LUK 6
6
Jeju ō ndɔ̄ Sabat ō
(Á̰a̰ī Mat 12.1-8; Mark 2.23-28)
1Jeju a mān̄ kem ndɔr̄ kōō gémē gə̄ tə́ ndɔ̄ sabat tə́ anī, ngé ndóō yá̰a̰ yān gə̄ gángə̄n̄ dɔ kōō gə̄ ba tóng a əsan̄. 2Loo ń noō tə́ Parijiyḛ kə́rēý gə̄ ədan̄ na:
Yá̰á̰ ń ndū najə̄ ɔgə̄ rāā ndɔ̄ sabat tə́ ní sḭḭ̄ ī-rāāī i tām̄ rí tə́?
3Jeju tūr̄ ədadə́ na:
Yá̰á̰ ń Dabid rāā nin̄ kə madə̄n gēé dan ń ɓō rāānneé tə́ ní sḭḭ̄ ī-tə́daī kem makətūbə̄ tə́ aĺ a? 4Ni udə kújə yā Nə́ɓā tə́, ba mápá kə́ ndējə̄ gə̄ ń ndū najə̄ ɔgə̄ de gə̄ malang kəsa ba i ngé tun̄ yá̰a̰ gə̄ ngóy n asən̄ kəsa ní, ni-ɔy əsa ō, adə̄ madə̄n gə̄ tə́ ō.
5Jeju ədadə́ ɓáý to̰ na:
Ngōn̄ deē i kɔ́ɔ̄ ndɔ̄ sabat.
Jeju rāā adə̄ jī deē kógə̄ḿ kə́ oy tél majə gogə́
(Á̰a̰ī Mat 12.9-14; Mark 3.1-6)
6Ndɔ̄ sabat kə́ rang tə́ anī Jeju udə kújə́ kán̄ naā tə́ a ndóō de gə̄ yá̰a̰. Deē kógə̄ḿ kə́ jī ko̰n tutə njururu ndi dan de gə̄ tə́ kem kújə́ kán̄ naā ní tə́. 7Ngé ngé ndóō de gə̄ ndū najə̄ gə̄ ō, Parijiyḛ gə̄ ō, ndi a umə̄n̄ Jeju sḛḛ, sāān̄ ka̰ā̰ ké Jeju a rāā kadə̄ rɔ̄ deē kógə̄ḿ a ngáā ndɔ̄ sabat tə́ wa, yā kadə̄ kə n-əngen̄neé kum najə̄ kə́ yā sekə́nəń. 8Banī Jeju ger̄ gír̄ yādə́, adə̄ ni-əda de kə́ nge jīn oy ní na:
Ḭ́ḭ ī-ra dan de gə̄ tə́ loo ń noō tə́.
Deē ní ḭḭ ra dɔɔ́. 9Anī Jeju ədadə́ na:
Yá̰á̰ ń ndū najə̄ adə̄ deē ta róbə rāān ndɔ̄ sabat tə́ ní i rí? Adə̄n i ta róbə rāā yá̰á̰ kə́ majə aké i rāā yá̰á̰ kə́ majaĺ? I ta róbə kajə deē aké i nujə deē?
10Ɔr̄ kumən a̰a̰də́ beé malang, ba gō tə́ anī əda dəngam ní na kə sə́ra jīn. Dəngam ní sə́ra jīn anī, tél to majə gogə́. 11Banī wōn̄g rāādə́ ngá̰ý adə̄ nējə̄n̄ naā najə̄ dɔ yá̰á̰ kə́ yā rāā kə Jejuú tə́.
Jeju gə̄rā ngámbang kəla kə́ kutə gidə i jōó gə̄
(Á̰a̰ī Mat 10.1-4; Mark 3.13-19)
12Dan ngeé ń noō tə́ ní Jeju aw̄ ndɔ̄yɔ̄ɔ́ dɔ mbalá. Ni ndɔ̄ȳ Nə́ɓā bátə́ loo tīī dɔn tə́. 13Dan ń loo tīī anī ni-ɓāŕ ngé ndóō yá̰a̰ yān gə̄ ba gə̄rā de gə̄ kutə gidə i jōó dandə́ tə́. Ni-əndā rīdə́ na i ngámbang kəla gə̄. 14De gə̄ ní i Simo̰ ń ni a tūr̄ rīn na i Piyer ní ō, ngōkó̰o̰n Andəre ō, Jakə ō, Ja̰a̰ ō, Pilipə ō, Bartelemi ō, 15Matiye ō, Toma ō, Jakə kə́ ngōn̄ Alpe ō, Simo̰ ń a ɓāŕnən̄ na i nge rɔ̄ɔ̄ dɔ ɓē yā Jipə gə̄ tə́ ní ō, 16Judas kə́ ngōn̄ Jakə ō, Judas Iskariot ń tél nge kəla Jeju jī de gə̄ ní ō.
