MARK 11

Jeju udə kem ɓē kə́ Jerusalem tə́

(Á̰a̰ī Mat 21.1-9; Luk 19.28-40; Ja̰a̰ 12.12-15)

1Dan ń Jeju nin̄ kə ngé ndóō yá̰a̰ yān gēé əndān̄ dɔ ɓē kə́ Jerusalem, adə̄ nin̄ i ngɔr kə̄ kadə ɓē kə́ Betpaje tə́ o, Betani tə́ ō, kum kə̄ mbal̄ kāgə̄ olibə gə̄ tə́ ní anī, 2Jeju ɔr̄ ngé ndóō yá̰a̰ yān gə̄ jōó, əladə́ ba ədadə́ na:

Āwī kem ɓē ń ra nosí tə́ noō. Dan ń ā údiī kə̄ kemeé anī, ā ə́ngeī ngōn̄ kərō kə́ deē kógə̄ḿ al̄ gidən tə́ aĺ ɓáý, kə́ do̰ō̰nən̄ ta bēl̄ tə́. Ī-tútəniī, ba ī-reēī seneé. 3Ba ré deē kógə̄ḿ a dəjesí na ké ī-rāāī yá̰á̰ ń noō i tām̄ rí tə́ wa anī, ə́daī na i Kɔ́ɔ̄ɓē n a sāā ní, ba kə̄ ta jī tə́ noō a tél yā kadə̄sí gogə́.

4Ngé ndóō yá̰a̰ yān gə̄ aw̄n̄, əngen̄ ngōn̄ kə̄rō kə́ do̰ō̰nən̄ ta ndogə̄ tə́ ndágá kadə róbə́ tə́, ba nin̄-tútənən̄. 5De kə́rēý gə̄ dan ngé gə̄ ń ran̄ noó tə́ ní dəjen̄də́ na ké a rāān̄ i rí wa. Ké a tútən̄ ngōn̄ kərō i tām̄ rí tə́ wa.

6Ba nin̄-ədan̄də́ tītə̄ ń Jeju tāańdə́ ní. Anī nin̄-əya̰n̄də́ adə̄ aw̄n̄neé. 7Nin̄-reēn̄ kə ngōn̄ kərō ní, adə̄n̄ Jeju, tə́nīn̄ kūbə̄ yādə́ gə̄ gidən tə́, ba Jeju al̄ ndi dɔ tə́. 8De gə̄ ngá̰ý selə́n̄ kūbə̄ tapīi gə̄ kum róbó kadə̄ ni-njə̄rā dɔ tə́ ō, de kə́rēý gə̄ gángə̄n̄ ta jī kāgə̄ kə̄ kem ndɔr̄ gə̄ tə́ ɓōkə́n̄ kum róbó ō. 9Ngé gə̄ ń njə̄rān̄ kété no Jeju tə́ ō, ngé gə̄ ń unən̄ gōn ō ní, əgan̄ kɔŕ ədan̄ na:

Kɔsə gɔn i yā Nə́ɓā! Ādə̄ Nə́ɓā rāā majə kə nge ń reē kə rī Kɔ́ɔ̄ɓēé ní! 10Ādə̄ Nə́ɓā rāā majə kə ɓē ko̰o̰ ń a reē tə́ ní, adə̄ i kə ɓē ko̰o̰ yā kaají Dabid tə́! Kɔsə gɔn i yā Nə́ɓā dɔ rā̰ tə́!

11Dan ń Jeju ugə̄ Jerusalem anī, ni udə kem kújə yā Kɔ́ɔ̄ɓē tə́. Ba loo ń ni-a̰a̰ yá̰a̰ malang ń gīr̄ gidən ní oy anī, nin̄ kə ngé kə́ kutə gidə i jōó gēé teē aw̄n̄ Betani, tɔdɔ̄ loo tíbə kɔ̄ɔ́.

