JEJU KƏ́ NGŌN̄ SIRAK 20
20
Ger̄ kum mbang kə́ yā kɔrə̄ń najə̄ ō, kə́ yā ndiń ta mbóo ō
1Kɔ̄l̄ kə́ kanjə̄ kumən i nuú ō,
kəndi ta mbóó kə́ ɔjə kadə̄ deē ngáā i nuú ō.
2Kɔ̄l̄ kə deé i sóótə́ tɔȳ ngɔ̄m̄ wūn̄g kem tə́.
3Deē ń ger̄ yá̰a̰ rāan gə̄ kə́ gōtə́ aĺ ní, a teē kum yá̰á̰ kə́ tōr̄ tə́ kanjə̄ kadə̄ yá̰a̰ rāan.
4Nge ndigə rāā yá̰á̰ kə́ gōtə́ dɔ gúú tə́,
to i tītə̄ áji mbang kə́ ngur mbutə ngōmandə rāan ngá̰ý beē.
5De kógə̄ḿ ndi kə tan kə́ mbóó, anī de gə̄ rāānən̄ nge kum kedə̄ tə́ ō,
de kógə̄ḿ kə́ rang ɔr̄ najə̄ waa ngá̰ý, anī nēl̄ de gə̄ seneé aĺ ngá̰ý ō.
6De kógə̄ḿ ndi kə tan kə́ mbóó, i tām̄ ger̄ kə́ ni ger̄ najə̄ kə́ yā tūr̄ kəda aĺ tə́.
Ba de kógə̄ḿ kə́ rang ndi kə tan kə́ mbóó, i tām̄ ni ger̄ kum mbang kə́ majə kə́ yā kɔrə̄ń najə̄.
7Nge kum kedə̄ ndi kə tan kə́ mbóó, bátə́ kadə̄ kum mbang kə́ majə kɔrə̄ń najə̄ asəń.
Banī nge kɔjə rɔ̄n ō, de kə́ mbóo ō, əya̰n̄ kum mbang kə́ majə kɔrə̄ń najə̄ adə̄ mān̄.
8Nge bəya̰ kum tām̄ i de kə́ nel̄ de gə̄ seneé aĺ ngá̰ý ō,
deē ń sāā kəndā gúu dɔ de gə̄ tə́ kadə̄ ndigən̄ najə̄ yān sɔɔ̄ń lo kəla yān kə́ bo ní, de gə̄ a im̄nən̄ ō.
Yá̰á̰ kə́ ton̄ tītə̄ naā aĺ gə̄
9Kə́rēý gə̄ anī deē a ənge yá̰á̰ kə́ majə tām̄ yān tə́ i tū yá̰á̰ kə́ majə aĺ ń teē dɔn tə́ ní tə́.
Ba yá̰á̰ kə́ deē əndā kemən dɔ tə́ alé tá reē ənge, asə téĺ yá̰á̰ kə́ a rāā majə aĺ seneé.
10Yá̰á̰ kə́rēý gə̄ ń ādə̄ kadə̄ karī tə́ ní, ā ə́ngé yá̰á̰ gírí alé.
Ba kə́rēý gə̄ ń ādə̄ kadə̄ karī tə́ ní, ā ə́ngé yá̰á̰ gírí kadə̄ tɔȳ dɔ nja jōó.
11Kə́rēý gə̄ anī kɔsə go̰n asə tél kə deé kə̄ nang tə́ ō,
kə́rēý gə̄ anī gō rɔ̄sɔl̄ ń əlan̄ dɔ deē tə́ ní, deē ɔr̄ dɔn dɔɔ́ ō.
12De kógə̄ḿ mang yá̰á̰ ngá̰ý kə nar kə́ sḛ́ý beé.
Ba ni tél gātəń kə gātə̄ ń mangəń ní nja sīrí.
13Nge kum kedə̄ ger̄ rāā kadə̄ deē tárən kə najə̄ kɔrə̄n kə́ sḛ́ý beē.
Banī yá̰á̰ kə́ rāā kə tárá yā de kə́ sapə i yá̰á̰ kə́ ndāńg karī.
14Yá̰á̰ ń de kə́ ger̄ yá̰a̰ aĺ adī karī ní, a teēī yá̰á̰ kógə̄ḿ alé.
Tām̄ yá̰á̰ ń ni gḛy kənge gírí ní, tɔȳ nge ń adī ní.
15Ni adī yá̰a̰ i sḛ́ý beē, ba kɔ̄l̄ seí ngá̰ý dɔ tə́ ō,
teē tan ngá̰ý dɔí tə́ ɔrə̄ń najə̄ tītə̄ kɔdə̄ mbēr̄ beé ō.
Ni adə̄ yá̰a̰ lo tə̄nā tə́ ɓōólaā, ba bírí anī dəje kə̄rān:
de kə́ beé i de kə́ majə ka̰a̰n aĺ bátə́.
