TƏ́DA 35
35
Ɓē gə̄ yā ngán Lebi gə̄
1Kɔ́ɔ̄ɓē ɔr̄ najə̄ kə Moijə ndágə loo gə̄ kə́ Moab tə́ kadə bā Jurdḛ ń tə́, sɔɔ̄n̄ ta na kə ɓē kə́ Jeriko ní. Najə̄ ń əda Moijə ní n toó:
2Ə́dá ngán Israel gə̄ ādə̄ əya̰n̄ ɓē yādə́ kə́rēý gə̄ adə̄n̄ ngán Lebi gə̄ kadə̄ ndin̄ tū tə́. Ādə̄ əya̰n̄ dɔ nang gə̄ ń gīrə̄n̄ gidə ɓē gə̄ ní adə̄n̄də́ ō. 3Ngán Lebi gə̄ a ndin̄ kem ɓē gə̄ ní tə́. A ngɔ̄mə̄n̄ yá̰a̰ kul̄ yādə́ gə̄ ō, yá̰a̰ rāā kəla yādə́ gə̄ ō, gotə dā̰ yādə́ kə́ rang gə̄ ō, i dɔ nang ń gīr̄ gidə ɓē gə̄ ngeé ń toō ní tə́. 4Ngāl̄ dɔ nang gə̄ ngeé ń toō a asə métər ɓú mí. A ḭḭ i kadə ndogə̄ mbal̄ tə́ kum kə̄ ndágá, kə gō gidə ɓēé kadə̄ gīr̄ gidə əla ta naā tə́. 5Ā ī-mbɔ̄jíī ngāl̄ métər dūbú kógə̄ḿ dām̄ kə́ gír ɓē tə́ ō, dām̄ mbɔ́r ɓē kə́ geleé tə́ ō, dām̄ kə́ no ɓē tə́ ō, dām̄ mbɔ́r ɓē kə́ ko̰ó̰ tə́ ō, kə́ gō gidə ɓēé kadə̄ gīr̄ gidə ba ɓē i danaá. dɔ nang ń ngán Lebi gə̄ a əngen̄ kə gō gidə ɓē yādə́ gēé ní n noó. 6Ādī ngán Lebi gə̄ ɓē ɓɔ̄ɔ̄ rɔ̄ mehḛ́ kadə̄ ngé tɔ̄l̄ de gə̄ a̰ȳ aw̄ ɓɔ̄ɔ̄n̄ rɔ̄də́ tū tə́. Tá ā ādīdə́ ɓē kə́ rang gə̄ kutə gidə i jōó dɔ tə́ ɓáý to̰. 7Ɓē gə̄ ń ā ādī ngán Lebi gə̄ ní malang i kutə sɔ́ gidə i sɔ́sɔ́ naā tə́ kə dɔ nang kə́ gidədə́ gə̄ tə́. 8Dan ń ā ī-táāī ɓē gə̄ jī ngán Israel gə̄ tə́ yā kadə̄ ngán Lebi gə̄ ní, de gə̄ ń loo yādə́ i ngá̰ý ní ā ī-taāī ɓē yādə́ i ngá̰ý ō, de gə̄ ń loo yādə́ i ngá̰ý aĺ ní ā ī-taāī ɓē yādə́ i ngá̰ý aĺ ō. Gír ɓē gə̄ kógə̄ḿ kógə̄ḿ a adə̄n̄ ngán Lebi gə̄ ɓē yādə́ gə̄ i kə gō loo yādə́ gə̄ ń a əngen̄ ní.
Ɓē ɓɔ̄ɔ̄ rɔ̄ gə̄
9-10Kɔ́ɔ̄ɓē mēr̄ Moijə kəda ngán Israel gə̄ ndū najə̄ gə̄ ń toō:
Ré ī-teēī bā Jurdḛ ba ūgī dɔ nang kə́ Kanaan tə́ anī, 11ī-gə̄rāī ɓē kə́rēý gə̄ kadə̄ télən̄ ɓē ɓɔ̄ɔ̄ rɔ̄ gə̄. Deē ń tɔ̄l̄ deē ba i kə gō kem ndigə yānneé aĺ ní, kɔ́ɔ̄ a a̰ȳ yā kaw̄ ɓɔ̄ɔ̄ rɔ̄n kemeé. 12I beé n ni a teēn̄ jī nge rāā ba̰ā̰ deē ń oy tə́ ní ō, deē a tɔ̄l̄nəń kété kanjə̄ kadə̄ ngán Israel gə̄ gāngə̄n̄ sarya kə́ dɔn tə́ aĺ ō ní. 13Ā ī-gə̄rāī ɓē ɓɔ̄ɔ̄ rɔ̄ gə̄ mehḛ́, 14kə́ mətá gə̄ i gidə bā Jurdḛ kə́ dām̄ kə́ gír ɓē tə́ ō, kə́ mətá gə̄ i dɔ nang kə́ Kanaan tə́ ō. 15Ɓē kə́ mehḛ́ gə̄ ń noō i loo ɓɔ̄ɔ̄ rɔ̄ kə́ tām̄ yā ngán Israel gə̄ tə́ ō, kə́ tām̄ yā tə̄rā gə̄ ń ndin̄ dandə́ tə́ ní ō. Náā nəkɔ́ ń tɔ̄l̄ deē ba i kə gō kem ndigə yānneé aĺ ní, kɔ́ɔ̄ a ənge loo kemeé yā ɓɔ̄ɔń rɔ̄n ō. 16Ré i gində̄ n deē tɔ̄ləń madə̄n anī, kɔ́ɔ̄ i nge tɔ̄l̄ deē, adə̄ a tɔ̄l̄nən̄ kɔ̄ɔ́. 17Ré i mbal̄ kə́ asə tɔ̄l̄ deē ń deē ənīń madə̄n tɔ̄l̄ anī, kɔ́ɔ̄ i nge tɔ̄l̄ deē, adə̄ a tɔ̄l̄nən̄ kɔ̄ɔ́. 18Ré i kāgə̄ kə́ asə tɔ̄l̄ deē n deē ənīń madə̄n tɔ̄lən anī, kɔ́ɔ̄ i nge tɔ̄l̄ deē, adə̄ a tɔ̄l̄nən̄ ō. 19Ré nge rāā ba̰ā̰ deē ń oy ní əngen anī a tɔ̄lən. 20Ré deē im̄ madə̄n kemən tə́ ba mbəren, aláa ənīn kə yá̰á̰ kə́rēý kə kem nduluú adə̄ oy, 21aké ɓir̄ jīn əndanəń kə ndāngá adə̄ oy anī, kɔ́ɔ̄ i nge tɔ̄l̄ deē, adə̄ a tɔ̄lən̄ kɔ̄ɔ́. Ré nge rāā ba̰ā̰ deē ń oy ní əngen anī a tɔ̄lən.
