LEBI GƏ̄ 10
10
Ndū najə̄ kə́ dɔ yo tə́
1Nadab ō, kə Abihu ō ń i ngán Aaro̰ gə̄ ní, ɔyn̄ yā̰l̄ hor kem ganáná, ɓōkə́n̄ kajaja kum tə́, ba aw̄nəń əndān̄ ta kum Kɔ́ɔ̄ɓē tə́. Hor kə́ karī ngeé ń əndān̄ ta kum Kɔ́ɔ̄ɓē tə́ ní i yá̰á̰ kə́ Kɔ́ɔ̄ɓē mēr̄də́ rāā alé. 2Ta anī hor teē rɔ̄ Kɔ́ɔ̄ɓē tə́ o̰o̰də́ adə̄ oyn̄ ta kum Kɔ́ɔ̄ɓē tə́. 3Moijə əda Aaro̰ na:
I yá̰á̰ ń Kɔ́ɔ̄ɓē tāādə́ dɔ tə́ kété əda na:
I kə ta kūl̄ ngé reē rɔ̄n tə́ ngɔr gə̄ n
de gə̄ a ger̄nəń kadə̄ ni i kə́ táĺ ní ō,
i nin̄ n a ɔsən̄ gɔnən ta kum ngán
Israel gə̄ tə́ malang ní ō.
Aaro̰ ndi kə tan kə́ mbóó.
4Moijə ɓāŕ Misael nin̄ kə Elisapan, ngán Ujiel ń i bɔbə̄ Aaro̰ kə́ dūú ní, ədadə́ na: Kə reē ɔyn̄ nīń ngákó̰ó̰də́ gə̄ loo kə́ táĺ tə́ kɔ̄ɔ́. Kə aw̄n̄ sedə́ sa̰y gidə ɓē tə́ ndágá. 5Nin̄ reē ɔyn̄də́ kə kūbə̄ gēé rɔ̄də́ tə́ aw̄n̄ sedə́ gidə ɓē tə́ ndágá tītə̄ ń Moijə ədań ní. 6Gō tə́ anī Moijə əda Aaro̰ nin̄ kə ngánən kə́ rang gə̄ ń i Eleajar ō, Itamar ō ní na: Kə lōōn̄ kəya̰ nənga dɔdə́ kadə̄ to gususu ō, kə lōōn̄ rə̄yā̰ kūbə̄ kə́ rɔ̄də́ tə́ ō, na sōgə́ nin̄ kɔ́ gə̄ oyn̄ ō, wōn̄g rāā Kɔ́ɔ̄ɓē kə ngán Israel gēé malang ō. Na i ngákó̰ó̰də́ gə̄ malang ń i ngán Israel gə̄ ní n na a nōōn̄ ngé gə̄ ń Kɔ́ɔ̄ɓē tɔ̄l̄də́ kə horoó ní. 7Ba nin̄ ngán Aaro̰ gə̄ na a ndɔ́tə̄n̄ loo ta kújə kənge naā tə́ alé, na sōgə́ oyn̄ tām̄ yibə̄ kə́ táĺ yā Kɔ́ɔ̄ɓē kə́ kur dɔdə́ tə́ ní na ɔr̄ kam̄də́. Aaro̰ nin̄ kə ngánən gēé rāān̄ tītə̄ ń Moijə ədańdə́ ní.
Ndū najə̄ kə́ dɔ kasə tə́
8Kɔ́ɔ̄ɓē əda Aaro̰ na: 9Ni ō, ngánən gə̄ ō, ní ré na a rāān̄ yā kaw̄ kə̄ kem kújə kənge naā tə́ anī, kə aȳn̄ kasə nduú aĺ ō, kasə kə́ rang aĺ ō, na sōgə́ óyn̄. Nge ń noō na i ndū najə̄ kə́ a to ngándáńg tām̄ yā ngáńdə́ gə̄ tə́ ō, ngán kaadə́ gə̄ tə́ ō. 10I beé tá na a ger̄nəń kɔr̄ kam̄ yá̰á̰ kə́ yā ɓōĺ gidə ō, yá̰á̰ kə́ karī ō, yá̰á̰ kə́ yḛr ō, yá̰á̰ kə́ unjə̄ njáý njáý ō. 11Na a ndóōnəń ngán Israel gə̄ yá̰a̰ gə̄ ń n-ndang kadə̄ yā rāā malang ń n-əndā ta Moijə tə́ kadə̄ ədadə́ ní ō.
