ROM 2
2
Sarya yā Nə́ɓā
1Ḭ̄ ń ī-gān̄g sarya ní, ká ḭ̄ i náā gə̄gē a, najə̄ i dɔí tə́. Tɔdɔ̄ ḭ̄ nge gān̄g sarya, dan ń ī-gān̄g sarya dɔ madí tə́ ō, īkɔ́ i rāā yá̰á̰ ń ni-rāā ō ní, īkɔ́ ə́hɔ rɔ̄í kə sarya. 2Tām̄ jə-gerī kadə̄ de gə̄ ń a rāān̄ yá̰á̰ kə́ tītə̄ ń noō gə̄ ní, Nə́ɓā a gān̄g sarya dɔdə́ tə́ i kə ta róbə́ kə́ rɔ̄kum. 3Ní ḭ̄ ń ā ī-gān̄g sarya dɔ de gə̄ ngeé ń noō tə́ ō, ā ī-rāā yá̰a̰ tītə̄ yādə́ ō ní, ī-gír̄ kadə̄ ā ī-teē kum sarya yā Nə́ɓā tə́ karī a? 4Aké ī-kídə̄ i Nə́ɓā ń a rāā kem majə ngá̰ý ō, a tə́gā tan dɔ yá̰a̰ gə̄ tə́ ō, a əre wurən njam dɔ tə́ ō ní ḿ? Ī-ger̄ kadə̄ kem majə ń Nə́ɓā a rāā ní i kadə̄ ī-tūrəń hálí aĺ a? 5Ba dɔ ngan̄g yāí ń noō ō, kem ngan̄g yāí ń ā ī-tūrəń hálí aĺ noō ō, a bə̄gān̄ wōn̄g dɔí tə́ ndɔ̄ wōn̄g ń Nə́ɓā nəkɔ́ a ɔjəń sarya yān kə́ gō tə́ kə̄ ndágá wáńg tə́ ní. 6Sarya kə́ gō tə́ yā Nə́ɓā ní i kadə̄ náā nəkɔ́ ɓáa, kɔ́ɔ̄ a ənge yá̰a̰ i kə gō kəla rāānneé#2.6 K. 6: Á̰a̰ī Pā 62.13. 7Ngé gə̄ ń əhɔn̄ ngan̄g ba a sāān̄ kɔsə gɔnən ō kɔr tan ō, a sāān̄ yá̰á̰ kə́ a ndumən̄ aĺ gə̄ ō ní, ni a adə̄də́ ndi kə kumuú kə́ ngándáńg. 8Ba ngé gə̄ ń i ngé mbātə́ najə̄ gə̄ á mbātə́n̄ najə̄ kə́ rɔ̄kum ba rāān̄ i yá̰á̰ kə́ súmūú aĺ gə̄ ní, wōn̄g yān ō, wur katə̄ yān ō, a reēn̄ dɔdə́ tə́. 9Deē malang ń rāā yá̰á̰ kə́ majaĺ ní a a̰a̰ tápə̄ ō, a ndi i kə sōlōó kəkəre ō. I Jipə gə̄ kété pá tá i de gə̄ ń nin̄ i Jipə aĺ gə̄ ní ō. 10Deē malang ń a rāā yá̰á̰ kə́ majə ní, ni a adə̄ a ənge kɔsə gɔn ō, kɔr ta ō, kem sɔl̄ lɔm ō. Jipə gə̄ a əngen̄ kété pá tá Gərek gə̄ a əngen̄ ɓáý, 11tɔdɔ̄ Nə́ɓā a rāā yá̰a̰ i loo ger̄ ta kum deē tə́ alé#2.11 K. 11: Á̰a̰ī Ndū 10.17; Kəla 10.34.
12Ngé gə̄ malang ń gerə̄n̄ ndū najə̄ yā Moijə alé ba rāān̄ yá̰á̰ kə́ majaĺ gə̄ ní a oyn̄, ba i kanjə̄ ndū najə̄. Ba ngé gə̄ malang ń gerə̄n̄ ndū najə̄ yā Moijə ba rāān̄ yá̰á̰ kə́ gō tə́ aĺ ní, i ndū najə̄ ń toō n a gān̄g sarya dɔdə́ tə́ ní. 13Tɔdɔ̄ de gə̄ ń i de kə́ súmūú gə̄ ta kum Nə́ɓā tə́ ní, i ngé gə̄ ń a oōn̄ ndū najə̄ ń toō kə mbīdə́ ngóy ní alé. De gə̄ ń a télən̄ de kə́ súmūú gə̄ ní, i ngé gə̄ ń a rāān̄ yá̰á̰ ń ndū najə̄ ɔjə ní. 14Dan ń nápar de gə̄ ń ndū najə̄ i dɔdə́ tə́ aĺ ní, ḭḭn̄ dɔ rɔ̄də́ rāān̄ yá̰á̰ ń ndū najə̄ ɔjə ní anī, nin̄ i ndū najə̄ tām̄ yā rɔ̄də́ nin̄ kɔ́ gə̄ tə́, ká ré ndū najə̄ yā Moijə gətóo dɔdə́ tə́ gə̄gē ní. 15Nin̄-ɔjən̄ kadə̄ kəla ń ndū najə̄ əndā dɔ de gə̄ tə́ ní, i yá̰á̰ kə́ ndangən̄ kemdə́ nin̄ tə́ kɔ̄ɔ́ ɓá. Yá̰á̰ ń kemdə́ ɔjədə́ yā rāā á rāān̄ ní ɔjə kadə̄ i tītə̄ ń noō, tá gír̄ yādə́ gə̄ i tītə̄ ń noō ɓáý to̰. Tɔdɔ̄ gír̄ yādə́ gə̄ ɔjən̄də́ kadə̄ yá̰á̰ kə́ beé gə̄ ń rāān̄ toó i kə́ majə ō, kə́ beé gə̄ i kə́ majaĺ ō. 16I yá̰á̰ ń toō n a teē ta kumjí tə́ wáńg ndɔ̄ ń Nə́ɓā a gāngəń sarya dɔ yá̰á̰ kə́ to loo mundə̄ tə́ yā de gə̄ tə́ kə ta kūl̄ Jeju Kərist ní. Najə̄ kə́ Majə ń m-ɔ́jə́sí ní əda i tītə̄ ń noō ō.
