PĀ GƏ̄ 147
147
Tɔ́gə́ Nə́ɓā kə́ tū yá̰a̰ gə̄ tə́
1 Aleluya!
Kɔsə gɔn Nə́ɓā yājí i yá̰á̰ kə́ majə ngá̰ý,
ɓōkə́n tɔ̄ȳ kə gōó majə i yá̰á̰ kə́ nel̄ ta ngá̰ý!
2Kɔ́ɔ̄ɓē rāā ɓē kə́ Jerusalem gogə́ rang.
Israel gə̄ ń ɔrə̄n̄də́ kɔ̄ɔ́ ní, a télən̄ yā kán̄ njadə́.
3I ni n i nge sɔl̄ kem ngé gə̄ ń kemdə́ nujə sá sák kɔ̄ɔ́ ní ō,
nge kun rɔ̄ tōr̄ yādə́ gə̄ ō ní.
4Ni tə́da kutə tə́yō̰ gə̄,
əndā rī dɔdə́ gə̄ tə́ kógə̄ḿ kógə̄ḿ.
5Kɔ́ɔ̄ɓē yājí i de kə́ bo ō, tɔ́gən i ngá̰ý ō.
Deē asə mbɔ̄jə́ ger̄ yá̰a̰ yān alé.
6Kɔ́ɔ̄ɓē rāā kə ngé gə̄ ń télən̄ kə rɔ̄də́ kə̄ nang tə́ ní.
Ba tél kə ngé kem ndul gēé kə̄ nang tə́ adə̄ ɔdən̄ nang lá láḿ.
7Úniī pā ī-rāāīneé Kɔ́ɔ̄ɓē kə́ra.
Úgiī kənde ɔ́siīneé gɔn Nə́ɓā yājí.
8I ni n rāā adə̄ kil̄ man̄ gə̄ taān̄ loo dɔ rā̰ tə́ ní.
Man̄ ń kadə̄ edə dɔ nang tə́ ní ni-əndā dɔ danaá i tītə̄ ń noō.
I ni n i nge rāā kadə̄ mu gə̄ əɓan̄ dɔ mbal̄ gə̄ tə́ ní.
9Ni-adə̄ yá̰a̰ kul̄ gə̄ ō,
ngáń ká̰ā̰ gə̄ ń a nōōn̄ ɓō ní ō yá̰a̰ kəsa.
10Yá̰a̰ kə́ ngá̰ý gə̄ ń sə́nda asə rāā ní taā kumən aĺ ō,
usən dɔ yá̰á̰ ń nja deē asə rāā tə́ ní aĺ ō.
11Ba o̰o̰n tɔdɔ̄ ngé gə̄ ń ɓōlə́n̄ ndílən ō,
əndān̄ kemdə́ dɔ kem majə yān tə́ ō ní.
12Jerusalem, ɔ́sə gɔn Kɔ́ɔ̄ɓē! Siyo̰, ī-tɔ̄ȳ Nə́ɓā yāí.
13Tɔdɔ̄ ni rákə̄ ta róbə ndogə̄ yāí adə̄ ngan̄g tɔȳ kə́ kété.
Ngání gə̄ ń ndin̄ ɓēé looí ní ni-rāā majə sedə́.
14I ni n i nge rāā kadə̄ lɔm to dɔ nang yāí tə́ ní.
Ni adī gémē kə́ majə ngá̰ý adə̄ ə́sa ī-ndān̄.
15Ni-əla kəla dɔ nang tə́,
anī najə̄ yān ní ngɔ̄də̄ taā loo.
16Ni-rāā néjə#147.16 Néjə: Á̰a̰ī Pā 68.15 adə̄ dəse tun tun
tītə̄ bḭḭ̄ batə̄ kə́ əhɔ naā beé.
Ni-rāā díḿsir adə̄ dəse tun tun tītə̄ bū beé.
17Ni-rāā kɔ̄sə̄ man̄ yān adə̄ tə́sō tītə̄ butə̄ yá̰a̰ kəsa beé.
I náā n asə ra kum kūl̄ yān tə́ ní?
18Ni-əda najə̄ anī kɔ̄sə̄ yḭ̄l̄.
Ni-rāā nél adə̄ əla, anī man̄ gə̄ nūgə́n̄.
19Ni-əda gír deē yān gə̄ najə̄ yān ō,
ɔjə Israel yá̰a̰ gə̄ ń ndang kadə̄ yā rāā ní ō, gō míndən gə̄ ō.
20Ni-rāā yá̰á̰ kə́ tītə̄ ń noō kə nápar de kə́ rang gēé aĺ ō,
nápar de kə́ rang gə̄ gerə̄n̄ gō míndən gə̄ aĺ ō.
Aleluya!
Currently Selected:
PĀ GƏ̄ 147: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.