̄ rɔ̄n tə́ ō,
a al̄ kə̄ dɔ dabə tun̄ yá̰a̰ kə́ táĺ tə́ ō anī,
rāā adə̄ kɔsə go̰n taā lo kem lo kə́ táĺ tə́.
12Ni ra kə njan kə́ dɔɔ́ kadə hor kə́ dɔ dabə tun̄ yá̰á̰ tə́
a taāń loo dā̰ gə̄ kə́ yā ndējə̄ jī ngé tun̄ yá̰a̰ gə̄ tə́.
Ngé rāā kəla seneé gə̄ ra gīrə̄n̄ gidən tītə̄ jākā mbang beé ō,
tītə̄ kāgə̄ sédər gə̄ kə́ Libā̰a̰ tə́ beé ō,
tītə̄ ɓōdə̄ kāgə̄ túmbur gə̄ beé ō.#50.12 Gīrə̄n̄ gidən tītə̄ kāgə̄ sédər gə̄ ō, kāgə̄ túmbur ō kə́ Libā̰a̰ tə́ ō: kumən na i kāgə̄ gə̄ kə́ majən̄ ngá̰ý ō, sáan̄ njururu gə̄.
13Ngé tun̄ yá̰a̰ gə̄ kə́ gír kojə yā Aaro̰ tə́ ran̄ nuú malang kə kūbə̄ yādə́ kə́ majə ngá̰ý gēé.
Yá̰a̰ gə̄ ń de gə̄ ndējə̄n̄ Kɔ́ɔ̄ɓē ní, ranə̄ń jīdə́ tə́
ta kum ngé kán̄ naā gə̄ malang yā Israel tə́.
14Simo̰ ra a rāā i kəla kə́ dɔ dabə tun̄ yá̰á̰ tə́ ō,
yá̰a̰ gə̄ ń ndējə̄n̄ Nge Ndi dɔ rā̰ tə́, adə̄ i Kɔ́ɔ̄ɓē kə́ nge kəndā yá̰a̰ malang ní, ni tə́ndādə́ kə gōó gōó ō.
15Ni əla jīn kə̄ dɔ bay tə́ ō,
kasə nduú ń i yá̰á̰ kə́ teē tū kāgə̄ nduú tə́ ní,
tə́te nja dabə tun̄ yá̰á̰ tə́ ō.
Nge ń nuū i ítər kə́ otə majə tām̄ yā mban̄g kə́ nge kəndā yá̰a̰ malang tə́.
16Lo ń nuū tə́ ngé tun̄ yá̰a̰ gə̄ ń i ngán Aaro̰ gə̄ ní əgan̄ kɔŕ ō,
kɔ̄rə́n̄ bərúnjə yādə́ kə́ rāā kə gində̄ kə́ kəndaá gə̄ ō,
rāān̄ adə̄ kōōdə́ ɓār̄ ngá̰ý ō,
kadə̄ i yá̰a̰ kəga kem dɔ najə̄ tə́ yā Nge Ndi dɔ rā̰ tə́.
17Anī kə̄ ta jī tə́ nuū kósə de gə̄ tétə̄n̄ kejədə́
ba ɔsən̄ nodə́ nang tə́ naā tə́ malang
rɔȳnəń Kɔ́ɔ̄ɓē yādə́
Nge Ndi dɔ rā̰ tə́ ń i Nə́ɓā kə́ tɔ́gən i ngá̰ý ní.
18Gō tə́ anī gōsə̄ pā gə̄ ɓōkə́nən̄ tɔ̄ȳ kə pāá,
adə̄ ndūdə́ ɓār̄ ngá̰ý ō, míndə́də́ nel̄ ngá̰ý ō.
19Ngán Israel gə̄ rāān̄ Nge Ndi dɔ rā̰ tə́ ɓɔ́,
ran̄ ta kum Nə́ɓā kə́ nge kem majə tə́ ndɔ̄ȳnəń
bátə́ kadə̄ gíŕ yá̰a̰ kūjə́ yā Kɔ́ɔ̄ɓē gāngəń ō,
gír kəla kə́ tām̄ yā Nə́ɓā tə́ gāngəń ō.
