NEHEMI 10
10
Ngán Israel gə̄ ənīn̄ ndūdə́ yā rāā yá̰á̰ ń ndū najə̄ əda ní
1J-ənī ndūjí kə ngangá ngá̰ý sɔɔ̄ń yá̰a̰ malang ń teē dɔjí tə́ ní. Ba ndūjí ń j-ənī ní jə-ndang kem makətūbūú ō, j-əndā tambō̰o̰ dɔ tə́ ō. Ngār yājí gə̄ ō ngán Lebi yājí gə̄ ō, ngé tun̄ yá̰a̰ yājí gə̄ ō, əndān̄ jīdə́ gír makətūbə̄ ní tə́. 2De gə̄ ń əndān̄ jīdə́ gírí ní rīdə́ n toó:
Nehemi kə́ ngōn̄ Hakalia, ni i nge ko̰o̰ ɓē. Sidekia, 3Seraya, Ajaria, Irmeya, 4Pasəhur, Amaria, Malkia 5Hatus, Sebania, Maluk, 6Harim, Meremot, Obadia, 7Daniel, Gineton, Baruk, 8Mesulam, Abia, Miamin, 9Maajia, Bilgai, Semaya. Nin̄ malang i ngé tun̄ yá̰a̰ gə̄.
10 Ngán Lebi gə̄ i Yesua kə́ ngōn̄ Ajania ō, Binui ń i de kə́ gír kaa yā Henadad tə́ ní ō, Kadəmiel ō, 11ngákó̰ó̰də́ gə̄ i Sebania ō Hodia ō Kelita ō Pelaya ō Hanan ō 12Mika ō Rehob ō Hasabia ō 13Jakur ō Serebia ō Sebania ō 14Hodia ō Bani ō Beninu ō.
15Ngār gə̄ yā ngán Israel gə̄ i Paros ō Pahat Moab ō Elam ō Jatu ō Bani ō 16Buni ō Asgad ō Bebai ō 17Adonia ō Bigwai ō Adin ō 18Ater ō Hijəkia ō Ajur ō 19Hodia ō Hasum ō Besai ō 20Harip ō Anatot ō Nebai ō 21Magəpias ō Mesulam ō Hejir ō 22Mesejabel ō Sadok ō Yadua ō 23Pelatia ō Hanan ō Hanania ō 24Ose ō Hanania ō Hasub ō 25Halohes ō Pila ō Sobek ō 26Rehum ō Hasabəna ō Maseya ō 27Ahia ō Hanan ō Anan ō 28Maluk ō Harim ō Baana ō.
29Gotə ngán Israel gə̄ ō, ngé tun̄ yá̰a̰ gə̄ ō, ngán Lebi gə̄ ō, ngé ngɔ̄m̄ ta róbə́ kújə gə̄ ō, gōsə̄ pā gə̄ ō, ngé kəla gə̄ ō, de gə̄ malang ń ɔrə̄n̄ rɔ̄də́ kɔ̄ɔ́ rɔ̄ de gə̄ kə́ dɔ ɓē kə́ rang gə̄ tə́ yā kunəń gō ndū najə̄ yā Nə́ɓā ní ō, nə̄yá̰də́ gə̄ ō, ngáńdə́ kə́ dəngam gə̄ ō, kə́ dəyá̰ gə̄ ō ń asən̄ ger̄ kum najə̄ ní ō, 30ɓoon̄ rɔ̄də́ tū yā ngákó̰ó̰də́ gə̄ ń i de kə́ bo gə̄ ní tə́. Nin̄ túbən̄ njadə́ ənīn̄neé ndūdə́ yā rāā yá̰á̰ ń ndū najə̄ yā Nə́ɓā əda ní ō, gō míndə gə̄ malang ń Kɔ́ɔ̄ɓē ń i kɔ́ɔ̄jí ní əda kadə̄ yā rāā ní ō, yā rāań yá̰a̰ kə g ō, jī bēl̄ loo rāā yá̰a̰ yān gə̄ ō. Nə́ɓā adə̄ ndū najə̄ ní i kə ta kūl̄ Moijə kə́ nge kəla yān.
