JEJU KƏ́ NGŌN̄ SIRAK 45
45
1Nə́ɓā tár Moyijə ō, de gə̄ tárən̄ Moyijə ō. Dan ń əga kemjí dɔn tə́ anī, jə-tɔ́r̄ tají dɔn tə́.
2Nə́ɓā adə̄n kɔsə go̰n kə́ asə naā kə yā de kə́ dɔ rā̰ tə́ gə̄ ō,
rāā adə̄ madə̄ ba̰ā̰ Israel gə̄ ɓōĺnən̄ ngá̰ý ō.
3Dan ń Moyijə əda najə̄ yā yá̰á̰ kə́ to kɔr kum gə̄ anī, Kɔ́ɔ̄ɓē rāā yá̰a̰ gə̄ ní kə̄ ta jī tə́ nuū ō,
ɔsə go̰nən ta kum mban̄g gə̄ tə́ ō,
ɔjən yá̰a̰ gə̄ kə́ kadə̄ gír deē yān gə̄ rāān̄ ō,
ɔjən yá̰á̰ kógə̄ḿ tū kɔsə go̰n yān tə́ adə̄ a̰ā̰ ō.
4Moyijə i nge ra dɔ ndūn tə́ ō, ni sɔl̄ lɔm ō.
I tām̄ ń nuū tə́ n Kɔ́ɔ̄ɓē ɔr̄ kamə̄n tayā tām̄ kəla yān tə́ ō,
gə̄rān dan de gə̄ tə́ malang ō ní.
5Ni rāā adə̄ Moyijə oō ndūn ō,
aw̄ seneé dan kil̄ man̄ kə́ ndul ndí ndḭ́ tə́ ō.
Nin̄ ran̄ ta naā tə́ ba ɔjən yá̰á̰ kə́ yā rāā gə̄ ō,
ɔjən ndū najə̄ kə́ a rāā kadə̄ deē ndi kə kumneé ō, kadə̄ kur̄ dɔ deē ger̄ yá̰a̰ ō.
Nə́ɓā ndóō de gə̄ kə́ gír kojə yā Jakob tə́ ndū najə̄ gə̄ kə́ dɔ madə̄ naā tə́ ō,
ɔjə ngán Israel gə̄ yá̰a̰ gə̄ ń ni ra dɔ tə́ yā rāā ní ō i tītə̄ ń nuū.
Aaro̰
6Aaro̰ ń i ngōkṵ́ṵ Moyijə kə̄ gír ɓē yā Lebi tə́ ní, Nə́ɓā ɔsən kə̄ dɔɔ́.
Ni i de kə́ táĺ tītə̄ Moyijə beé.
7Nə́ɓā ə̄ndān kem kəla yān tə́ i kə gō jī lo rāā yá̰á̰ kə́ to ngándáńg ō,
əndā kəla tun̄ yá̰a̰ yā ngán Israel gə̄ dɔn tə́ ō,
rāan adə̄ rɔ̄n nelə̄n tām̄ tə́lá yá̰á̰ súū rɔ̄ kə́ majə gə̄ rɔ̄n tə́ ō,
kūbə̄ kə́ majə gə̄ rɔ̄n tə́ ō.
8Ni tə́la kūbə̄ kə́ kɔsə desḛ̄ḛ tū tə́ rɔ̄n tə́ ō,
yá̰a̰ gə̄ kə́ ɔjən̄ kum gotə tɔ́gə yān rɔ̄n tə́ ō:
adə̄ i gajērē ō,#45.8 Gajērē: i kal̄só̰ó̰ kə́ a dṵṵ̄n̄ ta kəlān dām̄ kógə̄ḿ, ba yā Jipə gə̄ ɓáa njan i kə́ ngāl̄ sḛ́ý. kūbə̄ ngāl̄ ō, kūbə̄ Epod ō.
9Ni tə́la kan̄ kāgə̄ gərenādə gə̄ ta nja kūbə̄ ngāl̄ yān tə́ nang tə́ adə̄ gīr̄ gidə əla ta naā tə́ ō,
tə́lá ngán ɓɔ kə́ rāā kə lɔ́rɔ́ gə̄ ngá̰ý mbo̰ō̰ tə́ mbo̰ō̰ tə́ ō.
