LEBI GƏ̄ 13

Mo̰y gə̄ kə́ ndāŕ deē tə́

1Kɔ́ɔ̄ɓē əda Moijə nin̄ kə Aaro̰ na:

2Ré rɔ̄ deē agə̄, aláa mo̰y rāā ndārə̄n aláa yá̰a̰ teē tū tə́ ndə́lē wor wor, adə̄ yá̰á̰ ní rāā rɔ̄n i mo̰y kə́ rɔ̄ deē tə́ kə́ tītə̄ mo̰y bānjə̄ anī a reēn̄ seneé rɔ̄ Aaro̰ nge tun̄ yá̰á̰ tə́ aláa rɔ̄ ngōn̄ Aaro̰ kógə̄ḿ tə́. 3Nge tun̄ yá̰a̰ a əndā ma̰ȳ mo̰y kə́ rɔ̄ deē ní tə́. Ré bḭḭ̄ kə́ tū mo̰y ní tə́ tetə ndaa ō, loo kə́ mo̰y ní rúu kum kə̄ kemeé ō, anī i mo̰y bānjə̄. Ré nge tun̄ yá̰a̰ əndā ma̰ȳ nge mo̰y ní oy anī, a ədan wáńg na ni i de kə́ yḛr. 4Ré mo̰y ní ndə́lē ba ndaa put put ō, rúu kum kə́ kemeé aĺ ō, bḭḭ̄ kə́ tū tə́ tetə ndaa aĺ ō anī, nge tun̄ yá̰a̰ a ɔr̄ deē ní yā kəndān kə kérneé ndɔ̄ sīrí. 5Kə ndɔ̄ kə́ nge ko̰ sīrí anī nge tun̄ yá̰a̰ a əndā ma̰ȳ mo̰y ní gogə́ rang. Ré mo̰y ní ra gotoó ba aw̄ kum kə̄ kété aĺ anī, nge tun̄ yá̰a̰ a tél yā kəndā nge mo̰y ní kə kérneé ndɔ̄ sīrí ɓáý. 6Kə ndɔ̄ kə́ nge ko̰ sīrí anī, nge tun̄ yá̰a̰ a əndā ma̰ȳ mo̰y ní gogə́ ɓáý. Ré loo kə́ mo̰y ní ndə́lē to̰ aĺ ō, mo̰y ní aw̄ kə̄ kété to̰ aĺ ō anī, nge tun̄ yá̰a̰ a əda deē ní wáńg na ni i de kə́ unjə̄ njáý njáý, tām̄ yá̰á̰ ní i rɔ̄ de kə́ ḭḭ kɔ̄ɔ́. Deē ní a tə́go i kūbə̄ yān gə̄ ngóy ō, gō tə́ anī ni i de kə́ majaĺ tákə̄n aĺ ō. 7Ba ré gō kə́ gogə́ tə́ rɔ̄ deē ní ḭḭ kɔ̄ɔ́ kum kə̄ kété anī, nge mo̰y ní a tél yā kaw̄ gogə́ rɔ̄ nge tun̄ yá̰á̰ tə́. 8Ré nge tun̄ yá̰a̰ əndā ma̰ȳ a̰a̰ kadə̄ mo̰y ní aw̄ kum kə̄ kété anī, a əda nge mo̰y ní wáńg na ni de kə́ yḛr tɔdɔ̄ mo̰y ní i mo̰y bānjə̄.

9Ré mo̰y kə́ tītə̄ mo̰y bānjə̄ rāā deē anī, a reēń seneé rɔ̄ nge tun̄ yá̰á̰ tə́. 10Nge tun̄ yá̰a̰ a əndā ma̰ȳ mo̰y ní. Ré rɔ̄ deē ní agə̄ ba ndaa ō, bḭḭ̄ kə́ tū tə́ tetə ndaa ō, dā̰n sə̄lā mba kə̄ ndágá ō anī, 11i kɔ́ kə̄ bānjə̄. Nge tun̄ yá̰a̰ a əda deē ní wáńg na ni i de kə́ yḛr. A ɔr̄ deē ní yā kəndān kə kérneé to̰ alé, tɔdɔ̄ yḛr ní to i kə̄ ndágá. 12Ba ré yá̰a̰ teē rɔ̄ deē ní taā rɔ̄n malang, əla gír jam dɔn tə́ bátə́ ugə̄ń da njan tə́ anī, 13nge tun̄ yá̰a̰ a əndā ma̰ȳ yā ka̰a̰ ba a əda deē ní wáńg na ni i de kə́ unjə̄ njáý njáý, tɔdɔ̄ mo̰y ní tetə ndaa kɔ̄ɔ́ malang.

