JEJU KƏ́ NGŌN̄ SIRAK 19
19
1Nge rāā kəla kə́ nge ka̰ȳ yá̰a̰ a ənge yá̰a̰ alé.
Nge kidə tan gíŕ yá̰á̰ kə́ sḛ́ý beē tə́ a téĺ sḛ́ý sḛ́ý yā kəsō.
2De kə́ kur̄ dɔdə́ to nuú gə̄ ní, kasə nduú ō, dəyá̰ gə̄ ō, rāān̄də́ adə̄ ndúmə̄n̄.
Nge njə̄rā kə ájə́ba gēé a ɓōĺ gidə yá̰a̰ aĺ i kum kə́ kété kété.
3Háĺ kə́ tītə̄ ń nuū a tɔ̄lən ō,
kəde gə̄ a əsan̄ nīnə́n kə́ ndum ō.
Yá̰á̰ kə́ majə aĺ gə̄ ń a utə̄n̄ gō najə̄ waa ní
4Nge taā kem najə̄ láẃ i de kə́ gíŕ yá̰a̰ aw̄ sa̰y alé.
Nge rāā majaĺ rāā i yá̰á̰ kə́ gōtə́ aĺ kə rɔ̄n nəkɔ́.
5Deē ń nelə̄n rāā yá̰á̰ kə́ majə aĺ ní, a gāngə̄n̄ sarya dɔn tə́.
6Ba deē ń najə̄ kə́ kɔr̄ ngá̰ý nelə̄n aĺ ngá̰ý ní, a teē jī yá̰á̰ kə́ majə aĺ tə́ kɔ̄ɔ́.
7Yá̰á̰ ń deē əda ní ə́da kə̄ kété aĺ bátə́,
anī ā ī-tḭ̄ḭ̄ ta yá̰á̰ kógə̄ḿ tū tə́ alé.
8Ə́da najə̄ yā madə̄ taí, aké yā madə̄ ba̰ā̰í kə̄ kété alé.
Ə́dá yá̰á̰ kógə̄ḿ alé, banī i lo ń ré kəda najə̄ alé i yá̰á̰ kə́ a rāā kadə̄ ī-tél de kə́ kemií i gō yān tə́ ní tá.
9Na sōgə́ oō gotə anī kemən taā yāí tṵ aĺ ō,
ənge ta róbə anī ɔjiī kadə̄ kemən nelə̄n seí aĺ ngá̰ý ō.
10Ōō gotə najə̄ anī, ī-ngɔ̄m̄ tām̄ yāí tə́ bátə́ kadə̄ óyń!
Ī-lōō ɓōĺ na najə̄ ní a rāā kadə̄ kemií ndūw̄ alé!
11Yá̰á̰ kə́ tōr̄ gə̄ ń a ənge de kə́ mbóó ní, sɔɔ̄ń i najə̄ kɔrə̄n.
I tītə̄ dəyá̰ kə́ a rāā kem yā kojə beé.
12Najə̄ kə́ kem de kə́ sapə tə́
to i tītə̄ kum gərā kə́ ɔsə bingə̄n beé.
Ndəle gír najə̄ kə́ deē əda
13Ī-dəje madə̄ taí najə̄, na majalánī ni rāā yá̰á̰ kógə̄ḿ alé.
Ba ré rāā rɔ̄kum anī, a tél yā rāā gogə́ tṵ alé.
14Ī-dəje madə̄ ɓēí najə̄, na majə aĺ anī əda najə̄ ní alé.
Ba ré əda rɔ̄kum anī, a tél yā kəda gogə́ tṵ alé.
15Ī-dəje madə̄ taí najə̄, tām̄ de gə̄ a ədan̄ i najə̄ kə́ rɔ̄kum aĺ gə̄ dɔ madə̄də́ gə̄ tə́ dejə.
Ī-lōō taā kem najə̄ malang ń deē ədaī ní.
16De kógə̄ḿ əda najə̄ kə́ gōtə́ aĺ, ba i kanjə̄ gír̄ kə́ majə aĺ kemən tə́:
i náā n əda najə̄ kə́ majə aĺ nja kógə̄ḿ aĺ ɓáý ní?
17Ī-dəje madə̄ ɓēí najə̄ pá tá ī-kɔ̄l̄ seneé ɓáý ō,
ə́ya̰ ādə̄ ndū najə̄ yā Nge Ndi dɔ rā̰ tə́ rāā yá̰a̰ yān ō.#19.17 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə gidə i sɔ́sɔ́ ō, ndōhó ō gətóo tū tə́.
Kum kedə̄ kə́ rɔ̄kum ō, kə́ rɔ̄kum aĺ ō
20Kum kedə̄ kə́ rɔ̄kum i ɓōĺ ndíĺ Kɔ́ɔ̄ɓē.
Rāā yá̰á̰ kə́ ndū najə̄ əda i yá̰á̰ kə́ i kə̄ tū kum kedə̄ gə̄ tə́ malang.#19.20 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə jōó gidə i kógə̄ḿ gətóo tū tə́.
