JEJU KƏ́ NGŌN̄ SIRAK 37
37
Madə̄ deē kə́ rɔ̄kum ō, kə́ rɔ̄kum aĺ ō
1De gə̄ ngá̰ý ədan̄ na: Mā i madí ō.
Banī ngé kə́rēý gə̄ dandə́ tə́ i madə̄ kə́ rīḿ sedə́ gə̄ ngóy.
2Dan ń kə́ra madə̄ deē tél i madə̄ ba̰ā̰ deē ní,
nge ń nuū i wur kɔl kə́ madə̄ ɓē yo.
3Ngur rāā yá̰á̰ kə́ majə aĺ ń a rāājí dejə ní teē yān i rá?
Á gól̄ lo taāń lo dɔ nang tə́ malang ní!
4Ni i madí dan kə́ majə tə́,
ba dan kə́ majə aĺ tə́ anī a rɔ̄ɔ̄ī.
5Dan ń ā ūləń madí tə́ ní, ni a̰a̰ tápə̄ seí,
ba kum mbang yā rɔ̄ɔ̄ tə́ anī, un der yān.
6Ī-lōō kadə̄ dɔí ndígə̄nal madí ō,
ré ə́ngé yá̰a̰ anī ādə̄ əga kemií dɔn tə́ ɓáý tṵ ō.
Kɔjə̄ ń kadə̄ deē taā kem ní i nge kə́ rá?
7Ngé kadə̄ kɔjə̄ gə̄ malang i ngé kəda na kɔjə̄ yādə́ na i kɔjə̄ kə́ majə tɔȳ yā madə̄də́ gə̄.
Banī ngé kə́rēý gə̄ a adə̄n̄ kɔjə̄ i tām̄ yā kəngeń yá̰a̰.
8Ī-lōō taā kem nge kadə̄ kɔjə̄.
Yá̰á̰ kə́ ta kəga dɔ ń majə kadə̄ ī-dəje rɔ̄í ní n toó: Ni a gḛy i rí?
Adə̄ ré ə́hɔ kumií ta jīí tə́ aĺ anī,#37.8 Ə́hɔ kumií ta jīí tə́ aĺ anī: kumən na: ādə̄ kumií ngan̄g aĺ anī. a ɔsə mbara seí
tɔdɔ̄ yá̰á̰ ń ni núm̄ rāā ní, i yá̰á̰ kə́ kadə̄ teēn yá̰á̰ tə́.
9Adə̄ a ədaī na: Ún i róbə́ kə́ majə.
Ba gō tə́ anī, a ra sa̰y yā ka̰a̰ń yá̰á̰ ń a rāā yā rāāī ní.
10Ī-lōō kaw̄ rɔ̄ de kə́ rɔ̄kum aĺ tə́ dəjen kɔjə̄ ō,
yá̰a̰ gə̄ ń ī-sāā rāā ní, ī-ɓɔ̄ɔ̄ dɔ kɔ̄ɔ́ ādə̄ ngé kəndāí nii gə̄ gerə̄n̄ aĺ ō.
11Ī-lōō dəje kɔjə̄ kə́ tām̄ yā dəyá̰ kə́ kṵ jōó tə́ rɔ̄ niin tə́ ō,
dəje kɔjə̄ kə́ tām̄ yā rɔ̄ɔ̄ tə́ rɔ̄ de kə́ nge ɓōĺ tə́ ō,
dəje kɔjə̄ kə́ tām̄ yā yá̰a̰ gātə̄ tə́ rɔ̄ nge gātə̄ yá̰á̰ tə́ ō,
dəje kɔjə̄ kə́ tām̄ yā gātə̄ yá̰á̰ tə́ rɔ̄ nge mang yá̰á̰ tə́ ō,
dəje kɔjə̄ kə́ tām̄ yā rāā deē kə́rá tə́ rɔ̄ de kə́ nge ndə̄ngā yá̰á̰ tə́ ō,
dəje kɔjə̄ kə́ tām̄ yā kem majə tə́ rɔ̄ de kə́ hálən ngan̄g ngá̰ý tə́ ō,
dəje kɔjə̄ kə́ tām̄ yā kəla kə́rēý tə́ rɔ̄ de kə́ yai tə́ ō,
dəje kɔjə̄ kə́ tām̄ yā təgā kəla tə́ rɔ̄ nge kənge nar gír kəla kə́ kem ɓāl̄ kógə̄ḿ tə́ ō,
dəje kɔjə̄ kə́ tām̄ yā kəla kə́ bo tə́ rɔ̄ nge kəla kə́ yay tə́ ō.