Ɓɔ gə̄ ní a ɓārə̄n̄ i kə gō njan ń a un ní,
a ɓārə̄n̄ i ɓerēn̄g ɓerēn̄g kə gō nja Aaro̰ ń un a njə̄rań kem kújə yā Kɔ́ɔ̄ɓē tə́ ní.
Nge ń nuū i yá̰á̰ kə́ yā kadə̄ əgań kem Kɔ́ɔ̄ɓē dɔ gír deē yān gə̄ tə́.
10Kūbə̄ kə́ táĺ ń nge kɔsə desḛ̄ḛ ɔsə desḛ̄ḛ tū tə́ kə kəlā lɔ́r ō, kə kəlā kə́ kə̄rē gus gus ō,
kə kəlā kə́ kərē ō ní,
Aaro̰ əla rɔ̄n tə́. Ni əla ngōn̄ ngong gān̄g sarya ń wə̄lā Urim ō Tumim ō #45.10 Urim ō Tumim ō: Á̰a̰ī Teē 28.30. i kemeé ní dɔ tə́.
11Kɔdə̄ ɔsə desḛ̄ḛ tū ngong ní tə́ i kə kəlā kə́ kərēé ō,
tə́la mbal̄ kə́ gātə̄də́ i ngá̰ý gə̄ tū tə́ tītə̄ lo ndang yá̰a̰ tū tambō̰o̰ tə́ beē ō,
kɔdə̄ nge tɔ́sə̄ yá̰á̰ tə́la mbal̄ gə̄ ní kem kārən gə̄ kə́ rāādə́ kə lɔ́rɔ́ tə́ ō.
Ni ndang yá̰á̰ kə́ yā kadə̄ əgań kem Nə́ɓā dɔ yá̰á̰ tə́ tū mbal̄ gə̄ ní tə́,
kə gō kutə gír ɓē gə̄ yā ngán Israel gə̄.
12Əlan̄ yá̰á̰ súū rɔ̄ kə́ rāā kə lɔ́rɔ́ tū kūbə̄ kənda dɔ yā Aaro̰ tə́.
Ndangən̄ najə̄ ń toō tū tə́ ədan̄ na: i kə́ kɔr̄ kam̄ tām̄ yā Kɔ́ɔ̄ɓē tə́.
Yá̰á̰ ní i yá̰a̰ rɔȳ deē kə́ rāān̄ adə̄ majə ngá̰ý,
majə ka̰ā̰ ngá̰ý ō súūnən̄ adə̄ majə ɔtə̄ kə taá ō.
13Kété non ni tə́ ní, deē a̰a̰ kūbə̄ kə́ majə beé aĺ ɓáý.
De kə́ rang kə́ ṵṵ̄ kūbə̄ ń nuū gətóo,
ba i ngánən gə̄ ō,
ngán kaan gə̄ ō tá ngóy n a əlan̄ rɔ̄də́ tə́ ngándáńg ní.
14Yá̰á̰ kə́ tun̄ gə̄ ń Aaro̰ a ndējə̄ Nə́ɓā nja jōó kem ndɔ̄ kógə̄ḿ ngándáńg ní,
i gáŕ kadə̄ hor a róō malang.
15I Moyijə n əndān kem kəla yā Kɔ́ɔ̄ɓē tə́ ō,
ur yibə̄ kə́ táĺ dɔn tə́ ō ní.
Nge ń nuū i madə̄ naā kə́ a to ngándáńg tām̄ yān tə́ ō,
tām̄ yā gír kojə yān tə́ ō, kə dɔ ndɔ̄ gə̄ ń dɔ rā̰ a rań dɔɔ́ ɓáý tə́ ní.
I gáŕ kadə̄ nin̄ rāān̄ kəla tun̄ yá̰a̰ adə̄n̄ Kɔ́ɔ̄ɓē ō,
tɔ́rə̄n̄ tadə́ dɔ ngán Israel gə̄ tə́ kə rī Kɔ́ɔ̄ɓēé ō.