16De kə́ sapə əda na: Madə̄ taḿ gətóo ō,
de kə́ ger̄ majə kə́ m̄-rāā seneé gətóo ō.
Ngé kəsa yá̰a̰ yāḿ gə̄ i ngé ger̄ majə kə́ deē rāā sedə́ aĺ gə̄.
17De gə̄ mbóon̄ seneé nja i ngá̰ý!
Deē lōō kɔr̄ najə̄ kanjə̄ gíŕ yá̰a̰
18Lo kə́ rəte kə deé i sóótə́, tɔȳ najə̄ kə́ kəda pát.
Ngé kem ndul gə̄ a əsōn̄ láẃ ngá̰ý i tītə̄ ń nuū ō.
19De kə́ yá̰a̰ rāan tītə̄ yā gotə de gə̄ alé, to i tītə̄ najə̄ kə́ kɔr̄ kə kum mbangneé aĺ ń
de kə́ mbóo gə̄ a ɔrə̄n̄ ngándáńg ní beē.
20Deē a ndigə gōsə̄ najə̄ kə́ ta de kə́ sapə tə́ alé,
tāḿ a əda i kə kum mbang kə́ majə kədań aĺ tə́ tá dejə.
21Ndoō kə́ ngá̰ý ɔgə̄ de kə́rēý gə̄ rāā majaĺ,
adə̄ asən̄ kəto ɓīī kanjə̄ kadə̄ kemdə́ rāādə́.
22De kə́rēý gə̄ aw̄n̄ nuú, tḭ̄ḭ̄n̄ ta rɔ̄də́ najə̄ ɓōĺ kə́ ɓōlə́n̄ gidə deē tə́,
adə̄ tḭ̄ḭ̄n̄ ta rɔ̄də́ ta kum de kə́ mbóó tə́.
23De kə́rēý gə̄ aw̄n̄ nuú, ənīn̄ ndūdə́ adə̄n̄ madə̄də́ tām̄ ɓōĺ kə́ ɓōlə́n̄ gidən tə́,
adə̄ madə̄də́ ní tél i madə̄ ba̰ā̰də́ kanjə̄ kumən.
24Sor̄ i tītə̄ yá̰á̰ kə́ yḛr kə́ to rɔ̄sɔl̄ kə́ to rɔ̄ deē tə́ beē.
De kə́ ɓodə gə̄ a ənīn̄ gír kəlā ndo̰də́ tə́ i kə dɔ ndɔ̄ gə̄.
25Nge ɓogə i sóótə́ tɔȳ de kə́ nge sor̄ ngándáńg,
banī nin̄ jōó mbak ní tadə́ a tḭ̄ḭ̄.
26Sor̄ kə́ əhɔ deē ta tə́ rāā adə̄ nge sor̄ tḭ̄ḭ̄ ta hɔ̄r̄mō̰ yān kɔ̄ɔ́ ō,
rɔ̄n a sɔlə̄n i ngándáńg ō.
Kāgə̄ najə̄ gə̄ kə́ dɔ yá̰a̰ yā nge kum kedə̄ tə́ ō, yá̰á̰ kə́ kadə̄ ni rāā tə́ ō
27Nge kum kedə̄ rāā yá̰á̰ sḛ́ý beē ɓáa de gə̄ ndigənən̄ ō,
de kə́ ngáā ní nel̄ de kə́ bo gə̄ seneé ngá̰ý ō.
28Deē ń i bəra kɔsə ní, dūbə̄ kōō yān i ngá̰ý ō,
deē ń nel̄ de kə́ bo gə̄ seneé ní, asə kadə̄ māȳn̄ rɔ̄də́ dɔ yá̰a̰ rāan gə̄ kə́ gōtə́ aĺ tə́ ō.
29Yá̰a̰ ndējə̄ gə̄ ō, kadə̄ karī gə̄ ō, rāā ngé kum kedə̄ gə̄ adə̄ kumdə́ a̰a̰ lo aĺ ō,
to i tītə̄ bendə beé tadə́ tə́, adə̄ ɔgə̄də́ kɔ̄l̄ ō.
30Kum kedə̄ kə́ to lo ɓɔ̄ɔ̄ tə́ ō, yá̰á̰ kə́ gātən i ngá̰ý kə́ ɓɔ̄ɔ̄ gíŕ nángāá ō ní,
nin̄ jōó mbak deē a rāań i rí?
31De kə́ ɓɔ̄ɔ̄ dɔ mbóo yān adə̄ ngan̄g i sóótə́
tɔȳ nge ɓɔ̄ɔ̄ dɔ kum kedə̄ yān.