Ī-lōō kəndā tɔ́gí dɔ de gə̄ ń nuū tə́ tām̄ yā kɔjə̄ kógə̄ḿ tə́.
12Banī āw̄ ngándáńg rɔ̄ nge rāā yá̰a̰ kə gō kem ndigə yā Nə́ɓāá tə́,
kə́ ī-ger̄ kadə̄ ni i nge rāā yá̰a̰ gə̄ ń Kɔ́ɔ̄ɓē əda kadə̄ yā rāā ní ō,
gír̄ yān to tītə̄ gír̄ yāí ō,
kə́ ré ə̄sō tū yá̰á̰ ń ā ī-rāā tə́ ní anī, a ger̄ tōrən seí ō.
13Ādə̄ i yá̰a̰ gə̄ ń kemií ɔjiī kadə̄ ī-rāādə́ ní ngóy n ī-ra dɔ tə́ ní,
ba ī-lōō tɔ̄ɔ̄ kaw̄ kə̄ lo gə̄ tə́. Tɔdɔ̄ nge ra dɔ ndūn tə́ seí kə́ tɔȳn gətóo:
14Dɔ deē i yá̰á̰ kə́ a əda deē najə̄ dejə,
ni tɔȳ ngé ngɔ̄m̄ lo gə̄ sīrí, kə́ tə́ndān̄də́ dɔ kújə́ kə́ ngāl̄ ɓururu kum kə̄ dɔɔ́ tə́ kadə̄ umə̄n̄ lo.
15Ba kə́ tɔȳ nge ń nuū ní, ī-dəje Nge Ndi dɔ rā̰ tə́
kadə̄ ndɔ́rī ta róbə dɔ róbə́ kə́ rɔ̄kum tə́.
Sɔɔ̄ kadə̄ kum kedə̄ rāā kəla tām̄ yā de gə̄ tə́
16Tɔ́tə̄ naā dɔ najə̄ tə́ i ta kəla gír kəla malang.
Yá̰a̰ malang ní, majə kadə̄ deē gír̄ yá̰a̰ dɔ tə́ pá tá rāā.
17Ngəra gír̄ najə̄ gə̄ i dan wur deē.
18Dan wur deē rāā adə̄ yá̰a̰ gə̄ sɔ́ əɓan̄ kem deē tə́:
adə̄ i yá̰á̰ kə́ majə ō, kə́ majə aĺ ō, ndi kə kumuú ō, yo ō.
Ba i ta ndo̰ deē n i nge gə̄rā yá̰a̰ gə̄ ń nuū ní.
19De kə́rēý gə̄ gerə̄n̄ kɔjə madə̄də́ gə̄ yá̰á̰ ngá̰ý,
ba kə́ tām̄ yādə́ nin̄ kɔ́ gə̄ tə́ ɓáa, gerə̄n̄ yá̰á̰ kógə̄ḿ alé.
20De kógə̄ḿ ger̄ kɔr̄ najə̄ ngá̰ý, ba rāā adə̄ nel̄ de gə̄ seneé alé.
Adə̄ a ɔgə̄nən̄ yá̰a̰ kəsa kɔ̄ɔ́.
21Tɔdɔ̄ Kɔ́ɔ̄ɓē rāā kem majə seneé alé,
tām̄ kum kedə̄ yān gətóo.
22De kə́rēý gə̄ i ngé kum kedə̄ gə̄, ba i tām̄ yā majə yādə́ nin̄ kɔ́ gə̄ tə́ ngóy ō,
yá̰á̰ ń kur̄ dɔdə́ teēń ní, a rāā majə i sedə́ nin̄ kɔ́ gɔ̄ɔ́ ngóy ō.