16Kɔ́ɔ̄ɓē gə̄rā Aaro̰ dan de gə̄ tə́
i yā kadə̄ ndējən yá̰á̰ tun̄ kə́ róō horoó ō,
ndujə̄ nuū kāgə̄ kə́ otə majə ō ítər ō ń i yá̰a̰ kəga kem dɔ najə̄ tə́ ní ō,
kadə̄ rāā yá̰á̰ kə́ ɔjə kum gotə māȳ rɔ̄ dɔ majaĺ gə̄ tə́ tām̄ yā ngán Israel gə̄ tə́ ō.
17Nə́ɓā adə̄ Aaro̰ tɔ́gə
i yā kadə̄ ɔjəń kum yá̰a̰ gə̄ ń əda kadə̄ yā rāā ní ō,
ɔjəń Jakob yá̰a̰ gə̄ ń Nə́ɓā ndigə kadə̄ yā rāā gáŕ ní ō,
i yā rāań kadə̄ Israel a̰a̰ lo kə ta kūl̄ ndū najá ō.
18Dan ń ngán Israel gə̄ i dəla lo tə́ ní, de gə̄ kə́ gír kojə yā Aaro̰ tə́ aĺ gə̄ ḭḭn̄ seneé kə rɔ̄ɔ́ ō,
əndānən̄ nii ō.
Adə̄ i de gə̄ yā Data̰ nin̄ kə Abiram ō,
Kore nin̄ kə ɓūtə̄ de gə̄ yān gēé ō n wūn̄g rāādə́ ngá̰ý seneé ní.
19Dan ń Kɔ́ɔ̄ɓē a̰a̰ yá̰a̰ ngeé ń nuū ní nelə̄n aĺ ngá̰ý,
adə̄ wūn̄g yān kə́ ngá̰ý nujə sedə́ malang kɔ̄ɔ́.
Ni rāā yá̰á̰ kə́ to ɓōĺ ngá̰ý sedə́,
adə̄ hor yān ṵṵdə́.
20Kɔ́ɔ̄ɓē adə̄ Aaro̰ yá̰á̰ kə́ rang kə́ madə̄n gə̄ əngen̄ aĺ ɓáý tṵ ō,
adə̄n yá̰a̰ kənge ō:
i kan̄ yá̰á̰ kə́ ta kəga dɔ gə̄ kə́ dɔ nang tə́ ń de gə̄ reē ndējə̄n̄ ní.
adə̄ adə̄n i yá̰a̰ kəsa kə́ kadə̄ əsa ndān̄ kə dɔ ndɔ̄ gə̄.
21Tɔdɔ̄ yá̰a̰ kəsa yādə́ i yá̰a̰ gə̄ ń tun̄ adə̄n̄ Kɔ́ɔ̄ɓē ní.
Yá̰a̰ gə̄ ní i Kɔ́ɔ̄ɓē n adə̄ Aaro̰ nin̄ kə de kə́ gír kojə yān tə́ gə̄.
22Banī ni ənge dɔ nang kə́ tām̄ yān tə́ dɔ nang kə́ Israel tə́ alé,
ənge núsə dɔ nang kə́ tām̄ yān tə́ tītə̄ yā gotə ngán Israel gə̄ alé.
Tɔdɔ̄ Kɔ́ɔ̄ɓē əda Aaro̰ na: i mā n i núsə dɔ nang kə́ tām̄ yāí tə́ ní ō, yá̰a̰ kənge yāí i mā ō.
Pinas
23Pinas kə́ ngōn̄ Eleyajar i de kə́ kṵ mətá kə́ ənge kɔsə go̰n,
tām̄ əya̰ lo adə̄ deē alé, ba rɔ̄ɔ̄ dɔ rɔȳ kə́ kadə̄ de gə̄ rɔȳn̄ Kɔ́ɔ̄ɓē tə́, tɔdɔ̄ ɓōĺ ndíĺ Kɔ́ɔ̄ɓē.
Kəhɔ kem ngan̄g yān majə ngá̰ý, tām̄ ngán Israel gə̄ ń əsōn̄ wūn̄g ní,
ni əhɔ rɔ̄n tɔgə adə̄ majə ngá̰ý tām̄ ḭḭ dɔɔ́ ənīdə́ rɔ̄ɔ̄.
