JEJU KƏ́ NGŌN̄ SIRAK 44
44
Najə̄ kə́ kɔr̄ kə gōsōó yā rɔȳń kaají gə̄
1I beé ní, ādə̄ jə-tɔ̄yī de gə̄ ń rīdə́ ɓār̄ ngá̰ý ní,
adə̄ i bɔbə̄jí gə̄ kə gō ɓāl̄ kojədə́ gēé.
2Kɔ́ɔ̄ɓē adə̄də́ kɔsə go̰n kə́ bo ngá̰ý.
Nin̄ boon̄ tɔȳ madə̄də́ gə̄ i jóó ngá̰ý.
De kə́ bo kə́ kété jóo gə̄
3Kété ní mban̄g gə̄ ndin̄, nin̄ ṵṵn̄ ɓē dɔ de gə̄ kə́ kem ɓē kṵ yādə́ gə̄ tə́.
Nin̄ i de gə̄ kə́ tɔ́gə́də́ rāā adə̄ rīdə́ ɓār̄.
Kété ní ngé kadə̄ kɔjə̄ gə̄ ndin̄, nin̄ i de gə̄ kə́ ger̄ yá̰a̰ yā kur̄ dɔdə́ rāā adə̄ de gə̄ ɔsən̄ go̰ndə́.
Kété ní ngé ka̰a̰ yá̰a̰ gə̄ ndin̄, nin̄ i de gə̄ kə́ najə̄ kə́ Nə́ɓā əndā tadə́ tə́ rāā adə̄ de gə̄ ɔsən̄ go̰ndə́.
4Kété ní ngār gə̄ ndin̄, nin̄ gerə̄n̄ kadə̄ gír deē yādə́ gə̄ kɔjə̄.
Kété ní ngán mban̄g gə̄ ndin̄, yá̰á̰ ń kur̄ dɔdə́ ger̄ ní kumən ɗúú ngá̰ý.
Nin̄ ndóōn̄ de gə̄ yá̰a̰ adə̄ gerə̄n̄ i kə ta kūl̄ najə̄ kə́ kɔr̄ kə kum kedēé.
5Kété ní ngé rāā pā kə́ míndə́də́ nel̄ gə̄ ndin̄ ō,
nin̄ ndangən̄ gotə yá̰á̰ kə́ rāā yá̰a̰ gə̄ kə gōsōó ō.
6Kété ní de gə̄ kə́ yá̰a̰ kənge yādə́ rāā adə̄ tɔ́gə́də́ to ō,
ndin̄ kə kem sɔlɔ́ kem kújə yādə́ gə̄ tə́ ō ndin̄.
7De gə̄ ń nuū malang ní, de gə̄ kə́ ɓāl̄ yādə́ tə́ gə̄ ɔsən̄ go̰ndə́ ō,
dan ń ndinə̄ń kə kumdə́ ɓáý ní de gə̄ tɔ̄ȳn̄də́ ō.
8Rī ngé kə́rēý gə̄ to gotədə́ tə́
adə̄ de gə̄ a tɔ̄ȳn̄də́ laā ɓáý.
9Banī ngé kə́rēý gə̄ əya̰n̄ yá̰á̰ kə́ yā kadə̄ əgań kem deē dɔdə́ tə́ alé.
Deē oō najə̄ yādə́ tṵ alé, tītə̄ kə́ ndin̄ kə kumdə́ kété aĺ beé.
Adə̄ to tītə̄ kə́ ojən̄də́ aĺ beé ō,
yā ngáńdə́ gə̄ kə́ gotədə́ tə́ to i tītə̄ ń nuū ō.
Kaa Israel gə̄
10Yā kaají gə̄ ɓáa nin̄ i de kə́ majə gə̄.
Yá̰á̰ kə́ majə gə̄ ń rāān̄ ní dɔ deē ndígə̄nal alé.
11Yá̰a̰ kənge yādə́ mān̄ i kə̄ jī ngáńdə́ gə̄ tə́ ō,
kaadə́ gə̄ əngen̄ yá̰a̰ ndəbā yādə́ ō.
12De gə̄ kə́ gír kaa yādə́ tə́ ō, ngáńdə́ gə̄ ō,
ran̄ dɔ ndūdə́ tə́ i kə ta kūl̄də́.
13Gír kaa yādə́ a ndi ngándáńg ō,
de gə̄ a ɔsən̄ go̰ndə́ ngándáńg ō.
14Rɔ̄də́ to ɔr̄ koō ɓádá
banī rīdə́ ɓār̄ ngándáńg.
