JEJU KƏ́ NGŌN̄ SIRAK 10
10
1Nge gān̄g sarya kə́ kumən edə̄ ndóō gír deē yān gə̄ yá̰a̰ adə̄ gerə̄n̄.
Deē ń kur̄ dɔn to nuú ní, kṵ ɓē yān ndi majə.
2Nge gān̄g sarya yā de gə̄ to i tītə̄ ngé kəla kə́ bo yān gə̄ beé.
De kə́ kem ɓēé gə̄ ton̄ i tītə̄ nge kṵ ɓē yādə́ beé.
3Mban̄g kə́ ger̄ yá̰a̰ aĺ ní, gír deē yān gə̄ a nujən̄ sák sák kɔ̄ɔ́.
Ngār kə́ kur̄ dɔdə́ to nuú gə̄ rāān̄ ɓē adə̄ majə.
4Kṵ ɓē kə́ dɔ nang tə́ i kem jī Kɔ́ɔ̄ɓē tə́.
Deē ń majə kadə̄ i ni n ṵṵ ɓē ní, Kɔ́ɔ̄ɓē a əla seneé i kum mbang kə́ majə tə́.
5I Kɔ́ɔ̄ɓē n i nge rāā kadə̄ deē teē yá̰á̰ ní.
Ni a rāā kadə̄ kɔsə go̰n yān i dɔ nge ndang makətūbə̄ tə́.
Kɔjə rɔ̄ ō, kəndā tɔ́gə ta róbə́ tə́ ō
6Ī-lōō kəhɔ madí kemií tə́ tām̄ yā yá̰á̰ kógə̄ḿ kə́ gōtə́ aĺ kə́ ni rāā seí tə́.
Ī-lōō kəndā tɔ́gí ta róbə́ tə́ rāań yá̰á̰ kógə̄ḿ.
7Kɔjə rɔ̄ i yá̰á̰ kə́ majə aĺ ngá̰ý ta kum Kɔ́ɔ̄ɓē tə́ ō, ta kum de gə̄ tə́ ō.
Tām̄ yādə́ nin̄ tə́ jōó mbak ní, yá̰a̰ rāā kə́ gōtə́ aĺ i yá̰á̰ kə́ gōtə́ alé.
8Kṵ ɓē teē jī gír de kógə̄ḿ gə̄ tə́ aw̄ jī gír de kə́ rang gə̄ tə́,
i najə̄ yā yá̰a̰ rāā kə́ gōtə́ aĺ tə́ ō, kəndā tɔ́gə ta róbə́ tə́ ō, rāā ta nar tə́ tə́ ō.
9Nge ń ni i nán̄g ō bū ō ní, a ɔjə rɔ̄n i tām̄ rí tə́?
Tɔdɔ̄ dan ń ndiń kə kumneé gə̄gē ní, yedə̄ rosə kemən.
10Moy kə́ rāā deē dan i ngá̰ý i yá̰á̰ kə́ tɔ́sə̄ gātə̄ doktór.
Deē ń ɓōólaā ni i mban̄g ní, bírí a oy.
11Dan ń deē oy anī,
yá̰á̰ ń a ənge ní i kur̄ kə́ kagə nang tə́ gə̄ ō, i dā̰ kə́ bembeé gə̄ ō, i kəde gə̄ ō.
12Ta kəla gír kɔjə rɔ̄ yā deē i dan ń ɔr̄ rɔ̄n kɔ̄ɔ́ rɔ̄ Kɔ́ɔ̄ɓē tə́ ní,
i dan ń əsō wūn̄g ta nge kəndān tə́ ní.
13Ta kəla gír kɔjə rɔ̄ yā deē i rāā yá̰á̰ majaĺ.
Ba deē ń nay kə̄ lo rāā majaĺ tə́ ní, a rāā yā kadə̄ yá̰á̰ kə́ to yḛr kum gə̄ ton̄ ngá̰ý.
I tām̄ najə̄ ń toō tə́ n Kɔ́ɔ̄ɓē rāā adə̄ yá̰á̰ kə́ tōr̄ gə̄ rāān̄ ngé rāā majaĺ gə̄ ngá̰ý ní ō, ni nujə sedə́ sák sák kɔ̄ɔ́ ō ní.
14Kɔ́ɔ̄ɓē mbəre mban̄g gə̄ dɔ kōr̄ kāgə̄ mbang yādə́ gə̄ tə́ tə́nīdə́ kɔ̄ɔ́,
ba tə́ndā de kə́ dɔdə́ sɔl̄ gə̄ gotədə́ tə́.
15Kɔ́ɔ̄ɓē nujə gíŕ nápar de gə̄,
ba əndā ngé dɔ sɔl̄ gə̄ gotədə́ tə́.