I tītə̄ ń nuū n ni əngeń māȳ rɔ̄ yā Kɔ́ɔ̄ɓē tām̄ yā ngán Israel gə̄ tə́ ní.
24I tām̄ najə̄ ń nuū tə́ n Kɔ́ɔ̄ɓē əhɔń madə̄ naā kə́ tām̄ yā kem sɔl̄ lɔm tə́ seneé ní.
Ni a ndi ngār dɔ kújə́ kə́ táĺ tə́ ō, dɔ gír deē yān gə̄ tə́ ō.
I tītə̄ ń nuū n Kɔ́ɔ̄ɓē əndāń Pinas kə de gə̄ kə́ gír kojə yān tə́ gə̄
dɔ kəla tun̄ yá̰á̰ kə́ bo tə́ kə́ njɔ́ḿ gə̄ tə́ ní.
25Kɔ́ɔ̄ɓē əhɔ madə̄ naā kə Dabid
kə́ ngōn̄ Jese ń i de kə́ gír ɓē yā Juda tə́ ní ō.
Ənī ndūn kadə̄ kṵ ɓē a ḭḭ dɔ bɔbə̄ ngōn̄ tə́ yā ndi dɔ ngōn̄ kə́ kal kógə̄ḿ beē tə́ ō.
Ba yā Aaro̰ ɓáa, de gə̄ malang kə́ gír kojə yān tə́ a əngen̄ yá̰a̰ ndəbā yān.
26Ba sḭḭ̄ de gə̄ kə́ gír kojə yā Aaro̰ tə́, ādə̄ Kɔ́ɔ̄ɓē adə̄sí kum kedə̄ ngarā̰ kemsí tə́,
kadə̄ ī-gāngīiń sarya kə́ gōtə́ dɔ gír de gə̄ yān tə́ ō,
kadə̄ ndɔ̄ń tə́ anī ī-tḭ̄ḭ̄ ta yá̰a̰ gə̄ kə́ tām̄ yāsí tə́ aĺ ō,
kɔsə go̰n yāsí toń ta kə́ jóo ō.
Currently Selected:
JEJU KƏ́ NGŌN̄ SIRAK 45: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
JEJU KƏ́ NGŌN̄ SIRAK 45
45
1Nə́ɓā tár Moyijə ō, de gə̄ tárən̄ Moyijə ō. Dan ń əga kemjí dɔn tə́ anī, jə-tɔ́r̄ tají dɔn tə́.
2Nə́ɓā adə̄n kɔsə go̰n kə́ asə naā kə yā de kə́ dɔ rā̰ tə́ gə̄ ō,
rāā adə̄ madə̄ ba̰ā̰ Israel gə̄ ɓōĺnən̄ ngá̰ý ō.
3Dan ń Moyijə əda najə̄ yā yá̰á̰ kə́ to kɔr kum gə̄ anī, Kɔ́ɔ̄ɓē rāā yá̰a̰ gə̄ ní kə̄ ta jī tə́ nuū ō,
ɔsə go̰nən ta kum mban̄g gə̄ tə́ ō,
ɔjən yá̰a̰ gə̄ kə́ kadə̄ gír deē yān gə̄ rāān̄ ō,
ɔjən yá̰á̰ kógə̄ḿ tū kɔsə go̰n yān tə́ adə̄ a̰ā̰ ō.
4Moyijə i nge ra dɔ ndūn tə́ ō, ni sɔl̄ lɔm ō.
I tām̄ ń nuū tə́ n Kɔ́ɔ̄ɓē ɔr̄ kamə̄n tayā tām̄ kəla yān tə́ ō,
gə̄rān dan de gə̄ tə́ malang ō ní.
5Ni rāā adə̄ Moyijə oō ndūn ō,
aw̄ seneé dan kil̄ man̄ kə́ ndul ndí ndḭ́ tə́ ō.
Nin̄ ran̄ ta naā tə́ ba ɔjən yá̰á̰ kə́ yā rāā gə̄ ō,
ɔjən ndū najə̄ kə́ a rāā kadə̄ deē ndi kə kumneé ō, kadə̄ kur̄ dɔ deē ger̄ yá̰a̰ ō.