Currently Selected:
JEJU KƏ́ NGŌN̄ SIRAK 20: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
JEJU KƏ́ NGŌN̄ SIRAK 20
20
Ger̄ kum mbang kə́ yā kɔrə̄ń najə̄ ō, kə́ yā ndiń ta mbóo ō
1Kɔ̄l̄ kə́ kanjə̄ kumən i nuú ō,
kəndi ta mbóó kə́ ɔjə kadə̄ deē ngáā i nuú ō.
2Kɔ̄l̄ kə deé i sóótə́ tɔȳ ngɔ̄m̄ wūn̄g kem tə́.
3Deē ń ger̄ yá̰a̰ rāan gə̄ kə́ gōtə́ aĺ ní, a teē kum yá̰á̰ kə́ tōr̄ tə́ kanjə̄ kadə̄ yá̰a̰ rāan.
4Nge ndigə rāā yá̰á̰ kə́ gōtə́ dɔ gúú tə́,
to i tītə̄ áji mbang kə́ ngur mbutə ngōmandə rāan ngá̰ý beē.
5De kógə̄ḿ ndi kə tan kə́ mbóó, anī de gə̄ rāānən̄ nge kum kedə̄ tə́ ō,
de kógə̄ḿ kə́ rang ɔr̄ najə̄ waa ngá̰ý, anī nēl̄ de gə̄ seneé aĺ ngá̰ý ō.
6De kógə̄ḿ ndi kə tan kə́ mbóó, i tām̄ ger̄ kə́ ni ger̄ najə̄ kə́ yā tūr̄ kəda aĺ tə́.
Ba de kógə̄ḿ kə́ rang ndi kə tan kə́ mbóó, i tām̄ ni ger̄ kum mbang kə́ majə kə́ yā kɔrə̄ń najə̄.
7Nge kum kedə̄ ndi kə tan kə́ mbóó, bátə́ kadə̄ kum mbang kə́ majə kɔrə̄ń najə̄ asəń.
Banī nge kɔjə rɔ̄n ō, de kə́ mbóo ō, əya̰n̄ kum mbang kə́ majə kɔrə̄ń najə̄ adə̄ mān̄.
8Nge bəya̰ kum tām̄ i de kə́ nel̄ de gə̄ seneé aĺ ngá̰ý ō,
deē ń sāā kəndā gúu dɔ de gə̄ tə́ kadə̄ ndigən̄ najə̄ yān sɔɔ̄ń lo kəla yān kə́ bo ní, de gə̄ a im̄nən̄ ō.
Yá̰á̰ kə́ ton̄ tītə̄ naā aĺ gə̄
9Kə́rēý gə̄ anī deē a ənge yá̰á̰ kə́ majə tām̄ yān tə́ i tū yá̰á̰ kə́ majə aĺ ń teē dɔn tə́ ní tə́.
Ba yá̰á̰ kə́ deē əndā kemən dɔ tə́ alé tá reē ənge, asə téĺ yá̰á̰ kə́ a rāā majə aĺ seneé.
10Yá̰á̰ kə́rēý gə̄ ń ādə̄ kadə̄ karī tə́ ní, ā ə́ngé yá̰á̰ gírí alé.
Ba kə́rēý gə̄ ń ādə̄ kadə̄ karī tə́ ní, ā ə́ngé yá̰á̰ gírí kadə̄ tɔȳ dɔ nja jōó.
11Kə́rēý gə̄ anī kɔsə go̰n asə tél kə deé kə̄ nang tə́ ō,
kə́rēý gə̄ anī gō rɔ̄sɔl̄ ń əlan̄ dɔ deē tə́ ní, deē ɔr̄ dɔn dɔɔ́ ō.
12De kógə̄ḿ mang yá̰á̰ ngá̰ý kə nar kə́ sḛ́ý beé.
Ba ni tél gātəń kə gātə̄ ń mangəń ní nja sīrí.
13Nge kum kedə̄ ger̄ rāā kadə̄ deē tárən kə najə̄ kɔrə̄n kə́ sḛ́ý beē.
Banī yá̰á̰ kə́ rāā kə tárá yā de kə́ sapə i yá̰á̰ kə́ ndāńg karī.
14Yá̰á̰ ń de kə́ ger̄ yá̰a̰ aĺ adī karī ní, a teēī yá̰á̰ kógə̄ḿ alé.
Tām̄ yá̰á̰ ń ni gḛy kənge gírí ní, tɔȳ nge ń adī ní.
15Ni adī yá̰a̰ i sḛ́ý beē, ba kɔ̄l̄ seí ngá̰ý dɔ tə́ ō,
teē tan ngá̰ý dɔí tə́ ɔrə̄ń najə̄ tītə̄ kɔdə̄ mbēr̄ beé ō.
Ni adə̄ yá̰a̰ lo tə̄nā tə́ ɓōólaā, ba bírí anī dəje kə̄rān:
de kə́ beé i de kə́ majə ka̰a̰n aĺ bátə́.
