JEJU KƏ́ NGŌN̄ SIRAK 42
42
1Ādə̄ rɔ̄í sɔlī tām̄ najə̄ kə́ ōō ba ə́da kə̄ kété tə́ ō,
najə̄ yá̰á̰ kə́ to lo mundə̄ tə́ kə́ ə́dá tə́ ō.
Lo ń nuū tə́ ā ī-ger̄ yá̰á̰ ń i rɔ̄sɔl̄ kə́ rɔ̄kum ní ō,
de gə̄ malang a ndigən̄ najə̄ gōí tə́ ō.
Yá̰á̰ ń majə kadə̄ rɔ̄ deē sɔlə̄n najə̄n tə́ aĺ ní
Yá̰a̰ gə̄ ń m-ā m-ɔ́jiī sedə́ ní, ī-lōō kadə̄ rɔ̄í sɔlī najə̄ yādə́ tə́ ō,
ī-lōō kəga rɔ̄í gidədə́ tə́ ba rāań majaĺ ō.
2Ī-lōō kadə̄ rɔ̄í sɔlī najə̄ ndū najə̄ yā Nge Ndi dɔ rā̰ tə́ tə́ ō, madə̄ naā yān tə́ ō.
Nge rāā yá̰a̰ kə gō kem ndigə yā Nə́ɓāá aĺ ní, ī-lōō kadə̄ rɔ̄í sɔlī najə̄ sarya kə́ gōtə́ kə́ gān̄g kadə̄n tə́ ō.
3Ī-lōō kadə̄ rɔ̄í sɔlī najə̄ tə́da kutə yá̰á̰ tə́ kə madí, aláa kə madə̄ mbāí,
aláa najə̄ kēgə̄ naā yá̰a̰ ndəbā kə madí gēé tə́.
4Ī-lōō kadə̄ rɔ̄í sɔlī najə̄ yā yá̰a̰ mbɔ̄jə́ kɔȳ yá̰á̰ kə́ gōtə́ tə́ ō, mbal̄ gində̄ mbɔ̄jə́ kɔȳ yá̰a̰ gə̄ kə́ gōtə́ tə́ ō.
Ī-lōō kadə̄ rɔ̄í sɔlī najə̄ yā yá̰á̰ kə́ ə́ngé ngá̰ý tə́, aláa ngá̰ý aĺ tə́.
5Ī-lōō kadə̄ rɔ̄í sɔlī najə̄ yā yá̰á̰ kə́ ngé gātə̄ gə̄ gātə̄nəń ba əngen̄ manə̄n dɔ tə́ tə́ ō,
kənda kə́ ə́ndá ngání gə̄ dejə tə́ ō,
kənda kə́ ə́nda nge kəla kə́ majə aĺ kadən tə́ adə̄ mósən a̰ȳ tə́ ō.
6Ré nə̄yá̰í i dəyá̰ kə́ gḛy ka̰a̰ yá̰a̰ malang kə kumneé anī, ə̄ndā mbō̰ ta yá̰a̰ yāí tə́.
Ré de gə̄ kə́ ī-taā kemdə́ ngá̰ý aĺ gə̄ i ngá̰ý ɓēé loí anī, ī-ɓōkə́ yá̰a̰ yāí gə̄ lo kə́ ā ūtə̄ ta kə kélé tə́.
7Ré ā ī-ɓɔ̄ɔ̄ deē yá̰a̰ anī, majə kadə̄ ī-tə́da kutə yá̰á̰ ní ō, ī-mbɔ̄jə́ kɔȳn ō.
Yá̰á̰ ń ādə̄, aké ə́ngé ní, ī-ndang malang.
8Ī-lōō kadə̄ rɔ̄í sɔlī lo kənda de kə́ mbóó tə́ ō, de kə́ sapə tə́ ō,
de kə́ tɔgə ɓə́ga kə́ sāā dəyá̰ gə̄ lo kaya tə́ ō.
I tītə̄ ń nuū n ā ɔ́jəń kadə̄ ḭ̄ i de kə́ ndóōīn̄ yá̰a̰ adə̄ ī-ger̄ majə ō,
de gə̄ malang a ndigən̄ najə̄ gōí tə́ ō ní.
Sōl̄ yā bɔbə̄ ngōn̄ kə́ dəyá̰
9Ngōn̄ kə́ dəyá̰ i ngōn̄ kə́ rāā bɔbə̄n adə̄ gír̄ yá̰á̰ ngá̰ý,
ɔgə̄n kənī ɓīī kumən tə́, banī de gə̄ gerə̄n̄ alé.
Dan ń ngōnən kə́ dəyá̰ dūú ɓáý anī, sōl̄ najə̄ kadə̄ ɓāl̄ taān dəngam mān̄ kɔ̄ɔ́.
Ba ré taā dəngam anī, sōl̄ najə̄ kadə̄ nel̄ ngaan seneé aĺ ngá̰ý.
10Dan ń ngōn̄ kə́ dəyá̰ tɔgə mandə anī, bɔbə̄n sōl̄ najə̄ kadə̄ dəngam kə́rēý mbutən ō,
ənī ngōn̄ kemən tə́ ɓēé loneé ō.
Dan ń taā dəngam anī, bɔbə̄n sōl̄ najə̄ kadə̄ ɓogə dəngam kə́ rang ō,
tél dəyá̰ kə́ kujə kújə ngaa yān tə́ ō.