20Lo ń nuū tə́ Simo̰ risə kɔ̄ɔ́ dɔ lo tun̄ yá̰á̰ tə́, ɔy jīn kə̄ dɔɔ́
kə̄ dɔ ngé kán̄ naā gə̄ yā ngán Israel gə̄ tə́,
ba tɔ́r̄ tan dɔdə́ tə́ kə rī Kɔ́ɔ̄ɓēé.
I tītə̄ ń nuū n əngeń ta róbə ɓāŕ rī kə́ kal kógə̄ḿ beē ní.#50.20 Rī kə́ kal kógə̄ḿ beē: Dan ngeé ń nuū tə́ ní, i ndɔ̄ māȳ rɔ̄ tə́ ngóy n nge tun̄ yá̰á̰ kə́ bo a ɓāŕ rī Nə́ɓā ní. Rīn ní majə aĺ anī na i Yawo. Á̰a̰ī Tə́da 6.23-27; Leb 16; Leb 23.27-32.
21Ngé kán̄ naā gə̄ tél tetən̄ kejədə́ ba ɔsən̄ nodə́ nang tə́ malang ɓáý tṵ
yā kəngeń tɔ́r̄ ta yā Nge Ndi dɔ rā̰ tə́.
Ndɔ̄ȳ kə́ yā tɔ́rəń ta
22Ngɔlaā ní ī-rāāī Nə́ɓā nge kəndā yá̰a̰ malang kə́ra,
ni ń rāā yá̰á̰ kə́ bo gə̄ kə̄ lo gə̄ tə́ malang ō,
ojən̄jí hapə anī rāā adə̄ jə-tɔgiī ō,
rāā yá̰a̰ sejí kə́ gō kem majə yāneé ō ní.
23Ādə̄ ni adə̄jí rɔ̄nel̄ dan wurjí tə́ ō,
rāā adə̄ lo to lɔm ɓāl̄ yājí tə́
dɔ nang kə́ Israel tə́ tām̄ yā ndɔ̄ gə̄ kə́ ngándáńg tə́ ō.
24Ādə̄ kem majə yān i sejí ngándáńg kanjə̄ kəya̰ ta ō,
ādə̄ ni gān̄g dɔjí kə dɔ ndɔ̄ gə̄ malang ń j-a jə-ndiīń kə kumjí ní ō.
Nápar de gə̄ mətá kə́ nel̄ de gə̄ sedə́ aĺ ngá̰ý
25Nápar de gə̄ kə́ nelə̄m̄ sedə́ aĺ ngá̰ý gə̄ gíŕdə́ i jōó,
ba kə́ nge kṵ mətá yādə́ i nápar de gə̄ aĺ gə̄gē ɓáý.
26Ngé kə́ ta kəga dɔ gə̄ i deē dɔ mbal̄ gə̄ kə́ Seyir. Gō tə́ anī i Pilistin gə̄,
ta tɔ̄l̄ tadə́ i mbóo de gə̄ ń ndin̄ Sisem ní.
Nge ndang makətūbə̄ ń toō ō, makətūbə̄ yān ń ndang ní ō
27I Jeju kə́ ngōn̄ Sirak, kə́ ngōn̄ Eleyajar kə́ Jerusalem
n ndang makətūbə̄ ń toō ní.
Ni ndang i yá̰á̰ ndóō kə́ kum kedə̄ i ngá̰ý tū tə́ ō, yá̰a̰ ger̄ i ngá̰ý tū tə́ ō.
I kum kedə̄ kə́ ngá̰ý kə́ kemən tə́ n ndang kemeé tītə̄ man̄ kə́ a edə beé ní.
28Nge rɔ̄nel̄ i deē ń a tél a reē dɔ najə̄ gə̄ ń toō tə́ ngándáńg ní.
Deē ń a ngɔ̄m̄də́ kemən tə́ ní, a tél nge kum kedə̄.
29Tɔdɔ̄ ré undə́ rāań kəla anī, a ngan̄g tū yá̰a̰ gə̄ tə́ malang.