23De kə́ rang gə̄ i ngé kum kedə̄ gə̄, ba i tām̄ yā majə yā gír deē yādə́ gə̄ tə́ ō,
deē asə taā kem yá̰á̰ ń kur̄ dɔdə́ teēń ní ō.
24Nge kum kedə̄ i deē kə́ a ənge tɔ́r̄ ta ngá̰ý ō,
de gə̄ malang ń a̰a̰nən̄ ní ədan̄ na ni i nge rɔ̄nel̄ ō.
25Deē asə tə́da kutə ndɔ̄ gə̄ ń deē ndiń kə kumneé ní,
banī deē asə tə́da kutə ndɔ̄ gə̄ ń Israel ndiń kə kumneé ní alé.
26Nge kum kedə̄ ń ndi dan gír deē yān gə̄ tə́ ní, nin̄ a adə̄nən̄ kemdə́ ō,
rīn a udə aĺ bátə́ ō.
Kəsa wa alé
27Ngōnə̄ḿ, dan ń ī-ndiń kə kumií ní, ī-nāā rɔ̄í ḭ̄kɔ́:
Yá̰á̰ kə́ a rāā majaĺ seí ɓáa á̰a̰ ī-ger̄ ō, ɔ̄gə̄ rɔ̄í yá̰á̰ ní kɔ̄ɔ́ ō.
28Tām̄ yá̰a̰ malang majə tām̄ yā de gə̄ malang tə́ aĺ ō,
yá̰a̰ malang nel̄ de gə̄ malang aĺ ō.
29Ī-lōō kəsa wa ō,
ī-lōō rāā ta yá̰a̰ ō.
30Tām̄ kəsa yá̰á̰ ngá̰ý i yá̰á̰ kə́ a rāā deē kə moyo̰ó̰ ō,
kəsa waa nin̄ i gō naā tə́ kə kem tōrōó ō.
31De gə̄ ngá̰ý oyn̄ sɔɔ̄ń kəsa waa yādə́.
Banī deē ń əndā kum kedə̄ dɔ rɔ̄n tə́ ní, a ndi kə kumneé dan i ngá̰ý.
Currently Selected:
JEJU KƏ́ NGŌN̄ SIRAK 37: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
JEJU KƏ́ NGŌN̄ SIRAK 37
37
Madə̄ deē kə́ rɔ̄kum ō, kə́ rɔ̄kum aĺ ō
1De gə̄ ngá̰ý ədan̄ na: Mā i madí ō.
Banī ngé kə́rēý gə̄ dandə́ tə́ i madə̄ kə́ rīḿ sedə́ gə̄ ngóy.
2Dan ń kə́ra madə̄ deē tél i madə̄ ba̰ā̰ deē ní,
nge ń nuū i wur kɔl kə́ madə̄ ɓē yo.
3Ngur rāā yá̰á̰ kə́ majə aĺ ń a rāājí dejə ní teē yān i rá?
Á gól̄ lo taāń lo dɔ nang tə́ malang ní!
4Ni i madí dan kə́ majə tə́,
ba dan kə́ majə aĺ tə́ anī a rɔ̄ɔ̄ī.
5Dan ń ā ūləń madí tə́ ní, ni a̰a̰ tápə̄ seí,
ba kum mbang yā rɔ̄ɔ̄ tə́ anī, un der yān.
6Ī-lōō kadə̄ dɔí ndígə̄nal madí ō,
ré ə́ngé yá̰a̰ anī ādə̄ əga kemií dɔn tə́ ɓáý tṵ ō.
Kɔjə̄ ń kadə̄ deē taā kem ní i nge kə́ rá?
7Ngé kadə̄ kɔjə̄ gə̄ malang i ngé kəda na kɔjə̄ yādə́ na i kɔjə̄ kə́ majə tɔȳ yā madə̄də́ gə̄.
Banī ngé kə́rēý gə̄ a adə̄n̄ kɔjə̄ i tām̄ yā kəngeń yá̰a̰.
8Ī-lōō taā kem nge kadə̄ kɔjə̄.
Yá̰á̰ kə́ ta kəga dɔ ń majə kadə̄ ī-dəje rɔ̄í ní n toó: Ni a gḛy i rí?