Jeju ndɔ̄ĺ kāgə̄ kótə̄

(Á̰a̰ī Mat 21.18-19)

12Teē kə ndɔ̄ kə́ noō, dan ń nin̄-teēn̄ kɔ̄ɔ́ kem ɓē kə́ Betani tə́ anī, ɓō rāā Jeju. 13Ni-a̰a̰ kāgə̄ kótə̄ kə́ kə mbīn gēé kə̄ sa̰y anī, aw̄ yā ka̰ā̰ ké n-ənge kanən kə́rēý tū tə́ wa. Banī loo ń ni-ugə rɔ̄ tə́ anī, ənge i mbīn gə̄ ngóy, tɔdɔ̄ i nāā kan̄ kótə̄ aĺ ɓáý. 14Anī ni-un najə̄ əda na:

Deē a əsa kaní to̰ aĺ bátə́!

Ba ngé ndóō yá̰a̰ yān gə̄ oōn̄ najə̄ ní.

Jeju udə kem kújə yā Kɔ́ɔ̄ɓē tə́

(Á̰a̰ī Mat 21.12-17; Luk 19.45-48; Ja̰a̰ 2.13-22)

15Nin̄-ugə̄n̄ Jerusalem anī Jeju udə kem kújə yā Kɔ́ɔ̄ɓē tə́, ba tə̄ɓā ngé gə̄ ń a igən̄ yá̰a̰ ō, a mangən̄ yá̰a̰ ō, kem kújə yā Kɔ́ɔ̄ɓē tə́ ní kɔ̄ɔ́. Kāgə̄ tə́ndā yá̰a̰ gə̄ yā ngé mbél̄ nar gə̄ ō, kāgə̄ ndi gə̄ yā ngé kigə dér gə̄ ō ní, ni-mbə́rē tə́nī kɔ̄ɔ́. 16Ni əya̰ deē kógə̄ḿ adə̄ ətō yá̰a̰ mānəń kem kújə yā Kɔ́ɔ̄ɓē tə́ alé. 17Anī ni-ndóōdə́ yá̰a̰, ədadə́ na:

I kə́ ndang kem makətūbə̄ tə́ na: A ɓārə́n̄ kújə yāḿ na i kújə ndɔ̄ȳ kə́ tām̄ yā nápar de gə̄ tə́ malang aĺ a? Ba sḭḭ̄ ī-rāāī adə̄ tél i bəlo mbal̄ ɓɔ̄ɔ̄ rɔ̄ yā ngé gān̄g róbə gə̄#11.17 K. 17: Á̰a̰ī Ij 56.7; Jer 7.11; Mat 21.13!

18Loo ń ngol gə̄ kə́ dɔ ngé tun̄ yá̰a̰ gə̄ tə́ kə ngé ndóō de gə̄ ndū najə̄ gə̄ oōn̄ beé ní anī, sāān̄ loo tɔ̄lən kɔ̄ɔ́, tɔdɔ̄ nin̄-ɓōĺnən̄, tām̄ yá̰a̰ gə̄ ń ni ndóō kósə de gə̄ ní ɔr kumdə́ ngá̰ý.

19Dan ń loo tíbə anī, Jeju nin̄ kə ngé ndóō yá̰a̰ yān gə̄ teēn̄ kɔ̄ɔ́ kem ɓēé.

Jeju ō, kāgə̄ kótə̄ kə́ tutə kɔ̄ɔ́ ō

(Á̰a̰ī Mat 21.20-22)

20Dəloí loo ń nin̄ a mānə̄n̄ anī, ngé ndóō yá̰a̰ yān gə̄ a̰ā̰n̄ kāgə̄ kótə̄ ní tutə dɔn tə́ dɔɔ́ bátə́ ugə̄ ngəran tə́ nang tə́. 21Əga kem Piyer dɔ najə̄ ń Jeju əda tə́ ní anī, ni-ədan na:

Ngoljí á̰a̰ kāgə̄ kótə̄ ń ī-təmbē ní tutə kɔ̄ɔ́!