Tām̄ ɓōĺ ndíĺ Kɔ́ɔ̄ɓē i róbə yān.
Currently Selected:
JEJU KƏ́ NGŌN̄ SIRAK 50: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
JEJU KƏ́ NGŌN̄ SIRAK 50
50
Simo̰ nge tun̄ yá̰á̰ kə́ bo
1Lo kə́ nujə gə̄ kə́ tū kújə yā Kɔ́ɔ̄ɓē tə́ ní,
i Simo̰ kə́ ngōn̄ Oniyas nge tun̄ yá̰á̰ kə́ bo n tél rāādə́ gogə́ rang ní ō,
ɓāl̄ yān tə́ ní, ni rāā kújə yā Kɔ́ɔ̄ɓē adə̄ ngan̄g tɔȳ kə́ kété ō.
2Ndogə̄ mbal̄ kə́ ngāl̄ ngá̰ý kum kə̄ dɔɔ́ ń kəndān i gidə naā tə́ jōó ní, i ni n əndā ngəran ní.
Adə̄ i nja kújə́ kə́ nang tə́ kə́ nder̄ ń rāā adə̄ lo kə́ kem kújə yā Kɔ́ɔ̄ɓē tə́ ḭḭ kə̄ dɔɔ́ ní.
3Ndērə̄n̄ bəlo kə́ yā ngɔ̄m̄ man̄ kemeé i ɓāl̄ yān tə́.
Kem bəlo ní bo asə naā kə kem bay kə́ bo kə́ ta kújə yā Kɔ́ɔ̄ɓē kə́ kété tə́.
4Ni gḛy kadə̄ nujən̄ gír deē yān gə̄ kɔ̄ɔ́ alé,
adə̄ rāā ɓē adə̄ ngan̄g najə̄ yā ngé reē kənī ɓē rɔ̄ɔ̄ tə́ gə̄.
5Dan ń teē kɔ̄ɔ́ kem lo kə́ táĺ tə́, ba a njə̄rā kə gō gidə kújə yā Kɔ́ɔ̄ɓēé ní,
kɔsə go̰n yān i kə́ bo ngá̰ý.
6Ni to i tītə̄ dɔgə́ lo tīī kə́ unjə̄ dan kil̄ man̄ gə̄ tə́ beé ō,
tītə̄ nāā kə́ ndaa ngóńg ngóńg kə́ gōr̄ gong beé ō.
7Ni to i tītə̄ mbang kə́ ndə́lē dɔ kújə yā Nge Ndi dɔ rā̰ tə́ tə́ beé ō,
tītə̄ kə́ dēsə́ bā kə́ ndə́lē dan kil̄ man̄ gə̄ kə́ to kɔsə go̰n tə́ beé ō.
8Ni to i tītə̄ hútə̄ kāgə̄ kə́ majə gə̄ kə́ ta ɓar tə́ beé ō,
tītə̄ hútə̄ ndə́já lís gə̄ kə́ ran̄ kadə man̄ tə́ beé ō,
tītə̄ kāgə̄ gə̄ kə́ Libā̰a̰ tə́ kə́ ngā nəngá beé ō.
9Ni to i tītə̄ ndujə̄ nūū kāgə̄ kə́ otə majə kə́ hor ṵṵ dɔ dabə róō ndujə̄ nūū kāgə̄ kə́ otə majə tə́ beē ō,
tītə̄ bay lɔ́ŕ kə́ súūn̄ gidə kə mbal̄ gə̄ kə́ gātə̄də́ i ngá̰ý gə̄ kə́ tayā tayā gə̄ beé ō,
10to i tītə̄ kāgə̄ olibə kə́ kanə̄n i ngá̰ý beē ō,
kāgə̄ sipəres kə́ tɔgə bátə́ ugə̄ ɓōdə̄ rā̰ tə́ beē ō.
11Dan ń ni əla kūbə̄ kṵṵ̄ nge tun̄ yá̰á̰ kə́ bo rɔ̄n tə́ ō,
tə́lá yá̰á̰ súū rɔ̄ yān kə́ majə ngá̰ý gə̄ rɔ̄n tə́ ō,
a al̄ kə̄ dɔ dabə tun̄ yá̰a̰ kə́ táĺ tə́ ō anī,
rāā adə̄ kɔsə go̰n taā lo kem lo kə́ táĺ tə́.