Nə́ɓā ndóō de gə̄ kə́ gír kojə yā Jakob tə́ ndū najə̄ gə̄ kə́ dɔ madə̄ naā tə́ ō,
ɔjə ngán Israel gə̄ yá̰a̰ gə̄ ń ni ra dɔ tə́ yā rāā ní ō i tītə̄ ń nuū.
Aaro̰
6Aaro̰ ń i ngōkṵ́ṵ Moyijə kə̄ gír ɓē yā Lebi tə́ ní, Nə́ɓā ɔsən kə̄ dɔɔ́.
Ni i de kə́ táĺ tītə̄ Moyijə beé.
7Nə́ɓā ə̄ndān kem kəla yān tə́ i kə gō jī lo rāā yá̰á̰ kə́ to ngándáńg ō,
əndā kəla tun̄ yá̰a̰ yā ngán Israel gə̄ dɔn tə́ ō,
rāan adə̄ rɔ̄n nelə̄n tām̄ tə́lá yá̰á̰ súū rɔ̄ kə́ majə gə̄ rɔ̄n tə́ ō,
kūbə̄ kə́ majə gə̄ rɔ̄n tə́ ō.
8Ni tə́la kūbə̄ kə́ kɔsə desḛ̄ḛ tū tə́ rɔ̄n tə́ ō,
yá̰a̰ gə̄ kə́ ɔjən̄ kum gotə tɔ́gə yān rɔ̄n tə́ ō:
adə̄ i gajērē ō,#45.8 Gajērē: i kal̄só̰ó̰ kə́ a dṵṵ̄n̄ ta kəlān dām̄ kógə̄ḿ, ba yā Jipə gə̄ ɓáa njan i kə́ ngāl̄ sḛ́ý. kūbə̄ ngāl̄ ō, kūbə̄ Epod ō.
9Ni tə́la kan̄ kāgə̄ gərenādə gə̄ ta nja kūbə̄ ngāl̄ yān tə́ nang tə́ adə̄ gīr̄ gidə əla ta naā tə́ ō,
tə́lá ngán ɓɔ kə́ rāā kə lɔ́rɔ́ gə̄ ngá̰ý mbo̰ō̰ tə́ mbo̰ō̰ tə́ ō.
Ɓɔ gə̄ ní a ɓārə̄n̄ i kə gō njan ń a un ní,
a ɓārə̄n̄ i ɓerēn̄g ɓerēn̄g kə gō nja Aaro̰ ń un a njə̄rań kem kújə yā Kɔ́ɔ̄ɓē tə́ ní.
Nge ń nuū i yá̰á̰ kə́ yā kadə̄ əgań kem Kɔ́ɔ̄ɓē dɔ gír deē yān gə̄ tə́.
10Kūbə̄ kə́ táĺ ń nge kɔsə desḛ̄ḛ ɔsə desḛ̄ḛ tū tə́ kə kəlā lɔ́r ō, kə kəlā kə́ kə̄rē gus gus ō,
kə kəlā kə́ kərē ō ní,
Aaro̰ əla rɔ̄n tə́. Ni əla ngōn̄ ngong gān̄g sarya ń wə̄lā Urim ō Tumim ō #45.10 Urim ō Tumim ō: Á̰a̰ī Teē 28.30. i kemeé ní dɔ tə́.
11Kɔdə̄ ɔsə desḛ̄ḛ tū ngong ní tə́ i kə kəlā kə́ kərēé ō,
tə́la mbal̄ kə́ gātə̄də́ i ngá̰ý gə̄ tū tə́ tītə̄ lo ndang yá̰a̰ tū tambō̰o̰ tə́ beē ō,
kɔdə̄ nge tɔ́sə̄ yá̰á̰ tə́la mbal̄ gə̄ ní kem kārən gə̄ kə́ rāādə́ kə lɔ́rɔ́ tə́ ō.
Ni ndang yá̰á̰ kə́ yā kadə̄ əgań kem Nə́ɓā dɔ yá̰á̰ tə́ tū mbal̄ gə̄ ní tə́,
kə gō kutə gír ɓē gə̄ yā ngán Israel gə̄.
12Əlan̄ yá̰á̰ súū rɔ̄ kə́ rāā kə lɔ́rɔ́ tū kūbə̄ kənda dɔ yā Aaro̰ tə́.