Jeju ɔjə kósə de gə̄ yá̰a̰ ō, rāā adə̄ ngé mo̰y gə̄ əngen̄ rɔ̄ ngáā ō
(Á̰a̰ī Mat 4.23-25)
17Jeju risə sedə́ kɔ̄ɔ́ dɔ mbalá ba reē dəba loo kógə̄ḿ kə́ dūnə̄n asə naā tə́. Kósə́ ngé ndóō yá̰a̰ yān gə̄ ō, kósə́ ngán Israel gə̄ kə́ ḭḭn̄ nang kə́ Jude tə́ ō, Jerusalem ō, kem ɓē gə̄ kə́ kadə bā bo tə́ adə̄ i Tir ō Sidon ō i loo ngeé ń noō tə́. 18Nin̄-reēn̄ i koō najə̄ yān tə́ ō, i kadə̄ ni-rāā adə̄ rɔ̄də́ ngáā ō. Ni-rāā adə̄ ngé gə̄ ń ndíĺ kə́ yḛr gə̄ a rāān̄ kumdə́ ndoō tə́ əngen̄ rɔ̄ ngáā. 19Adə̄ kósə de gə̄ malang a sāān̄ i kɔdə rɔ̄n kə jīdə́, tɔdɔ̄ tɔ́gə́ kógə̄ḿ teē rɔ̄n tə́ ō, rɔ̄ de gə̄ malang ngáā ō.
Ndi majə ō, ndi majaĺ ō
(Á̰a̰ī Mat 5.1-12)
20Loo ń noō tə́ Jeju ɔr̄ dɔn dɔɔ́ a̰a̰ ngé ndóō yá̰a̰ yān gə̄ ba əda na:
Rɔ̄nel̄ i yāsí sḭḭ̄ ngé ndoō gə̄, tɔdɔ̄ Ɓē ko̰o̰ yā Nə́ɓā i yāsí!
21Rɔ̄nel̄ i yāsí sḭḭ̄ ń ɓō rāāsí ngɔlaā ní, tɔdɔ̄ ā ī-ndānī!
Rɔ̄nel̄ i yāsí sḭḭ̄ ń ā i-nōōī naā ngɔlaā ní, tɔdɔ̄ ā ī-kəgōī naā!
22Sḭḭ̄ i kə rɔ̄nelēé dan ń de gə̄ a imə̄n̄sí ō, a tə̄ɓān̄sí kɔ̄ɔ́ dɔ dáńdə́ tə́ ō, a tájə̄n̄sí ō, a ədan̄ najə̄ kə́ majaĺ dɔsí tə́ ō najə̄ yā Ngōn̄ deē tə́ ní. 23Ndɔ̄ ń noō tə́ ī-rāāī rɔ̄nel̄ ō, ī-tḭ́ḭ̄ bal walya ō, tɔdɔ̄ yá̰a̰ kəndā nja yāsí i yá̰á̰ kə́ ngá̰ý dɔ rā̰ tə́. Tɔdɔ̄ i loo rāā nəkɔ́ ń kaadə́ gə̄ rāān̄neé kə ngé koō ta gēé ní n noó. 24Ba rɔ̄ tō ndoō i yāsí sḭḭ̄ ngé kənge yá̰a̰ gə̄,
tɔdɔ̄ sḭḭ̄ ə́ngeī kem sɔl̄ yāsí kɔ̄ɔ́ ɓá!
25Rɔ̄ ndoō i yāsí sḭḭ̄ ń ī-ndānī ngɔlaā ní,
tɔdɔ̄ ɓō a rāāsí!
Rɔ̄ ndoō i yāsí sḭḭ̄ ń ā ə̄gōī ngɔlaā ní,
tɔdɔ̄ ā ə́hɔī ndoō ō, ā ī-nōōī ō.
26Rɔ̄ ndoō i yāsí dan ń de gə̄ malang a ədan̄ najə̄ yāsí kə́ majə ní, tɔdɔ̄ i loo rāā nəkɔ́ ń kaadə́ gə̄ rāān̄neé kə ngé koō ta kə́ rɔ̄kum aĺ gə̄ ní n noó.
