JEJU KƏ́ NGŌN̄ SIRAK 27
27
1De gə̄ ngá̰ý rāān̄ majaĺ tām̄ yá̰a̰ kənge nel̄də́ ngá̰ý ō,
nge sāā yá̰a̰ kənge i nge kun kumən kɔ̄ɔ́ ta yá̰a̰ rāā kə́ gōtə́ tə́ ō.
2Nge kigə yá̰a̰ ō, nge mang yá̰a̰ ō ní, majaĺ udə mbo̰ō̰də́ tə́
i tītə̄ kāgə̄ kə́ tan atə dām̄ kógə̄ḿ kə́ kudə mbo̰ō̰ mbal̄ gə̄ tə́ beē.
3Ré ī-ɓōĺ ndíĺ Kɔ́ɔ̄ɓē kə ngangá aĺ anī,
kújə yāí a əsō yā nujə sák sák kɔ̄ɔ́ i láẃ ngá̰ý.
Deē a ger̄ deē i najə̄ kɔrə̄n tə́
4Ré deē əga yá̰a̰ kə yengəreé anī, i yo̰ yá̰á̰ ní n a nay kem yengəreé ní.
Adə̄ dan ń deē a ɔr̄ najə̄ anī, hálən kə́ gōtə́ aĺ a to kə̄ dɔ ndágá i tītə̄ ń nuū ō.
5Tītə̄ ń i hor n a mēr̄ kadə̄ kɔdə̄ tə́ngā jóo gerə̄ń ngan̄g jóó ní,
deē a ger̄ deē i najə̄ kɔrə̄n tə́ ō.
6I kan̄ kāgə̄ n a ɔjə kadə̄ əndān̄ kāgə̄ ní majə ní ō,
i najə̄ kɔr̄ deē n i nge rāā kadə̄ deē ger̄ gír̄ kə́ kem deē tə́ ní ō.
7Ī-lōō ɓōkə́ deē tɔ̄ȳ kété kanjə̄ koō najə̄ kɔrə̄n.
Tām̄ i koō najə̄ kɔr̄ deē n a mēr̄ kadə̄ deē gerə̄ń deē ní.
Yá̰á̰ ń kum kedə̄ a adə̄ deē ní
8Ré ī-ngɔ̄də̄ gō yá̰a̰ rāā kə́ gōtə́ anī, ā ə́hɔn ō,
ā ə́lan rɔ̄í tə́ tītə̄ kūbə̄ kə́ to kɔsə go̰n beé ō.
9Gír yel̄ kə́ kógə̄ḿ beē gə̄ rāān̄ ɓēēdə́ i lo kógə̄ḿ.
I rāā yá̰á̰ kə́ rɔ̄kum n a reē kə yá̰á̰ kə́ rɔ̄kumuú ní.
10Tītə̄ ń ɓɔl umə̄ń dā̰ yā kəhɔn ní, majaĺ um̄ ngé rāā yá̰á̰ kə́ gōtə́ aĺ gə̄ i tītə̄ ń nuū ō.
11Ngándáńg ní kum kedə̄ i ngá̰ý tū najə̄ kɔr̄ nge rāā yá̰a̰ kə gō ń kem Nə́ɓā ndigə ní tə́,
banī hál de kə́ mbóo ra gotə kógə̄ḿ aĺ tītə̄ nāā kə́ a tūr̄ beé.
12Ī-lōō ndi ngá̰ý dan de kə́ ger̄ yá̰a̰ aĺ gə̄ tə́,
banī ī-ndi ngá̰ý dan ngé gír̄ yá̰a̰ gə̄ tə́.
13Najə̄ kɔr̄ de kə́ sapə gə̄ rāā deē adə̄ wūn̄g rāan ō,
kəgō yādə́ i kəgō kə́ mān̄ dɔ majən ō.
14Najə̄ kɔr̄ de kə́ nge túbə dejə i yá̰á̰ kə́ jənga dɔ deē ō,
kɔ̄l̄ yān a rāā kadə̄ deē utə̄ mbīn dɔ gúú tə́ ō.
15Kɔ̄l̄ naā yā de kə́ ngé kɔjə rɔ̄də́ gə̄ rāā adə̄ mósə deē a̰ȳ nang tə́ ō,
najə̄ kə́ tōr̄ yādə́ gə̄ ń a ədan̄ naā ní, i yá̰á̰ kə́ majə koō aĺ ō.
Ger̄ lo ngɔ̄m̄ yá̰á̰ kə́ to lo mundə̄ tə́
16Nge teē kə yá̰á̰ kə́ to lo mundə̄ tə́ ndágá i nge nujə kə taā kə́ taān̄ kemən,
adə̄ ni a ənge madə̄ tan kə́ rɔ̄kum tṵ alé.
17Ī-tár madə̄ taí ō, ī-ra dɔ ndūí tə́ seneé ō.