Ndangən̄ najə̄ ń toō tū tə́ ədan̄ na: i kə́ kɔr̄ kam̄ tām̄ yā Kɔ́ɔ̄ɓē tə́.
Yá̰á̰ ní i yá̰a̰ rɔȳ deē kə́ rāān̄ adə̄ majə ngá̰ý,
majə ka̰ā̰ ngá̰ý ō súūnən̄ adə̄ majə ɔtə̄ kə taá ō.
13Kété non ni tə́ ní, deē a̰a̰ kūbə̄ kə́ majə beé aĺ ɓáý.
De kə́ rang kə́ ṵṵ̄ kūbə̄ ń nuū gətóo,
ba i ngánən gə̄ ō,
ngán kaan gə̄ ō tá ngóy n a əlan̄ rɔ̄də́ tə́ ngándáńg ní.
14Yá̰á̰ kə́ tun̄ gə̄ ń Aaro̰ a ndējə̄ Nə́ɓā nja jōó kem ndɔ̄ kógə̄ḿ ngándáńg ní,
i gáŕ kadə̄ hor a róō malang.
15I Moyijə n əndān kem kəla yā Kɔ́ɔ̄ɓē tə́ ō,
ur yibə̄ kə́ táĺ dɔn tə́ ō ní.
Nge ń nuū i madə̄ naā kə́ a to ngándáńg tām̄ yān tə́ ō,
tām̄ yā gír kojə yān tə́ ō, kə dɔ ndɔ̄ gə̄ ń dɔ rā̰ a rań dɔɔ́ ɓáý tə́ ní.
I gáŕ kadə̄ nin̄ rāān̄ kəla tun̄ yá̰a̰ adə̄n̄ Kɔ́ɔ̄ɓē ō,
tɔ́rə̄n̄ tadə́ dɔ ngán Israel gə̄ tə́ kə rī Kɔ́ɔ̄ɓēé ō.
16Kɔ́ɔ̄ɓē gə̄rā Aaro̰ dan de gə̄ tə́
i yā kadə̄ ndējən yá̰á̰ tun̄ kə́ róō horoó ō,
ndujə̄ nuū kāgə̄ kə́ otə majə ō ítər ō ń i yá̰a̰ kəga kem dɔ najə̄ tə́ ní ō,
kadə̄ rāā yá̰á̰ kə́ ɔjə kum gotə māȳ rɔ̄ dɔ majaĺ gə̄ tə́ tām̄ yā ngán Israel gə̄ tə́ ō.
17Nə́ɓā adə̄ Aaro̰ tɔ́gə
i yā kadə̄ ɔjəń kum yá̰a̰ gə̄ ń əda kadə̄ yā rāā ní ō,
ɔjəń Jakob yá̰a̰ gə̄ ń Nə́ɓā ndigə kadə̄ yā rāā gáŕ ní ō,
i yā rāań kadə̄ Israel a̰a̰ lo kə ta kūl̄ ndū najá ō.
18Dan ń ngán Israel gə̄ i dəla lo tə́ ní, de gə̄ kə́ gír kojə yā Aaro̰ tə́ aĺ gə̄ ḭḭn̄ seneé kə rɔ̄ɔ́ ō,
əndānən̄ nii ō.
Adə̄ i de gə̄ yā Data̰ nin̄ kə Abiram ō,
Kore nin̄ kə ɓūtə̄ de gə̄ yān gēé ō n wūn̄g rāādə́ ngá̰ý seneé ní.
19Dan ń Kɔ́ɔ̄ɓē a̰a̰ yá̰a̰ ngeé ń nuū ní nelə̄n aĺ ngá̰ý,
adə̄ wūn̄g yān kə́ ngá̰ý nujə sedə́ malang kɔ̄ɔ́.
Ni rāā yá̰á̰ kə́ to ɓōĺ ngá̰ý sedə́,
adə̄ hor yān ṵṵdə́.