22Anī Jeju tél ədadə́ na:

Ī-taāī kem Nə́ɓā. 23Ādə̄ m-ə́dásí najə̄ kə́ bo ngá̰ý, ré deē kógə̄ḿ əda mbal̄ ń toō na kə ɔtə kɔ̄ɔ́ kə aw̄ kum bā bo tə́, ba ré kemən tɔ́sən aĺ ō, ni-taā kem mámák kadə̄ yá̰á̰ ń ni-əda ní a rāā yá̰a̰ ō anī, a reē tām̄ yān tə́. 24I tām̄ ń toō tə́ n m-ə́dásí na yá̰a̰ malang ń ī-dəjeī kə ndɔ̄yɔ̄ɔ́ ní, ī-taāī kem kadə̄ ə́ngeī yá̰á̰ ní kɔ̄ɔ́ anī a reē tām̄ yāsí tə́. 25Ba loo ń ā ī-raī dɔɔ́ loo ndɔ̄ȳ tə́ ní, ré najə̄ kógə̄ḿ i mbo̰ō̰sí tə́ kə deē kógə̄ḿ anī, ī-mā̰yī rɔ̄sí dɔ tə́, yā kadə̄ Bɔbə̄sí kə́ dɔ rā̰ tə́ mā̰yń rɔ̄n dɔ majaĺ yāsí tə́ ō. 26Banī ré ī-mā̰yī rɔ̄sí dɔn tə́ aĺ anī, Bɔbə̄sí kə́ dɔ rā̰ tə́ a mā̰ȳ rɔ̄n dɔ majaĺ yāsí gə̄ tə́ aĺ ō#11.26 K. 26 gətóo kem makətūbə̄ yā Mark kə́rēý gə̄ kə́ kété tə́ kə ta Gərek..

I náā n adə̄ Jeju tɔ́gə́ á rāań yá̰a̰ gə̄ ń toō ní

(Á̰a̰ī Mat 21.23-27; Luk 20.1-8)

27Jeju nin̄ kə ngé ndóō yá̰a̰ yān gə̄ tél aw̄n̄ Jerusalem gogə́. Ba dan ń Jeju a njə̄rā kem kújə yā Kɔ́ɔ̄ɓē tə́ anī, ngol gə̄ kə́ dɔ ngé tun̄ yá̰a̰ gə̄ tə́ ō, ngé ndóō de gə̄ ndū najə̄ gə̄ ō, 28kum kɔɔ̄ gə̄ ō, reēn̄ rɔ̄n tə́, ba dəjenən̄ na ké i náā n adə̄n tɔ́gə wa, ké tɔ́gə́ ń a rāań yá̰a̰ gə̄ ní ké teēń i rá wa.

29Ba Jeju tél ədadə́ na:

M-ā m̄-dəjesí i najə̄ kógə̄ḿ beē ngóy, ré ī-tūrmī tə́ anī, m-ā m-ə́dásí loo ń m̄-teē kə tɔ́gə́ń toō tū tə́ á m̄-rāań yá̰a̰ gə̄ ń toō ní ō. 30Batém yā Ja̰a̰ ní ḭḭ i rɔ̄ Nə́ɓā tə́ aké i rɔ̄ de gə̄ tə́ ḿ? Ī-tél ī-tūrmī tə́.

31Nin̄-nējə̄n̄ naā najə̄ beé dɔ dáńdə́ tə́ ba ədan̄ na:

Ń toō ní, ré j-ədaī na ḭḭ i rɔ̄ Nə́ɓā tə́ anī, ni a tél yā dəjejí na ké i tām̄ rí tə́ á jə-taāī kem Ja̰a̰ aĺ wa. 32Ba kə j-ədaī na ḭḭ i rɔ̄ de gə̄ tə́ a?

Nin̄-ɓōlə́n̄ kósə de gə̄, tɔdɔ̄ nin̄ malang gírə̄n̄ kadə̄ Ja̰a̰ i nge koō ta kógə̄ḿ.

33Anī tél ədan̄ Jeju na n-gerə̄n̄ alé.

Banī Jeju tél ədadə́ na:

Ɓáa mā m-ā m-ə́dásí loo ń m̄-teē kə tɔ́gə́ ń toō tū tə́ á m̄-rāań yá̰a̰ gə̄ ń toō ní aĺ ō.

Currently Selected:

MARK 11: SARDC

Highlight

Copy

Compare