TƏ́DA 30
30
1Moijə əda ngán Israel gə̄ yá̰a̰ malang ń Kɔ́ɔ̄ɓē mērən kədadə́ ní.
Ndū najə̄ kə́ dɔ ndū kə́ kənī tə́
2Gō tə́ anī Moijə əda ngār gə̄ kə́ dɔ gír ɓē yā ngán Israel gə̄ tə́ na:
Yá̰á̰ ń Kɔ́ɔ̄ɓē mēr̄ rāā ní n toó: 3Ré de kə́ dəngam ənī ndūn yā ndējə̄ Kɔ́ɔ̄ɓē yá̰a̰, aké ənī ndūn yā mbātə́ yá̰á̰ kə́rēý anī, ni a lōō gíŕ yá̰á̰ ń ni-ənī ndūn yā rāā tə́ ní alé, banī a əndā kumən gírí yā rāā kə gōó.
4Ré ngōn̄ kə́ dəyá̰ kə́ ndi ɓē bɔbə̄neé ɓáý əda rī rāā yá̰á̰ kógə̄ḿ kadə̄ Kɔ́ɔ̄ɓē, aláa ənī ndūn yā rāā, 5ba bɔbə̄n ger̄ gō ō, əda yá̰a̰ aĺ ō anī, ngōn̄ kə́ dəyá̰ ní a rāā yá̰á̰ ní. 6Ba ré bɔbə̄n mbātə́ gōn tə́ ndɔ̄ ń oōń najə̄ yá̰á̰ ń a sāā rāā tə́ ō, ndūn ń ənī yā kə rāań tə́ ō ní anī, ngōn̄ kə́ dəyá̰ ní a lōō gírí. Kɔ́ɔ̄ɓē a mā̰ȳ rɔ̄n dɔn tə́ tɔdɔ̄ bɔbə̄n ɔgə̄n rāā yá̰á̰ ní.
7Ré ngōn̄ kə́ dəyá̰ əda rī rāā yá̰á̰ kógə̄ḿ, aláa ənī ndūn yā rāā yá̰á̰ kógə̄ḿ kadə̄ Kɔ́ɔ̄ɓē kanjə̄ gír̄ yá̰a̰ ō, reē taā ngaa dɔ tə́ ō, 8ba ngaan oō ō mbātə́ gōn tə́ aĺ ō anī, dəyá̰ ní a rāā yá̰á̰ ní. 9Ba ré ngaan mbātə́ gōn tə́ ndɔ̄ ń oōń tə́ ní anī, ndūn ń ənī ní a tél yā to karī ō, Kɔ́ɔ̄ɓē a mā̰ȳ rɔ̄n dɔn tə́ ō.
10Ré dəyá̰ kə́ ngaa koy, aláa dəyá̰ kə́ ngaan mbātə́n ənī ndūn adə̄ Kɔ́ɔ̄ɓē anī, i gáŕ kadə̄ a rāā yá̰á̰ ń ni-ənī ndūn dɔ tə́ ní.
11Ba ré dəyá̰ ndi i jī ngaan tə́ n ədań rī rāā yá̰a̰, aláa ənīń ndūn yā rāā yá̰a̰ 12ba ngaan oō ō, mbātə́ gōn tə́ aĺ anī, i gáŕ kadə̄ a rāā yá̰á̰ ní. 13Ba ré ngaan mbātə́ gōn tə́ ndɔ̄ nəkɔ́ ń oōń tə́ noō anī, kəda rī rāā yá̰a̰ gə̄gē, kənī ndū gə̄gē a tél a ton̄ i yá̰á̰ kə́ karī tə́. Kɔ́ɔ̄ɓē a mā̰ȳ rɔ̄n dɔn tə́ tām̄ i ngaan n ɔgə̄n rāā yá̰á̰ ní. 14Adə̄ ré dəyá̰ əda rī ndi ɓō tām̄ yā Nə́ɓā tə́, aláa ənī ndūn yā ndi ɓō anī i ngaan n a adə̄n ta róbə aláa a ogə̄n ní. 15Ba ré ngaan oō ba ədan yá̰a̰ aĺ bátə́ loo tīī anī ndigə i gōn tə́. Adə̄ kəda rī rāā yá̰a̰ gə̄gē kənī ndū gə̄gē ní a ton̄ gotoó, tām̄ ndɔ̄ ń ngaan oōń tə́ ní ədan yá̰a̰ alé. 16Ba ré teē kə ndɔ̄ kə́ rangaá pá tá ngaan mbātə́ gōn tə́ anī, najə̄ yā dəyá̰ ní a tél yā kəsō i dɔ ngaan nəkɔ́ tə́.
17 Ndū najə̄ kə́ dɔ kənī ndū yā dəyá̰ kə́ taā ngaa tə́ ō, yā ngōn̄ kə́ dəyá̰ kə́ taā ngaa aĺ ɓáý kə́ ndi ɓē bɔbə̄neé tə́ ō ń Kɔ́ɔ̄ɓē adə̄ Moijə ní n noó.
Currently Selected:
TƏ́DA 30: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