31Adə̄ de gə̄ ń ndin̄ kem ɓēé ní j-adə̄də́ ngáńjí kə́ dəyá̰ gə̄ aĺ ō, j-a jə-taā ngáńdə́ kə́ dəyá̰ gə̄ yā kadə̄ ngáńjí kə́ dəngam gə̄ aĺ ō. 32Ré reēn̄ kə kōō gémēé, aláa yá̰a̰ gātə̄ kə́ rang gēé yā kigəń ndɔ̄ sabat yā Nə́ɓā tə́, aláa ndɔ̄ rāā nāā tə́ anī, j-a jə-mangdə́ yá̰á̰ kógə̄ḿ alé. Kə dɔ ɓāl̄ kə́ sīrí gə̄ malang ní, j-a j-əya̰ dɔ nang kadə̄ taā koō ō, j-a jə-lōō gír dəje kə̄rā gə̄ tə́ ō. 33J-əndā ndū najə̄ kógə̄ḿ dɔjí jḭḭ kɔ́ gə̄ tə́ kadə̄ j-adə̄ kəlōo gə̄ sɔ́ kə dɔ ɓāl̄ gēé yā rāań kəla kə́ kem kújə yā Nə́ɓā yājí tə́. 34Adə̄ i yā sāań mápá kə́ yā ndējə̄ Nə́ɓā ō, yá̰a̰ tun̄ kə́ yā róō horoó gə̄ ō, yá̰a̰ ndējə̄ kə́ rāā kə kōó gə̄ kə́ yā ndējə̄ kə dɔ ndɔ̄ gə̄ ō, yá̰a̰ tun̄ gə̄ kə́ ndɔ̄ sabat tə́ ō, ndɔ̄ teē nāā tə́ ō, ndɔ̄ rāā nāā gə̄ tə́ ō, yá̰á̰ kə́ kɔr̄ kam̄ tayā tām̄ yā Nə́ɓā tə́ gə̄ ō, yá̰a̰ tun̄ gə̄ kə́ yā kutəń dɔ majaĺ gə̄ yā ngán Israel gə̄ ō, yā rāań kəla malang kə́ tū kújə yā Nə́ɓā yājí tə́ ō. 35Jḭḭ ngé tun̄ yá̰a̰ gə̄ ō, ngán Lebi gə̄ ō, de kə́ karī gə̄ ō, jə-túgə̄ wə̄lā j-adə̄ń gír kojə yājí gə̄ kum m bang gə̄ kə́ yā reēń kə kīr̄í yā ndējə̄ kem kújə yā Nə́ɓā yājí tə́. A reēn̄neé i kə dɔ ɓāl̄ gə̄ yā tə́ngań yá̰á̰ kə́ tun̄ dɔ loo tun̄ yá̰a̰ yā Kɔ́ɔ̄ɓē Nə́ɓā yājí tə́ tītə̄ ń ndū najə̄ ədań ní. 36Kan̄ yá̰á̰ kə́ dɔ nang yājí tə́ kə́ ta kəga dɔ ō, kan̄ kāgə̄ yājí kə́ ta kəga dɔ gə̄ ō ní, i gáŕ kadə̄ jə-reēń kem kújə yā Kɔ́ɔ̄ɓē tə́ kə dɔ ɓāl̄ gə̄. 37I gáŕ kadə̄ jə-reē kə ngáń hágə́jí kə́ dəngam gə̄ ō, hágə́ yá̰a̰ kul̄ yājí gə̄ ō, kem kújə yā Kɔ́ɔ̄ɓē tə́ tītə̄ ń ndangən̄neé kem makətūbə̄ ndū najə̄ tə́ ní. Hágə man̄g yājí gə̄ ō, hágə batə̄ yājí gə̄ ō, hágə bə̄yā̰ yājí gə̄ ō ní, j-a jə-reēń kem kújə yā Nə́ɓā yājí tə́ yā kadə̄ ngé tun̄ yá̰a̰ gə̄ ń a rāān̄ kəla kem kújə yā Nə́ɓā yājí tə́ ní. 38J-a jə-kēgə̄ ndujə̄ yājí kə́ majə yā kadə̄də́ ō, j-a j-adə̄də́ yá̰a̰ ndējə̄ yājí kə́ kəla kə̄ dɔɔ́ gə̄ ō, kan̄ kāgə̄ yājí gə̄ ō, kasə nduú yājí kə́ kijə ō, yibə̄ ō. J-a j-aw̄ń kem kújə́ kə́ kadə kújə yā Nə́ɓā yājí tə́ yā kadə̄də́. Kan̄ yá̰a̰ gə̄ ń teēn̄ dɔ nang yājí tə́ ní i kutə anī, j-a j-ɔr̄ kógə̄ḿ danaá yā kadə̄ ngán Lebi gə̄ ō. Nin̄ kɔ́ gə̄ ngán Lebi gə̄ kə deē dɔdə́ a aw̄n̄ kə̄ kem ɓē gə̄ malang ń j-a jə-rāā kəla kemeé tə́ ní yā kaw̄ taā dɔ yá̰á̰ kə́ kɔr̄ kógə̄ḿ dan kə́ kutə gə̄ tə́. 39Dan ń a taān̄ anī nge tun̄ yá̰á̰ kógə̄ḿ kə́ ngōn̄ Aaro̰ a ra loo taān tə́ sedə́ ō, ré dɔ yá̰á̰ kə́ kɔr̄ kógə̄ḿ dan kə́ kutə gə̄ tə́ ní ugə̄ kutə anī, nin̄ a ɔrə̄n̄ kógə̄ḿ tām̄ yā kújə yā Nə́ɓā yājí tə́ ō, ba a aw̄n̄neé i kem kújə ngɔ̄m̄ yá̰a̰ kənge tə́. 40Tām̄ ngán Israel gə̄ ō, ngán Lebi gə̄ ō, a reēn̄ kə kōō gémē kə́ ndējə̄ gə̄ ō, kasə nduú kə́ guḿ ō, yibə̄ ō, a ɓōkə́n̄ i kem kújə ngɔ̄m̄ yá̰a̰ kənge ní tə́. Yá̰a̰ rāā kəla gə̄ kə́ kem loo kə́ táĺ tə́ a ton̄ i kem kújə́ ní tə́ ō, ngé tun̄ yá̰a̰ gə̄ ń a rāān̄ kəla ní ō, ngé ngɔ̄m̄ ta róbə́ kújə gə̄ ō, gōsə̄ pā gə̄ ō ní a ran̄ i kemeé.
I tītə̄ ń noō n j-a j-əya̰ń kújə yā Nə́ɓā yājí kɔ̄ɔ́ aĺ ní.
Currently Selected:
NEHEMI 10: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