Jipə gə̄ ō ndū najə̄ ō
17Ḭ̄ ń rī Jipə ɓār̄ dɔí tə́ ní, ə̄ndā tɔ́gí dɔ ndū najə̄ tə́ ō, ɔ́jə rɔ̄í najə̄ yā Nə́ɓā yāí tə́ ō, 18ī-ger̄ gō kem ndigə yā Nə́ɓā ō, ndū najə̄ ɔjiī loo gə̄rā yá̰á̰ kə́ só tə́ ō, 19ī-gír̄ kemií tə́ kadə̄ ḭ̄ i nge kɔjə ngé kum tɔ̄ɔ̄ gə̄ ta róbə ō, kadə̄ ḭ̄ i loo kə́ unjə̄ kow tām̄ yā ngé gə̄ ń nin̄ i kum til tə́ ní ō, 20nge kɔjə de kə́ kur̄ dɔdə́ gətóo gə̄ yá̰a̰ ō, ngol ngé ndóō ngán gə̄ yá̰a̰ ō, tām̄ ger̄ yá̰a̰ ō, najə̄ kə́ rɔ̄kum ō ní, ḭ̄ āwń tū ndū najə̄ tə́. 21Tá i ba̰ý á ḭ̄ ń ī-ndóō madí gə̄ yá̰á̰ ní, ḭ̄ kɔ́ ī-tél ī-ndóō rɔ̄í yá̰a̰ aĺ ní? Ḭ̄ ń ɔ́jə najə̄ ə́da na kə deē kə ɓogə aĺ ní, i ba̰ý á ī-tél ī-ɓogə ní? 22Ḭ̄ ń əda na kə deē kə rāȳ aĺ ní, i ba̰ý á ī-tél ī-rāȳ ní? Ḭ̄ ń ɔ̄r̄ nja ngé rāā ɓesə̄ gə̄ ní, i ba̰ý á ī-tél ā ɔ́ý yá̰a̰ gə̄ kə́ kem kújə ɓesə̄ gə̄ tə́ ní? 23Ḭ̄ ń ɔ́jə rɔ̄í i kə ta kūl̄ ndū najə̄ ní, i ba̰ý á ī-tél ī-mbātə́ rāā yá̰á̰ ń ndū najə̄ ɔjə ní ī-nujəń rī Nə́ɓā ní? 24Tɔdɔ̄ ndangən̄ na nápar de gə̄ na ngonjə̄n̄ dɔ Nə́ɓā tə́ sɔɔ̄ńsí#2.24 K. 24: Á̰a̰ī Ij 52.5; Eje 36.20-22.
25Ré ī-rāā yá̰á̰ ń ndū najə̄ əda ní aĺ anī, kəja motə yāí i tītə̄ kəja mɔtə aĺ beē. 26Deē ń əja mɔtən aĺ ní, ré kɔ́ɔ̄ rāā yá̰a̰ gə̄ ń ndū najə̄ əda ní anī, Nə́ɓā a rāān i de kə́ əja mɔtən tə́ aĺ a? 27Deē ngeé ń toō ní əja mɔtən kə́ gō yā dā̰ rɔ̄ tə́ alé, banī ni-rāā yá̰á̰ ń ndū najə̄ əda ní. Loo ń noō tə́ ní, ni a gān̄g sarya dɔí ḭ̄ tə́, tām̄ ḭ̄ ī-rāā yá̰á̰ ń ndū najə̄ əda ní alé. Tá ḭ̄ āw̄ kə makətūbə̄ ndū najə̄ ō, ə́ja mɔtií ō! 28Tɔdɔ̄ i yá̰á̰ ń deē a̰ā̰ kə kumneé ní n rāā adə̄ deē i Jipə ní aĺ ō, i tə́re yá̰á̰ kə́ rɔ̄ deē tə́ n ɔjə kadə̄ deē əja mɔtən ní aĺ ō. 29Banī i yá̰á̰ kə́ to loo mundə̄ tə́ n rāā adə̄ deē i Jipə ní ō, i kəja mɔtə kə́ dan wur tə́ n i kəja mɔtə ní ō. Kəja mɔtə ngeé ń toō ní i yā Ndíl banī i yā ndū najə̄ alé. De kə́ beé ní i Nə́ɓā n i nge tɔ̄yn banī i deē ndul alé.
Currently Selected:
ROM 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.