JEJU KƏ́ NGŌN̄ SIRAK 39
39
1Ni ndóō kum kedə̄ yā kum kɔɔ̄ kə́ jóo gə̄ malang ō,
un kum mbang yān ń a ndiń karī ní gírəń yá̰a̰ dɔ najə̄ kɔr̄ ngé koō ta gə̄ tə́ ō.
2Ni ngɔ̄m̄ gotə najə̄ yā de gə̄ ń rīdə́ ɓār̄ ngá̰ý ní ō,
əhɔ rɔ̄n tɔgə ger̄ kum gōsə̄ najə̄ kə́ ngan̄g gə̄ ō,
3sāā kum gōsə̄ najə̄ gə̄ ní ō,
un kum mbang yān sāań kum yá̰a̰ gə̄ kə́ ton̄ lo ɓɔ̄ɔ̄ tə́ kə́ tū najə̄ kə́ kɔr̄ kə kum kedēé tə́ ō.
4Ni rāā kəla adə̄ de kə́ bo gə̄ ō,
de kə́ bo gə̄ a əndān̄ kumdə́ i dɔn ni tə́ ō.
Ni njə̄rā mbā aw̄ dɔ nang yā tə̄rā gə̄ tə́.
Tɔdɔ̄ yá̰á̰ kə́ majə ō,
kə́ majə aĺ ō ń to dan de gə̄ tə́ ní, ni ger̄də́ majə.
5Ni əndā kemən dɔ kaw̄ tə́ kə gír loí ɓatə
rɔ̄ Kɔ́ɔ̄ɓē nge kəndān tə́ ō,
ra ta kum Nge Ndi dɔ rā̰ tə́ tə́#39.5 Ta kum Nge Ndi dɔ rā̰ tə́: kumən na ra i kem kújə yā Kɔ́ɔ̄ɓē tə́. ndɔ̄yń ō.
Ni teē tan ndɔ̄yń ō,
rāā Kɔ́ɔ̄ɓē ɓɔ́ najə̄ majaĺ gə̄ ń ni rāā tə́ ní ō.
6Ré Kɔ́ɔ̄ɓē kə́ Bo ndigə anī,
ndíl ger̄ kum najə̄ a rosə kemən.
Lo ń nuū tə́ ni a ɔr̄ najə̄ kə́ kum kedə̄ i tū tə́ gə̄ ngá̰ý ō,
a tɔ̄ȳ Kɔ́ɔ̄ɓē kem ndɔ̄ȳ yān tə́ ō.
7Ni a aw̄ kə yá̰a̰ ger ō, a gān̄g sarya kə́ súūmú ō,
yá̰a̰ gə̄ yā Nə́ɓā kə́ ton̄ lo ɓɔ̄ɔ̄ tə́ ní, ni a gír̄ yá̰a̰ dɔ tə́ ō.
8Ni a ɔjə yá̰á̰ ń ndóōnən̄ ní kə̄ ndágá ō,
a ɔjə rɔ̄n kə ndū najə̄ kə́ dɔ madə̄ naā yā Kɔ́ɔ̄ɓē tə́ ō.
9De gə̄ ngá̰ý a tɔ̄ȳnən̄ tām̄ ger̄ kum najə̄ yān tə́ ō,
dɔdə́ a ndígə̄nal aĺ bátə́ ō.
A əga kem de gə̄ dɔn tə́ ngándáńg ō,
rīn a ɓār̄ kə dɔ ɓāl̄ gə̄ ɓāl̄ gə̄ ō.
10Nápar de gə̄ a ɔrə̄n̄ najə̄ kə́ dɔ kum kedə̄ yān tə́ ō,
ngé kán̄ naā gə̄ a ɓōkə́nən̄ tɔ̄ȳ ō.
11Ré ni ndi dan i ngá̰ý anī, a əya̰ rī kə́ to kɔsə go̰n tɔȳ gotə rī kə́ rang gə̄ dūbú gotən tə́ ō,
ré ni oy anī, i kə kem sɔlɔ́ ō.
Yá̰a̰ malang ń Nə́ɓā rāā ní i kə́ majə
12Dan ń m̄-gíŕ yá̰a̰ oy anī, m̄-sāā kɔr̄ najə̄ ɓáý,
tɔdɔ̄ gír̄ najə̄ rosə kemḿ, adə̄ m̄-to tītə̄ nāā kə́ gōr̄ gong ba ndaa ngóńg ngóńg beē.