Najə̄ kə́ dɔ tár madə̄ ba̰ā̰ gə̄ tə́
(Á̰a̰ī Mat 5.38-48; 7.12a)
27Ba sḭḭ̄ ń ī-ndi ā ōōī najə̄ taḿ tə́ toō ādə̄ m-ə́dásí, ī-táriī madə̄ ba̰ā̰sí gə̄ ō, ngé gə̄ ń imə̄n̄sí ní ī-rāāī majə sedə́ ō, 28ī-rāāī Nə́ɓā ɓɔ́ kadə̄ rāā majə kə ngé ndɔ̄ĺsí gə̄ ō, ī-ndɔ̄yī tām̄ yā ngé tétə̄ najə̄ dɔsí tə́ gə̄ ō. 29Deē ənda mbɔ́rí kə́ dām̄ kógə̄ḿ tə́ anī, ī-tūr̄ kə́ dām̄ kə́ noó tə́ ādə̄n ɓáý to̰. Deē taā kūbə̄ yāí kə́ dɔ madə̄ gə̄ tə́ anī, ī-lōō kɔgə̄n nge kə́ kemeé ń ā ə́lá pá tə́ ā ə́la madə̄ dɔ tə́ ní. 30Náā nəkɔ́ ń dəjeī yá̰a̰ anī adə̄n. Deē taā yá̰a̰ yāí anī ī-lōō sāā nja. 31Yá̰á̰ ń ī-gḛyiī kadə̄ de gə̄ rāān̄ sesí ní ī-rāāī sedə́ tītə̄ ń noō ō.
32Ré i ngé táŕsí gə̄ ngóy n ā ī-táriīdə́ anī, i rí kə́ ngá̰ý n ā ə́ngeī gírí ní? Tɔdɔ̄ ngé rāā majaĺ gə̄ a tárən̄ ngé táŕdə́ gə̄ ō. 33Ré i ngé rāā majə sesí gə̄ ngóy n ā ī-rāāī majə sedə́ anī, i rí kə́ ngá̰ý n ā ə́ngeī gírí ní? Ngé rāā majaĺ gə̄ gə̄gē a rāān̄ i tītə̄ ń noō ō. 34Ré i ngé gə̄ ń ə̄ndāī kemsí dɔdə́ tə́ kadə̄ a əgān̄sí kə̄rā ní tá ngóy n ā ādīdə́ yá̰a̰ loo tə̄nā tə́ anī i rí kə́ ngá̰ý n ā ə́ngeī gírí ní? Tɔdɔ̄ ngé rāā majaĺ gə̄ a adə̄n̄ ngé rāā majaĺ madə̄də́ gə̄ yá̰a̰ loo tə̄nā tə́ kadə̄ tél əgān̄də́ kə̄rā ō. 35Ba sḭḭ̄, ī-táriī madə̄ ba̰ā̰sí gə̄ ō, ī-rāāī majə kə de gēé ō, ādī yá̰a̰ loo tə̄nā tə́ kanjə̄ kəndā kemsí dɔ tél kənge yá̰á̰ ní gogə́ ō. Loo ń noō tə́ ā ə́ngeī yá̰a̰ kəndā nja kə́ ngá̰ý ō, ā ī-téliī ngáń Nə́ɓā kə́ dɔɔ́ gə̄ ō. Tɔdɔ̄ ni-rāā kem majə kə ngé ger̄ kem majə yān aĺ gə̄ ō, kə ngé kem ndul gə̄ ō.
36Ādī kumsí o̰o̰sí kə de gēé tītə̄ ń kum Bɔbə̄sí a o̰o̰nəń kə de gēé ní ō.
Ī-lōōī rāā madə̄sí gə̄ kə najá
(Á̰a̰ī Mat 7.1-5)
37Ī-gāngī sarya dɔ deē tə́ alé, anī a gāngə̄n̄ sarya dɔsí tə́ aĺ ō. Ī-gāngī dɔ madə̄sí gə̄ anī a gāngə̄n̄ dɔsí ō. 38Ādī madə̄sí gə̄ yá̰á̰ ń ndoōn rāādə́ ní anī Nə́ɓā a adə̄sí yá̰á̰ ń ndoōn rāāsí ní, a ɔjən̄ kadə̄ majə ō, a əren̄ ō, a yéȳn̄ ō, a rə̄ɓā ō, pá tá a ɓōkə́n̄ ta kūbə̄ yāsí tə́. Tɔdɔ̄ a mbɔ̄jə́n̄ yá̰a̰ yā kadə̄sí i kə kār̄ tɔ̄jə̄ yá̰á̰ ń sḭḭ̄ ī-mbɔ̄jíīneé yá̰a̰ ādī madə̄sí gə̄ ní.