Ba ré ī-teē kə gíŕ yá̰a̰ yān gə̄ kə́ ton̄ lo mundə̄ tə́ ndágá anī, ī-lōō sāā nja madə̄ naā yān tṵ.
18Tītə̄ ń ngee deē kə́ koy i de kə́ tan tḭ̄ḭ̄ kɔ̄ɔ́ tām̄ yā ngeen tə́ ní,
tām̄ yāí ḭ̄ tə́ ɓáa madə̄ naā yān i kə́ ta tḭ̄ḭ̄ kɔ̄ɔ́.
19Ḭ̄ ə́ya̰ madí ādə̄ aw̄ i tītə̄ yel̄ kə́ ə́ya̰n dɔɔ́ adə̄ aw̄ kɔ̄ɔ́ beē.
Adə̄ ré ī-tə̄ɓā gōn gə̄gē anī, ā ə́hɔn tṵ alé.
20Ī-lōō ngɔ̄də̄ gōn na ni i sa̰y ngá̰ý kɔ̄ɔ́.
Ni teē kɔ̄ɔ́ kum réńg tə́ tītə̄ jal̄ beé.
21Deē asə ndem̄ ta do,
aláa māȳ rɔ̄n dɔ ndū kə́ tájə̄nən̄ tə́.
Banī deē ń teē kə yá̰á̰ kə́ to lo mundə̄ tə́ ndágá ní,
yá̰á̰ kə́ yā kadə̄ ni əndā kemən dɔ tə́ tṵ gətóo.
Gól̄ lo
22Nge ka̰a̰ lo kə kə̄lá kumneé i de kə́ aw̄ kə gír̄ kə́ majə aĺ kemən tə́.
Banī de kə́ gerə̄n ɔr̄ rɔ̄n kɔ̄ɔ́ rɔ̄n tə́.
23Ta kumií tə́ ɓáa najə̄ kə́ tan tə́ yḛmbə njḭḭ ō,
ni a a̰ā̰ kadə̄ najə̄ kɔrí i najə̄ kə́ majə ō.
Banī gidií tə́ anī ni tūr̄ najə̄ kɔrə̄n kɔ̄ɔ́ ō,
un najə̄ kɔrí rāā adə̄ téĺ yá̰á̰ kə́ əga deē bə̄dē tə́ ō.
24Yá̰á̰ kə́ nelə̄m̄ aĺ gə̄ i ngá̰ý ɓá tā, ba nge ka̰a̰ lo kə kə̄lá kumneé nelə̄m̄ aĺ tɔȳ gotə gə̄ malang.
A nel̄ Kɔ́ɔ̄ɓē seneé aĺ ngá̰ý ō.
Yá̰á̰ kə́ majə aĺ ń deē rāā ní, deē a əgā kə̄rān ngándáńg
25Deē ń ənī mbal̄ kum kə̄ dɔɔ́ ní, mbal̄ ní a tél a əsō i dɔn nəkɔ́ tə́.
Deē ń ngḛy deē gidən tə́ əndan ní, a ənge do kum gotə kə̄rā.
26Deē ń ndēr̄ bəlo ní a əsō tū tə́ ō,
deē ń əyā gūmbə̄ ní, gūmbə̄ ní a əhɔn ō.
27Yá̰á̰ kə́ majə aĺ ń deē rāā ní, tél a əsō i dɔn nəkɔ́ tə́ ō,
ni ger̄ lo ń yá̰á̰ kə́ majə aĺ ní teē tū tə́ ní aĺ ō.
28Mbóo kə deé ō, tájə̄ ndū ō, i yá̰a̰ rāā de kə́ nge kɔjə rɔ̄n.
Banī ba̰ā̰ to a ngóōn tītə̄ ɓɔl kə́ to a um̄ dā̰ yā kəwan beé.
29Deē ń rāā rɔ̄nel̄ najə̄ yá̰á̰ kə́ majə aĺ kə́ teē dɔ nge rāā yá̰a̰ kə gō kem ndigə yā Nə́ɓāá tə́ ní, a əsō kum gūmbə̄ tə́:
yá̰á̰ kə́ tōr̄ gə̄ a rāānən̄ ngá̰ý pá tá kadə̄ a oy ɓáý.
Māȳ rɔ̄ dɔ deē tə́ i sóótə́ tɔȳ kəhɔ deē kem tə́
30Kəhɔ deē kem tə́ ō, rāā wūn̄g ō ní, i yá̰a̰ gə̄ kə́ kadə̄ nel̄ deē sedə́ aĺ ngá̰ý gə̄ ō,
nge rāā majaĺ ger̄ yá̰a̰ gə̄ ń nuū ngá̰ý ō.