14Ba ndɔ̄ ń dā̰n a sə̄lā mbo̰ kə̄ ndágá tə́ ní, ni i de kə́ yḛr. 15Nge tun̄ yá̰a̰ a əndā ma̰ȳ loo ń dā̰n sə̄lā mbo̰ kə̄ ndágá tū tə́ ní, ba a əda deē ní wáńg na ni i de kə́ yḛr. Dā̰n ń sə̄lā mbo̰ kə̄ ndágá ní i yá̰á̰ kə́ yḛr, i mo̰y bānjə̄. 16Ba ré loo ní tél tetə ndaa anī, deē ní a tél yā reē rɔ̄ nge tun̄ yá̰á̰ tə́. 17Nge tun̄ yá̰a̰ a əndā ma̰ȳn, ba ré a̰a̰ kadə̄ mo̰y ní tél tetə ndaa rɔ̄kum anī, a əda na mo̰y ní i mo̰y kə́ a tákə̄ deē kə majaĺ alé, deē ní na unjə̄ njáý njáý ō.

18Ré ngaw kə́ rɔ̄ deē kə́rēý tə́ edə̄, 19ba gotən agə̄ ba ndaa, aláa kərē suk suk anī, deē ní a reē yā kadə̄ nge tun̄ yá̰a̰ əndā ma̰ȳ. 20A əndā ma̰ȳ mo̰y ní, ba ré a̰a̰ kadə̄ loo ń adə̄ ní rúu kum kə̄ kemeé ō, bḭḭ̄ kə́ tū tə́ tetə ndaa ō anī, ni a əda nge mo̰y ní wáńg na ni i de kə́ yḛr. Tɔdɔ̄ mo̰y kə́ tītə̄ mo̰y bānjə̄ teē gotə ngaw ní tə́ ní. 21Ré nge tun̄ yá̰a̰ əndā ma̰ȳ mo̰y ní ō, a̰a̰ kadə̄ bḭḭ̄ kə́ tū tə́ i kə́ tetə ndaa aĺ ō, loo ń agə̄ ní rúu kum kə̄ kemeé aĺ ō, gotə ngaw ní ndə́lē wor wor aĺ ō anī, ni a ɔr̄ nge mo̰y ní yā kəndān kə kérneé ndɔ̄ sīrí. 22Ba ré mo̰y ní aw̄ kum kə̄ kété anī, nge tun̄ yá̰a̰ a əda nge mo̰y ní wáńg na ni i de kə́ yḛr, tɔdɔ̄ i mo̰y kə́ tītə̄ mo̰y bānjə̄. 23Ba ré mo̰y ní ra gotoó ba aw̄ kum kə́ kété aĺ anī, i tə́re ngaw, adə̄ nge tun̄ yá̰a̰ a əda deē ní wáńg na ni i de kə́ unjə̄ njáý njáý.

