TƏ́DA 4
4
Kəla rāā gír kaa gə̄ yā Lebi
1. Ngán kaa Kehat gə̄
1Kɔ́ɔ̄ɓē əda Moijə nin̄ kə Aaro̰ na:
2Ī-ndangiī rī ngán kaa Kehat gə̄ kə́ dan ngán Lebi tə́ gə̄ makətūbūú kə gō gír kaadə́ gēé ō, gír kojə yādə́ gēé ō. 3Ī-ndangiī rī ngé gə̄ malang ń ɓāl̄də́ ḭḭ dɔ kutə mətá tə́ bátə́ kutə mí tə́ ń a rāān̄ kəla tām̄ yā kújə kənge naā tə́ ní, 4a a̰a̰n̄ gō yá̰á̰ kə́ táĺ ngá̰ý gə̄. 5Ré ngán Israel gə̄ a ndɔ́tə̄n̄ ɓē anī Aaro̰ nin̄ kə ngánən gēé a tútən̄ kūbə̄ ń gāngnəń gír loo kə́ táĺ ní, yā ɓírəń gidə sandúkə ndū najə̄. 6A ənīn̄ ngə̄rā dā̰ kə́ ngan̄g dɔ sandúkə́ ní tə́ ō, a ɓírə̄n̄ gidə kə kūbə̄ kə́ ndul gusə gusuú ō, pá tá a tə́lan̄ sáa kāgə̄ gə̄ kə́ yā kətōń sandúkə́ ní dām̄ kadən gə̄ tə́ ɓáý. 7A selə́n̄ kūbə̄ kə́ ndul gusə gusə dɔ tábəl ndējə̄ yá̰á̰ tə́ ō, a tə́ndān̄ səmbē kə́ laa gə̄ ō, kópə gə̄ ō, ngán bay gə̄ ō, səmbē kə́ rúu gə̄ ń a tə́tenə̄ń kasə nduú ní ō, dɔ tə́. Tá mápá ń a ndējə̄mə̄n̄ ngándáńg ní a to dɔ tə́ ō. 8A selə́n̄ kūbə̄ kə́ kərē bḭḭ dɔ yá̰a̰ gə̄ ń noō tə́ malang pá tá a əlan̄ ngong ngə̄rā dā̰ kə́ ngan̄g dɔ tə́ ɓáý. Gō tə́ anī a tə́lan̄ sáa kāgə̄ gə̄ kə́ yā kətōń tábəl ní kadə tə́ dām̄ jōó. 9A utə̄n̄ dɔ ɗəra hor ō, bay hor gə̄ kə́ ta tə́ ō, yá̰a̰ kūsə́ ta kəlā hor gə̄ ō, bay gə̄ kə́ yā kɔyń bū hor ō, kū yibə̄ gə̄ ō, i kə kūbə̄ kə́ ndul gusə gusuú. 10A ɓōkə́n̄ yá̰a̰ gə̄ ń noō malang kem ngə̄rā dā̰ kə́ ngan̄g tə́, ba a əndān̄ dɔ kāgə̄ tē tə́ yā kətōń. 11A selə́n̄ kūbə̄ kə́ ndul gusə gusə dɔ loo róō ndujə̄ yá̰á̰ kə́ kotə majə kə́ rāā kə lɔ́rɔ́ tə́, ba a əlan̄ ngong ngə̄rā dā̰ kə́ ngan̄g dɔ tə́. A tə́lan̄ sáa kāgə̄ gə̄ kə́ yā kətōń kadə tə́ dām̄ jōó. 12A ɔyn̄ yá̰a̰ malang ń a rāānəń kəla kem loo kə́ táĺ tə́ ní yā ɓōkə́ kem kūbə̄ kə́ ndul gusə gusə tə́ ō, a əlan̄ ngə̄rā dā̰ kə́ ngan̄g dɔ tə́ ō, tá a əndān̄ dɔ kāgə̄ tē tə́ yā kətōń ɓáý. 13A ɔyn̄ bū kə́ dɔ loo tun̄ yá̰á̰ tə́ kɔ̄ɔ́ ō, a selə́n̄ kūbə̄ kə́ kərē bḭḭ dɔ tə́ ō. 14A ɓōkə́n̄ bay hor gə̄ ō, yá̰a̰ rāā kəla gə̄ malang kə́ dɔ loo tun̄ yá̰á̰ tə́ ō, dɔ kūbə̄ ń selə́n̄ tə́ ní, a utə̄n̄ dɔ kə́ ngə̄rā dā̰ kə́ ngan̄g ō, a tə́lan̄ sáa kāgə̄ gə̄ kə́ yā kətōń loo tun̄ yá̰á̰ ní kadən gə̄ tə́ dām̄ jōó ō. 15Dan ń ngán