Currently Selected:
JEJU KƏ́ NGŌN̄ SIRAK 27: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
JEJU KƏ́ NGŌN̄ SIRAK 27
27
1De gə̄ ngá̰ý rāān̄ majaĺ tām̄ yá̰a̰ kənge nel̄də́ ngá̰ý ō,
nge sāā yá̰a̰ kənge i nge kun kumən kɔ̄ɔ́ ta yá̰a̰ rāā kə́ gōtə́ tə́ ō.
2Nge kigə yá̰a̰ ō, nge mang yá̰a̰ ō ní, majaĺ udə mbo̰ō̰də́ tə́
i tītə̄ kāgə̄ kə́ tan atə dām̄ kógə̄ḿ kə́ kudə mbo̰ō̰ mbal̄ gə̄ tə́ beē.
3Ré ī-ɓōĺ ndíĺ Kɔ́ɔ̄ɓē kə ngangá aĺ anī,
kújə yāí a əsō yā nujə sák sák kɔ̄ɔ́ i láẃ ngá̰ý.
Deē a ger̄ deē i najə̄ kɔrə̄n tə́
4Ré deē əga yá̰a̰ kə yengəreé anī, i yo̰ yá̰á̰ ní n a nay kem yengəreé ní.
Adə̄ dan ń deē a ɔr̄ najə̄ anī, hálən kə́ gōtə́ aĺ a to kə̄ dɔ ndágá i tītə̄ ń nuū ō.
5Tītə̄ ń i hor n a mēr̄ kadə̄ kɔdə̄ tə́ngā jóo gerə̄ń ngan̄g jóó ní,
deē a ger̄ deē i najə̄ kɔrə̄n tə́ ō.
6I kan̄ kāgə̄ n a ɔjə kadə̄ əndān̄ kāgə̄ ní majə ní ō,
i najə̄ kɔr̄ deē n i nge rāā kadə̄ deē ger̄ gír̄ kə́ kem deē tə́ ní ō.
7Ī-lōō ɓōkə́ deē tɔ̄ȳ kété kanjə̄ koō najə̄ kɔrə̄n.
Tām̄ i koō najə̄ kɔr̄ deē n a mēr̄ kadə̄ deē gerə̄ń deē ní.
Yá̰á̰ ń kum kedə̄ a adə̄ deē ní
8Ré ī-ngɔ̄də̄ gō yá̰a̰ rāā kə́ gōtə́ anī, ā ə́hɔn ō,
ā ə́lan rɔ̄í tə́ tītə̄ kūbə̄ kə́ to kɔsə go̰n beé ō.
9Gír yel̄ kə́ kógə̄ḿ beē gə̄ rāān̄ ɓēēdə́ i lo kógə̄ḿ.
I rāā yá̰á̰ kə́ rɔ̄kum n a reē kə yá̰á̰ kə́ rɔ̄kumuú ní.
10Tītə̄ ń ɓɔl umə̄ń dā̰ yā kəhɔn ní, majaĺ um̄ ngé rāā yá̰á̰ kə́ gōtə́ aĺ gə̄ i tītə̄ ń nuū ō.
11Ngándáńg ní kum kedə̄ i ngá̰ý tū najə̄ kɔr̄ nge rāā yá̰a̰ kə gō ń kem Nə́ɓā ndigə ní tə́,
banī hál de kə́ mbóo ra gotə kógə̄ḿ aĺ tītə̄ nāā kə́ a tūr̄ beé.
12Ī-lōō ndi ngá̰ý dan de kə́ ger̄ yá̰a̰ aĺ gə̄ tə́,
banī ī-ndi ngá̰ý dan ngé gír̄ yá̰a̰ gə̄ tə́.
13Najə̄ kɔr̄ de kə́ sapə gə̄ rāā deē adə̄ wūn̄g rāan ō,
kəgō yādə́ i kəgō kə́ mān̄ dɔ majən ō.
14Najə̄ kɔr̄ de kə́ nge túbə dejə i yá̰á̰ kə́ jənga dɔ deē ō,
kɔ̄l̄ yān a rāā kadə̄ deē utə̄ mbīn dɔ gúú tə́ ō.
15Kɔ̄l̄ naā yā de kə́ ngé kɔjə rɔ̄də́ gə̄ rāā adə̄ mósə deē a̰ȳ nang tə́ ō,
najə̄ kə́ tōr̄ yādə́ gə̄ ń a ədan̄ naā ní, i yá̰á̰ kə́ majə koō aĺ ō.
Ger̄ lo ngɔ̄m̄ yá̰á̰ kə́ to lo mundə̄ tə́
16Nge teē kə yá̰á̰ kə́ to lo mundə̄ tə́ ndágá i nge nujə kə taā kə́ taān̄ kemən,
adə̄ ni a ənge madə̄ tan kə́ rɔ̄kum tṵ alé.
17Ī-tár madə̄ taí ō, ī-ra dɔ ndūí tə́ seneé ō.