24Ré hor o̰o̰ deē kə́rēý ba yá̰á̰ kə́ ndə́lē wor wor ba kərē suk suk, aláa ndaa gotə do hor ní tə́ anī, nge tun̄ yá̰a̰ a əndā ma̰ȳ. 25Ré bḭḭ̄ kə́ loo ní tə́ tetə ndaa ō, yá̰á̰ ń teē ní rúu kum kə̄ kemeé ō anī, i bānjə̄ n teē gotə do hor ní tə́. Adə̄ nge tun̄ yá̰a̰ a əda deē ní wáńg na ni i de kə́ yḛr tɔdɔ̄ i mo̰y kə́ tītə̄ mo̰y bānjə̄. 26Ba ré nge tun̄ yá̰a̰ əndā ma̰ȳ a̰a̰ kadə̄ bḭḭ̄ kə́ tū yá̰á̰ ń teē tə́ ní tetə ndaa aĺ ō, yá̰á̰ ní rúu kum kə̄ kemeé aĺ ō, ndə́lē wor wor aĺ ō anī, ni a ɔr̄ deē ní yā kəndān kə kérneé ndɔ̄ sīrí. 27Kə ndɔ̄ kə́ nge ko̰ sīrí anī, a əndā ma̰ȳ gogə́ rang. Ré a̰a̰ kadə̄ mo̰y ní aw̄ kum kə̄ kété anī, a əda deē ní wáńg na ni i de kə́ yḛr tɔdɔ̄ i mo̰y kə́ tītə̄ mo̰y bānjə̄. 28Ba ré, mo̰y ní ra gotoó ba aw̄ kum kə̄ kété aĺ ō, ndə́lē wor wor aĺ ō anī, i hor ń o̰o̰ deē ní n rāā ndārə́n adə̄ agə̄ ní. Nge tun̄ yá̰a̰ a əda deē ní wáńg na ni i de kə́ unjə̄ njáý njáý, tām̄ yá̰á̰ ní tə́re dɔ hor.

29Ré yá̰á̰ kə́rēý teē rɔ̄ de kə́ dəngam tə́ aláa rɔ̄ de kə́ dəyá̰ tə́ ba i dɔn tə́, aké bəgen tə́ anī, 30nge tun̄ yá̰a̰ a əndā ma̰ȳ. Ré yá̰á̰ ní rúu kum kə̄ kemeé ō, bḭḭ̄ kə́ tū tə́ kərē suk suk ō, ndaa kok kok ō anī, ni a əda deē ní wáńg na ni i de kə́ yḛr, tām̄ yá̰á̰ ní i básḛý adə̄ i mo̰y bānjə̄ kə́ dɔ tə́, aláa kə́ təge tə́. 31Ba ré nge tun̄ yá̰a̰ əndā ma̰ȳ básḛý ní a̰a̰ kadə̄ rúu kum kə̄ kemeé aĺ ɓá tā ba bḭḭ̄ kə́ tū tə́ ndul aĺ anī, ni a ɔr̄ nge básḛý ní yā kəndān kə kérneé ndɔ̄ sīrí.

32Ré kə ndɔ̄ kə́ nge ko̰ sīrí ni-əndā ma̰ȳ ba a̰a̰ kadə̄ básḛý ní əsa kum kə̄ kété aĺ ō, bḭḭ̄ kə́ kərē suk suk gətóo kum tə́ ō, rúu kum kə̄ kemeé aĺ ō anī, 33nge mo̰y ní a dəsā dɔn, ba a dəsā loo ń básḛý i tū tə́ ní alé. Gō tə́ anī nge tun̄ yá̰a̰ a ɔr̄ nge básḛý ní yā kəndān kadə̄ ndi kə kérneé ndɔ̄ sīrí ɓáý to̰. 34Kə ndɔ̄ kə́ nge ko̰ sīrí anī, nge tun̄ yá̰a̰ a əndā ma̰ȳ básḛý ní gogə́ rang. Ré básḛý ní əsa kum kə̄ kété aĺ ō, rúu kum kə̄ kemeé aĺ ō anī, na a əda deē ní wáńg na ni de kə́ unjə̄ njáý njáý. Adə̄ deē ní a tə́go i kūbə̄ yān gə̄ ngóy, gō tə́ anī ni i de kə́ unjə̄ njáý njáý. 35Ba ré nge tun̄ yá̰a̰ əda nge básḛý ní na ni i de kə́ majaĺ tákə̄n alé, ba ré gō kə́ gogə́ tə́ básḛý ní əsa rang anī, 36nge tun̄ yá̰a̰ a tél yā kəndā ma̰ȳ. Dan ń básḛý ní əsa kɔ̄ɔ́ ɓá ní, nge tun̄ yá̰a̰ a sāā bḭḭ̄ kə́ tū tə́ kə́ kərē wa to̰ alé, tām̄ deē ní i de kə́ yḛr. 37Ba ré nge tun̄ yá̰a̰ a̰a̰ kadə̄ básḛý ní əsa kum kə̄ kété aĺ ō, bḭḭ̄ kə́ ndul əɓa kum tə́ ō anī, básḛý ní edə̄ kɔ̄ɔ́. Deē ní na majaĺ tákən alé, adə̄ nge tun̄ yá̰a̰ a ədan wáńg na ni de kə́ unjə̄ njáý njáý.