12Ni ra kə njan kə́ dɔɔ́ kadə hor kə́ dɔ dabə tun̄ yá̰á̰ tə́
a taāń loo dā̰ gə̄ kə́ yā ndējə̄ jī ngé tun̄ yá̰a̰ gə̄ tə́.
Ngé rāā kəla seneé gə̄ ra gīrə̄n̄ gidən tītə̄ jākā mbang beé ō,
tītə̄ kāgə̄ sédər gə̄ kə́ Libā̰a̰ tə́ beé ō,
tītə̄ ɓōdə̄ kāgə̄ túmbur gə̄ beé ō.#50.12 Gīrə̄n̄ gidən tītə̄ kāgə̄ sédər gə̄ ō, kāgə̄ túmbur ō kə́ Libā̰a̰ tə́ ō: kumən na i kāgə̄ gə̄ kə́ majən̄ ngá̰ý ō, sáan̄ njururu gə̄.
13Ngé tun̄ yá̰a̰ gə̄ kə́ gír kojə yā Aaro̰ tə́ ran̄ nuú malang kə kūbə̄ yādə́ kə́ majə ngá̰ý gēé.
Yá̰a̰ gə̄ ń de gə̄ ndējə̄n̄ Kɔ́ɔ̄ɓē ní, ranə̄ń jīdə́ tə́
ta kum ngé kán̄ naā gə̄ malang yā Israel tə́.
14Simo̰ ra a rāā i kəla kə́ dɔ dabə tun̄ yá̰á̰ tə́ ō,
yá̰a̰ gə̄ ń ndējə̄n̄ Nge Ndi dɔ rā̰ tə́, adə̄ i Kɔ́ɔ̄ɓē kə́ nge kəndā yá̰a̰ malang ní, ni tə́ndādə́ kə gōó gōó ō.
15Ni əla jīn kə̄ dɔ bay tə́ ō,
kasə nduú ń i yá̰á̰ kə́ teē tū kāgə̄ nduú tə́ ní,
tə́te nja dabə tun̄ yá̰á̰ tə́ ō.
Nge ń nuū i ítər kə́ otə majə tām̄ yā mban̄g kə́ nge kəndā yá̰a̰ malang tə́.
16Lo ń nuū tə́ ngé tun̄ yá̰a̰ gə̄ ń i ngán Aaro̰ gə̄ ní əgan̄ kɔŕ ō,
kɔ̄rə́n̄ bərúnjə yādə́ kə́ rāā kə gində̄ kə́ kəndaá gə̄ ō,
rāān̄ adə̄ kōōdə́ ɓār̄ ngá̰ý ō,
kadə̄ i yá̰a̰ kəga kem dɔ najə̄ tə́ yā Nge Ndi dɔ rā̰ tə́.
17Anī kə̄ ta jī tə́ nuū kósə de gə̄ tétə̄n̄ kejədə́
ba ɔsən̄ nodə́ nang tə́ naā tə́ malang
rɔȳnəń Kɔ́ɔ̄ɓē yādə́
Nge Ndi dɔ rā̰ tə́ ń i Nə́ɓā kə́ tɔ́gən i ngá̰ý ní.
18Gō tə́ anī gōsə̄ pā gə̄ ɓōkə́nən̄ tɔ̄ȳ kə pāá,
adə̄ ndūdə́ ɓār̄ ngá̰ý ō, míndə́də́ nel̄ ngá̰ý ō.
19Ngán Israel gə̄ rāān̄ Nge Ndi dɔ rā̰ tə́ ɓɔ́,
ran̄ ta kum Nə́ɓā kə́ nge kem majə tə́ ndɔ̄ȳnəń
bátə́ kadə̄ gíŕ yá̰a̰ kūjə́ yā Kɔ́ɔ̄ɓē gāngəń ō,
gír kəla kə́ tām̄ yā Nə́ɓā tə́ gāngəń ō.