Ba ré ī-teē kə gíŕ yá̰a̰ yān gə̄ kə́ ton̄ lo mundə̄ tə́ ndágá anī, ī-lōō sāā nja madə̄ naā yān tṵ.
18Tītə̄ ń ngee deē kə́ koy i de kə́ tan tḭ̄ḭ̄ kɔ̄ɔ́ tām̄ yā ngeen tə́ ní,
tām̄ yāí ḭ̄ tə́ ɓáa madə̄ naā yān i kə́ ta tḭ̄ḭ̄ kɔ̄ɔ́.
19Ḭ̄ ə́ya̰ madí ādə̄ aw̄ i tītə̄ yel̄ kə́ ə́ya̰n dɔɔ́ adə̄ aw̄ kɔ̄ɔ́ beē.
Adə̄ ré ī-tə̄ɓā gōn gə̄gē anī, ā ə́hɔn tṵ alé.
20Ī-lōō ngɔ̄də̄ gōn na ni i sa̰y ngá̰ý kɔ̄ɔ́.
Ni teē kɔ̄ɔ́ kum réńg tə́ tītə̄ jal̄ beé.
21Deē asə ndem̄ ta do,
aláa māȳ rɔ̄n dɔ ndū kə́ tájə̄nən̄ tə́.
Banī deē ń teē kə yá̰á̰ kə́ to lo mundə̄ tə́ ndágá ní,
yá̰á̰ kə́ yā kadə̄ ni əndā kemən dɔ tə́ tṵ gətóo.
Gól̄ lo
22Nge ka̰a̰ lo kə kə̄lá kumneé i de kə́ aw̄ kə gír̄ kə́ majə aĺ kemən tə́.
Banī de kə́ gerə̄n ɔr̄ rɔ̄n kɔ̄ɔ́ rɔ̄n tə́.
23Ta kumií tə́ ɓáa najə̄ kə́ tan tə́ yḛmbə njḭḭ ō,
ni a a̰ā̰ kadə̄ najə̄ kɔrí i najə̄ kə́ majə ō.
Banī gidií tə́ anī ni tūr̄ najə̄ kɔrə̄n kɔ̄ɔ́ ō,
un najə̄ kɔrí rāā adə̄ téĺ yá̰á̰ kə́ əga deē bə̄dē tə́ ō.
24Yá̰á̰ kə́ nelə̄m̄ aĺ gə̄ i ngá̰ý ɓá tā, ba nge ka̰a̰ lo kə kə̄lá kumneé nelə̄m̄ aĺ tɔȳ gotə gə̄ malang.
A nel̄ Kɔ́ɔ̄ɓē seneé aĺ ngá̰ý ō.
Yá̰á̰ kə́ majə aĺ ń deē rāā ní, deē a əgā kə̄rān ngándáńg
25Deē ń ənī mbal̄ kum kə̄ dɔɔ́ ní, mbal̄ ní a tél a əsō i dɔn nəkɔ́ tə́.
Deē ń ngḛy deē gidən tə́ əndan ní, a ənge do kum gotə kə̄rā.
26Deē ń ndēr̄ bəlo ní a əsō tū tə́ ō,
deē ń əyā gūmbə̄ ní, gūmbə̄ ní a əhɔn ō.
27Yá̰á̰ kə́ majə aĺ ń deē rāā ní, tél a əsō i dɔn nəkɔ́ tə́ ō,
ni ger̄ lo ń yá̰á̰ kə́ majə aĺ ní teē tū tə́ ní aĺ ō.
28Mbóo kə deé ō, tájə̄ ndū ō, i yá̰a̰ rāā de kə́ nge kɔjə rɔ̄n.
Banī ba̰ā̰ to a ngóōn tītə̄ ɓɔl kə́ to a um̄ dā̰ yā kəwan beé.
29Deē ń rāā rɔ̄nel̄ najə̄ yá̰á̰ kə́ majə aĺ kə́ teē dɔ nge rāā yá̰a̰ kə gō kem ndigə yā Nə́ɓāá tə́ ní, a əsō kum gūmbə̄ tə́:
yá̰á̰ kə́ tōr̄ gə̄ a rāānən̄ ngá̰ý pá tá kadə̄ a oy ɓáý.
Māȳ rɔ̄ dɔ deē tə́ i sóótə́ tɔȳ kəhɔ deē kem tə́
30Kəhɔ deē kem tə́ ō, rāā wūn̄g ō ní, i yá̰a̰ gə̄ kə́ kadə̄ nel̄ deē sedə́ aĺ ngá̰ý gə̄ ō,
nge rāā majaĺ ger̄ yá̰a̰ gə̄ ń nuū ngá̰ý ō.
Bibəl ta Sar̄ © L'Alliance Biblique du Tchad, 2006, 2010.