20Kɔ́ɔ̄ɓē adə̄ Aaro̰ yá̰á̰ kə́ rang kə́ madə̄n gə̄ əngen̄ aĺ ɓáý tṵ ō,
adə̄n yá̰a̰ kənge ō:
i kan̄ yá̰á̰ kə́ ta kəga dɔ gə̄ kə́ dɔ nang tə́ ń de gə̄ reē ndējə̄n̄ ní.
adə̄ adə̄n i yá̰a̰ kəsa kə́ kadə̄ əsa ndān̄ kə dɔ ndɔ̄ gə̄.
21Tɔdɔ̄ yá̰a̰ kəsa yādə́ i yá̰a̰ gə̄ ń tun̄ adə̄n̄ Kɔ́ɔ̄ɓē ní.
Yá̰a̰ gə̄ ní i Kɔ́ɔ̄ɓē n adə̄ Aaro̰ nin̄ kə de kə́ gír kojə yān tə́ gə̄.
22Banī ni ənge dɔ nang kə́ tām̄ yān tə́ dɔ nang kə́ Israel tə́ alé,
ənge núsə dɔ nang kə́ tām̄ yān tə́ tītə̄ yā gotə ngán Israel gə̄ alé.
Tɔdɔ̄ Kɔ́ɔ̄ɓē əda Aaro̰ na: i mā n i núsə dɔ nang kə́ tām̄ yāí tə́ ní ō, yá̰a̰ kənge yāí i mā ō.
Pinas
23Pinas kə́ ngōn̄ Eleyajar i de kə́ kṵ mətá kə́ ənge kɔsə go̰n,
tām̄ əya̰ lo adə̄ deē alé, ba rɔ̄ɔ̄ dɔ rɔȳ kə́ kadə̄ de gə̄ rɔȳn̄ Kɔ́ɔ̄ɓē tə́, tɔdɔ̄ ɓōĺ ndíĺ Kɔ́ɔ̄ɓē.
Kəhɔ kem ngan̄g yān majə ngá̰ý, tām̄ ngán Israel gə̄ ń əsōn̄ wūn̄g ní,
ni əhɔ rɔ̄n tɔgə adə̄ majə ngá̰ý tām̄ ḭḭ dɔɔ́ ənīdə́ rɔ̄ɔ̄.
I tītə̄ ń nuū n ni əngeń māȳ rɔ̄ yā Kɔ́ɔ̄ɓē tām̄ yā ngán Israel gə̄ tə́ ní.
24I tām̄ najə̄ ń nuū tə́ n Kɔ́ɔ̄ɓē əhɔń madə̄ naā kə́ tām̄ yā kem sɔl̄ lɔm tə́ seneé ní.
Ni a ndi ngār dɔ kújə́ kə́ táĺ tə́ ō, dɔ gír deē yān gə̄ tə́ ō.
I tītə̄ ń nuū n Kɔ́ɔ̄ɓē əndāń Pinas kə de gə̄ kə́ gír kojə yān tə́ gə̄
dɔ kəla tun̄ yá̰á̰ kə́ bo tə́ kə́ njɔ́ḿ gə̄ tə́ ní.
25Kɔ́ɔ̄ɓē əhɔ madə̄ naā kə Dabid
kə́ ngōn̄ Jese ń i de kə́ gír ɓē yā Juda tə́ ní ō.
Ənī ndūn kadə̄ kṵ ɓē a ḭḭ dɔ bɔbə̄ ngōn̄ tə́ yā ndi dɔ ngōn̄ kə́ kal kógə̄ḿ beē tə́ ō.
Ba yā Aaro̰ ɓáa, de gə̄ malang kə́ gír kojə yān tə́ a əngen̄ yá̰a̰ ndəbā yān.
26Ba sḭḭ̄ de gə̄ kə́ gír kojə yā Aaro̰ tə́, ādə̄ Kɔ́ɔ̄ɓē adə̄sí kum kedə̄ ngarā̰ kemsí tə́,
kadə̄ ī-gāngīiń sarya kə́ gōtə́ dɔ gír de gə̄ yān tə́ ō,
kadə̄ ndɔ̄ń tə́ anī ī-tḭ̄ḭ̄ ta yá̰a̰ gə̄ kə́ tām̄ yāsí tə́ aĺ ō,
kɔsə go̰n yāsí toń ta kə́ jóo ō.
Bibəl ta Sar̄ © L'Alliance Biblique du Tchad, 2006, 2010.