MATIYE 19
19
Najə̄ yā Jeju kə́ dɔ mbātə́ naā yā ngé taā naā gə̄ tə́
(Á̰a̰ī Mark 10.1-12)
1Dan ń Jeju ɔjə de gə̄ yá̰a̰ gə̄ ń noō oy ní anī, ndɔ́tə̄ Galile, ba aw̄ gō nang kə́ Jude tə́ gidə bā Jurdḛ tə́. 2Kósə de gə̄ ngá̰ý aw̄n̄ gōn tə́ ō, ni-rāā adə̄ rɔ̄ ngé mo̰y yādə́ gə̄ ngáā loo ngeé ń noō tə́ ō. 3Parijiyḛ kə́rēý gə̄ reēn̄ rɔ̄n tə́, ba dəjenən̄ najə̄ yā nāanneé ədan̄ na:
Ndū najə̄ yājí adə̄ de kə́ dəngam ta róbə mbātə́ nə̄yá̰n tām̄ hálən kə́rēý tə́ a?
4Anī Jeju tél ədadə́ na ké najə̄ ń ndangən̄ kem makətūbə̄ yā Nə́ɓā tə́ ní ké nin̄-tə́dan̄ aĺ wa. Ndangən̄ na ta kəla gíŕ tə́ ní, nge rāā de gə̄ 5rāādə́ i dəngam ō, dəyá̰ ō, ba əda na:
I tām̄ najə̄ ń noō tə́ n de kə́ dəngam a əya̰ bɔbə̄n ō kó̰o̰n ō,
ba a ndin̄ naā tə́ kə nə̄yá̰neé, kadə̄ nin̄ jōó télən̄ de kə́ kógə̄ḿ beé gə̄ ní.
6Loo ń noō tə́ nin̄ i jōó to̰ alé, banī nin̄ i de kə́ kógə̄ḿ beé. Ní, yá̰á̰ ń Nə́ɓā ɓoo naā tə́ ní kadə̄ deē gān̄gdə́ naā tə́ alé.
7Anī Parijiyḛ gə̄ tél ədan̄ na:
Ba i tām̄ rí tə́ á Moijə əda kadə̄ ré deē mbātə́ dəyá̰ ɓáa kə kɔ́ɔ̄ kə adə̄n makətūbə̄ mbātə́ naā ní?
8Anī Jeju tél ədadə́ na:
Moijə adə̄sí ta róbə mbātə́ nə̄yá̰sí gə̄ i tām̄ kem ngan̄g yāsí tə́. Banī ta kəla gíŕ tə́ ní, i tītə̄ n noō alé. 9Ní, ādə̄ m-ə́dásí: Deē ń mbātə́ nə̄yá̰n ba taāń dəyá̰ kə́ rang kanjə̄ kadə̄ nə̄yá̰n ní sāā i dəngam loo kaya tə́ anī, ni-rāȳ i mbée.
10Ngé ndóō yá̰a̰ yān gə̄ ədanən̄ na:
Ré najə̄ kə́ dɔ dəngam tə́ tām̄ yā dəyá̰ tə́ to i tītə̄ ń noō anī, taā dəyá̰ aĺ i só tə́.
11Anī Jeju tél ədadə́ na de gə̄ malang gerə̄n̄ kum najə̄ ń toō alé, ba i de gə̄ ń Nə́ɓā rāā sedə́ adə̄ gerə̄n̄ kum ní tá ngóy. 12Taā dəyá̰ alé yā de kə́rēý gə̄ teēn̄neé i kem kó̰ó̰də́ gə̄ tə́. Kə́ madə̄ gə̄ ń i áji mbang gə̄#19.12 Áji mbang i de kə́ ɔrə̄n̄ gumə̄n kɔ̄ɔ́. ní, i de gə̄ n rāān̄də́ á asən̄ taā dəyá̰ aĺ ní. Kə́ madə̄ gə̄ ɓáý to̰ taān̄ dəyá̰ alé i kə gō kem ndigə yādə́ nin̄ kɔ́ gə̄, tām̄ yā Ɓē ko̰o̰ kə́ dɔ rā̰ tə́ tə́. Deē ń asə ger̄ kum najə̄ ń noō anī ādə̄ kɔ́ɔ̄ ger̄ kum.
Jeju tɔ́r̄ tan dɔ ngán kə́ dūú gə̄ tə́
(Á̰a̰ī Mark 10.13-16; Luk 18.15-17)
13Anī de gə̄ reēn̄ kə ngáń kə́ dūú gēé rɔ̄n tə́ kadə̄ əndā jīn dɔdə́ tə́ ō, ndɔ̄ȳ tām̄ yādə́ tə́ ō, banī ngé ndóō yá̰a̰ yān gə̄ ndángə̄n̄də́. 14Anī Jeju ədadə́ na kə əya̰n̄ ngáń kə́ dūú gə̄ kadə̄ reēn̄ kə̄ rɔ̄n tə́, ba kə lōōn̄ kɔ́gə̄də́ reē, tɔdɔ̄ i de kə́ tītə̄də́ beē gə̄ n Ɓē ko̰o̰ kə́ dɔ rā̰ tə́ i tām̄ yādə́ tə́ ní. 15Gō tə́ anī ni-əndā jīn dɔdə́ tə́ ba ɔtə loo ní tə́ kɔ̄ɔ́.