16De kə́ sapə əda na: Madə̄ taḿ gətóo ō,
de kə́ ger̄ majə kə́ m̄-rāā seneé gətóo ō.
Ngé kəsa yá̰a̰ yāḿ gə̄ i ngé ger̄ majə kə́ deē rāā sedə́ aĺ gə̄.
17De gə̄ mbóon̄ seneé nja i ngá̰ý!
Deē lōō kɔr̄ najə̄ kanjə̄ gíŕ yá̰a̰
18Lo kə́ rəte kə deé i sóótə́, tɔȳ najə̄ kə́ kəda pát.
Ngé kem ndul gə̄ a əsōn̄ láẃ ngá̰ý i tītə̄ ń nuū ō.
19De kə́ yá̰a̰ rāan tītə̄ yā gotə de gə̄ alé, to i tītə̄ najə̄ kə́ kɔr̄ kə kum mbangneé aĺ ń
de kə́ mbóo gə̄ a ɔrə̄n̄ ngándáńg ní beē.
20Deē a ndigə gōsə̄ najə̄ kə́ ta de kə́ sapə tə́ alé,
tāḿ a əda i kə kum mbang kə́ majə kədań aĺ tə́ tá dejə.
21Ndoō kə́ ngá̰ý ɔgə̄ de kə́rēý gə̄ rāā majaĺ,
adə̄ asən̄ kəto ɓīī kanjə̄ kadə̄ kemdə́ rāādə́.
22De kə́rēý gə̄ aw̄n̄ nuú, tḭ̄ḭ̄n̄ ta rɔ̄də́ najə̄ ɓōĺ kə́ ɓōlə́n̄ gidə deē tə́,
adə̄ tḭ̄ḭ̄n̄ ta rɔ̄də́ ta kum de kə́ mbóó tə́.
23De kə́rēý gə̄ aw̄n̄ nuú, ənīn̄ ndūdə́ adə̄n̄ madə̄də́ tām̄ ɓōĺ kə́ ɓōlə́n̄ gidən tə́,
adə̄ madə̄də́ ní tél i madə̄ ba̰ā̰də́ kanjə̄ kumən.
24Sor̄ i tītə̄ yá̰á̰ kə́ yḛr kə́ to rɔ̄sɔl̄ kə́ to rɔ̄ deē tə́ beē.
De kə́ ɓodə gə̄ a ənīn̄ gír kəlā ndo̰də́ tə́ i kə dɔ ndɔ̄ gə̄.
25Nge ɓogə i sóótə́ tɔȳ de kə́ nge sor̄ ngándáńg,
banī nin̄ jōó mbak ní tadə́ a tḭ̄ḭ̄.
26Sor̄ kə́ əhɔ deē ta tə́ rāā adə̄ nge sor̄ tḭ̄ḭ̄ ta hɔ̄r̄mō̰ yān kɔ̄ɔ́ ō,
rɔ̄n a sɔlə̄n i ngándáńg ō.
Kāgə̄ najə̄ gə̄ kə́ dɔ yá̰a̰ yā nge kum kedə̄ tə́ ō, yá̰á̰ kə́ kadə̄ ni rāā tə́ ō
27Nge kum kedə̄ rāā yá̰á̰ sḛ́ý beē ɓáa de gə̄ ndigənən̄ ō,
de kə́ ngáā ní nel̄ de kə́ bo gə̄ seneé ngá̰ý ō.
28Deē ń i bəra kɔsə ní, dūbə̄ kōō yān i ngá̰ý ō,
deē ń nel̄ de kə́ bo gə̄ seneé ní, asə kadə̄ māȳn̄ rɔ̄də́ dɔ yá̰a̰ rāan gə̄ kə́ gōtə́ aĺ tə́ ō.
29Yá̰a̰ ndējə̄ gə̄ ō, kadə̄ karī gə̄ ō, rāā ngé kum kedə̄ gə̄ adə̄ kumdə́ a̰a̰ lo aĺ ō,
to i tītə̄ bendə beé tadə́ tə́, adə̄ ɔgə̄də́ kɔ̄l̄ ō.
30Kum kedə̄ kə́ to lo ɓɔ̄ɔ̄ tə́ ō, yá̰á̰ kə́ gātən i ngá̰ý kə́ ɓɔ̄ɔ̄ gíŕ nángāá ō ní,
nin̄ jōó mbak deē a rāań i rí?
31De kə́ ɓɔ̄ɔ̄ dɔ mbóo yān adə̄ ngan̄g i sóótə́
tɔȳ nge ɓɔ̄ɔ̄ dɔ kum kedə̄ yān.
Bibəl ta Sar̄ © L'Alliance Biblique du Tchad, 2006, 2010.