11Ré ngōnīí kə́ dəyá̰ ngɔ̄m̄ rɔ̄n aĺ anī, ə̄ndā kumií gírən tə́ ādə̄ tɔȳ kə́ kété,
na sōgə́ rāā adə̄ ī-tél kur̄ kəgō yā madə̄ ba̰ā̰í gə̄ ō,
de kə́ kem ɓēé gə̄ rāān̄ mēlē tām̄ seneé ō, əgan̄ naā dɔn tə́ gir gir ō,
əla rɔ̄sɔl̄ dɔí tə́ dan ngé kán̄ naā gə̄ kə́ ngá̰ý tə́ ō.
12Ī-lōō kadə̄ kumií ra dɔ majə deē tə́ ō,
ī-lōō ndi dan dəyá̰ gə̄ tə́ ō.
13Tītə̄ ń kur̄ gə̄ a teēn̄ i kem kūbūú ní,
kem ndul yā dəyá̰ a teē i kem dəyá̰ tə́ ō.
14kem ndul yā dəngam i sóótə́ tɔȳ kem majə yā dəyá̰.
Dəyá̰ i yá̰á̰ kə́ a əla rɔ̄sɔl̄ kə́ ngá̰ý dɔ deē tə́ ō, a rāā kadə̄ tájə̄n̄ deē ō.
Makətūbə̄ yá̰á̰ ndóō gə̄ kə́ nge kṵ mí
Nge kəndā dɔ rā̰ ō, dɔ nang ō i de kə́ bo
15Kə́ ngɔr ń toō tə́ ɓáa m-ā m̄-ter̄ kemsí i dɔ kəla gə̄ ń Kɔ́ɔ̄ɓē rāā tə́ ní.
Yá̰á̰ ń m-á̰a̰ā̰ ní, m-ā m-ə̄nī gotə.
Kəla gə̄ ń Kɔ́ɔ̄ɓē rāā ní, ton̄ i kə ta kūl̄ najə̄ kɔrə̄n gə̄.
16Mbang ń ndə́lē ní, a̰a̰ yá̰a̰ malang ō,
kɔsə go̰n yā Kɔ́ɔ̄ɓē taā lo malang tū kəla rāan tə́ ō.
17De gə̄ kə́ dɔ rā̰ tə́ yā Kɔ́ɔ̄ɓē gə̄gē asən̄
kənī gotə yá̰á̰ kə́ majə ngá̰ý kə́ to kɔr kum gə̄ ń ni rāā ní malang alé.
Adə̄ i yá̰a̰ gə̄ ń Kɔ́ɔ̄ɓē kə́ tɔ́gən i ngá̰ý tə́ndādə́ adə̄ ndin̄ ngan̄g ní,
yā kadə̄ yá̰a̰ malang ń ni əndā ní ran̄ ngan̄g tū kɔsə go̰n yān tə́.
18Ni əndā ma̰ȳ ɓūl̄ bā bo gə̄ ō, ngarā̰ kem de gə̄ ō,
teē dɔ yá̰a̰ gə̄ kə́ ton̄ lo ɓɔ̄ɔ̄ tə́ kemdə́ gə̄ tə́ ō.
A̰á̰ā̰, Nge Ndi dɔ rā̰ tə́ asə ger̄ yá̰a̰ malang.
Kumən i dɔ yá̰a̰ gə̄ ń a ɔjən̄ gō kum mbang gə̄ ń yá̰a̰ gə̄ a rāān̄nəń yá̰á̰ ní tə́.
19Ni əda najə̄ yā yá̰á̰ kə́ mān̄ kɔ̄ɔ́ ō, yá̰á̰ kə́ a reē ɓáý ō.
Ni rāā adə̄ deē ger̄ yá̰a̰ gə̄ kə́ ton̄ lo mundə̄ tə́ ngá̰ý.
20Gír̄ yā deē kə́ ndúmə̄n gətóo ō,
najə̄ kógə̄ḿ kə́ to lo mundə̄ tə́ tām̄ yān tə́ gətóo ō.
21Kəla kə́ bo gə̄ ń ni gír̄ dɔ tə́ kə kum kedə̄ yāneé ní, tə́ndādə́ lo ndidə́ gə̄ tə́ kə gōó gōó.
Tɔdɔ̄ ni ndi i kété no ɓāl̄ gə̄ kə́ ngá̰ý tə́ ō, a ndi i mbóńg kə̄ non tə́ ō.
Yá̰a̰ malang ń ni rāā ní, yá̰á̰ kə́ rang kə́ yā kənī ta tə́ gətóo ō, kə́ yā kɔr̄ kɔ̄ɔ́ gətóo ō,
ni sāā kɔjə̄ yā deē kógə̄ḿ aĺ ō.
22Yá̰a̰ malang ń Kɔ́ɔ̄ɓē rāā ní majə ka̰ā̰ ngá̰ý,
i bátə́ ugə̄ń dɔ yā̰l̄ hor kə́ dūú ngá̰ý ń kə́rā adə̄ deē a̰ā̰ ní tə́.
23Yá̰a̰ gə̄ malang ń nuū ndin̄ kə kumdə́ ō, a ton̄ ngándáńg ō,
tām̄ yā rāań yá̰a̰ malang ń deē gḛy tə́ ní ō, a sɔlə̄n̄ dɔdə́ malang ō.
24Yá̰a̰ malang i jōó jōó ō əhɔn̄ ta naā ō,
kəla rāan kə́ loon kə́rēý kə́ gōtə́ aĺ to gətóo ō.
25Yá̰a̰ gə̄ kógə̄ḿ kógə̄ḿ ɔjən̄ majə yā madə̄də́ gə̄.
I náā n kɔr rāan lo ka̰a̰ kɔsə go̰n yā Kɔ́ɔ̄ɓē tə́ ní?
Currently Selected:
JEJU KƏ́ NGŌN̄ SIRAK 42: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.