TƏ́DA 12

Kɔ́ɔ̄ɓē ənī mo̰y bānjə̄ dɔ Miriam tə́

1Moijə taā dəyá̰ Kus#12.1 Dəyá̰ Kus ní kə gōó ɓáa i dəyá̰ kə́ Etiopi. Banī majanī i dəyá̰ kə́ Madian. kógə̄ḿ. Anī Miriam nin̄ kə Aaro̰ tāmə̄n̄ seneé najə̄ dəyá̰ ń ni-taā ní. 2Nin̄ ədan̄ na:

Kɔ́ɔ̄ɓē ɔr̄ najə̄ i kə Moijə ngóy a? Ni-ɔr̄ najə̄ sejí ō aĺ a? Kɔ́ɔ̄ɓē oō najə̄ ní. 3Tá Moijə i de kə́ ndigə tél kə́ rɔ̄neé kə nang tə́ ngá̰ý. De kə́ dɔ nang tə́ kə́ ndigə tél kə rɔ̄neé kə̄ nang tə́ kə́ asə seneé gətóo. 4Kə̄ ta jī tə́ noō Kɔ́ɔ̄ɓē ɓāŕ Moijə ō, Aaro̰ ō, Miriam ō, ba ədadə́ na:

Sḭḭ̄ kɔ́ gə̄ mətá mbak āwī kújə kəngə naā tə́.

Anī nin̄ mətá mbak aw̄n̄. 5Kɔ́ɔ̄ɓē risə dan kil̄ man̄ tə́ reē ra ta kújə ní tə́, ba ɓāŕ Aaro̰ nin̄ kə Miriam. Anī nin̄ jōó mbak ndɔ́tə̄n̄ kə̄ kété. 6Kɔ́ɔ̄ɓē ədadə́ na:

Najə̄ ń m-ā m-ə́dásí toō ōōī majə. Ré de kə́ nge koō ta yā Nə́ɓā i dansí tə́ anī, mā Kɔ́ɔ̄ɓē m-ā m-ɔ́jən rɔ̄ḿ kadə̄ gerə̄m̄ i kə ta kūl̄ ndɔ̄bə̄ kə́ m-ā m̄-ndɔ̄bə̄n ō, kə najə̄ kə́ m-ā m-ɔ̄r̄ seneé kem nī tə́ ō. 7Banī nge kəla yāḿ Moijə ń i nge ka̰a̰ gō kósə de gə̄ yāḿ gə̄ malang kə gōó majə ní, m̄-rāā seneé i beé alé. 8M-ɔ̄r̄ najə̄ seneé kadə̄ unjə̄ aĺ alé. Tají sɔɔ̄ ta naā ō, m̄-rāā kadə̄ ni a̰a̰m̄ ō, adə̄ ni-a̰a̰ yá̰á̰ ń i Kɔ́ɔ̄ɓē ní. Ba i tām̄ rí tə́ á sḭḭ̄ ī-ɓōlíī alé ba ī-tāmī kə nge kəla yāḿ Moijə ní?

9Kɔ́ɔ̄ɓē rāā wōn̄g dɔdə́ tə́ ngá̰ý ba ɔtə aw̄. 10Dan ń kil̄ man̄ ḭḭ kɔ̄ɔ́ dɔ kújə kənge naā tə́ anī, bānjə̄ kə́ ndaa tītə̄ búy kūbə̄#12.10 Búy kūbə̄: Á̰a̰ī Teē 4.6 beé teē rɔ̄ Miriam tə́. Aaro̰ mbel a̰a̰n anī rɔ̄n i bānjə̄ malang. 11Aaro̰ əda Moijə na:

Sarya əhɔjí, banī m̄-rāāī ɓɔ́, ī-lōō kəndají najə̄ yá̰á̰ kə́ majaĺ ń jə-rāā loo ɓodə tə́ ní. 12Ādə̄ Miriam to tītə̄ ngáń kə́ koy kem kó̰ó̰də́ gə̄ tə́ ń ta teēdə́ kə̄ ndágá anī núsə dā̰də́ i kə́ nujə kɔ̄ɔ́ noō alé.

13Tā anī Moijə rāā Kɔ́ɔ̄ɓē ɓɔ́ əda na:

Nə́ɓā, m̄-rāāī ɓɔ́, ájən. 14Anī Kɔ́ɔ̄ɓē əda Moijə:

Ré bɔbə̄n tībə̄ hōr̄ kumən tə́ anī rɔ̄n a sɔlə̄n bátə́ ndɔ̄ sīrí aĺ a? I beé ní ɔ̄rīin̄ kɔ̄ɔ́ kem ɓēé, ādə̄ ndi gidə ɓē tə́ ndágá ndɔ̄ sīrí. Gō tə́ anī ə́ya̰in̄ ādī tél reē gogə́ kem ɓēé. 15Tə̄ɓān̄ Miriam kɔ̄ɔ́ kem ɓēé adə̄ ndi i gidə ɓē tə́ ndágá ndɔ̄ sīrí, banī ngán Israel gə̄ ndɔ́tə̄n̄ loo alé bátə́ kadə̄ tél reēń gogə́ kem ɓēé. 16Loo ń noō tə́ tā anī nin̄ ndɔ́tə̄n̄ Haserot aw̄ ndin̄ ɓē kem dəla loo kə́ Paran tə́.

Currently Selected:

TƏ́DA 12: SARDC

Highlight

Copy

Compare