Balsáá kógə̄ḿ kə́ ənge yá̰á̰ ngá̰ý
(Á̰a̰ī Mark 10.17-31; Luk 18.18-30)
16Deē kógə̄ḿ reē rɔ̄ Jeju tə́, ba ədan na:
Ngoləḿ, yá̰á̰ kə́ majə ń kadə̄ m̄-rāā tá m-ə́ngeń ndi kə kumuú kə́ ngándáńg ní i rí?
17Anī Jeju ədan na:
Ī-dəjem̄ najə̄ kə́ dɔ yá̰á̰ kə́ majə tə́ i tām̄ rí tə́? De kə́ majə i kógə̄ḿ beē ngóy. Adə̄ ré ī-gḛy kudə tū ndi kə kumuú tə́ ɓáa, ī-rāā gō míndə gə̄.
18Ni-tél dəjen na ké i ni kə́ rá gə̄ wa.
Jeju tūr̄ ədan na:
Ā ī-tɔ̄l̄ deē alé, ā ī-rāȳ alé, ā ī-ɓogə alé,
ā əda najə̄ kə́ sor̄ dɔ deē tə́ alé, ā ī-ɓōĺ ndíl bɔbí ō kó̰ó̰í ō,
19ī-tár deē madí tītə̄ dā̰ rɔ̄í īkɔ́ beē.
20Balsáá ní əda Jeju na yá̰a̰ gə̄ ń noō malang ní na n-rāā kɔ̄ɔ́ ɓá, ní ké i rí n na̰y ɓáý wa.
21Anī Jeju tél ədan na:
Ré ī-gḛy kadə̄ ḭ̄ i de kə́ majə ɔtə̄ kə taá ɓáa, āw̄ ígə́ yá̰a̰ kənge yāí gə̄ malang ba ādə̄ ngé ndoō gə̄ narən. Loo ń noō tə́ ā ə́ngé yá̰á̰ ngá̰ý dɔ rā̰ tə́. Gō tə́ anī, ī-reē un gōḿ.
22Dan ń balsáá ní oō najə̄ ní anī, ɔtə aw̄ kɔ̄ɔ́ kə wōngōó, tɔdɔ̄ ni i de kə yá̰a̰ kənge yān i ngá̰ý.
23Anī Jeju əda ngé ndóō yá̰a̰ yān gə̄ na:
Ādə̄ m-ə́dásí najə̄ kə́ bo ngá̰ý, kudə kem Ɓē ko̰o̰ kə́ dɔ rā̰ tə́ i yá̰á̰ kə́ ngan̄g ngá̰ý tām̄ yā de kə́ ənge yá̰á̰ ngá̰ý tə́. 24Ādə̄ m-ə́dásí najə̄ kə́ bo ngá̰ý kə́rēý ɓáý to̰: Kadə̄ jámbal mān̄ kum bəlo líbə́ri tə́ ní, i yá̰á̰ kə́ ngan̄g ɓá tā, ba kadə̄ de kə́ ənge yá̰á̰ ngá̰ý udə kem Ɓē ko̰o̰ yā Nə́ɓā tə́ ní, i yá̰á̰ kə́ ngan̄g tɔȳn.
25Najə̄ ní ɔr kum ngé ndóō yá̰a̰ yān gə̄ ngá̰ý, adə̄ ədan̄ na:
Ba ré i beé anī, i náā n asə kadə̄ ajənən̄ ní?
26Jeju əndā kumən dɔdə́ tə́ a̰a̰də́ ba ədadə́ na:
A dum̄ de gə̄, banī yá̰á̰ kə́ dum̄ Nə́ɓā gətóo.
27Anī Piyer un najə̄ ɔr̄, əda Jeju na:
Jḭḭ ń j-əya̰ yá̰a̰ malang kɔ̄ɔ́, ba jə-reē j-un gōí ní, yājí a to i ba̰ý?
28Jeju tél ədadə́ na:
Ādə̄ m-ə́dásí najə̄ kə́ bo ngá̰ý, dan ń yá̰a̰ gə̄ malang a télən̄ kə́ kijə á Ngōn̄ Deē a ndi dɔ kōr kāgə̄ mbang yān kə́ to kɔsə gɔn tə́ anī, sḭḭ̄ gə̄ ń úniī gōḿ ní, a ī-ndiī dɔ kōr kāgə̄ mbang kə́ kutə gidə i jōó gə̄ tə́ yā gāngəń sarya dɔ gír ɓē kə́ kutə gidə i jōó gə̄ yā ngán Israel gə̄ tə́. 29Tá deē ń a əya̰ kújə yān gə̄, aláa ngákó̰o̰n kə́ dəngam gə̄, aláa kə́ dəyá̰ gə̄, aláa bɔbə̄n, aláa kó̰o̰n, aláa ngánən gə̄, aláa ndɔr̄ yān gə̄ kɔ̄ɔ́ najə̄ yāḿ mā tə́ ní, kɔ́ɔ̄ a ənge tɔȳ ni ń noó nja ɓú ō, a ənge ndi kə kumuú kə́ ta ngóyn a gətóo ō. 30Banī ngá̰ý gə̄ dan ngé kə́ kété gə̄ tə́ a télən̄ ngé kə́ gogə́ gə̄ ō, ngá̰ý gə̄ dan ngé kə́ gogə́ gə̄ tə́ a télən̄ ngé kə́ kété gə̄ ō.
Currently Selected:
MATIYE 19: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.