38Ré yá̰á̰ kə́ ndə́lē wor wor ō, ndō, teē rɔ̄ de kə́ dəngam tə́, aké dəyá̰ tə́ anī, 39nge tun̄ yá̰a̰ a əndā ma̰ȳ. Ré yá̰á̰ ń teē ní ndaa dogəro anī, i ndārə́n n ɔr̄ ɓáĺ kə́ ndaa karī. Deē ní i de kə́ unjə̄ njáý njáý.

40Ré nənga dɔ de kə́ dəngam tə́sō anī, ni i nge dɔ kɔr̄ adə̄ i de kə́ unjə̄ njáý njáý. 41Ré i nənga kə́ non tə́ n tə́sō adə̄ non ɔr̄mo anī, ni i de kə́ unjə̄ njáý njáý. 42Ba ré yá̰á̰ kə́ ndaa ba kərē suk suk to jam dɔn kə́ kɔr̄ tə́ aláa ta non kə́ kɔr̄ tə́ anī, i bānjə̄ n a əla gír teē jam dɔn tə́ aláa non tə́ noō. 43Nge tun̄ yá̰a̰ a əndā ma̰ȳ. Ré yá̰á̰ ń agə̄ jam dɔn tə́ aláa ta non tə́ ní ndaa ba kərē suk suk ō, to tītə̄ bānjə̄ ō anī, 44deē ní i nge bānjə̄, adə̄ i de kə́ yḛr. Nge tun̄ yá̰a̰ a ədan wáńg na ni i de kə́ yḛr tām̄ bānjə̄ əsa dɔn.

45De kə́ nge bānjə̄ a o̰ō̰ i ngísə kūbə̄#13.45 O̰ō̰ i ngísə kūbə̄: Á̰a̰ī rə́yā̰ kūbə̄ gə̄ tū «Kum Najə̄ kə́ Ngón̄g Ngón̄g gə̄» tə́. ō, a əya̰ nənga dɔn kadə̄ to gususu ō, ni a do̰ō̰ yá̰a̰ dɔ mbāýn tə́ ō, a əga kɔŕ əda na: Majaĺ tákə̄m̄, majaĺ tákə̄m̄ ō. 46Ni i de kə́ yḛr bátə́ kadə̄ bānjə̄ kə́ rɔ̄n tə́ urə̄ń. Ni a ndi i kə kérneé gidə ɓē tə́ ndágá.

