PĀ GƏ̄ 68
68
Pā kə́ yā kɔsəń gɔn Nə́ɓā kə́ nge tetə rɔ̄ɔ̄
1Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid. Pā.
2Nə́ɓā ḭḭ dɔɔ́ anī madə̄ ba̰ā̰n gə̄ tḭ̄ḭ̄n̄ naā kə̄ loo gə̄ tə́ ō,
madə̄ kɔ̄lən gə̄ a̰ȳn̄ naā kɔ̄ɔ́ non tə́ ō.
3Ḭ̄ ī-tə̄ndā ī-tḭ̄ḭ̄də́ kɔ̄ɔ́ tītə̄ sa hor kə́ tḭ̄ḭ̄ kɔ̄ɔ́ beē.
De kə́ sew aĺ gə̄ oyn̄ ta kum Nə́ɓā tə́,
tītə̄ tībə̄ tejə bəya̰ kə́ yḛḛ̄ horoó beē.
4Banī de kə́ súmūú gə̄ rāān̄ rɔ̄nel̄,
tḭ́ḭ̄n̄ bal walya ta kum Nə́ɓā tə́.
Nin̄ ndāmə̄n̄ ndām̄ rɔ̄nel̄.
5Ə̄nīī pā ɔ́siīneé gɔn Nə́ɓā, ī-tɔ̄yī rīn,
ī-tɔ̄yī nge kal̄ kil̄ man̄ gə̄ sə́ndá tə́,
rīn na i Kɔ́ɔ̄ɓē, ī-tḭ́ḭ̄ī bal walya ta kumən tə́.
6Háĺ Nə́ɓā kə́ kem kújə́ kə́ táĺ yān tə́ n toó:
Ni i bɔbə̄ ngán hal gə̄ ō, nge ka̰a̰ gō ngé ngaa koy gə̄ ō.
7De gə̄ ń ndin̄ kə kéŕdə́ ní, Nə́ɓā adə̄də́ gír kojə ō,
ni-gān̄g dɔ de gə̄ ń rɔ̄ gān̄gdə́ ní adə̄ əngen̄ rɔ̄nel̄ ō.
Banī ngé mbātə́ najə̄ gə̄ ndin̄ i loo kə́ tutə ká káḿ tə́.
8-9Nə́ɓā, Nə́ɓā kə́ Sinai, Nə́ɓā yā Israel,
dan ń ī-teē ī-njə̄rā kété no gír deē yāí gə̄ tə́ ní,
dan ń ī-njə̄rā kem dəla loo tə́ ní,
dɔ nang ndebə ō, dɔ rā̰ tetə man̄ adə̄ də̄yā̰ kété noí tə́ ō.
10Nə́ɓā, ḭ̄ ī-rāā adə̄ man̄ kə́ ngá̰ý edə.
Dɔ nang yāí ɔr, banī ḭ̄ ī-tél ādə̄n tɔ́gə gogə́ rang.
11Loo yāí ń nin̄ ndin̄ tū tə́ ní,
i ḭ̄ Nə́ɓā kə́ nge kem majə n ī-ngɔ̄m̄ tām̄ yā de kə́ nge rɔ̄ to ndoō tə́ ní.
12Kɔ́ɔ̄ɓē əda najə̄ tan kógə̄ḿ,
anī dəyá̰ kə́ ngé kəla yān gə̄ teēn̄ láẃ tītə̄ kósə́ áskar gə̄ beé.
13Mban̄g gə̄ ō ngé rɔ̄ɔ̄ gə̄ ō a̰ȳn̄ naā.
Nin̄ a̰ȳn̄ naā ō, dəyá̰ gə̄ ń ndin̄ kem kújú ní,
nə̄ɓōn̄ yá̰a̰ kənge kə́ kɔy ta rɔ̄ɔ̄ tə́ gə̄ ō.
14Ba sḭḭ̄ ī-gə̄rāī i to gətóo kem gérgereé a?
Əndān̄ gində̄ arjā̰a̰ kə́ laa mbé mbé tū bɔ̄gə̄ dér dum tə́ ō,
lɔ́ŕ kə́ tetə ndaa tū belə̄n gə̄ tə́ ō.
15Dan ń Nə́ɓā kə́ bo kə́ tɔ́gən i ngá̰ý tə̄ndā mban̄g gə̄ tḭ̄ḭ̄də́ ní,
néjə#68.15 Néjə: I man̄ kə́ to tītə̄ kɔ̄sə̄ ba ndaa túĺ túĺ tītə̄ búy kūbə̄ beé. Dan ń kūl̄ o̰o̰ ngá̰ý anī a ḭḭ dɔ rā̰ tə́ a dəse tun tun, ba gətóo dɔ nang yājí tə́ laā. dəse tun tun dɔ mbal̄ Salmon tə́.
16Mbal̄ yā Nə́ɓā, mbal̄ kə́ Basan,
mbal̄ kə́ ta télən gə̄ i ngá̰ý, mbal̄ kə́ Basan,
17i tām̄ rí tə́ á sḭḭ̄ mbal̄ gə̄ ń jamsí gə̄ i ngá̰ý ní
ə̄ndāī ni mbal̄ ń Nə́ɓā gərā yā ndi tū tə́ ní?
A̰á̰ā̰, Kɔ́ɔ̄ɓē a ndi tū tə́ ngándáńg.
18Púsə rɔ̄ɔ̄ gə̄ yā Nə́ɓā i dūbú ngá̰ý,
i dūbú ngá̰ý nja kutə kə̄ gogə́.
Kɔ́ɔ̄ɓē i dandə́ tə́, mbal̄ Sinai i kem loo kə́ táĺ tə́.