39Jeju ɔjədə́ kūjə́ najə̄ kógə̄ḿ ɓáý to̰ əda na: De kə́ nge kum tɔ̄ɔ̄ a ndɔ́r̄ nge kum tɔ̄ɔ̄ madə̄n ta róbə a? Nin̄ jōó mbak a əsōn̄ bəloó aĺ a? 40De kə́ nge ndóō yá̰a̰ tɔȳ nge kɔjən yá̰a̰ alé. Banī de kə́ nge ndóō yá̰á̰ ń ndóōnən̄ yá̰a̰ majə ní, a to tītə̄ nge kɔjən yá̰a̰ beé.
41Á̰a̰ buĺ mu kə́ kum madí tə́, banī á̰a̰ kāgə̄ kə́ bo ń kumií īkɔ́ tə́ ní aĺ ní i najə̄ rí tə́? 42Ḭ̄ ń á̰a̰ kāgə̄ kə́ bo kə́ kumií īkɔ́ tə́ aĺ ní, loo kəda madí na kə ra ɓam kadə̄ ún buĺ mu kumən tə́ kɔ̄ɔ́ i ba̰ý? Ḭ̄ de kə́ ngé gól̄ loo, ún kāgə̄ kə́ kumií tə́ kɔ̄ɔ́ pá tá á̰a̰ loo unjə̄ anī, ún buĺ mu kə́ kum madí tə́ kɔ̄ɔ́ ɓáý!
Kāgə̄ ō kanə̄n ō
(Á̰a̰ī Mat 7.16-20; 12.33-35)
43Kāgə̄ kə́ majə a a̰a̰n̄ kan̄ kə́ majaĺ aĺ ō, kāgə̄ kə́ majaĺ a a̰a̰n̄ kan̄ kə́ majə aĺ ō. 44A gerə̄n̄ kāgə̄ i kanə̄n tə́. Deē a sāā kan̄ kótə̄ dɔ kōn̄ ngɔkərɔ tə́ aĺ ō, deē a sāā kan̄ kāgə̄ nduú dɔ kōn̄ ngar̄ tə́ aĺ ō. 45Deē ń i de kə́ majə ní, ngarān̄g kemən i loo ngɔ̄m̄ yá̰á̰ kə́ majə gə̄, adə̄ a teē kə yá̰á̰ kə́ majə gə̄ tū tə́ ō, deē ń i de kə́ majaĺ ní, ngarān̄g kemən i loo ngɔ̄m̄ yá̰á̰ kə́ majaĺ gə̄, adə̄ ni a teē kə yá̰á̰ kə́ majaĺ gēé tū tə́ ō. Tɔdɔ̄ ta deē əda i yá̰á̰ gə̄ ń rosən̄ kemən ba rə̄ɓā kə̄ ndágá ní.
Kújə́ kə́ jōó gə̄
(Á̰a̰ī Mat 7.24-27)
46I tām̄ rí tə́ á ī-ɓāŕmī Kɔ́ɔ̄ɓē, Kɔ́ɔ̄ɓē, ba ré m-ə́dásí yá̰a̰ anī ī-rāāī aĺ ní? 47Deē ń reē rɔ̄ḿ tə́ ba oō najə̄ yāḿ ō, rāā yá̰a̰ kə gō najə̄ yāḿ ō ní, ādə̄ m-ɔ̄jə̄sí deē ń ni-tītə̄n ní. 48Ni to i tītə̄ de kə́ nge rāā kújə. Deē ndēr̄ bəlo adə̄ rúu ba əndā gíŕ kújə dɔ mbal̄ tə́ beē. Dan ń man̄ taā loo ba un nja kújə́ ní anī kújə́ ní yéȳ alé, tɔdɔ̄ rāān̄ kújə́ ní adə̄ ngan̄g majə. 49Banī deē ń oō najə̄ yāḿ ba rāā yá̰a̰ kə gō najə̄ yāḿ aĺ ní, to i tītə̄ de kə́ əndā kújə yān i dɔɔ́ karī kanjə̄ ndēr̄ bəlo tá kəndāń. Dan ń man̄ taā loo ba un nja kújə́ ní anī kújə́ ní tetə ənda nang kə̄ ta jī tə́ beē ō, nujə sák sák kɔ̄ɔ́ ō.
Currently Selected:
LUK 6: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.