16Kɔ́ɔ̄ɓē nujə gō nang yā gíŕ nápar de gə̄ malang kɔ̄ɔ́,
nujəń bátə́ ugə̄ gír gisə dɔ nang tə́.
17Ni ɔr̄də́ kɔ̄ɔ́ dan de gə̄ tə́, ba rāā adə̄ oyn̄.
Yá̰á̰ ń kadə̄ əgań kem de gə̄ dɔdə́ tə́ dɔ nang tə́ ní, ni nujəń kɔ̄ɔ́.
18Rāān̄ kɔjə rɔ̄ i tām̄ yā de gə̄ tə́ aĺ ō,
wūn̄g kə́ ngá̰ý i tām̄ yā ngé gə̄ ń ojən̄də́ ní tə́ aĺ ō.
19I gír kaa kə́ rá n majə rɔȳn ní? I gír kaa de gə̄.
I gír kaa kə́ rá n majə rɔȳn ní? I ngé gə̄ ń ɓōlə́n̄ ndíĺ Kɔ́ɔ̄ɓē ní.
I gír kaa kə́ rá n majə rɔȳn aĺ ní? I gír kaa de gə̄.
I gír kaa kə́ rá n majə rɔȳn aĺ ní?
I ngé gə̄ ń mbātə́n̄ rāā yá̰a̰ gə̄ ń Kɔ́ɔ̄ɓē ədadə́ kadə̄ rāān̄ ní.
20De gə̄ rɔȳn̄ ngār dan ngákṵ́ṵn gə̄ tə́ ō,
ngé gə̄ ń ɓōlə́n̄ ndíĺ Kɔ́ɔ̄ɓē ní, ngār rɔȳdə́ ō.#10.20 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə jōó gidə i kógə̄ḿ gətóo tū tə́.
22Jipə tél ō, tə̄rā ō, nge ndoō ō ní,
yá̰a̰ kənda kadə yādə́ i ɓōĺ ndíĺ Kɔ́ɔ̄ɓē.
23Tájə̄ nge ndoō kə́ kur̄ dɔn to i yá̰á̰ kə́ gōtə́ aĺ ō,
kɔsə go̰n nge rāā majaĺ i yá̰á̰ kə́ majə aĺ ō.
24Ɔsən̄ go̰n de kə́ bo ō, nge gān̄g sarya ō, ngār ō.
Banī de kógə̄ḿ kə́ dandə́ tə́ kə́ bo tɔȳ nge ɓōĺ ndíĺ Kɔ́ɔ̄ɓē gətóo.
25Ɓəlo kə́ kumən edə̄ a ənge de gə̄ kə́ nin̄ i kɔ́ɔ̄ rɔ̄də́ gə̄ kadə̄ rāān̄ kəla adə̄nən̄,
ba de kə́ ngáā a ənge yá̰á̰ kə́ yā kəda dɔ tə́ alé.
Deē ń majə kadə̄ rɔȳnən̄ ní
26Dan ń ā ī-rāā kəla yāí anī, ī-lōō rāā tītə̄ kə́ ḭ̄ i nge kum kedə̄ beé.
Ī-lōō kɔsə rɔ̄í kə̄ dɔɔ́ kum mbang ń nar gətóon̄ jīí tə́ ní.
27Deē ń rāā kəla ō ənge yá̰á̰ ngá̰ý adə̄ mān̄ dɔ ō ní, ni i sóótə́
tɔȳ nge kɔsə rɔ̄n kə̄ dɔɔ́ ba yá̰a̰ kəsa yān gətóo.
28Ngōnə̄ḿ, ɔ́sə rɔ̄í kə̄ dɔɔ́ ādə̄ mān̄ dɔ majən alé,
ba ɔ́sə go̰nən ādə̄ asə loon tə́.
29Deē ń rāā majaĺ kə rɔ̄neé ní, i náā n a rāan de kə́ súūmú tə́ ní?
Deē ń əla rɔ̄sɔl̄ dɔ rɔ̄n nəkɔ́ tə́ ní, i náā n a ɔsə go̰nən ní?
30A rɔȳn̄ nge ndoō tām̄ yá̰a̰ ger̄ yān tə́ ō,
nge kənge yá̰a̰ tām̄ yá̰a̰ kənge yān tə́ ō.
31Ré rɔȳn̄ deē dan ndoōn tə́ anī, dan ń a ənge yá̰á̰ ní a rɔȳnən̄ kadə̄ mān̄ dɔ aĺ a?
Ba ré kídə̄n̄ deē dan kəngen yá̰á̰ tə́ anī, lo ń a əsō kum ndoō tə́ ní a kídə̄nən̄ kadə̄ mān̄ dɔ aĺ a?