Adə̄ ré ə́hɔ kumií ta jīí tə́ aĺ anī,#37.8 Ə́hɔ kumií ta jīí tə́ aĺ anī: kumən na: ādə̄ kumií ngan̄g aĺ anī. a ɔsə mbara seí
tɔdɔ̄ yá̰á̰ ń ni núm̄ rāā ní, i yá̰á̰ kə́ kadə̄ teēn yá̰á̰ tə́.
9Adə̄ a ədaī na: Ún i róbə́ kə́ majə.
Ba gō tə́ anī, a ra sa̰y yā ka̰a̰ń yá̰á̰ ń a rāā yā rāāī ní.
10Ī-lōō kaw̄ rɔ̄ de kə́ rɔ̄kum aĺ tə́ dəjen kɔjə̄ ō,
yá̰a̰ gə̄ ń ī-sāā rāā ní, ī-ɓɔ̄ɔ̄ dɔ kɔ̄ɔ́ ādə̄ ngé kəndāí nii gə̄ gerə̄n̄ aĺ ō.
11Ī-lōō dəje kɔjə̄ kə́ tām̄ yā dəyá̰ kə́ kṵ jōó tə́ rɔ̄ niin tə́ ō,
dəje kɔjə̄ kə́ tām̄ yā rɔ̄ɔ̄ tə́ rɔ̄ de kə́ nge ɓōĺ tə́ ō,
dəje kɔjə̄ kə́ tām̄ yā yá̰a̰ gātə̄ tə́ rɔ̄ nge gātə̄ yá̰á̰ tə́ ō,
dəje kɔjə̄ kə́ tām̄ yā gātə̄ yá̰á̰ tə́ rɔ̄ nge mang yá̰á̰ tə́ ō,
dəje kɔjə̄ kə́ tām̄ yā rāā deē kə́rá tə́ rɔ̄ de kə́ nge ndə̄ngā yá̰á̰ tə́ ō,
dəje kɔjə̄ kə́ tām̄ yā kem majə tə́ rɔ̄ de kə́ hálən ngan̄g ngá̰ý tə́ ō,
dəje kɔjə̄ kə́ tām̄ yā kəla kə́rēý tə́ rɔ̄ de kə́ yai tə́ ō,
dəje kɔjə̄ kə́ tām̄ yā təgā kəla tə́ rɔ̄ nge kənge nar gír kəla kə́ kem ɓāl̄ kógə̄ḿ tə́ ō,
dəje kɔjə̄ kə́ tām̄ yā kəla kə́ bo tə́ rɔ̄ nge kəla kə́ yay tə́ ō.
Ī-lōō kəndā tɔ́gí dɔ de gə̄ ń nuū tə́ tām̄ yā kɔjə̄ kógə̄ḿ tə́.
12Banī āw̄ ngándáńg rɔ̄ nge rāā yá̰a̰ kə gō kem ndigə yā Nə́ɓāá tə́,
kə́ ī-ger̄ kadə̄ ni i nge rāā yá̰a̰ gə̄ ń Kɔ́ɔ̄ɓē əda kadə̄ yā rāā ní ō,
gír̄ yān to tītə̄ gír̄ yāí ō,
kə́ ré ə̄sō tū yá̰á̰ ń ā ī-rāā tə́ ní anī, a ger̄ tōrən seí ō.
13Ādə̄ i yá̰a̰ gə̄ ń kemií ɔjiī kadə̄ ī-rāādə́ ní ngóy n ī-ra dɔ tə́ ní,
ba ī-lōō tɔ̄ɔ̄ kaw̄ kə̄ lo gə̄ tə́. Tɔdɔ̄ nge ra dɔ ndūn tə́ seí kə́ tɔȳn gətóo:
14Dɔ deē i yá̰á̰ kə́ a əda deē najə̄ dejə,
ni tɔȳ ngé ngɔ̄m̄ lo gə̄ sīrí, kə́ tə́ndān̄də́ dɔ kújə́ kə́ ngāl̄ ɓururu kum kə̄ dɔɔ́ tə́ kadə̄ umə̄n̄ lo.
15Ba kə́ tɔȳ nge ń nuū ní, ī-dəje Nge Ndi dɔ rā̰ tə́
kadə̄ ndɔ́rī ta róbə dɔ róbə́ kə́ rɔ̄kum tə́.
