NEHEMI 4

1Dan ń Sanbalat ō Tobia ō Arabə gə̄ ō Amon gə̄ ō Asdod gə̄ ō oōn̄ kadə̄ kəla kəndā ndogə̄ mbal̄ kə́ Jerusalem a aw̄ i kum kə̄ kété ō, kum loo kə́ ra wōȳ kə́ tū tə́ gə̄ i kə́ kutə̄ kɔ̄ɔ́ ō anī, wōn̄g rāādə́ ngá̰ý. 2Nin̄ oōn̄ naā yā reē malang gidə kógə̄ḿ yā kənī ɓē kə́ Jerusalem rɔ̄ɔ̄ ō, yā nujə loo kemeé ō. 3Tā anī jə-ndɔ̄ȳ Nə́ɓā yājí ba j-əndā de gə̄ kadə̄ ngɔ̄mə̄n̄ loo kadaá ō ndɔ̄ɔ́ ō najə̄ yādə́ tə́. 4Ɓá tā ba de kə́ dəngam kə́ Juda tə́ gə̄ ədan̄ na:

Tɔ́gə́ ngé rāā kəla gə̄ təgā kɔ̄ɔ́!

Loo kə́ nujə gə̄ i ngá̰ý!

J-asiī kəndā ndogə̄ mbal̄ tɔ̄l̄ alé!

5Madə̄ ba̰ā̰jí gə̄ ədan̄ yādə́ na: A gerə̄n̄ gōjí aĺ ō, a a̰a̰n̄jí aĺ ō, bátə́ kadə̄ j-ugīīneé dandə́ tə́. Loo ń noō tə́ j-a jə-tɔ̄līdə́ ō, j-a jə-bāāī ta kəla ō.

Nehemi adə̄ ngé rāā kəla gə̄ yá̰a̰ rɔ̄ɔ̄ gə̄

6 Jipə gə̄ ń ndin̄ ɓē kadə madə̄ ba̰ā̰jí gə̄ tə́ ngɔr ní reē tāān̄jí kə̄ nja naā tə́ najə̄ yá̰á̰ kə́ to yo ń a ngḛy jí nang tə́ ní, ədan̄ na: Loo malang ń sḭḭ̄ āwī tū tə́ ba ī-tél ī-reēī ní, nin̄ teēn̄ kə̄ ta gə̄ tə́ yā reē rɔ̄ jí! Loo ń noō tə́ m-á̰a̰ ku loo gə̄ gidə ndogə̄ mbal̄ tə́ ndágá. 7Anī m̄-tə́ndā ngé rɔ̄ɔ̄ gə̄ tū tə́ kə gō gír kaa yādə́ gēé. Yá̰a̰ rɔ̄ɔ̄ yādə́ gə̄ i kaskar ō nənga ō ga̰ gərā ō. 8M-á̰a̰ loo oy anī m-ə́da de kə́ bo gə̄ ō, ngé rāā sarya gə̄ ō, gotə ngán Israel gə̄ ō na:

Ī-lōōī ɓōĺdə́! Ādə̄ əga kemsí dɔ Kɔ́ɔ̄ɓē ń i de kə́ bo ō, to ɓōĺ ngá̰ý ní ō tə́, ba ī-rɔ̄ɔ̄ī tām̄ yā ngákó̰ó̰sí gə̄ tə́ ō, ngáńsí gə̄ tə́ ō nə̄yá̰sí gə̄ tə́ ō, kújə yāsí gə̄ tə́ ō.

9Dan ń madə̄ ba̰ā̰jí gə̄ oōn̄ kadə̄ tāān̄jí kɔ̄ɔ́ anī, nin̄ gerə̄n̄ kadə̄ Nə́ɓā nujə yá̰á̰ ń nin̄ númə̄n̄ yā rāā ní kɔ̄ɔ́. Loo ń noō tə́ jḭḭ malang jə-tél j-aw̄ ta kəla kəndā ndogə̄ mbal̄ tə́ gogə́. De gə̄ kógə̄ḿ kógə̄ḿ ran̄ ta kəla yādə́ gə̄ tə́. 10Banī əla gír ndɔ̄ ń noō tə́ ní i núsə de gə̄ ngóy n a rāān̄ kəla. Gotə gə̄ ran̄ i kə yá̰a̰ rɔ̄ɔ̄ gēé. Ran̄ i kə nənga gə̄, kə der gə̄, kə ga̰ gərā gə̄, kə kūbə̄ gində̄ gə̄. Ngār gə̄ əndān̄ kumdə́ gír Juda gə̄ tə́ malang. 11Ngé kəndā ndogə̄ mbal̄ gə̄ ō, ngé kətō yá̰a̰ gə̄ ō, ngé kɔy yá̰a̰ kə̄ dɔɔ́ gə̄ ō, a rāān̄ kəla i kə jīdə́ kə́ kógə̄ḿ, banī jīdə́ kə́rēý a əhɔ i yá̰a̰ rɔ̄ɔ̄. 12Ngé kəndā ndogə̄ mbal̄ gə̄ ran̄ i kə kaskar gēé ɓōdə̄də́ tə́ n a əndān̄neé ndogə̄ mbal̄ ní. Nge kɔ̄ŕ tōw̄ ra i kadəḿ mā tə́. 13M-ə́da de kə́ bo gə̄ ō, ngé rāā sarya gə̄ ō, gotə ngán Israel gə̄ ō na: Kəla i ngá̰ý ō, laa ngá̰ý ō, jə-tə̄ndā jə-tḭ̄ḭ̄ naā kə̄ loo gə̄ tə́ dɔ ndogə̄ mbal̄ tə́ ō, adə̄ jḭḭ̄ i sa̰y rɔ̄ naā tə́ ní, 14ré ōōī kōō tōw̄ kə́ ɓār̄ anī, ɔ́siī dɔsí naā tə́ rɔ̄ḿ tə́. Nə́ɓā yājí a rɔ̄ɔ̄ tām̄ yājí tə́.

15Dan ń jə-ra j-a jə-rāā kəla ní, deē yājí kə́rēý gə̄ ran̄ i kə nənga gēé jīdə́ tə́. J-əla gír rāā kəla i dan ń ta gír loo unjə̄ wororo ní. Jə-rāā bátə́ kadə̄ tə́yō̰ gə̄ ndangən̄ ngururu dɔjí tə́. 16I dan ngeé ń noō tə́ n m-ə́dań ngán Israel gə̄ najə̄ ń toō ní. M-ə́dádə́ na: Sḭḭ̄ kógə̄ḿ kógə̄ḿ ní, ndɔ̄ɔ anī ī-toī Jerusalem kə ngé kəla yāsí gēé. Ndɔ̄ɔ́ anī ādə̄ j-əndāī ngé ngɔ̄m̄ loo gə̄ dɔjí tə́, banī kadaá anī jə-rāāī kəla malang. 17Mə̄kɔ́ ō, ngééḿ gə̄ ō, madə̄ kəlaḿ gə̄ ō, ngé ngɔ̄m̄ loo gə̄ ń a unən̄ gōḿ ō ní, de kə́ danjí tə́ kə́ ɔr̄ kūbə̄ rɔ̄n tə́ gətóo. Jḭḭ kógə̄ḿ kógə̄ḿ malang ní, yá̰a̰ rɔ̄ɔ̄ yājí gə̄ i jījí kə́ ko̰ó̰ tə́.

Currently Selected:

NEHEMI 4: SARDC

Highlight

Copy

Compare