13Ngáń kə́ táĺ gə̄ ōōī najə̄ yāḿ, ba ī-tɔgiī
tītə̄ kāgə̄ kə́ majə kə́ əɓa kadə man̄ tə́ beē.
14Ādə̄ sēēsí otə majə tītə̄ sēē ndujə̄ nūū kāgə̄ kə́ otə majə beé ō,
ādə̄ hútə̄sí to tītə̄ hútə̄ ndə́já lís beé ō.
Sḭḭ̄ malang úniī ndūsí kə̄ dɔɔ́ ə̄nīiń pā ō,
ī-tɔ̄yī Kɔ́ɔ̄ɓē tām̄ kəla malang ń ni rāā tə́ ní ō.
15Ə̄nīī mbēr̄ ə́daī na: Nə́ɓā i kə́ bo ō, ī-ɓōkíin̄ tɔ̄ȳ kə pāá ō.
Ə̄nīī pā ō, úgiī kənde gō tə́ ō.
Najə̄ ń kadə̄ ā ə́daī yā rāanəń kə́rá ní n toó:
16Kəla gə̄ malang ń Kɔ́ɔ̄ɓē rāādə́ ní majən̄ ngá̰ý ō,
yá̰a̰ gə̄ ń ni əda kadə̄ yā rāā ní, reē udən̄ gírí kə kum mbang yādə́ gēé kógə̄ḿ kógə̄ḿ ō.
17Najə̄ gə̄ ń toō ní, majə kadə̄ deē dəjedə́ alé: Yá̰á̰ ń toō i rí? Nge ń nuū i tām̄ rí tə́?
Tɔdɔ̄ najə̄ malang kə́ dum dɔ deē ní, lo kɔrə̄n kadə̄ majə i kə kum mbangneé.
Dan ń Kɔ́ɔ̄ɓē ɔr̄ najə̄ ní, man̄ kə́ a nūgə́ dəba ō, kán̄ rɔ̄n dɔ naā tə́ ō.
Ni əda najə̄ tan kógə̄ḿ anī, man̄ gə̄ kánə̄n̄ rɔ̄də́ kem kār̄də́ gə̄ tə́ ō.
18Ni adə̄ ndūn anī, yá̰a̰ malang i kə́ rāā kə gō ń ni ndigə ní ō,
de kə́ yā kɔgə̄n rāā kəla kajə deē yān gətóo ō.
19Ni a̰a̰ yá̰a̰ rāā de gə̄ malang ō,
yá̰á̰ kə́ a mān̄ ta kumən tə́ kanjə̄ kadə̄ ni a̰ā̰ gətóo ō.
20Ni a̰a̰ yá̰á̰ kə́ ta kəla gíŕ tə́ bátə́ ta tɔ̄l̄ ta tə́ ō,
yá̰á̰ kə́ ɔr kumən gətóo ō.
21Najə̄ gə̄ ń toō ní, majə kadə̄ deē dəjedə́ alé: Yá̰á̰ ń toō i rí? Nge ń nuū i tām̄ rí tə́?
Tɔdɔ̄ ni rāā yá̰a̰ malang i kə kumneé.
22Kem majə yān to i tītə̄ man̄ bā kə́ rə̄ɓā kem kārən tə́ ō,
taā lo dɔ nang tə́ malang tītə̄ man̄ kaw̄ kə́ ngá̰ý beē ō.
23Adə̄ wūn̄g a rāan dɔ nápar de kə́ rang gə̄ tə́ ō,
tītə̄ kə́ ɓāl̄ ń ni rāań adə̄ gō nang kə́ man̄ aw̄ tū tə́ majə kété téləń dəla lo kə́ katə̄ i tū tə́ ní.
24Tām̄ yā ngé kə́ táĺ gə̄ tə́ ɓáa, gō róbə yān gə̄ i gō róbə́ kə́ súūmú gə̄,
ba tām̄ yā ngé rāā yá̰a̰ kə gō kem ndigə yā Nə́ɓāá aĺ gə̄ tə́ ɓáa, gō róbə yān gə̄ i gō róbə gə̄ kə́ yá̰á̰ kə́ ngan̄g gə̄ i ngá̰ý tū tə́.