Currently Selected:
JEJU KƏ́ NGŌN̄ SIRAK 10: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
JEJU KƏ́ NGŌN̄ SIRAK 10
10
1Nge gān̄g sarya kə́ kumən edə̄ ndóō gír deē yān gə̄ yá̰a̰ adə̄ gerə̄n̄.
Deē ń kur̄ dɔn to nuú ní, kṵ ɓē yān ndi majə.
2Nge gān̄g sarya yā de gə̄ to i tītə̄ ngé kəla kə́ bo yān gə̄ beé.
De kə́ kem ɓēé gə̄ ton̄ i tītə̄ nge kṵ ɓē yādə́ beé.
3Mban̄g kə́ ger̄ yá̰a̰ aĺ ní, gír deē yān gə̄ a nujən̄ sák sák kɔ̄ɔ́.
Ngār kə́ kur̄ dɔdə́ to nuú gə̄ rāān̄ ɓē adə̄ majə.
4Kṵ ɓē kə́ dɔ nang tə́ i kem jī Kɔ́ɔ̄ɓē tə́.
Deē ń majə kadə̄ i ni n ṵṵ ɓē ní, Kɔ́ɔ̄ɓē a əla seneé i kum mbang kə́ majə tə́.
5I Kɔ́ɔ̄ɓē n i nge rāā kadə̄ deē teē yá̰á̰ ní.
Ni a rāā kadə̄ kɔsə go̰n yān i dɔ nge ndang makətūbə̄ tə́.
Kɔjə rɔ̄ ō, kəndā tɔ́gə ta róbə́ tə́ ō
6Ī-lōō kəhɔ madí kemií tə́ tām̄ yā yá̰á̰ kógə̄ḿ kə́ gōtə́ aĺ kə́ ni rāā seí tə́.
Ī-lōō kəndā tɔ́gí ta róbə́ tə́ rāań yá̰á̰ kógə̄ḿ.
7Kɔjə rɔ̄ i yá̰á̰ kə́ majə aĺ ngá̰ý ta kum Kɔ́ɔ̄ɓē tə́ ō, ta kum de gə̄ tə́ ō.
Tām̄ yādə́ nin̄ tə́ jōó mbak ní, yá̰a̰ rāā kə́ gōtə́ aĺ i yá̰á̰ kə́ gōtə́ alé.
8Kṵ ɓē teē jī gír de kógə̄ḿ gə̄ tə́ aw̄ jī gír de kə́ rang gə̄ tə́,
i najə̄ yā yá̰a̰ rāā kə́ gōtə́ aĺ tə́ ō, kəndā tɔ́gə ta róbə́ tə́ ō, rāā ta nar tə́ tə́ ō.
9Nge ń ni i nán̄g ō bū ō ní, a ɔjə rɔ̄n i tām̄ rí tə́?
Tɔdɔ̄ dan ń ndiń kə kumneé gə̄gē ní, yedə̄ rosə kemən.
10Moy kə́ rāā deē dan i ngá̰ý i yá̰á̰ kə́ tɔ́sə̄ gātə̄ doktór.
Deē ń ɓōólaā ni i mban̄g ní, bírí a oy.
11Dan ń deē oy anī,
yá̰á̰ ń a ənge ní i kur̄ kə́ kagə nang tə́ gə̄ ō, i dā̰ kə́ bembeé gə̄ ō, i kəde gə̄ ō.
12Ta kəla gír kɔjə rɔ̄ yā deē i dan ń ɔr̄ rɔ̄n kɔ̄ɔ́ rɔ̄ Kɔ́ɔ̄ɓē tə́ ní,
i dan ń əsō wūn̄g ta nge kəndān tə́ ní.
13Ta kəla gír kɔjə rɔ̄ yā deē i rāā yá̰á̰ majaĺ.
Ba deē ń nay kə̄ lo rāā majaĺ tə́ ní, a rāā yā kadə̄ yá̰á̰ kə́ to yḛr kum gə̄ ton̄ ngá̰ý.
I tām̄ najə̄ ń toō tə́ n Kɔ́ɔ̄ɓē rāā adə̄ yá̰á̰ kə́ tōr̄ gə̄ rāān̄ ngé rāā majaĺ gə̄ ngá̰ý ní ō, ni nujə sedə́ sák sák kɔ̄ɔ́ ō ní.
14Kɔ́ɔ̄ɓē mbəre mban̄g gə̄ dɔ kōr̄ kāgə̄ mbang yādə́ gə̄ tə́ tə́nīdə́ kɔ̄ɔ́,
ba tə́ndā de kə́ dɔdə́ sɔl̄ gə̄ gotədə́ tə́.
15Kɔ́ɔ̄ɓē nujə gíŕ nápar de gə̄,
ba əndā ngé dɔ sɔl̄ gə̄ gotədə́ tə́.
16Kɔ́ɔ̄ɓē nujə gō nang yā gíŕ nápar de gə̄ malang kɔ̄ɔ́,
nujəń bátə́ ugə̄ gír gisə dɔ nang tə́.