Israel gə̄ a ndɔ́tə̄n̄ ɓē anī, Aaro̰ nin̄ kə ngánən gēé a tɔ̄lə̄n̄ ta ɓír̄ gidə yá̰á̰ kə́ táĺ gə̄ ō, yá̰a̰ rāā kəla gə̄ kə́ kem loo kə́ táĺ tə́ ō, pá tá ngán Kehat gə̄ a reēn̄ yā kɔy kətō ɓáý. Ngán Kehat gə̄ a ɔdən̄ rɔ̄ɔ̄ yá̰á̰ kə́ táĺ gə̄ alé na sōgə́ oyn̄. Kəla kətō yá̰á̰ kə́ kem kújə kənge naā tə́ ń əndān̄ dɔ ngán Kehat gə̄ tə́ kadə̄ rāān̄ ni n noó. 16Eleajar ngōn̄ Aaro̰ nge tun̄ yá̰a̰ a əndā kumən gír yibə̄ hor tə́ ō, ndujə̄ yá̰á̰ kə́ kotə majə kə́ yā róō horoó tə́ ō, ndujə̄ kōō kə́ ndējə̄ kə dɔ ndɔ̄ gə̄ tə́ ō, yibə̄ kə́ táĺ tə́ ō. Ni a a̰a̰ gō kújə yā Nə́ɓā ō, yá̰a̰ malang kə́ kemeé ō, loo kə́ táĺ ō, yá̰a̰ rāā kəla gə̄ kə́ kemeé ō.
17Kɔ́ɔ̄ɓē əda Moijə ō, Aaro̰ ō na:
18Ī-lōōī rāā kadə̄ gír kaa gə̄ yā Kehat gə̄ gətóon̄ kɔ̄ɔ́ dan ngán Lebi gə̄ tə́. 19Yá̰á̰ ń ā ī-rāāī tá kadə̄ nin̄ oynə̄ń loo rāā kəla yá̰á̰ kə́ táĺ ngá̰ý gə̄ tə́ aĺ ní n toó: Ādī Aaro̰ nin̄ kə ngánən gēé aw̄ tə́ndān̄də́ kógə̄ḿ kógə̄ḿ ta kəla yādə́ gə̄ tə́, aláa ta yá̰a̰ gə̄ ń kadə̄ ətōn̄ tə́ ní. 20A udən̄ kem loo kə́ táĺ tə́ dan ń a ɓír̄nəń gidə yá̰á̰ kə́ táĺ gə̄ ní alé, na ré kumdə́ əsō dɔ tə́ anī a oyn̄.
2. Ngán kaa Gerson gə̄
21Kɔ́ɔ̄ɓē əda Moijə na:
22Ī-ndang rī ngán kaa Gerson gə̄ makətūbūú kə gō gír kojə yādə́ gēé ō, gír kaadə́ gēé ō. 23Ā ī-tə́dá ngé gə̄ malang ń ɓāl̄də́ ḭḭ dɔ kutə mətá tə́ bátə́ kutə mí tə́ ń a rāān̄ kəla tām̄ yā kújə kənge naā tə́ ní. 24Kəla gə̄ ń a rāān̄, aláa yá̰a̰ gə̄ ń a ətōn̄ ní n toó: 25A ətōn̄ kūbə̄ kə́ dɔ kújə yā Nə́ɓā tə́ ō, kə́ dɔ kújə kənge naā tə́ ō, a ətōn̄ ndāŕ batə̄ ō, ngə̄rā dā̰ kə́ ngan̄g ō, kə́ dɔ kújə kənge naā tə́ ō, kūbə̄ kə́ ta róbən tə́ ō, 26ndogə̄ kūbə̄ ń əgan̄ dɔ ndágə loo kə́ gīr̄ gidə kújə yā Kɔ́ɔ̄ɓē tə́ nin̄ kə loo tun̄ yá̰á̰ ní ō, kūbə̄ kə́ ta róbə ndogə̄ tə́ ō, kəlā gə̄ ō, yá̰a̰ rāā kəla gə̄ ō. 27I Aaro̰ nin̄ kə ngánən gēé n a ɔjən̄ ngán Gerson gə̄ kəla rāādə́ gə̄ malang ní. Ká i yá̰a̰ kətō aké i kəla kə́ yā rāā gə̄gē anī, i nin̄ n i ngé kɔjədə́ ní. A adə̄n̄də́ yá̰a̰ malang ń kadə̄ ətōn̄ ní. 28Kəla yá̰á̰ kújə yā Nə́ɓā ń adə̄n̄ ngán Gerson gə̄ kadə̄ rāān̄ ní n noó. I Itamar ngōn̄ Aaro̰ nge tun̄ yá̰a̰ n i nge kəndā kumən gír kəla yādə́ gə̄ tə́ ní.