22Ger̄ yá̰á̰ kə́ majə aĺ i kum kedə̄ alé.
Kun kɔjə̄ yā ngé rāā majaĺ gə̄ rāań yá̰a̰, i kəndā kum kedə̄ dɔ rɔ̄ tə́ alé.
23Jī ger̄ yá̰á̰ kə́ majə aĺ ngá̰ý kógə̄ḿ to nuú ō,
deē ń kum kedə̄ yān gətóó ní i de kə́ mbóo ō.
24De kə́ ger̄ yá̰a̰ yān i ngá̰ý alé ba ɓōĺ ndíĺ Kɔ́ɔ̄ɓē i sóótə́,
tɔȳ de kə́ jīn ger̄ yá̰a̰ ngá̰ý ba idə tan gír ndū najə̄ yā Kɔ́ɔ̄ɓē tə́.
25Jī ger̄ yá̰á̰ kə́ ngá̰ý al̄naā kə́ asə rāā kadə̄ deē rāā yá̰á̰ kə́ gōtə́ aĺ i nuú ō,
de kə́ rāā yá̰á̰ kə́ gōtə́ aĺ yā kɔjəń kadə̄ yá̰á̰ ní i yá̰á̰ kə́ sɔɔ̄n i nuū ō.
26De kə́ gír̄ kə́ kemən tə́ majə aĺ ngá̰ý njə̄rā a əla i dɔn nang tə́, tām̄ najə̄ kə́ tōr̄ wurən tə́,
banī gól̄ lo i ngá̰ý kemən tə́.
27Ni ɓɔ̄ɔ̄ ta kumən kɔ̄ɔ́, ba rāā tītə̄ kə́ ni i mbíkī beé.
Ba dan ń de kə́ usən dɔ yá̰a̰ rāan tə́ gətóo anī, ni əndā gúu dɔí tə́.
28De kógə̄ḿ mbātə́ rāā majaĺ i tām̄ tɔ́gən kə́ gətóó tə́,
ba ré ənge ta róbə anī, a rāā yá̰á̰ kə́ majə aĺ i kə̄ ta jī tə́ nuū.
29Deē a ger̄ dəngam i ta kumən tə́ ō,
deē a ger̄ de kə́ ngáā i ta kumən tə́ ō.
30Kūbə̄ kṵṵ̄ deē ō, kəgō kə́ tān tə́ ō,
pā njə̄rān ō, i yá̰á̰ kə́ a ɔjə hálən kə̄ ndágá.
Currently Selected:
JEJU KƏ́ NGŌN̄ SIRAK 19: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
JEJU KƏ́ NGŌN̄ SIRAK 19
19
1Nge rāā kəla kə́ nge ka̰ȳ yá̰a̰ a ənge yá̰a̰ alé.
Nge kidə tan gíŕ yá̰á̰ kə́ sḛ́ý beē tə́ a téĺ sḛ́ý sḛ́ý yā kəsō.
2De kə́ kur̄ dɔdə́ to nuú gə̄ ní, kasə nduú ō, dəyá̰ gə̄ ō, rāān̄də́ adə̄ ndúmə̄n̄.
Nge njə̄rā kə ájə́ba gēé a ɓōĺ gidə yá̰a̰ aĺ i kum kə́ kété kété.
3Háĺ kə́ tītə̄ ń nuū a tɔ̄lən ō,
kəde gə̄ a əsan̄ nīnə́n kə́ ndum ō.
Yá̰á̰ kə́ majə aĺ gə̄ ń a utə̄n̄ gō najə̄ waa ní
4Nge taā kem najə̄ láẃ i de kə́ gíŕ yá̰a̰ aw̄ sa̰y alé.
Nge rāā majaĺ rāā i yá̰á̰ kə́ gōtə́ aĺ kə rɔ̄n nəkɔ́.
5Deē ń nelə̄n rāā yá̰á̰ kə́ majə aĺ ní, a gāngə̄n̄ sarya dɔn tə́.
6Ba deē ń najə̄ kə́ kɔr̄ ngá̰ý nelə̄n aĺ ngá̰ý ní, a teē jī yá̰á̰ kə́ majə aĺ tə́ kɔ̄ɔ́.
7Yá̰á̰ ń deē əda ní ə́da kə̄ kété aĺ bátə́,
anī ā ī-tḭ̄ḭ̄ ta yá̰á̰ kógə̄ḿ tū tə́ alé.
8Ə́da najə̄ yā madə̄ taí, aké yā madə̄ ba̰ā̰í kə̄ kété alé.
Ə́dá yá̰á̰ kógə̄ḿ alé, banī i lo ń ré kəda najə̄ alé i yá̰á̰ kə́ a rāā kadə̄ ī-tél de kə́ kemií i gō yān tə́ ní tá.
9Na sōgə́ oō gotə anī kemən taā yāí tṵ aĺ ō,
ənge ta róbə anī ɔjiī kadə̄ kemən nelə̄n seí aĺ ngá̰ý ō.
10Ōō gotə najə̄ anī, ī-ngɔ̄m̄ tām̄ yāí tə́ bátə́ kadə̄ óyń!