Kūbə̄ kə́ əɓa mə̄rō

47Ré kūbə̄ əɓa mə̄rō, ba kūbə̄ ní i kə́ rāā kə bḭḭ̄ batāá, aké i kə lḛ́ḛ, 48ba kūbə̄ ní i kūbə̄ kə́ yā ko̰ō̰ aláa i bájo kə́ rāā kə lḛ́ḛ, aké i kə bḭḭ̄ batāá, aláa i ndāŕ n əɓa mə̄rō, aláa i yá̰á̰ kə́rēý kə́ rāā kə ndārá n əɓa mə̄rō, 49ba mə̄rō ní i kə́ ndul gusə gusə tītə̄ mbi kāgə̄, aláa i kə́ kərē suk suk tū kūbə̄ tə́, aké i tū ndāŕ tə́, aké i tū kūbə̄ ko̰ō̰ tə́, aké i tū bájo tə́, aké i tū yá̰á̰ kə́rēý kə́ rāā kə ndārá tə́ anī, i bānjə̄ kə́ tū kūbə̄ tə́, a reēn̄ kə yá̰á̰ ń əɓa mə̄rō ní kadə̄ nge tun̄ yá̰a̰ əndā ma̰ȳ. 50Nge tun̄ yá̰a̰ a əndā ma̰ȳ yá̰á̰ ń əɓa mə̄rō ní, ba gō tə́ anī a ənīn tayā kadə̄ to ndɔ̄ sīrí. 51Kə ndɔ̄ kə́ nge ko̰ sīrí anī a əndā ma̰ȳ. Ré yá̰á̰ ní əɓa mə̄rō kum kə̄ kété anī, i mə̄rō kə́ loo kɔrə̄n gətóo, adə̄ yá̰á̰ ní i kə́ yḛr. 52Nge tun̄ yá̰a̰ a ənī yá̰á̰ ní horoó kɔ̄ɔ́ kadə̄ hor o̰o̰, tɔdɔ̄ loo kɔr̄ mə̄rō kə́ tū tə́ gətóo. 53Ba ré nge tun̄ yá̰a̰ əndā ma̰ȳ yá̰á̰ ní, ba a̰a̰ kadə̄ əɓa mə̄rō kum kə̄ kété alé anī, 54ni a mēr̄ tə́gó yá̰á̰ ń əɓa mə̄rō ní. Ba gō tə́ anī a tél yā kənī yá̰á̰ ní tayā kadə̄ to ndɔ̄ sīrí ɓáý to̰. 55Ré tə́gon̄ yá̰á̰ ní oy anī, nge tun̄ yá̰a̰ a əndā ma̰ȳ. Ré ɓál mə̄rō ní to i kum gotən, aké aw̄ kum kə̄ kété aĺ gə̄gē anī, yá̰á̰ ní i kə́ yḛr. Ká ré i kemən n əɓa mə̄rō, aké i gidən n əɓa mə̄rō gə̄gē anī, ā ə̄nīī yá̰á̰ ní horoó kɔ̄ɔ́ kadə̄ hor o̰o̰. 56Ba ré tə́gon̄ yá̰á̰ ní oy ba nge tun̄ yá̰a̰ a̰a̰ kadə̄ mə̄rō kə́ tū yá̰á̰ ní tetə ndaa dogəro anī, a ɔr̄ loo ń əɓa mə̄rō ní kɔ̄ɔ́. Ré i tū ndāŕ tə́ aké i tū kūbə̄ ko̰ō̰ tə́, aké i tū bájo tə́ anī, a ɔr̄ loo ń əɓa mə̄rō ní kɔ̄ɔ́. 57Ré ní tél əɓa mə̄rō ɓáý, adə̄ i kūbə̄ ko̰ō̰, aké i bájo, aké i yá̰á̰ kə́ rāā kə ndārá anī, i yā róō yá̰á̰ ní horoó kɔ̄ɔ́.

58Ré kūbə̄ ko̰ō̰ aké bájo aké yá̰á̰ kə́ rāā kə ndārá i kə́ tə́go ba tél əɓa mə̄rō gogə́ to̰ aĺ anī, i yā téĺ tə́gó yá̰á̰ ní nja kə́ nge ko̰ jōó, gō tə́ anī yá̰á̰ ní i kə́ unjə̄ njáý njáý.

59Kūbə̄ kə́ rāā kə bḭḭ̄ batāá ō, kə lḛ́ḛ ō, kə́ əɓa mə̄rō aláa kūbə̄ ko̰ō̰ aké bájo, aké yá̰á̰ kə́ rāā kə ndārá kə́ əɓa mə̄rō ō ní, ndū najə̄ kə́ dɔdə́ tə́ n noó. I ndū najə̄ ń noō n a ɔjə kadə̄ yá̰á̰ ní i kə́ yḛr, aláa i kə́ yḛr alé ní.

Currently Selected:

LEBI GƏ̄ 13: SARDC

Highlight

Copy

Compare