3. Ngán kaa Merari gə̄
29Ā ī-tə́dá ngán kaa Merari gə̄ kə gō gír kaadə́ gēé ō, gír kojə yādə́ gēé ō. 30Ā ī-tə́dá ngé gə̄ malang ń ɓāl̄də́ ḭḭ dɔ kutə mətá tə́ bátə́ ugə̄ń kutə mí tə́ ń a rāān̄ kəla tām̄ yā kújə kənge naā tə́ ní. 31Kəla gə̄ ń a əndān̄ dɔdə́ tə́ kadə̄ rāān̄ ní n toó: A ətōn̄ kāgə̄ kə́ yā rāań mbōgə̄ kújə ō, kə́ yā dēsə́ mbo̰ō̰ madə̄ gə̄ tə́ ō, kāgə̄ nga dan kújə ō, bir̄ nja kāgə̄ gə̄ ō, 32kāgə̄ ndogə̄ kūbə̄ gə̄ ń əgan̄ dɔ ndágə loo kə́ gīr̄ gidə kújə yā Kɔ́ɔ̄ɓē tə́ ní ō, bir̄ njadə́ gə̄ ō, bēl̄#4.32 Bēl̄: Á̰a̰ī Tə́da 3.37 gə̄ kə́ tū tə́ ō, kəlā gə̄ ō, yá̰a̰ rāā kəla gə̄ malang ō. Yá̰a̰ gə̄ ń kadə̄ ətōn̄ ní ɔ́jiīdə́ kógə̄ḿ kógə̄ḿ kə dɔdə́ gēé. 33Kəla yā kújə kənge naā ń kadə̄ ngán Merari gə̄ rāān̄ ní n noó. Itamar ngōn̄ Aaro̰ nge tun̄ yá̰a̰ a əndā kumən gírí.
Tə́dan̄ ngán Lebi gə̄ ń a rāān̄ kəla ní
34-49Moijə ō, Aaro̰ ō, ngār gə̄ kə́ dɔ ngán Israel gə̄ tə́ ō, tə́dan̄ ngán kaa Kehat gə̄ ō, Gerson gə̄ ō, Merari gə̄ ō, kə gō gír kaadə́ gēé ō, gír kojə yādə́ gēé ō. Tə́dan̄ i ngé gə̄ malang ń ɓāl̄də́ ḭḭ dɔ kutə mətá tə́ bátə́ kutə mí tə́ ń a rāān̄ kəla tām̄ yā kújə kənge naā tə́ ní. Kutə de gə̄ ń tə́dan̄ kə gō ndū Kɔ́ɔ̄ɓē ń adə̄ Moijə ní n toó: Ngán kaa Kehat gə̄ i deē 2 750. Ngán kaa Gerson gə̄ i deē 2 630. Ngán kaa Merari gə̄ i deē 3 200. Kutə ngán Lebi gə̄ malang i deē 8 580.
Nin̄ kógə̄ḿ kógə̄ḿ ní ɔjən̄də́ kəla ń kadə̄ rāān̄ ní ō, yá̰á̰ ń kadə̄ ətōn̄ ní ō. Ɔjən̄də́ i tītə̄ ń Kɔ́ɔ̄ɓē ədań Moijə ní.
Currently Selected:
TƏ́DA 4: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