Ndū najə̄ kə́ dɔ dā̰ kə́ tun̄ kadə̄ Nə́ɓā tə́
12Moijə əda Aaro̰ nin̄ kə ngánən kə́ jōó gə̄ ń nayn̄ ní na: Ndujə̄ kə́ ndējə̄ Nə́ɓā ní, ré ndégən̄ dɔ kə́ yā róō horoó kadə̄ Kɔ́ɔ̄ɓē oy anī, kə unən̄ gotə ɔ̄rən̄ mápá tə́ kanjə̄ rāā kaa mápa tū tə́, ba kə ə́san̄ kadə loo tun̄ yá̰á̰ tə́, tɔdɔ̄ i yá̰á̰ kə́ táĺ ngá̰ý, 13adə̄ na ā ə́san̄ i kem loo kə́ táĺ tə́. Gotə ndujə̄ kə́ ndégə̄ dɔ róō horoó kadə̄ Kɔ́ɔ̄ɓē ní, na i tām̄ yān ni Aaro̰ tə́ kə ngánən gēé. Na yá̰á̰ ń Kɔ́ɔ̄ɓē ədan ni n noó. 14Dā̰ gə̄ ń ngán Israel gə̄ na tunə̄n̄ tām̄ yā kem kógə̄ḿ tə́ ní, nganjədə́ ō, ɓúŕdə́ ō, kə́ ndējə̄ Kɔ́ɔ̄ɓē kə gō looneé ní na i yá̰a̰ yān kə ngánən gēé kadə̄ adə̄n̄də́. Ni ō, ngánən kə́ dəngam gə̄ ō, kə́ dəyá̰ gə̄ ō, na a əsan̄ i kem loo kə́ unjə̄ njáý njáý tə́. 15Ngán Israel gə̄ na a reēnəń i naā tə́ kə yibə̄ dā̰ kə́ yā róō horoó dɔ loo tun̄ yá̰á̰ tə́.
Ré na ndējə̄n̄ Kɔ́ɔ̄ɓē kə gō looneé#10.15 Ndējə̄n̄ Kɔ́ɔ̄ɓē kə gō looneé: Á̰a̰ī Leb 7.30 oy anī, na a télnə̄n̄ yā kadə̄n ní ō, ngánən gə̄ ō, ngándáńg kə gō ndū najə̄ Kɔ́ɔ̄ɓē.
16Moijə dəje najə̄ yā bal bə̄yā̰ kə́ yā tun̄ tām̄ majaĺ yā ngán Israel gə̄ tə́ ní ədanən̄ na i kə́ róō horoó kɔ̄ɔ́. Loo ń noō tə́ wōn̄g rāān kə Eleajar nin̄ kə Itamar, ngán Aaro̰ gə̄ ń nayn̄ ní, adə̄ ni ibədə́ əda na: 17Dā̰ bal bə̄yā̰ kə́ táĺ ngá̰ý ní ké əsan̄ kem loo kə́ táĺ tə́ aĺ i najə̄ rí tə́ wa? Kɔ́ɔ̄ɓē na adə̄də́ i yā kɔrə̄ń majaĺ gə̄ ń ngán Israel gə̄ na rāān̄ ní ō, yā rāān̄ yá̰á̰ kə́ yā kutə̄ń dɔ majaĺ yādə́ gə̄ ō ta kumən tə́. 18Mósə bal bə̄yā̰ ń i kə́ kudəń kem loo kə́ táĺ tə́ aĺ ní, na majə kadə̄ əsan̄ dā̰n i loo kə́ táĺ tə́ tītə̄ ń n-ə́dańdə́ ní. 19Aaro̰ tél əda Moijə na ndɔ̄ n ngánə́ń gə̄ na adə̄nəń Kɔ́ɔ̄ɓē yá̰a̰ tun̄ yādə́ kə́ tām̄ majaĺ tə́ ō, yá̰á̰ kə́ yā róō horoó ō ní, yá̰á̰ kə́ tōr̄ ń rāān ni Aaro̰ ní Moijə na ger̄. Ni ré n-əsa dā̰ kə́ tun̄ tām̄ yā majaĺ tə́ kem ndɔ̄ kə́ beē tə́ anī ké a nel̄ Kɔ́ɔ̄ɓē wa? 20Moijə ndigə̄ najə̄ ń Aaro̰ əda ní.
Currently Selected:
LEBI GƏ̄ 10: SARDC
Highlight
Copy
Compare
Share
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