Sɔɔ̄ kadə̄ kum kedə̄ rāā kəla tām̄ yā de gə̄ tə́
16Tɔ́tə̄ naā dɔ najə̄ tə́ i ta kəla gír kəla malang.
Yá̰a̰ malang ní, majə kadə̄ deē gír̄ yá̰a̰ dɔ tə́ pá tá rāā.
17Ngəra gír̄ najə̄ gə̄ i dan wur deē.
18Dan wur deē rāā adə̄ yá̰a̰ gə̄ sɔ́ əɓan̄ kem deē tə́:
adə̄ i yá̰á̰ kə́ majə ō, kə́ majə aĺ ō, ndi kə kumuú ō, yo ō.
Ba i ta ndo̰ deē n i nge gə̄rā yá̰a̰ gə̄ ń nuū ní.
19De kə́rēý gə̄ gerə̄n̄ kɔjə madə̄də́ gə̄ yá̰á̰ ngá̰ý,
ba kə́ tām̄ yādə́ nin̄ kɔ́ gə̄ tə́ ɓáa, gerə̄n̄ yá̰á̰ kógə̄ḿ alé.
20De kógə̄ḿ ger̄ kɔr̄ najə̄ ngá̰ý, ba rāā adə̄ nel̄ de gə̄ seneé alé.
Adə̄ a ɔgə̄nən̄ yá̰a̰ kəsa kɔ̄ɔ́.
21Tɔdɔ̄ Kɔ́ɔ̄ɓē rāā kem majə seneé alé,
tām̄ kum kedə̄ yān gətóo.
22De kə́rēý gə̄ i ngé kum kedə̄ gə̄, ba i tām̄ yā majə yādə́ nin̄ kɔ́ gə̄ tə́ ngóy ō,
yá̰á̰ ń kur̄ dɔdə́ teēń ní, a rāā majə i sedə́ nin̄ kɔ́ gɔ̄ɔ́ ngóy ō.
23De kə́ rang gə̄ i ngé kum kedə̄ gə̄, ba i tām̄ yā majə yā gír deē yādə́ gə̄ tə́ ō,
deē asə taā kem yá̰á̰ ń kur̄ dɔdə́ teēń ní ō.
24Nge kum kedə̄ i deē kə́ a ənge tɔ́r̄ ta ngá̰ý ō,
de gə̄ malang ń a̰a̰nən̄ ní ədan̄ na ni i nge rɔ̄nel̄ ō.
25Deē asə tə́da kutə ndɔ̄ gə̄ ń deē ndiń kə kumneé ní,
banī deē asə tə́da kutə ndɔ̄ gə̄ ń Israel ndiń kə kumneé ní alé.
26Nge kum kedə̄ ń ndi dan gír deē yān gə̄ tə́ ní, nin̄ a adə̄nən̄ kemdə́ ō,
rīn a udə aĺ bátə́ ō.
Kəsa wa alé
27Ngōnə̄ḿ, dan ń ī-ndiń kə kumií ní, ī-nāā rɔ̄í ḭ̄kɔ́:
Yá̰á̰ kə́ a rāā majaĺ seí ɓáa á̰a̰ ī-ger̄ ō, ɔ̄gə̄ rɔ̄í yá̰á̰ ní kɔ̄ɔ́ ō.
28Tām̄ yá̰a̰ malang majə tām̄ yā de gə̄ malang tə́ aĺ ō,
yá̰a̰ malang nel̄ de gə̄ malang aĺ ō.
29Ī-lōō kəsa wa ō,
ī-lōō rāā ta yá̰a̰ ō.
30Tām̄ kəsa yá̰á̰ ngá̰ý i yá̰á̰ kə́ a rāā deē kə moyo̰ó̰ ō,
kəsa waa nin̄ i gō naā tə́ kə kem tōrōó ō.
31De gə̄ ngá̰ý oyn̄ sɔɔ̄ń kəsa waa yādə́.
Banī deē ń əndā kum kedə̄ dɔ rɔ̄n tə́ ní, a ndi kə kumneé dan i ngá̰ý.
Bibəl ta Sar̄ © L'Alliance Biblique du Tchad, 2006, 2010.