15Nápar de gə̄ a ɔjən̄ gotə najə̄ kə́ dɔ kum kedə̄ yādə́ tə́ ō,
ngé kán̄ naā gə̄ a ɓōkə́n̄də́ tɔ̄ȳ ō.
Henok
16Nel̄ Kɔ́ɔ̄ɓē kə Henok, adə̄ unən aw̄ seneé rɔ̄n tə́.
Henok i deē kə́ tūr̄ rɔ̄n kə̄ rɔ̄ Nə́ɓā tə́, adə̄ majə kadə̄ ngé gə̄ ń a reēn̄ ɓáý ní tūrə̄n̄ rɔ̄də́ kə̄ rɔ̄ Nə́ɓā tə́ tītə̄ yān.
Nowe
17Nə́ɓā a̰ā̰ kadə̄ Nowe i de kə́ majə ɔtə̄ kə taá ō, i nge rāā yá̰á̰ kə́ gō tə́ ō.
Dan ń wūn̄g rāā Nə́ɓā adə̄ yá̰a̰ malang i kə́ nujə kɔ̄ɔ́ ní, i Nowe n un gotə de kə́ kété jóo gə̄ ní.
De gə̄ ń teēn̄ ta yo tə́ dan ń man̄ kaw̄ taāń lo ní,
ndin̄ dɔ nang tə́ i kə kūl̄neé.
18Nə́ɓā əhɔ madə̄ naā kə́ a to ngándáńg i seneé.
I tītə̄ ń nuū n man̄ kaw̄ a nujəń yá̰a̰ gə̄ kə́ ndin̄ kə kumdə́ tṵ aĺ bátə́ ní.
Abəraham
19Abəraham ń i de kə́ bo ní, ni ń i kaa gíŕ nápar de gə̄ ngá̰ý ní,
deē kə́ kɔsə go̰n yān tītə̄ yān gətóo.
20Ni əhɔ gō ndū najə̄ yā Nge Ndi dɔ rā̰ tə́ ō,
əhɔ madə̄ naā seneé ō.
Ni əndā tə́ré yá̰á̰ kə́ ɔjə kadə̄ əhɔ madə̄ naā kə Nge Ndi dɔ rā̰ tə́ dā̰ rɔ̄n tə́ ō,
dan ń Nge Ndi dɔ rā̰ tə́ nāan anī a̰ā̰ kadə̄ ni i nge ra dɔ ndūn tə́ ō.
21I tām̄ najə̄ ń toō tə́ n Nə́ɓā túbə ənīń ndūn adə̄n ní,
ədan na n-a n-un de gə̄ kə́ gír kojə yān tə́ yā rāań majə kə gír de gə̄ malang.
Na n-a n-rāā kadə̄ a tél de kə́ ngá̰ý gə̄, kə́ kutədə́ to tītə̄ nán̄g ngárə̄ḿnjēý beē.
Na n-a n-ɔsə gír kojə yān kə̄ dɔɔ́ tītə̄ tíyō̰ gə̄ kə́ dɔ rā̰ tə́ beē ō,
dɔ nang yādə́ na a ḭḭ
bā bo kə́rēý tə́ bátə́ yā kugə̄ bā bo kə́ rang tə́ ō,
a ḭḭ bāá bátə́ yā kugə̄ ta ngóy dɔ nang tə́ ō.
Ijaak ō Jakob ō
22-23aMadə̄ naā kə́ kógə̄ḿ beē nəkɔ́ ń toō, Nə́ɓā əhɔ kə Ijaak
najə̄ yā bɔbə̄n Abəraham tə́.
Tɔ́r̄ ta yān kə́ tām̄ yā de gə̄ malang tə́ ō, ndūn ń ənī ō ní,
əndā i dɔ Jakob tə́.
Nə́ɓā ɔjən kadə̄ na n-a n-tɔ́r̄ tan dɔn tə́ rɔ̄kum ō,
adə̄n dɔ nang ń kadə̄ ənge ní ō.
Ni gán̄g dɔ nang ní
ba adə̄ gír ɓē gə̄ kə́ kutə gidə i jōó.
Moyijə
23bDan de gə̄ kə́ gír kojə yā Jakob tə́ ní, Kɔ́ɔ̄ɓē gə̄rā de kə́ majə kógə̄ḿ.
Deē ní nel̄ de gə̄ malang seneé.
Currently Selected:
JEJU KƏ́ NGŌN̄ SIRAK 44: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.