Ī-lōō ɓōĺ na najə̄ ní a rāā kadə̄ kemií ndūw̄ alé!
11Yá̰á̰ kə́ tōr̄ gə̄ ń a ənge de kə́ mbóó ní, sɔɔ̄ń i najə̄ kɔrə̄n.
I tītə̄ dəyá̰ kə́ a rāā kem yā kojə beé.
12Najə̄ kə́ kem de kə́ sapə tə́
to i tītə̄ kum gərā kə́ ɔsə bingə̄n beé.
Ndəle gír najə̄ kə́ deē əda
13Ī-dəje madə̄ taí najə̄, na majalánī ni rāā yá̰á̰ kógə̄ḿ alé.
Ba ré rāā rɔ̄kum anī, a tél yā rāā gogə́ tṵ alé.
14Ī-dəje madə̄ ɓēí najə̄, na majə aĺ anī əda najə̄ ní alé.
Ba ré əda rɔ̄kum anī, a tél yā kəda gogə́ tṵ alé.
15Ī-dəje madə̄ taí najə̄, tām̄ de gə̄ a ədan̄ i najə̄ kə́ rɔ̄kum aĺ gə̄ dɔ madə̄də́ gə̄ tə́ dejə.
Ī-lōō taā kem najə̄ malang ń deē ədaī ní.
16De kógə̄ḿ əda najə̄ kə́ gōtə́ aĺ, ba i kanjə̄ gír̄ kə́ majə aĺ kemən tə́:
i náā n əda najə̄ kə́ majə aĺ nja kógə̄ḿ aĺ ɓáý ní?
17Ī-dəje madə̄ ɓēí najə̄ pá tá ī-kɔ̄l̄ seneé ɓáý ō,
ə́ya̰ ādə̄ ndū najə̄ yā Nge Ndi dɔ rā̰ tə́ rāā yá̰a̰ yān ō.#19.17 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə gidə i sɔ́sɔ́ ō, ndōhó ō gətóo tū tə́.
Kum kedə̄ kə́ rɔ̄kum ō, kə́ rɔ̄kum aĺ ō
20Kum kedə̄ kə́ rɔ̄kum i ɓōĺ ndíĺ Kɔ́ɔ̄ɓē.
Rāā yá̰á̰ kə́ ndū najə̄ əda i yá̰á̰ kə́ i kə̄ tū kum kedə̄ gə̄ tə́ malang.#19.20 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə jōó gidə i kógə̄ḿ gətóo tū tə́.
22Ger̄ yá̰á̰ kə́ majə aĺ i kum kedə̄ alé.
Kun kɔjə̄ yā ngé rāā majaĺ gə̄ rāań yá̰a̰, i kəndā kum kedə̄ dɔ rɔ̄ tə́ alé.
23Jī ger̄ yá̰á̰ kə́ majə aĺ ngá̰ý kógə̄ḿ to nuú ō,
deē ń kum kedə̄ yān gətóó ní i de kə́ mbóo ō.
24De kə́ ger̄ yá̰a̰ yān i ngá̰ý alé ba ɓōĺ ndíĺ Kɔ́ɔ̄ɓē i sóótə́,
tɔȳ de kə́ jīn ger̄ yá̰a̰ ngá̰ý ba idə tan gír ndū najə̄ yā Kɔ́ɔ̄ɓē tə́.
25Jī ger̄ yá̰á̰ kə́ ngá̰ý al̄naā kə́ asə rāā kadə̄ deē rāā yá̰á̰ kə́ gōtə́ aĺ i nuú ō,
de kə́ rāā yá̰á̰ kə́ gōtə́ aĺ yā kɔjəń kadə̄ yá̰á̰ ní i yá̰á̰ kə́ sɔɔ̄n i nuū ō.
26De kə́ gír̄ kə́ kemən tə́ majə aĺ ngá̰ý njə̄rā a əla i dɔn nang tə́, tām̄ najə̄ kə́ tōr̄ wurən tə́,
banī gól̄ lo i ngá̰ý kemən tə́.
27Ni ɓɔ̄ɔ̄ ta kumən kɔ̄ɔ́, ba rāā tītə̄ kə́ ni i mbíkī beé.
Ba dan ń de kə́ usən dɔ yá̰a̰ rāan tə́ gətóo anī, ni əndā gúu dɔí tə́.
28De kógə̄ḿ mbātə́ rāā majaĺ i tām̄ tɔ́gən kə́ gətóó tə́,
ba ré ənge ta róbə anī, a rāā yá̰á̰ kə́ majə aĺ i kə̄ ta jī tə́ nuū.
29Deē a ger̄ dəngam i ta kumən tə́ ō,
deē a ger̄ de kə́ ngáā i ta kumən tə́ ō.
30Kūbə̄ kṵṵ̄ deē ō, kəgō kə́ tān tə́ ō,
pā njə̄rān ō, i yá̰á̰ kə́ a ɔjə hálən kə̄ ndágá.
Bibəl ta Sar̄ © L'Alliance Biblique du Tchad, 2006, 2010.