20Lo ń nuū tə́ Simo̰ risə kɔ̄ɔ́ dɔ lo tun̄ yá̰á̰ tə́, ɔy jīn kə̄ dɔɔ́
kə̄ dɔ ngé kán̄ naā gə̄ yā ngán Israel gə̄ tə́,
ba tɔ́r̄ tan dɔdə́ tə́ kə rī Kɔ́ɔ̄ɓēé.
I tītə̄ ń nuū n əngeń ta róbə ɓāŕ rī kə́ kal kógə̄ḿ beē ní.#50.20 Rī kə́ kal kógə̄ḿ beē: Dan ngeé ń nuū tə́ ní, i ndɔ̄ māȳ rɔ̄ tə́ ngóy n nge tun̄ yá̰á̰ kə́ bo a ɓāŕ rī Nə́ɓā ní. Rīn ní majə aĺ anī na i Yawo. Á̰a̰ī Tə́da 6.23-27; Leb 16; Leb 23.27-32.
21Ngé kán̄ naā gə̄ tél tetən̄ kejədə́ ba ɔsən̄ nodə́ nang tə́ malang ɓáý tṵ
yā kəngeń tɔ́r̄ ta yā Nge Ndi dɔ rā̰ tə́.
Ndɔ̄ȳ kə́ yā tɔ́rəń ta
22Ngɔlaā ní ī-rāāī Nə́ɓā nge kəndā yá̰a̰ malang kə́ra,
ni ń rāā yá̰á̰ kə́ bo gə̄ kə̄ lo gə̄ tə́ malang ō,
ojən̄jí hapə anī rāā adə̄ jə-tɔgiī ō,
rāā yá̰a̰ sejí kə́ gō kem majə yāneé ō ní.
23Ādə̄ ni adə̄jí rɔ̄nel̄ dan wurjí tə́ ō,
rāā adə̄ lo to lɔm ɓāl̄ yājí tə́
dɔ nang kə́ Israel tə́ tām̄ yā ndɔ̄ gə̄ kə́ ngándáńg tə́ ō.
24Ādə̄ kem majə yān i sejí ngándáńg kanjə̄ kəya̰ ta ō,
ādə̄ ni gān̄g dɔjí kə dɔ ndɔ̄ gə̄ malang ń j-a jə-ndiīń kə kumjí ní ō.
Nápar de gə̄ mətá kə́ nel̄ de gə̄ sedə́ aĺ ngá̰ý
25Nápar de gə̄ kə́ nelə̄m̄ sedə́ aĺ ngá̰ý gə̄ gíŕdə́ i jōó,
ba kə́ nge kṵ mətá yādə́ i nápar de gə̄ aĺ gə̄gē ɓáý.
26Ngé kə́ ta kəga dɔ gə̄ i deē dɔ mbal̄ gə̄ kə́ Seyir. Gō tə́ anī i Pilistin gə̄,
ta tɔ̄l̄ tadə́ i mbóo de gə̄ ń ndin̄ Sisem ní.
Nge ndang makətūbə̄ ń toō ō, makətūbə̄ yān ń ndang ní ō
27I Jeju kə́ ngōn̄ Sirak, kə́ ngōn̄ Eleyajar kə́ Jerusalem
n ndang makətūbə̄ ń toō ní.
Ni ndang i yá̰á̰ ndóō kə́ kum kedə̄ i ngá̰ý tū tə́ ō, yá̰a̰ ger̄ i ngá̰ý tū tə́ ō.
I kum kedə̄ kə́ ngá̰ý kə́ kemən tə́ n ndang kemeé tītə̄ man̄ kə́ a edə beé ní.
28Nge rɔ̄nel̄ i deē ń a tél a reē dɔ najə̄ gə̄ ń toō tə́ ngándáńg ní.
Deē ń a ngɔ̄m̄də́ kemən tə́ ní, a tél nge kum kedə̄.
29Tɔdɔ̄ ré undə́ rāań kəla anī, a ngan̄g tū yá̰a̰ gə̄ tə́ malang.
Tām̄ ɓōĺ ndíĺ Kɔ́ɔ̄ɓē i róbə yān.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.