22Banī ré mbəren i kə kem kə́ majaĺ alé, aláa ənīn kə yá̰á̰ kə́rēý ba i kə kem nduluú alé, 23aké a̰a̰ alé adə̄ əya̰ mbal̄ kə́ asə tɔ̄l̄ deē dɔɔ́ adə̄ teē əsō dɔn tə́ tɔ̄lən, banī rāā yá̰á̰ ní i ndáńg aĺ ō, sāā i rāā yá̰á̰ kə́ majaĺ seneé aĺ ō anī, 24ngán Israel gə̄ a unən̄ gō ndū najə̄ kə́ tām̄ yá̰á̰ kə́ beé gə̄ tə́ yā gāngəń sarya ń to mboō nge tɔ̄l̄ deē tə́ kə nge rāā ba̰ā̰ deē ń oy tə́ ní. 25Ngán Israel gə̄ a taān̄ nge tɔ̄l̄ deē ní jī nge rāā ba̰ā̰ deē ń oy tə́ ní yā kəya̰n dɔɔ́. A télən̄ seneé yā kaw̄ seneé gogə́ kem ɓē ń a̰ȳ aw̄ ɓɔ̄ɔ̄ rɔ̄n tū tə́ kété tə́ ní. Ni a ndi noó bátə́ kadə̄ ngol ngé tun̄ yá̰á̰ ń urən̄ yibə̄ kə́ táĺ dɔn tə́ ní oy pá tá. 26Ba ré ni teē dɔ nang yā ɓē ń ni ɓɔ̄ɔ̄ rɔ̄n kemeé tə́ ní kɔ̄ɔ́, 27adə̄ nge rāā ba̰ā̰ deē ń oy ní əngen ba tɔ̄lən anī najə̄ a gətóo. 28Adə̄ deē ń tɔ̄l̄ deē ní a ndi i ɓē ɓɔ̄ɔ̄ rɔ̄ tə́ bátə́ kadə̄ ngol ngé tun̄ yá̰a̰ gə̄ oyń. Ré ngol ngé tun̄ yá̰a̰ gə̄ oy anī ni a tél yā kaw̄ gogə́ dɔ nang yān tə́.
29Ā ī-ngɔ̄mī ndū najə̄ ń noō kə dɔ ɓāl̄ gə̄ gāngəń sarya dɔ dáńsí tə́ loo malang ń ā ī-ndiī tū tə́ ní tə́.
30Ré deē tɔ̄l̄ deē anī, a tɔ̄lə̄n̄ kɔ́ɔ̄ i kə gō najə̄ kə́ ta ngé kə́ kum tə́ gə̄ ń a̰a̰nən̄ loo tɔ̄l̄ de tə́ ní. Ba najə̄ ta de kə́ kum tə́ kə́ kal kógə̄ḿ beē a asə deē tɔ̄ləń ngé tɔ̄l̄ deē alé. 31Nge tɔ̄l̄ deē ń majə kadə̄ ni-oy ní, ī-lōōī taā nar gān̄g dɔ jīn tə́ ba kəya̰n. I gáŕ kadə̄ ni-oy. 32Ī-lōōī taā nar ba kəya̰ nge tɔ̄l̄ deē kadə̄ a̰ȳ aw̄ sāā loo ɓɔ̄ɔń rɔ̄n kem ɓē ɓɔ̄ɔ̄ rɔ̄ tə́, aláa kadə̄ tél aw̄ ndi gogə́ dɔ nang yān tə́ kété kanjə̄ kadə̄ ngol ngé tun̄ yá̰a̰ gə̄ oy.
33Ā ī-nujiī dɔ nang ń ā ī-ndiī tū tə́ ní alé, tām̄ mósə i yá̰á̰ kə́ a nujə dɔ nang. Tá a tə́gon̄ mósə kə́ kənī nang tə́ i kə mósə deē ń ənī mósə madən̄ nang tə́ ní. 34Dɔ nang ń ī-ndiī tū tə́ á m-ā m̄-ndi tū tə́ ō ní, ā ī-rāāī kadə̄ majaĺ tákə̄ alé, tɔdɔ̄ mā i Kɔ́ɔ̄ɓē ō, m̄ndi dan ngán Israel gə̄ tə́ ō.
Currently Selected:
TƏ́DA 35: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.