25Ta kəla gíŕ tə́ ní, rāān̄ yá̰á̰ kə́ majə gə̄ i tām̄ yā de kə́ majə gə̄ tə́ ō,
yá̰á̰ kə́ tōr̄ gə̄ i tām̄ yā ngé rāā majaĺ gə̄ tə́ ō.
26Yá̰á̰ kə́ ta kəga dɔ ń deē a sāā yā ndiń kə kumneé ní:
i man̄ ō, hor ō, gində̄ ō, katə̄ ō,
ndujə̄ kōō gémē kə́ lándə̄ ō, mba ō, yibə̄ tejə ō,
kasə nduú ō, yibə̄ ō, kūbə̄ ō.
27Yá̰a̰ gə̄ ń nuū malang ní, i yá̰á̰ kə́ majə gə̄ tām̄ yā ngé rāā yá̰a̰ kə gō kem ndigə yā Nə́ɓāá gə̄,
banī tām̄ yā ngé rāā majaĺ gə̄ tə́ ɓáa télən̄ i yá̰á̰ kə́ majə aĺ gə̄.
28Kɔ́ɔ̄ɓē rāā néĺ kə́rēý gə̄ i ndéý tə́ ō,
dan ń néĺ gə̄ ní əlan̄ kə ngangá ngá̰ý anī, rāān̄ adə̄ yá̰á̰ kə́ to kum kaȳ aĺ ń əsō dɔ de gə̄ ń najə̄ i dɔdə́ tə́ ní bo ngá̰ý kum kə̄ kété ō.
Kum mbang gān̄g sarya tə́ anī, nél gə̄ ní əlan̄ kə ngangá ngá̰ý ō,
rāān̄ adə̄ wūn̄g yā nge rāādə́ tetə ō.
29Hor ō, kɔ̄sə̄ ō, ɓōō kə́ əsō ō yo ō ní,
Kɔ́ɔ̄ɓē rāādə́ i ndéý tə́.
30Ngān̄g dā̰ kə́ dṵ gə̄ ō, kókə́rang gə̄ ō, lī kakə́m gə̄ ō,
kaskar dal ba̰ā̰ ń tɔ̄l̄ ngé rāā yá̰a̰ kə gō kem ndigə yā Nə́ɓāá aĺ gə̄ ō ní,
31rāān̄ rɔ̄nel̄ najə̄ koō kə́ oōn̄ ta Kɔ́ɔ̄ɓē tə́.
Dɔ nang tə́ ní, nin̄ ndin̄ dɔ rɔ̄də́ tə́ kɔ̄ɔ́ yā rāā yá̰á̰ ń ni ndigə ní.
Ré kum mbang yādə́ ugə̄ anī, nin̄ a mbātə́n̄ rāā yá̰á̰ ń ni ədadə́ ní alé.
32Yá̰a̰ gə̄ ń nuū malang ní, kumdə́ unjə̄ ngá̰ý tām̄ yāḿ mā tə́ i ta kəla gíŕ tə́.
I tām̄ najə̄ ń nuū tə́ n lo ń m̄-gír̄ yá̰a̰ oy anī, m̄-ndangdə́ ní.
33Kəla gə̄ ń Kɔ́ɔ̄ɓē rāādə́ ní, majən̄ malang.
Dan ń ndoō yá̰á̰ kə́rēý rāā deē anī, Kɔ́ɔ̄ɓē adə̄n.
34I beé ní, kəda na nge ń toō na majə aĺ tɔȳ nge ń nuū ní, i najə̄ kə́ yā kɔr̄ alé!
Tɔdɔ̄ kum mbang a reē nuú, kadə̄ de gə̄ a gerə̄n̄ kadə̄ yá̰a̰ malang i yá̰á̰ kə́ majə.
35Ba ngɔlaā ní, ī-teēī tasí ngá̰ý ə̄nīiń pā kə ngarā̰ kemsí gēé malang ō,
ī-ɓōkíī Kɔ́ɔ̄ɓē tɔ̄ȳ ō.
Currently Selected:
JEJU KƏ́ NGŌN̄ SIRAK 39: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.