PĀ GƏ̄ 28
28
Ndɔ̄ȳ yā de kə́ teē ta yo tə́
1I pā yā Dabid.
Kɔ́ɔ̄ɓē, m̄-ɓāríī,
ḭ̄ mbal̄ yāḿ, ī-nēl̄ mbīí ōoń ndūḿ!
Ré ī-ndi mándáńg anī,
mā i de kə́ gír yāḿ gān̄g kɔ̄ɔ́.
2Ōō ndūḿ ń m̄-rāāīneé ɓɔ́
dan ń m-ə́gań kɔŕ kə̄ dɔí tə́,
m-ɔ́yń jīḿ kə̄ dɔɔ́ kum kə̄ loo kə́ táĺ ngá̰ý yāí ń,
ī-ndi kemeé tə́ ní.
3Ī-lōō ɓoo jīḿ naā tə́ kə ngé kem ndul gēé ō,
kə ngé rāā majaĺ gēé ō.
Nin̄ ɔrə̄n̄ najə̄ lápə́ya kə tadə́,
banī ndāńg rosə kemdə́.
4Ī-rāādə́ yá̰á̰ kə́ tōr̄ tām̄ yá̰a̰ rāādə́ tə́,
tām̄ yá̰a̰ rāādə́ kə́ majaĺ tə́.
Ī-rāādə́ yá̰á̰ ń nin̄ rāān̄ kə madə̄də́ gēé ní.
Ī-rāā ādə̄ yá̰a̰ rāādə́ kə́ majaĺ tél ənda dɔdə́ nin̄ kɔ́ gə̄ gogə́.
5Tɔdɔ̄ usədə́ dɔ kəla rāā Kɔ́ɔ̄ɓē tə́ aĺ ō,
dɔ yá̰á̰ ń Kɔ́ɔ̄ɓē rāā kə jīneé tə́ ní aĺ ō.
I beé ní, ādə̄ Kɔ́ɔ̄ɓē nujədə́ sák sák kɔ̄ɔ́ ō,
tél undə́ dɔɔ́ gogə́ to̰ aĺ bátə́ ō!
6m̄-ndadə̄ Kɔ́ɔ̄ɓē
tām̄ ni oō ndūḿ dan ń m̄-rāān ɓɔ́ ní!
7Kɔ́ɔ̄ɓē i loo ɓɔ̄ɔ̄ rɔ̄ yāḿ kə́ ngan̄g ngá̰ý ō,
i der yāḿ ō.
M-ə̄ndā kemḿ dɔn tə́, anī ni dḭḭ̄m̄.
Adə̄ m̄-rāā walya ō m-ə̄nī pā m-ɔ́səń gɔnən ō!
8Kɔ́ɔ̄ɓē i tɔ́gə yā gír deē yān gə̄,
ni i loo ɓɔ̄ɔ̄ rɔ̄ kə́ ngan̄g ngá̰ý kə́ ajə mban̄g yān.
9Kɔ́ɔ̄ɓē, ájə́ gír deē yāí gə̄ ō,
ī-rāā majə kə yá̰a̰ halaí gēé ō.
ādə̄ ḭ̄ i nge kuldə́ ō, nge ka̰a̰ gōdə́ ngándáńg ō!
Currently Selected:
PĀ GƏ̄ 28: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.