17Ni ɔr̄də́ kɔ̄ɔ́ dan de gə̄ tə́, ba rāā adə̄ oyn̄.
Yá̰á̰ ń kadə̄ əgań kem de gə̄ dɔdə́ tə́ dɔ nang tə́ ní, ni nujəń kɔ̄ɔ́.
18Rāān̄ kɔjə rɔ̄ i tām̄ yā de gə̄ tə́ aĺ ō,
wūn̄g kə́ ngá̰ý i tām̄ yā ngé gə̄ ń ojən̄də́ ní tə́ aĺ ō.
19I gír kaa kə́ rá n majə rɔȳn ní? I gír kaa de gə̄.
I gír kaa kə́ rá n majə rɔȳn ní? I ngé gə̄ ń ɓōlə́n̄ ndíĺ Kɔ́ɔ̄ɓē ní.
I gír kaa kə́ rá n majə rɔȳn aĺ ní? I gír kaa de gə̄.
I gír kaa kə́ rá n majə rɔȳn aĺ ní?
I ngé gə̄ ń mbātə́n̄ rāā yá̰a̰ gə̄ ń Kɔ́ɔ̄ɓē ədadə́ kadə̄ rāān̄ ní.
20De gə̄ rɔȳn̄ ngār dan ngákṵ́ṵn gə̄ tə́ ō,
ngé gə̄ ń ɓōlə́n̄ ndíĺ Kɔ́ɔ̄ɓē ní, ngār rɔȳdə́ ō.#10.20 Kem makətūbə̄ kə́ ngá̰ý gə̄ tə́ ní, kəlān kə́ nge kṵ kutə jōó gidə i kógə̄ḿ gətóo tū tə́.
22Jipə tél ō, tə̄rā ō, nge ndoō ō ní,
yá̰a̰ kənda kadə yādə́ i ɓōĺ ndíĺ Kɔ́ɔ̄ɓē.
23Tájə̄ nge ndoō kə́ kur̄ dɔn to i yá̰á̰ kə́ gōtə́ aĺ ō,
kɔsə go̰n nge rāā majaĺ i yá̰á̰ kə́ majə aĺ ō.
24Ɔsən̄ go̰n de kə́ bo ō, nge gān̄g sarya ō, ngār ō.
Banī de kógə̄ḿ kə́ dandə́ tə́ kə́ bo tɔȳ nge ɓōĺ ndíĺ Kɔ́ɔ̄ɓē gətóo.
25Ɓəlo kə́ kumən edə̄ a ənge de gə̄ kə́ nin̄ i kɔ́ɔ̄ rɔ̄də́ gə̄ kadə̄ rāān̄ kəla adə̄nən̄,
ba de kə́ ngáā a ənge yá̰á̰ kə́ yā kəda dɔ tə́ alé.
Deē ń majə kadə̄ rɔȳnən̄ ní
26Dan ń ā ī-rāā kəla yāí anī, ī-lōō rāā tītə̄ kə́ ḭ̄ i nge kum kedə̄ beé.
Ī-lōō kɔsə rɔ̄í kə̄ dɔɔ́ kum mbang ń nar gətóon̄ jīí tə́ ní.
27Deē ń rāā kəla ō ənge yá̰á̰ ngá̰ý adə̄ mān̄ dɔ ō ní, ni i sóótə́
tɔȳ nge kɔsə rɔ̄n kə̄ dɔɔ́ ba yá̰a̰ kəsa yān gətóo.
28Ngōnə̄ḿ, ɔ́sə rɔ̄í kə̄ dɔɔ́ ādə̄ mān̄ dɔ majən alé,
ba ɔ́sə go̰nən ādə̄ asə loon tə́.
29Deē ń rāā majaĺ kə rɔ̄neé ní, i náā n a rāan de kə́ súūmú tə́ ní?
Deē ń əla rɔ̄sɔl̄ dɔ rɔ̄n nəkɔ́ tə́ ní, i náā n a ɔsə go̰nən ní?
30A rɔȳn̄ nge ndoō tām̄ yá̰a̰ ger̄ yān tə́ ō,
nge kənge yá̰a̰ tām̄ yá̰a̰ kənge yān tə́ ō.
31Ré rɔȳn̄ deē dan ndoōn tə́ anī, dan ń a ənge yá̰á̰ ní a rɔȳnən̄ kadə̄ mān̄ dɔ aĺ a?
Ba ré kídə̄n̄ deē dan kəngen yá̰á̰ tə́ anī, lo ń a əsō kum ndoō tə́ ní a kídə̄nən̄ kadə̄ mān̄ dɔ aĺ a?
Bibəl ta Sar̄ © L'Alliance Biblique du Tchad, 2006, 2010.