19Kɔ́ɔ̄ɓē Nə́ɓā, ḭ̄ al̄ āw̄ loo kə́ dɔɔ́ tə́,
ə́hɔ de gə̄ ɓəlo tə́ āw̄ sedə́.
Ī-taā kadə̄ karī gə̄ jī de gə̄ tə́, dan ngé mbātə́ najə̄ gə̄ tə́ gə̄gē,
yā kəngeń loo ndi!
20Ādə̄ de gə̄ tɔ̄ȳn̄ Kɔ́ɔ̄ɓē kə ndɔ̄ gə̄!
Nə́ɓā ngeé ń toō tetə rɔ̄ɔ̄ adə̄jí.
21Ni i Nə́ɓā kə́ nge tetə rɔ̄ɔ̄ gə̄ tām̄ yājí tə́ ō,
ta róbə gə̄ ń de gə̄ a oyn̄neé ní i ta róbə gə̄ yā Nə́ɓā ń i Kɔ́ɔ̄ɓē ní ō.
22Banī Nə́ɓā tɔ̄ɔ̄ dɔ madə̄ ba̰ā̰n gə̄,
ni tɔ̄ɔ̄ kār̄ dɔ deē ń əɓa nənga ngá̰ý á rāā yá̰á̰ kə́ majaĺ ní.
23Kɔ́ɔ̄ɓē əda na n-a n-ḭḭ sedə́ Basan yā reē sedə́ ō,
n-a n-teē sedə́ kem bəlo loo gə̄ kə́ gír bā bo tə́ yā reē sedə́ ō,
24yā kadə̄ ī-tə́ɓādə́ kə njaí kum mósə tə́ ō,
kadə̄ madə̄ ba̰ā̰í kə́rēý gə̄ télən̄ dā̰ yā bísə yāí gə̄ ō.
25Nə́ɓā, nin̄ a̰a̰n̄ kósə de gə̄ ń njə̄rān̄ gōí tə́ ní,
kósə de gə̄ ń njə̄rān̄ gō Nə́ɓā yāḿ tə́ ō, mban̄g yāḿ tə́ ō,
kem loo kə́ táĺ tə́ ní.
26Ngé kənī pā gə̄ i kété, gōsə̄ gə̄ utə̄n̄ gōdə́,
ba ngáń kə́ dəyá̰ kə́ ngé kənda kɔdə gə̄ njə̄rān̄ kə gō kadədə́.
27Ī-tɔ̄yī Nə́ɓā loo kán̄ náā gə̄ tə́,
ī-tɔ̄yī Kɔ́ɔ̄ɓē ta kəɓa man̄ kə́ Israel tə́.
28Benjamḛ ń i ngōn̄ kə́ dūú ní i laā,
tá ngār kə́ Juda gə̄ ō, kə́ Jabulo̰ gə̄ ō, kə́ Nepətali gə̄ ō, i laā ō.
29Nə́ɓā yāí gḛy kadə̄ ī-ngan̄g.
Nə́ɓā, ḭ̄ ń ī-rāā yá̰a̰ tām̄ yājí tə́ ní ɔ́jə́ tɔ́gí!
30Dan ń mban̄g gə̄ a̰a̰n̄ kújə mban̄g yāí ń
dɔn un dɔ kújə gə̄ malang kə́ Jerusalem tə́ ní anī,
a reēn̄ kə kadə̄ karī yādə́ gēé yā ndējī.
31Əla ɓōĺ kem Ejiptə ń i dā̰ kə́ kem tə̄ɓā gə̄ tə́ ní,
ni ń rāā rɔ̄n i ɓūtə̄ man̄g kə́ bəra gə̄ tə́ ō,
ngol kə́ dɔ gír de gə̄ tə́ ō ní,
ni ń ndējī sə́lē gində̄ arjā̰a̰ sɔlə̄ń dɔn kə̄ noí tə́ ní.
Gír de gə̄ ń nel̄də́ rɔ̄ɔ̄ ngá̰ý ní, ī-tə̄ndā ī-tḭ̄ḭ̄də́ naā tə́ kɔ̄ɔ́.
32Ngé kɔsə kum gotə ɓē gə̄ ḭḭn̄ Ejiptə reē ugə̄n̄.
De kə́ Etiopi gə̄ əlan̄ jīdə́ kum kə̄ rɔ̄ Nə́ɓā tə́.
33Ɓē ko̰o̰ gə̄ kə́ dɔ nang tə́, ə̄nīī pā ādī Nə́ɓā,
ɔ́siī gɔn Kɔ́ɔ̄ɓē kə yá̰á̰ kə́ ɓār̄ gōsə̄ gēé.
34Kɔ́ɔ̄ɓē ń i nge njə̄rā kə sə́ndá dɔ rā̰ tə́, dɔ rā̰ kə́ to i jóó ngá̰ý tə́ ní.
Á̰a̰ā̰, i ni n-ɔr̄ najə̄ kə tɔ́gɔ́ ō, kə ndū boó ō toó.
35Ədaī na tɔ́gə i yā Nə́ɓā,
ə́daī na ni i de kə́ bo dɔ ɓē kə́ Israel tə́ ō,
tɔ́gən i dan kil̄ man̄ tə́ ō.
36Nə́ɓā ndi kem loo kə́ táĺ yān tə́
ɔjəń kə̄ ndágá kadə̄ ni i de kə́ to ɓōĺ ngá̰ý.
I Nə́ɓā yā Israel n i nge kadə̄ gír deē yān gə̄ tɔ́gə ō, ko̰o̰ ɓē ō ní.
Ādə̄ de gə̄ tɔ̄ȳn̄ Kɔ́ɔ̄ɓē!
Currently Selected:
PĀ GƏ̄ 68: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.